2018 оны 10 сарын 25 өдөр

Дугаар 102/ШШ2018/03192

Улаанбаатар хот

 

 

                              МОНГОЛ УЛСЫН НЭРИЙН ӨМНӨӨС

 

Баянгол дүүргийн Иргэний хэргийн анхан шатны шүүхийн шүүгч Р.Алтантуяа даргалж, тус шүүхийн хуралдааны танхимд хийсэн хуралдаанаар:

 

Нэхэмжлэгч: Н.Н-ийн нэхэмжлэлтэй,

 

Хариуцагч: Ч.У-т холбогдох хүүхдийн тэтгэлэг гаргуулахыг хүссэн хэргийг хянан хэлэлцэв.

 

Шүүх хуралдаанд:    Нэхэмжлэгч Н.Н, хариуцагч Ч.У, шүүх хуралдааны нарийн бичгийн дарга Ц.Жавзанпагма нар оролцов.  

 

                                                                                   ТОДОРХОЙЛОХ нь: 

 

Нэхэмжлэгч Н.Н шүүхэд гаргасан нэхэмжлэл болон шүүх хуралдаанд гаргасан тайлбартаа: Би 2016 онд Ч.У-тай танилцсан, 2018 оны 2-р сарын 6-нд охин У.Э төрсөн. Бид бараг хамт амьдраагүй, хоорондоо зан харьцааны хувьд таардаггүй. Ч.У нь охиноо төрснөөс хойш ганц ч удаа уулзаагүй, эцгийнхээ үүргийг гүйцэтгэдэггүй. Иймд эцгээс нь хүүхдийн тэтгэлэг гаргуулж өгнө үү гэв.

 

Хариуцагч Ч.У шүүхэд болон шүүх хуралдаанд гаргасан тайлбартаа: Наранжингийн ярьсныг хүлээн зөвшөөрч байна. Хүүхдийн тэтгэлэг төлнө гэв.

 

 Шүүх хуралдаанаар хэрэгт цугларсан бичгийн баримтуудыг шинжлэн судлаад                                                                                                    ҮНДЭСЛЭХ нь:

Нэхэмжлэгч Н.Н нь Ч.Ут холбогдох хүүхдийн тэтгэлэг гаргуулахыг хүссэн нэхэмжлэлийг шүүхэд гаргажээ. Шүүх нэхэмжлэлийн шаардлагыг хангаж шийдвэрлэлээ.

 

  Н.Н, Ч.У нар нь 2016 онд танилцан үерхэж байгаад 2018 оны 02-р сарын 06-ны өдөр охин У.Энэрэлмааг төрүүлж өсгөжээ.  

 

Гэр бүлийн тухай хуулийн 21.5 дахь хэсэгт зааснаар гэрлэлтээ бүртгүүлээгүй хүмүүсийн дундаас төрсөн хүүхэд нь гэрлэлтээ бүртгүүлсэн гэр бүлээс төрсөн хүүхдийн адил эрх эдэлж, үүрэг хүлээнэ, 26-р зүйлийн 26.1 дэх хэсэгт зааснаар эцэг, эх нь хүүхдээ хүмүүжүүлэхэд тэгш эрх эдэлж, адил үүрэг хүлээнэ, 38-р зүйлийн 38.1 дэх хэсэгт зааснаар эцэг, эх нь хүүхдээ тэжээн тэтгэх үүрэгтэй байна.

 

  Харин талууд зан харьцааны хувьд таарамжгүй байсны улмаас хамт амьдраагүй, охин У.Э нь эхийн асрамжинд байгаа нь зохигчийн тайлбараар тогтоогдсон байна.

 

  Иймд хуульд заасан журмаар хүүхдийн тэтгэлэг тогтоож охин У.Э тэжээн тэтгүүлэх нь зүйтэй.  

 

Иргэний хэрэг шүүхэд хянан шийдвэрлэх тухай хуулийн 115-р зүйлийн 115.2.1, 116, 118-р зүйлд  заасныг удирдлага болгон

                                                                                                               ТОГТООХ нь:

 

  1. Гэр бүлийн тухай хуулийн 40-р зүйлийн 40.1.1, 40.1.2 дахь хэсэгт заасныг баримтлан 2018 оны 02-р сарын 06-нд төрсөн охин У.Э-г 11 нас хүртэл тухайн бүс нутагт тогтоогдсон амьжиргааны доод түвшингийн 50 хувиар, 11-16 нас /суралцаж байгаа тохиолдолд 18 нас/ хүртэл амьжиргааны доод түвшингийн хэмжээгээр сар бүр тэтгэлэг гаргуулж эцэг Ч.У-аар тэжээн тэтгүүлсүгэй.

 

  2. Улсын тэмдэгтийн хураамжийн тухай хуулийн 7-р зүйлийн 7.1.2 дахь хэсэг, Иргэний хэрэг шүүхэд хянан шийдвэрлэх тухай хуулийн 60-р зүйлийн 60.1, 56-р зүйлийн 56.1 дэх хэсэгт зааснаар нэхэмжлэгчээс улсын тэмдэгтийн хураамжид төлсөн 70 200 төгрөгийг улсын орлогот хэвээр үлдээж, хариуцагч Ч.У-аас 70 200 төгрөг гаргуулж нэхэмжлэгчид олгосугай.   

 

3. Шийдвэрийг зохигч гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргаж эрхтэй.

 

 

 

 

ДАРГАЛАГЧ, ШҮҮГЧ                            Р.АЛТАНТУЯА