Зохигчдын эвлэрлийг баталж, хэргийг хэрэгсэхгүй болгох тухай

Дорноговь аймгийн Замын-Үүд сум дахь сум дундын шүүхийн шүүгч Б.Н би

Нэхэмжлэгч: Улаанбаатар хот Чингэлтэй дүүрэг 1 дүгээр хороонд байрлах, “Т банк” ХХК-ний нэхэмжлэлтэй,

Хариуцагч: “Г” ХХК /захирал Улаанбаатар хот Хан-Уул дүүрэг 3-р хороонд оршин суух, Б овогт Ц.Ц,

Хариуцагч: Дорноговь аймгийн Замын-Үүд сумын Сүлд багт оршин суух, Б овогт Ц.Б нарт холбогдох,

“Зээлийн төлбөр 1,350,130,943.11 төгрөг, зээлийн хүү 151,342,206.02 төгрөг, нэмэгдүүлсэн хүү 555,925.80 төгрөг, нотариатын үнэ 95,300 төгрөг нийт 1,502,124,374.93 төгрөгийг гаргуулах”-ыг хүссэн нэхэмжлэлийг 2018 оны 06 дугаар сарын 21-ний өдөр хүлээн авч, 2018 оны 06 дугаар сарын 27-ны өдөр иргэний хэрэг үүсгэн хянаад

ТОДОРХОЙЛОХ нь:

Нэхэмжлэгч Т банк ХХК-ийн итгэмжлэгдсэн төлөөлөгч Ч.У нь шүүхэд гаргасан нэхэмжлэлдээ: “Зээлдэгч “Г” ХХК түүнийг төлөөлөн захирал Ц.Ц, хамтран зээлдэгч Ц.Б нар нь 2017 оны 02 дугаар сарын 24-ний өдөр ЗГ/18/08 тоот Зээлийн гэрээгээр Т банкны Замын-Үүд салбараас 1,500,000,000 /Нэг тэрбум таван зуун сая / төгрөгийн хөрөнгө оруулалтын зээлийг сарын 2,1% /жилийн 25,2%/-ийн хүүтэй, 60 сар /5 жил/-ын хугацаатайгаар авсан. Зээл, зээлийн хүү төлөх хуваарийн дагуу зээлдэгч "Г” ХХК нь 2018 оны 01 дүгээр сараас хойш сар бүр төлбөл зохих зээлийн үндсэн төлбөр болон зээлийн хүүгээ төлөөгүйгээс график зөрчигдөж улмаар тус зээл нь хэвийн бус ангилалтай болсон ба төлбөр хийхийг зээлдэгчээс удаа дараа шаардаж мэдэгдэл өгсөн боловч төлөлт хийгээгүй. Зээлийн үндсэн төлбөр болон зээлийн хүүгээ төлөөгүйгээс зээл, зээлийн хүүгийн үлдэгдэл 2018 оны 06 дугаар сарын 20-ны байдлаар 1,502,029,074.93 төгрөг болж хуримтлагдсан байна. Иймд Т банктай байгуулсан 2017 оны 02 дугаар сарын 24-ний өдөр ЗГ/48/08 тоот зээлийн гэрээгээр хүлээсэн үүргээ биелүүлээгүйгээс үүссэн үүрэг буюу төлбөрийн хуваарь зөрчсөний улмаас зээлийн үндсэн төлбөр 1,350,130,943.11 төгрөг, зээлийн хүү 151,342,206.02 төгрөг, нэмэгдүүлсэн хүү 555,925.80 төгрөг, нотариатын үнэ 95,300 төгрөг нийт 1,502,124,374.93 төгрөгийг “Г” ХХК  болон Захирал Ц.Ц, хамтран зээлдэгч Ц.Б нараас гаргуулах, тус зээлийн барьцаанд байгаа Замын-Үүд 1-р багт орших Улсын бүртгэлийн ... дугаартай ... гэрчилгээтэй, 72 м талбай бүхий үйлчилгээний зориулалттай үл хөдлөх хөрөнгө, Замын-Үүд 1-р баг орших Улсын бүртгэлийн ... дугаартай ... гэрчилгээтэй, 144 м талбай бүхий үйлчилгээний зориулалттай үл хөдлөх хөрөнгө, Замын-Үүд 1-р багт орших Улсын бүртгэлийн ... дугаартай ... гэрчилгээтэй, 198 м талбай бүхий үйлчилгээний зориулалттай үл хөдлөх хөрөнгө, Замын-Үүд 3-р баг хаягт орших Улсын бүртгэлийн ... дугаартай ... гэрчилгээтэй, 800 м талбай бүхий грашийн зориулалтай үл хөдлөх хөрөнгө, Замын-Үүд 3-р багт орших ... гэрчилгээтэй, ... 700 м талбай бүхий газар, Замын-Үүд 3-р багт орших ... гэрчилгээтэй, ... 700 м талбай бүхий газар, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... Улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт зэрэг барьцаа хөрөнгүүдээр зээлийн гэрээний үүргийн гүйцэтгэлийг хангуулж өгнө үү” гэжээ.

