МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ж.Мөнхтуяа даргалж,

Шүүх хуралдааны нарийн бичгийн дарга О.Эрдэнэбат

Улсын яллагчаар Б.Сувд-Эрдэнэ

Шүүгдэгчийн өмгөөлөгч И.Отгонсүрэн

Шүүгдэгч Д.П нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 17.3 дугаар зүйлийн 1 дэх хэсэгт зааснаар яллах дүгнэлт үйлдэж, хэргийг хялбаршуулсан журмаар хянан шийдвэрлүүлэхээр ирүүлсэн Олхонууд овогтой Дамбадаржаагийн Пилжээд холбогдох эрүүгийн 2034001340275 дугаартай хэргийг 2020 оны 05 дугаар сарын 15-ны өдөр хүлээн авч, 2020 оны 05 дугаар сарын 19-ний өдөр хянан хэлэлцэв.

 

Шүүгдэгчийн биеийн байцаалт:

Монгол Улсын иргэн ....... төрсөн, 44 настай, эмэгтэй, дээд боловсролтой, эрх зүйч мэргэжилтэй, эрхэлсэн тодорхой ажилгүй, ..... оршин суух хаягтай , Ам бүл: 2 охины хамт амьдардаг, хэрэг хариуцах чадвартай гэх , урьд 2017 оны 04 дүгээр сарын 13-ны өдөр 2002 оны Эрүүгийн хуулийн тусгай ангийн 148 дүгээр зүйлийн 148.1 дэх хэсэгт заасан хэрэгт холбогдон шалгагдаж, Эрүүгийн хэрэг хянан шийдвэрлэх тухай 25.1 дүгээр зүйлийн 208 дугаар зүйлийн 208.1 дэх хэсэгт зааснаар хохирогчтой эвлэрсэн үндэслэлээр хэрэгсэхгүй болгож шийдвэрлэж байсан Д.П /РД: /

 

Холбогдсон хэргийн талаар /яллах дүгнэлтэд дурдагдсанаар/

Яллагдагч Д.П нь 2019 оны 01 дүгээр сарын 18-ны өдөр Төв аймгийн Зуунмод сумын нутагт С.Ганболдын эрх хасагдсан жолооны үнэмлэхийг сэргээж өгнө гэж хуурч, бодит байдлыг нуух замаар төөрөгдүүлд оруулж С.Ганболдоос 500.000 төгрөг залилсан гэмт хэрэгт холбогджээ.

ТОДОРХОЙЛОХ нь:

Шүүгдэгч Д.Пгийн хэргээ хүлээн мэдүүлсэн мэдүүлэг нь хохирогч, гэрч нарын мэдүүлэг болон бусад нотлох баримтуудаар давхар нотлогдон тогтоогдсон тул түүний мэдүүлгийг яллах талын нотлох баримтад тооцсон.

Шүүгдэгч Д.П нь 2019 оны 01 дүгээр сарын 18-ны өдөр Төв аймгийн Зуунмод сумын нутагт С.Ганболдын эрх хасагдсан жолооны үнэмлэхийг сэргээж өгнө гэж хуурч, бодит байдлыг нуух замаар төөрөгдүүлд оруулж С.Ганболдоос 500,000 төгрөг залилсан гэмт хэрэг үйлдсэн гэм буруутай болох нь:

