Говь-Алтай аймаг дахь сум дундын эрүүгийн хэргийн анхан шатны шүүхийн эрүүгийн хэргийн шүүх хуралдааныг шүүгч Ч.Мөнхтуяа даргалж

Шүүх хуралдааны нарийн бичгийн дарга Б.Түвшинтөр

Улсын яллагч Ц.Сайнхүү

Хохирогч Чимэдцогзол

Шүүгдэгч Г.Алтанзулын өмгөөлөгч Б.Болормаа

Шүүгдэгч З.Сумъяабазарын өмгөөлөгч Ж.Мөнхнасан

Шүүгдэгч Н.Хүрэлийн өмгөөлөгч Д.Ариун-Эрдэнэ нарыг оролцуулан тус шүүхийн шүүх хуралдааны танхимд нээлттэй явуулсан шүүх хуралдаанаар

Говь-Алтай аймгийн Прокурорын газраас Эрүүгийн хуулийн 145 дугаар зүйлийн 145.2, 148 дугаар зүйлийн 148.2, 181 дүгээр зүйлийн 181.2.1 дэх хэсгүүдэд заасан гэмт хэрэгт холбогдуулан яллах дүгнэлт үйлдэж ирүүлсэн З.Сумъяабазар, 145 дугаар зүйлийн 145.2 дахь хэсэгт заасан гэмт хэрэгт холбогдуулан яллах дүгнэлт үйлдэж ирүүлсэн  Г.Алтанзул, 145 дугаар зүйлийн 145.2, 261 дүгээр зүйлийн 261.1 дэх хэсэгт заасан гэмт хэрэгт холбогдуулан яллах дүгнэлт үйлдэж ирүүлсэн Н.Хүрэл нарт холбогдох 201607000041 дугаарын хэргийг 2016 оны 10 дугаар сарын 26-ны өдөр хүлээн авч  хянан хэлэлцэв.

Шүүгдэгч:1986 оны 10 сарын 25-ны өдөр төрсөн, эрэгтэй, 31 настай Говь-Алтай аймгийн Есөнбулаг сумын Сутайн хороо 5-9 тоотод оршин суух, ам бүл 4, ээж дүү нарын хамт амьдардаг, боловсрол, мэргэжил байхгүй, өмнө нь 2006 оны 1 дүгээр сарын 23-ны өдөр Говь-Алтай аймгийн Сум дундын шүүхээс  Эрүүгийн хуулийн 145 дугаар зүйлийн 145.2-д зааснаар 3 сар 10 хоногийн баривчлахялаар, 2011 оны 06 сарын 28-ны өдөр Эрүүгийн хуулийн 145 дугаар зүйлийн 145.2, 181 дүгээр зүйлийн 181.3 дахь хэсэгт зааснаар 7 жил 1 сараар хорих ял эдэлж өршөөлийн хуулиар суллагдсан Номгон овогт Гансүхийн Алтанзул гэв.

Шүүгдэгч: Монгол улсын иргэн, 1992 оны 10 сарын 06-ны өдөр төрсөн, эрэгтэй, 25 настай, Говь-Алтай аймгийн Жаргалан сумын Тээл багт оршин суух, малчин, бүрэн дунд боловсролтой, урьд нь ял шийтгэл эдэлж байгаагүй, төрөөс авсан гавьяа шагналгүй, ам бүл 2, аавын хамт амьдардаг Их мянган овогт Зоригтийн Сумъяабазар гэв.

Шүүгдэгч: 1993 оны 07 сарын 30-ний өдөр төсрөн, эрэгтэй, ам бүл 5, эмээ 3 дүүгийн хамт амьдардаг, бүрэн дунд боловсролтой, авто фермер мэргэжилтэй, Говь-Алтай аймгийн Есөнбулаг сумын Харзат 6-30 тоотод оршин суух, хэрэг хариуцах чадвартай, урьд нь ял шийтгэгдэж байгаагүй, төрөөс авсан гавьяа шагналгүй шүүгдэгч Шаншин овогт Нэргүйн Хүрэл гэв.