Нэхэмжлэгч байгууллагын итгэмжлэгдсэн төлөөлөгч Ч.У шүүхэд ирүүлсэн хариу тайлбартаа: “Т банк” ХХК-ийн итгэмжлэгдсэн төлөөлөгч Ч.У миний бие “Г” ХХК-ийн итгэмжлэгдсэн төлөөлөгч Ц.Б-н 2018 оны 07 дугаар сарын 20-ны өдрийн гаргасан хүсэлт, хариу тайлбарыг хүлээн зөвшөөрч байгаа тул хэргийг хялбаршуулсан журмаар шийдвэрлэж өгнө үү” гэжээ.

Хариуцагчийн итгэмжлэгдсэн төлөөлөгч болон хариуцагч Ц.Б нь 2018 оны 07 дугаар сарын 20-ны өдөр шүүхэд ирүүлсэн хариу тайлбартаа: “Г” ХХК нь тус банкны нэхэмжилсэн зээлийн үндсэн төлбөр болох 1,350,130,943.11 /нэг тэрбум гурван зуун тавин сая нэг зуун гучин мянга есөн зуун дөчин гурван төгрөг арван нэгэн мөнгө/ төгрөг, зээлийн хүүгийн төлбөр 151,342,206.02 /нэг зуун тавин нэгэн сая гурван зуун дөчин хоёр мянга хоёр зуун зургаан төгрөг хоёр мөнгө/ төгрөг, нэмэгдүүлсэн хүү 555,925.80 /таван зуун тавин таван мянга есөн зуун хорин таван төгрөг наян мөнгө/ төгрөг, нотариатын үнэ 95,300 төгрөг, нийт 1,502,124,374.93 төгрөг гаргуулах нэхэмжлэлийн дагуу 2018 оны 06 сарын 30-ны дотор нотариатын хөлсний нэхэмжлэл болох 95,300 төгрөг, зээлийн үндсэн төлөлт болох тодорхой хэмжээний хүүгийн хамт 94,843,000 төгрөгийг төлж барагдуулсан байгаа. Одоо үлдэгдэл төлбөр болох 1,407,186,874.93 төгрөгийг цаашид дараах хуваарийн дагуу зээлийн эргэн төлөлтийг хийхээр төлөвлөж байгаа. Үүнд: Зээлийн хүү болох 149,528,131.82 төгрөгийг 2018 оны 7, 8, 9 дүгээр сарын үндсэн төлөлтүүд болох 53,880,464.63 төгрөгийн хамт буюу нийт 203,408,596.45 төгрөгийг доорх хуваарийн дагуу төлөх:

1/. 2018 оны 07 дугаар сард багтаж 26,408,596.45 төгрөг,

2/. 2018 оны 08 дугаар сард 77,000,000 төгрөг,

3/. 2018 оны 09 дүгээр сард 100,000,000 төгрөг нийт 203,408,596.45 төгрөг.

Харин зээлийн үлдэгдэл болох 1,203,780,957 төгрөгийг 2018 оны 10 дугаар сараас зээлийн гэрээний үндсэн хугацаа болох 41 сард дараах эргэн төлөлтийн хуваарийн дагуу төлөхөөр харилцан тохиролцож Дорноговь аймгийн Замын-Үүд сум дахь сум дундын шүүхээр хялбаршуулсан журмаар шийдвэрлүүлэх хүсэлтэй байна. Үүнд:

№	Огноо	Үндсэн төлбөр	Зээлийн үлдэгдэл	№	Огноо	Үндсэн төлбөр	Зээлийн үлдэгдэл
			1,203,780,957	21	20.06.23	28,204,222	713,726,852
1	18.10.23	19,150,473	1,184,630,484	22	20.07.23	29,300,635	684,426,218
2	18.11.23	18,729,242	1,165,901,242	23	20.08.23	29,434,984	654,991,234
3	18.12.23	19,935,050	1,145,966,192	24	20.09.23	30,064,973	624,926,261
4	19.01.23	19,556,764	1,126,409,428	25	20.10.23	31,139,902	593,786,359
5	19.02.23	19,975,332	1,106,434,096	26	20.11.23	31,374,925	562,411,434
6	19.03.23	22,694,542	1,083,739,554	27	20.12.23	32,434,729	529,976,705
7	19.04.23	20,888,584	1,062,850,970	28	21.01.23	32,740,626	497,236,078
8	19.05.23	22,069,461	1,040,781,509	29	21.02.23	33,441,366	463,794,712
9	19.06.23	21,808,004	1,018,973,504	30	21.03.23	35,117,729	428,676,983
10	19.07.23	22,978,266	995,995,239	31	21.04.23	34,908,718	393,768,265
11	19.08.23	22,766,553	973,228,686	32	21.05.23	35,927,722	357,840,543
12	19.09.23	23,253,820	949,974,866	33	21.06.23	36,424,812	321,415,731
13	19.10.23	24,407,388	925,567,478	34	21.07.23	37,426,312	283,989,419
14	19.11.23	24,273,900	901,293,577	35	21.08.23	38,005,428	245,983,991
15	19.12.23	25,415,691	875,877,886	36	21.09.23	38,818,849	207,165,142
16	20.01.23	25,337,394	850,540,493	37	21.10.23	39,792,707	167,372,435
17	20.02.23	25,879,683	824,660,810	38	21.11.23	40,501,351	126,871,084
18	20.03.23	27,572,289	797,088,521	39	21.12.23	41,455,784	85,415,299
19	20.04.23	27,023,702	770,064,819	40	22.01.23	42,255,459	43,159,841
20	20.05.23	28,133,744	741,931,075	41	22.02.23	43,159,841	0

Эдгээр графикийн дагуу төлөхөөр хүсэлт гаргаж байгаа бөгөөд харилцан тохиролцох хүсэлтийг хүлээж авна уу. Уг зээлийг графикийн дагуу төлж барагдуулж чадаагүй тохиолдолд барьцаалбар эд хөрөнгөөр барагдуулахыг зөвшөөрч байна” гэжээ.

ҮНДЭСЛЭХ  нь:

Нэхэмжлэгч Т банк ХХК нь хариуцагч Г ХХК-ийн захирал Ц.Ц, Ц.Б нарт холбогдуулан үндсэн зээлийн төлбөр 1,350,130,943.11 төгрөг, зээлийн хүү 151,342,206.02 төгрөг, нэмэгдүүлсэн хүү 555,925.80 төгрөг, нотариатын үнэ 95,300 төгрөг нийт 1,502,124,374.93 төгрөг гаргуулахыг хүссэн нэхэмжлэлийн шаардлага гаргажээ.

Хэрэг хянан шийдвэрлэх явцад нэхэмжлэгчийн итгэмжлэгдсэн төлөөлөгч хариуцагч нар нь үндсэн зээлийн төлбөр 1,350,130,943.11 төгрөг, зээлийн хүү 151,342,206.02 төгрөг, нэмэгдүүлсэн хүү 555,925.80 төгрөг, нотариатын үнэ 95,300 төгрөг нийт 1,502,124,374.93 төгрөгийн хэмжээнд эвлэрсэн ба хэрэг хянан шийдвэрлэх ажиллагаанд хариуцагч нар нь нэхэмжлэлийн шаардлагаас нотариатын зардал 95,300 төгрөг, зээлээс 94,843,000 төгрөгийг төлж, үлдэгдэл 1,407,186,874.93 төгрөгийг  зээлийн гэрээний дуусах хугацаа болох 2022 оны 02 дугаар сарын 23-ны өдрийг хүртэл дээрх графикийн дагуу төлж барагдуулах, графикийн дагуу төлж барагдуулж чадаагүй тохиолдолд барьцаалбар эд хөрөнгөөр барагдуулахаар эвлэрсэн тайлбарыг шүүхэд ирүүлсэн байна. Нэхэмжлэгчийн итгэмжлэгдсэн төлөөлөгч, хариуцагч нарын эвлэрэл нь иргэний хуульд болон талуудын эрх ашигт нийцсэн, гуравдагч этгээдийн эрх, эрх чөлөө, хуулиар хамгаалагдсан ашиг сонирхлыг хөндөхгүй байх тул зохигчдын эвлэрлийг баталж, хэргийг хэрэгсэхгүй болгох үндэслэлтэй байна.