• Эрүүгийн хэрэг үүсгэж яллагдагчаар татах тухай Прокурорын тогтоол /хх-ийн 19 тал/
• Шүүгдэгч Д.Пгийн мөрдөн байцаалтын шатанд хэргийг хялбаршуулсан журмаар хянан шийдвэрлүүлэх тухай бичгээр гаргасан хүсэлт /хх-ийн 40 тал/
• Хэргийг хялбаршуулсан журмаар хянан шийдвэрлэх тухай Прокурорын тогтоол /хх-ийн 53 тал/
• Хохирогч С.Ганбатын мөрдөн байцаалтын шатанд мэдүүлсэн: “би 2019 оны 01 дүгээр сарын 18-ны өдөр найз Баттүвшинд хандан би жолоочийн эрхээ хасуулчихлаа гээд хэлтэл над руу маргаа щш өглөө нь залгаад энд 3 хоногийн дотор 500.000 төгрөгөөр жолоочийн эрх сэргээж өгдөг хүн байна гэж хэлсэн. Тэгээд Баттүвшинтэй хамт Төв аймгийн Зуунмол сумын өндөр дов гэх газар цагдаагийн постны хажууд жолооны эрх сэргээж өгнө гэсэн Пэлжээ гээд автотээврийн улсын байцаагч гээд нэг эмэгтэй байсан. Тэгээд тэр эмэгтэйтээ уулзтал надад 500.000 төгрөг өгчих, би 3 хоногийн дотор сэргээгээл өгнө гээд охиныхоо 5845509497 тоот Аззаяа гэх хүний эзэмшлийн дансыг өгсөн. Тэгээд тэр үедээ салаад 3 хоногийн дотор миний жолооны үнэмлэхийг сэргээж өгөөгүй. Одоо Пэлжээ гэх хүний өөрийн өөрийн дугаар луу залгахаар үнэмлэхийг чинь сэргээж чадахаа больсон гэж хэлдэг, заримдаа би лицензийн төвийн дарга хурандаа цолтой хүнд өгсөн гэж надад хэлдэг...” гэх мэдүүлэг /хх-ийн 11 тал/
• Гэрч С.Баттүвшингийн мөрдөн байцаалтын шатанд мэдүүлсэн: “ ... Ганболд надад жолооны эрхээ хасуулчихлаа таньж мэддэг сэргээдэг хүн байна уу гэж асуусан тэгэхээр нь би авто тээвэрт ажилладаг Пэлжээ гээд хүн байдаг юм тэр сэргээж өгч магадгүй гэж хэлээд хэзээ билээ нэг өдөр Довын постон дээр дагуулж очоод Пэлжээ, Ганболд хоёрыг уулзуулсан юм тэгээд тэр хоёр хоорондоо ярьж байгаад салцгаасан, ...Пэлжээ надад жолооны эрхээ хасуулсан хүн байвал надад хэлээрэй би тус болоё гэж хэлж байсан, ... Ганболд 500,000 төгрөг шилжүүлсэн гэж байх шиг байсан “ гэх мэдүүлэг,

• Шүүгдэгч Д.Пгийн мөрдөн байцаалтын шатанд яллагдагчаар мэдүүлсэн “... Ганбод гэдэг хүн над руу залгаад би согтуугаар тээврийн хэрэгсэл жолоодож байгаад жолооны эрхээ хасуулсан юм та сэргээж өгч чадах уу гэж ярьж байсан. Тэгэхэд нь би яг одоогоор сайн мэдэхгүй байна цаашаа хүмүүстэй холбогдож байгаад болоё гэж хэлсэн тэгээд би цаашаагаа хүн рүү залгаад согтуугаар тээврийн хэрэгсэл жолоодож яваад жолооны эрхээ хасуулсан хүн над руу залгаж байна гэж хэлэхэд хугацаа ойрхон байна хэсэг хүлээх хэрэгтэй гэж надад хэлсэн. Тэгэхээр нь би Ганболд руу залгаад эрх хасуулсан хугацаа чинь их ойрхон байна та тэгэхээр хэсэг хүлээх хэрэгтэй юм байна гэж хэлсэн. Тэгээд боломж гарвал би таны жолооны эрхийг сэргээж өгөе гээд 500,000 төгрөгийг өөрийн охин П.Аззаяагийн дансаар шилжүүлж авсан “ гэх мэдүүлэг  /хх-ийн 40 тал/ зэрэг болон хэрэгт цугларсан бусад бичгийн нотлох баримтуудаар нотлогдон тогтоогдож байна.

 

Мөрдөн шалгах ажиллагааны явцад Д.П нь 2020 оны 5 сарын 07-ны өдөр яллагдагчаар мэдүүлэг өгөхдөө гэмт хэрэг үйлдсэн гэм буруугаа хүлээн зөвшөөрч, хэргээ хялбаршуулсан журмаар хянан шийдвэрлүүлэх тухай хүсэлтээ гаргажээ. /хх-ийн 21, 40 тал/,

 

Төв аймгийн прокурорын газрын хяналтын прокурор Б.Сувд-Эрдэнэ нь хэргийг хялбаршуулсан журмаар хянан шийдвэрлэх үндэслэлтэй гэж үзэж, хэргийг хялбаршуулсан журмаар хянан шийдвэрлүүлэх тухай яллагдагчийн хүсэлтийг хүлээн авч 2020 оны 5 сарын 08-ны өдөр 53 дугаартай “хэргийг хялбаршуулснаар хянан шийдвэрлэх тухай” прокурорын тогтоол гаргаж, хуульд заасан хугацаанд мөрдөн байцаалт явуулж, Эрүүгийн хэрэг хянан шийдвэрлэх тухай хуулийн 17.3 дугаар зүйлийн 1 дэх хэсэгт заасан хэргийн зүйчлэл, түүнд хүлээлгэх эрүүгийн хариуцлагын төрөл, хэмжээний тухай прокурорын саналыг /хх-41, 46 тал/ 2020 оны 5 сарын 08-ны өдөр яллагдагчид танилцуулж, яллагдагч Д.П нь хүлээн зөвшөөрч гарын үсэг зурж баталгаажсанаар, мөн өдөр яллах дүгнэлт үйлдэн хэргийг шүүхэд шилжүүсэн байна.