Шүүгдэгч З.Сумъяабазар нь давтан үйлдлээр 2015 оны 11 дүгээр сарын 18-ны өдөр хохирогч Т.Бавуугарьдын Самсунг Эс-2 маркын гар утсыг, 2016 оны 01 дүгээр сарын 24-ний өдөр хохирогч Ж.Дашдаваагийн Айфоне 4-Эс маркын гар утсыг утсаар яриад өгье гэж хэлж хуурч, залилан мэхэлж авсан, Говь-Алтай аймгийн Есөнбулаг сумын төвд Түмэн багт Бадмаараг-Алтай дэлгүүрийн гадаа 2016 оны 02 дугаар сарын 29-ний өдрийн орой 16 цаг 30 минутын үед согтууруулах ундааны зүйл хэрэглэсэн үедээ нийгмийн хэв журам зөрчиж догшин авирлаж танхайран хохирогч Ж.Мөнх-Эрдэнийг зодож бие мах бодид нь хөнгөн зэргийн гэмтэл учруулсан, мөн Н.Хүрэл, Г.Алтанзул нартай бүлэглэн 2016 оны 03 дугаар сарын 31-ний өдөр Говь-Алтай аймгийн Есөнбулаг сумын Баянхайрхан баг 6-56 тоотод байрлах Банзрагчийн гэрт хууль бусаар нэвтэрч Хайсэнсэ маркын 32 инчийн телевизор, дунд үеийн цагаан өнгийн хаш хөөрөг зэргийг хулгайлж, хохирогч Д.Чимэдцогзолд 730.000 төгрөгийн хохирол учруулсан, яллагдагч Н.Хүрэл нь З.Сумъяабазар, Г.Алтанзул нартай бүлэглэн 2016 оны 03 дугаар сарын 31-ний өдөр Говь-Алтай аймгийн Есөнбулаг сумын Баянхайрхан багийн 6-56 тоотод байрлах Банзрагчийн гэрт хууль бусаар нэвтэрч Хайсэнсэ маркын 32 инчийн телевизор, дунд үедийн цагаан өнгийн хаш хөөрөг зэргийг хулгайлж, хохирогч Д.Чимэдцогзолд 730.000 төгрөгийн хохирол учруулсан, 2016 оны 09 дүгээр сарын 05-ны өдөр зарлагдсан анхан шатны шүүх хуралдаанд хүндэтгэн үзэх шалтгаангүйгээр ирээгүй, шүүн таслах ажиллагаанаас зориуд зайлсхийсэн, яллагдагч Г.Алтанзул нь З.Сумъяабазар, Н.Хүрэл нартай бүлэглэн 2016 оны 03 дугаар сарын 31-ний өдөр Говь-Алтай аймгийн Есөнбулаг сумын Баянхайрхан багийн 6-56 тоотод байрлах Банзрагчийн гэрт хууль бусаар нэвтэрч Хайсэнсэ маркын 32 инчийн телевизор, дунд үедийн цагаан өнгийн хаш хөөрөг зэргийг хулгайлж, хохирогч Д.Чимэдцогзолд 730.000 төгрөгийн хохирол 2016 оны 05 дугаар сарын 25-наас 26-нд шилжих шөнө давтан үйлдлээр “Нарлаг” хүнсний дэлгүүрт хууль бусаар нэвтэрч бэлэн мөнгө, эд зүйл хулгайлан иргэн Ш.Сийлэгмаад 1166500 мянган төгрөгийн хохирол учруулсан гэмт хэрэгт холбогджээ. /яллах дүгнэлтэд бичигдсэнээр/

ТОДОРХОЙЛОХ нь:

Шүүгдэгч Н.Хүрэл шүүхийн хэлэлцүүлэгт мэдүүлэг өгөхийг зөвшөөрч байна гээд мэдүүлэхдээ: Би Г.Алтанзул З.Сумъяабазар хоёртой Банзрагчийн гэрч очих үед гэрт нь хүн байхгүй байсан. Цоожийг нь эвдэж ороод нэг архи уусан. Тэгээд такси дуудаж зурагтыг нь авч яваад дэлгүүрт тавьсан. Тэр дэлгүүрээс архи пиво идэж уух юм авч Дугана хад буудалд очиж тэндээ хоносон. Маргааш нь гэртээ ирэх үед цагдаа нар ирсэн байсан. Тэгээд би авсан юм аа гэж цагдаа дээр очиж хэлсэн ингээд эрүү үүсээд явсан гэв.

Шүүгдэгч З.Сумъяабазар шүүхийн хэлэлцүүлэгт мэдүүлэг өгөхийг зөвшөөрч байна гээд мэдүүлэхдээ: Хойд дэрстэй дэлгүүрийн тэнд тоглож байх үед Мөнхөө Шөмөө хоёр ирсэн. Тэгээд архи ууж байгаад би Мөнхөөтэй маргалдаад гарч ирээд би цохьсон юм шиг байсан. Эмнэлгийн тэнд Н.Хүрэл бид 2 явж байх үед Бавуутай таарсан. Би хүнтэй уулзах гэж явсан юм миний утасны цэнэг дууссан байсан. Тэгээд Бавуугарьдын утсыг гуйж аваад ярьсан. Тэгээд эмнэлэг орж хүнтэй уулзаж байхад Бавуугарьд хичээл орох гээд байна хурдан гараад ир гэсэн би арай болоогүй байна гэсэн чинь би явж байя чи араас сургууль дээр аваад ир гэсэн. Тэгээд урагшаа Н.Хүрэлийн гэрт оччихоод анагаах орох замдаа утсыг нь гээсэн байсан. Маргааш нь Бавуугарьдтай уулзаад утсыг чинь гээчихсэн байна гэхэд чи тэгж байгаад утас юм уу мөнгийг нь өгчих гэсэн. Тэгээд утсыг нь авч өгсөн гэв. Од цайны газарт байж байгаад тэр эгчийн утсыг гуйж аваад ярьсан гарахдаа аваад гарсан байсан юм. Н.Хүрэл талд манай дүүгийнд очно гээд тэнд очсон. Тэгээд нэг шил архи уугаад зурагтыг нь авч ирээд дэлгүүрт тавьсан гэв. 