Нэхэмжлэгч Т банк ХХК нь улсын тэмдэгтийн хураамжид нэхэмжлэл гаргахдаа 7,668,572 төгрөг төлснийг төрийн санд хэвээр үлдээж, уг төгрөгийн 50 хувь болох 3,834,286 төгрөгийг төрийн сангаас, хариуцагч нараас 50 хувь болох 3,834,286 төгрөгийг тус тус гаргуулан нэхэмжлэгчид олгох нь зүйтэй байна.

Монгол Улсын Иргэний хэрэг шүүхэд хянан шийдвэрлэх тухай хуулийн 74   дүгээр зүйлийн 74.1,  74.2, 75 дугаар зүйлийн 75.1, 123 дугаар зүйлийн 123.1-д заасныг удирдлага болгон ЗАХИРАМЖЛАХ нь:

1. Нэхэмжлэгч Т банк ХХК-ийн итгэмжлэгдсэн төлөөлөгч Ч.У,  хариуцагчийн итгэмжлэгдсэн төлөөлөгч болон хариуцагч Ц.Б нар нь нэхэмжлэлийн шаардлагаас нийт 94,938,300 /ерэн дөрвөн сая есөн зуун гучин найман мянга гурван зуун/ төгрөгийг төлж, үлдэгдэл 1,407,186,874.93 /нэг тэрбум дөрвөн зуун долоон сая нэг зуун наян зургаан мянга найман зуун далан дөрвөн төгрөг ерэн гурван мөнгө/ төгрөгийг графикийн дагуу төлөхөөр эвлэрсэн тул зохигчдын эвлэрлийг баталж, хэргийг хэрэгсэхгүй  болгосугай.

2. Монгол Улсын Иргэний хуулийн 153 дугаар зүйлийн 153.1, 175 дугаар зүйлийн 175.1-д зааснаар хариуцагч “Г” ХХК-ийн захирал Ц.Ц, Ц.Б нар нь нэхэмжлэгч Т банк ХХК-д төлөх 1,407,186,874.93 төгрөгийг эвлэрсэн графикийнхаа дагуу сайн дураараа эс төлбөл барьцааны зүйл болох Замын-Үүд 1-р багт орших Улсын бүртгэлийн ... дугаартай ... гэрчилгээтэй, 72 м талбай бүхий үйлчилгээний зориулалттай үл хөдлөх хөрөнгө, Замын-Үүд 1-р багт орших Улсын бүртгэлийн ... дугаартай ... гэрчилгээтэй, 144 м талбай бүхий үйлчилгээний зориулалттай үл хөдлөх хөрөнгө, Замын-Үүд 1-р багт орших Улсын бүртгэлийн ... дугаартай ... гэрчилгээтэй, 198 м талбай бүхий үйлчилгээний зориулалттай үл хөдлөх хөрөнгө, Замын-Үүд 3-р багт орших Улсын бүртгэлийн ... дугаартай ... гэрчилгээтэй, 800 м талбай бүхий гражийн зориулалтай үл хөдлөх хөрөнгө, Замын-Үүд 3-р багт орших ... гэрчилгээтэй, ... 700 м талбай бүхий газар, Замын-Үүд 3-р багт орших ... гэрчилгээтэй, ... 700 м талбай бүхий газар, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүлийн хамт, ... Улсын дугаартай ... арлын дугаартай цагаан өнгийн NORTHBENZ марк бүхий автомашин ... чиргүүл зэрэг эд хөрөнгийг албадан дуудлага худалдаанд оруулж үнийн дүнгээс нэхэмжлэлийн шаардлагыг хангасугай.

3. Монгол Улсын Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэг, Улсын тэмдэгтийн хураамжийн тухай хуулийн 7 дугаар зүйлийн 7.1.1 дэх хэсэгт зааснаар нэхэмжлэгчийн улсын тэмдэгтийн хураамжид төлсөн 7,668,572 төгрөгийг төрийн санд хэвээр үлдээж, төрийн сангаас 3,834,286 төгрөг, хариуцагч Ц.Ц, Ц.Б нараас 3,834,286 төгрөгийг тус тус гаргуулан нэхэмжлэгч Т банк ХХК-д олгосугай.

4. Монгол Улсын Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч нар сайн дураараа биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

5. Монгол Улсын Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-д зааснаар зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

ШҮҮГЧ                              Б.Н