Д.Пд холбогдох хэргийг хүлээн авч танилцаад хэргийг хянан шийдвэрлэхэд боломжтой гэж шүүх үзэж, шүүх хуралдааныг зарлан явуулахад Эрүүгийн хэрэг шийдвэрлэх тусгай журам зөрчөөгүй, хэргийг хялбаршуулснаар хянан шийдвэрлүүлэхээр ирүүлсэн Прокурорын тогтоол үндэслэлтэй байна.

 

Хэрэгт авагдсан баримтаар шүүгдэгч Д.П нь гэмт хэрэг үйлдсэн нь нотлогдсон, гэмт хэрэг үйлдсэн гэм буруугаа сайн дураараа хүлээн зөвшөөрсөн, гэмт хэргийн улмаас учруулсан хохирол, хор уршигийг нөхөн төлсөн, гэмт хэрэг үйлдсэн гэм буруугаа хүлээн зөвшөөрсний улмаас үүсэх хууль зүйн үр дагаварыг шүүгдэгч нь ойлгосон байх тул шүүгдэгч Д.Пг гэмт хэрэг үйлдсэн гэм буруутайд тооцож, 

прокурорын саналыг хүлээн авч, саналын хүрээнд шүүгдэгчийн эрх зүйн байдлыг дордуулахгүйгээр эрүүгийн хариуцлага хүлээлгэх нь зүйтэй байна.

 

Хэрэгт эд мөрийн баримтаар хураагдан ирсэн зүйлгүй, бичгийн баримтаар хураагдаж ирсэн зүйлгүй, битүүмжлэгдсэн эд хөрөнгөгүй, шүүгдэгч Д.П нь бусдад төлөх төлбөргүй болохыг дурдаж, шүүгдэгч Д.Пгийн 2020 оны 04 дүгээр сарын 12-ны өдрөөс 2020 оны 04 дүгээр сарын 14-ний хүртэл сэжигтэнээр цагдан хоригдсон 2 хоногийг эдлэх ялаас хасч тооцох нь зүйтэй байна.

 

Монгол Улсын Шүүхийн тухай хуулийн 31 дүгээр зүйлийн 1, 31.3.1, Эрүүгийн хэрэг хянан шийдвэрлэх тухай хуулийн 17.4, 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт заасан зүйл, заалтуудыг тус тус удирдлага болгон

ТОГТООХ нь:

 

1. Шүүгдэгч Д.П бусдыг хуурч, бодит байдлыг нуух замаар төөрөгдөлд оруулж, залилсан гэмт хэргийг үйлдсэн гэм буруутайд тооцсугай.
2. Шүүгдэгч Д.П Эрүүгийн хуулийн тусгай ангийн 17.3 дугаар зүйлийн 1 дэх хэсэгт зааснаар таван зуун нэгжтэй тэнцэх хэмжээний буюу 500.000 /таван зуун мянга/ төгрөгөөр торгох ялаар шийтгэсүгэй.

 

3. Эрүүгийн хуулийн ерөнхий ангийн 6.10 дугаар зүйлийн 2 дахь хэсэгт зааснаар шүүгдэгч Д.Пгийн сэжигтэнээр цагдан хоригдсон 2 хоногийн нэг хоногийг торгох ялын арван таван нэгжтэй тэнцэх хэмжээний төгрөгөөр тооцож оногдуулсан ялаас хасч дөрвөн зуун далан нэгжтэй тэнцэх хэмжээний буюу 470.000 /дөрвөн зуун далан мянга/ төгрөгөөр торгох ялаар тогтоосугай.

 

4. Эрүүгийн хуулийн 5.3 дугаар зүйлийн 5 дахь хэсэгт заасныг баримтлан шүүгдэгч Д.Пг дөрвөн зуун далан нэгжтэй тэнцэх хэмжээний буюу 470.000 /дөрвөн зуун далан мянга/ төгрөгөөр торгох ялыг Шүүхийн шийдвэр гүйцэтгэх тухай хуулийн 160 дугаар зүйлийн 160.1 дэх хэсэгт заасан хугацаанд биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний буюу 15.000 /арван таван мянга/ төгрөгийг нэг хоногоор тооцож хорих ялаар солихыг сануулсугай.

 

5. Шийтгэх тогтоол хүчин төгөлдөр болтол шүүгдэгч Д.Пд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

6. Хэрэгт эд мөрийн баримтаар хураагдан ирсэн зүйлгүй, битүүмжлэгдсэн эд хөрөнгөгүй, иргэний бичиг баримт шүүхэд ирээгүй, шүүгдэгч Д.П нь бусдад төлөх төлбөргүй болохыг тус тус дурдсугай.

 

7. Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.

 

8. Шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлсүгэй.

 

 

 

 

ДАРГАЛАГЧ,  ШҮҮГЧ                          Ж.МӨНХТУЯА