Өмнөговь аймаг дахь сум дундын иргэний хэргийн анхан шатны шүүхийн иргэний хэргийн шүүх хуралдааныг шүүгч А.Энхтөр даргалж, тус шүүхийн танхимд хийсэн хуралдаанаар:

 

Нэхэмжлэгч: Өмнөговь аймаг, Ноён сум, Сайран ..........................  оршин суух, *******  овогт Д.Т   /РД:....................... /

Ажилласан байдал тогтоолгох нэхэмжлэлийг 2018 оны 08 дугаар сарын 23-ны өдөр хүлээн авч, 2018 оны 08 дугаар сарын 30-ны өдөр иргэний хэрэг үүсгэснээр хянан хэлэлцэв.

Шүүх хуралдаанд: Нэхэмжлэгч Д.Т , нарийн бичгийн дарга Ө.Мөнхзаяа нар оролцов.

ТОДОРХОЙЛОХ нь:

Нэхэмжлэгч Д.Т  шүүхэд гаргасан нэхэмжлэлдээ: “1983 оны 09 дүгээр сарын 15-аас 1990 оны 12 дугаар сарын 31-нийг дуустал Өмнөговь аймгийн Ноён сумын “*******” нэгдлийн Сайран бригадын хана хэсэгт ямаачнаар, мөн 1991 оны 01 дүгээр сарын 01-ээс 1994 оны 12 дугаар сарын 31-нийг дуустал Ноён сумын “*******” ХК-д ямаачнаар ажиллаж байсныг тус тус тогтоож өгнө үү” гэжээ.

             Нэхэмжлэгч Д.Т  шүүх хуралдаанд гаргасан тайлбартаа: Би өөрийн эх Ц.Д гээр овоглож явдаг. Тухайн үед аав, ээжийн хамт амьдардаг байсан бөгөөд эх Ц.Д гийн нэрээр малын “А” данс байгааг үндэслэн “*******” ХК-д малчнаар ажиллаж байсныг тогтоож өгнө үү. Ажилласан жилийг нотлох хөдөлмөрийн дэвтэр байсан боловч гэр түймэрт өртөхөд бүх баримт бичиг шатаж үгүй болсныг манай сумынхан бүгд мэднэ гэв.

ҮНДЭСЛЭХ нь:

Нэхэмжлэгч Д.Т  нь 1983 оны 09 дүгээр сарын 15-ны өдрөөс 1990 оны 12 дугаар сарын 31-ний өдрийг дуустал Өмнөговь аймгийн Ноён сумын “*******” нэгдэлд малчин, 1991 оны 01 дүгээр сарын 01-ний өдрөөс 1994 оны 12 дугаар сарын 31-ний өдрийг дуустал Өмнөговь аймгийн Ноён сумын “*******” ХК-д малчнаар тус тус ажилласан байдлаа тогтоолгохоор шүүхэд нэхэмжлэл гаргасан бөгөөд хэрэгт:

1. Нэхэмжлэгч Д.Т ийн иргэний үнэмлэхийн нотариатаар гэрчлүүлсэн хуулбар, төрсний бүртгэлийн лавлагаа, оршин суугаа багийн Засаг даргын тодорхойлолт,
2. Өмнөговь аймгийн Ноён сумын “*******” нэгдлээс нэхэмжлэгчид олгосон хөдөлмөрийн дэвтрийн хуулбар,
3.  Өмнөговь аймгийн Архивын тасгийн 2018 оны 08 дугаар сарын 16-ны өдрийн 837 дугаар Д.Т  нь 1983-1990 онуудад Өмнөговь аймгийн Ноён сумын “*******” нэгдлийн Сайран бригадын Хана хэсэгт малчнаар ажиллаж байхдаа авч байсан цалингийн лавлагаа,
4.  Өмнөговь аймгийн Архивын тасгийн 2018 оны 08 дугаар сарын 22-ны өдрийн 854 дугаар архивын лавлагаа,
5. Өмнөговь аймгийн Архивын тасгийн 2018 оны 09 дүгээр сарын 10-ны өдрийн 891 дүгээр Өмнөговь аймгийн Ноён сумын” *******” нэгдлийн Сайран бригадын малчин Ц.Д  1990, 1992-1993 он хүртэл мал маллаж байсан архивын лавлагаа,
6. Өмнөговь аймгийн Ноён сумын “*******” ХК-ийн гишүүдийн бүртгэл дэх  Ц.Д , Д.Т  нарын нэрс,
7. 1991 оны 08 сарын 29-ний өдрийн 7/2 дугаар Өмнөговь аймгийн Ноён сумын “*******” нэгдлийн өмч хувьчлалын комисс, хяналтын зөвлөлийн гишүүд, нэгдэлчдийн үйлдвэрчний эвлэлийн хорооны тэргүүлэгчид, нэгдлийн ерөнхий хорооны гишүүдийн хамтарсан хурлын тэмдэглэл,
8. Гэрч Я.Чулуунбат шүүхэд өгсөн “Д.Т  нь 1983 оны 09 сараас 1990 оныг дуустал “*******” нэгдэлд ямаачнаар, 1991 оноос 1994 он дуустал “*******” ХХК-ийн малчин байсныг мэднэ” гэх мэдүүлэг,
9. Гэрч Л.Н шүүхэд өгсөн “Д.Т  нь 1983 оны 09 сараас 1990 оны 12 сарыг дуустал Ноён сумын “*******” нэгдэлд ямаачин байсан. 1991 оны 11 сараас 1994 оны 12 сарыг дуустал “*******” ХК-д ямаачинаар тус тус ажиллаж байсан” гэх мэдүүлэг,
10. Гэрч Я.Ч, Л.Н нарын гэрчийн мэдүүлэг, иргэний үнэмлэх, хөдөлмөрийн дэвтрийн нотариатаар гэрчлүүлсэн хуулбар, оршин суугаа багийн Засаг даргын тодорхойлолт зэрэг нотлох баримт авагджээ.

Дээр дурдсан нотлох баримтаар нэхэмжлэгч Д.Т  нь 1983 оны 09 дүгээр  сарын 15-ны өдрөөс 1991 оны 01 дүгээр сарын 01-ний өдрийг дуустал Өмнөговь аймгийн Ноён сумын “*******” нэгдэлд малчнаар ажиллаж байсан нь нотлогдож байна. Нэхэмжлэгч нь өөрийн төрсөн эх Ц.Д гээр овоглодог болох нь түүний төрсний бүртгэлийн лавлагаа, иргэний үнэмлэхийн хуулбараар тогтоогдож байгаа бөгөөд эх Ц.Д тэй өрх тусгаарлалгүй хамт амьдарч, мал тоолуулдаг байсан нь Өмнөговь аймгийн Архивын тасгийн 2018 оны 09 дүгээр сарын 10-ны өдрийн 891 дүгээр архивын лавлагаагаар нотлогдож байх тул  Д.Т ийг 1991 оны 01 дүгээр сарын 01-ний өдрөөс 1994 оны 01 дүгээр сарын 01-ний өдрийг дуустал Өмнөговь аймгийн Ноён сумын “*******” ХК-д малчнаар ажиллаж байсан нь тогтоогдож байна.

Иймд дээрхи нотлох баримтуудад үндэслэн нэхэмжлэгч Д.Т ийг 1983 оны 09 дүгээр сарын 15-ны өдрөөс 1991 оны 01 дүгээр сарын 01-ний өдрийг хүртэл Өмнөговь аймгийн Ноён сумын “*******” нэгдэлд малчин, 1991 оны 01 дүгээр сарын 01-ний өдрөөс 1994 оны 01 дүгээр сарын 01-ний өдрийг хүртэл Өмнөговь аймгийн Ноён сумын “*******” ХК-д малчнаар тус тус ажилласан байдлыг тогтоож, 1994 оны 01 дүгээр сарын 01-ний өдрөөс 1994 оны 12 дугаар сарын 31-ний өдөр хүртэл  ажилласан жил нь нотлогдохгүй байгаа тул хэрэгсэхгүй болгон шийдвэрлэлээ. Нэхэмжлэгчийн улсын тэмдэгтийн хураамжид төлсөн 70 200 төгрөгийг орон нутгийн төсвийн орлогод хэвээр үлдээх нь зүйтэй.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.2, 116, 118, 135 дугаар зүйлд заасныг удирдлага болгон ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.6-д зааснаар нэхэмжлэгч ******* овгийн Д.Т  /РД:....................... /-ын Өмнөговь аймгийн Ноён сумын “*******” нэгдэлд 1983 оны 09 дүгээр сарын 15-ны өдрөөс 1991 оны 01 дүгээр сарын 01-ний өдрийг хүртэл малчин, Өмнөговь аймгийн Ноён сумын “*******” ХК-д 1991 оны 01 дүгээр сарын 01-ний өдрөөс 1994 оны 01 дүгээр сарын 01-ний өдрийг хүртэл малчнаар тус тус ажилласан байдлыг тогтоож, үлдэх хэсгийг хэрэгсэхгүй болгосугай.  

        2.Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-т зааснаар нэхэмжлэгч Д.Т ийн улсын тэмдэгтийн хураамжид төлсөн 70 200 төгрөгийг орон нутгийн төсвийн орлогод хэвээр үлдээсүгэй.

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2-т зааснаар шийдвэр нь танилцуулан сонсгосноор хуулийн хүчинтэй болох бөгөөд зохигчид эс зөвшөөрвөл шийдвэрийг гардан авснаас хойш 14 хоногийн дотор анхан шатны шүүхээр дамжуулан Өмнөговь аймгийн эрүү, иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

ДАРГАЛАГЧ,  ШҮҮГЧ                                          А.ЭНХТӨР