Шүүгдэгч Г.Алтанзул шүүхийн хэлэлцүүлэгт мэдүүлэг өгөхийг зөвшөөрч байна гээд мэдүүлэхдээ: Би Н.Хүрэлтэй санал нэг байна. Энэ айлд очих үедээ хулгай хийх гэж очоогүй. Би ахын мотоциклийг унаж явсан юм ах маань хөдөө явах гэж байна гэхээр нь мотоциклийг нь хүргэж өгөөд буцаж очоод нэг шил архи уусан. Тухайн үедээ Н.Хүрэл энэ ямар учиртай айл юм бэ гэхэд манай хүргэнийх байгаа юм санаа зоволтгүй гэсэн. Н.Хүрэл зурагт тавина арыг нь би даана гэхээр нь бид 2 хэлсэн. Зурагтыг дэлгүүрт тавихад нь би зуучлаад өгсөн. Дугана хад буудалд архи уугаад орой нь тарсан. Маргааш өглөө нь Н.Хүрэлийн дүү цагдаад хэлээд ах нарыгаа дагуулаад ир гээд бид нар очсон. Ингээд эрүүгийн хэрэг үүсгээд шалгасан. Сийлэгмаа илүү мөнгө нэхэмжлээд байна. Би мэдүүлэг өгсөн байгаа гэв.

Хохирогч Чимэдцогзол шүүхийн хэлэлцүүлэгт мэдүүлэхдээ: 2016 оны 05 сарын 30-ны өдөр манай хүн Жаргалан сум явсан. Би тэр шөнө гэртээ хоноогүй. Буурал ээжийнд хоноод маргааш орой нь 18 цагийн үед гэртээ очих үед гэрийн цоожийг эвдсэн байсан. Найздаа хүүхдээ хүргэж өгөөд цагдаа дуудсан. Өдөр нь Н.Хүрэл гэртээ байж байх үед З.Сумъяабазар, Г.Алтанзул нар ирсэн. Гэтэл З.Сумъяабазар Банзрагчийнд очъё гээд танай гэрийн түлхүүр байна уу? гэхээр нь би эгчдээ гэрийн түлхүүрээ өгсөн гэж хэлсэн. Тэгээд гэрт очих үед цоож эвдэрсэн байсан гэртээ ороход зурагт, аавын хөөрөг хоёр байхгүй байсан. Ширээн доогуур архины шил байсан гэв.

Гэрч Ц.Ариунбаяр шүүхийн хэлэлцүүлэгт мэдүүлэхдээ: Тухайн харилцагч бэлэн мөнгөтэй бол бэлэн бараагаа хүргэж өгөөд мөнгөө авдаг. Бэлэн мөнгөгүй бол 7-30 хоногийн хугацаатай зээл өгдөг. Зээл өгсөн тохиолдолд төвөөс зөвшөөрөл аваад паданаар өгнө. 2016 оны 05 сарын 18-ны өдөр манайхаас Нарлаг дэлгүүр бараа зээлж авсан. 2016 оны 05 сарын 25-ын өдөр мөнгө бэлэн болсон гэж надад хэлэн. Би ажил үүргийн хуваарийн дагуу ажлаа хийдэг. 2016 оны 05 сарын 25-ны өдөр Нарлаг дэлгүүрт очиж мөнгө авах өдөр биш байсан. 2016 оны 05 сарын 26-ын өдөр мөнгөө авах гээд очих үед мөнгө ингээд алдчихлаа байхгүй гэж байсан гэв.

Гэрч Т.Наранцэцэг шүүхийн хэлэлцүүлэгт мэдүүлэхдээ: 2016 оны 05 сарын 25-ны өдөр 17 цаг өнгөрөөд орлого авах гээд явж байх үед Сийлэгмаатай таарсан. Надад зээл өгнө гэсэн гээд явж байсан. Би Сийлэгмаад та манай дэлгүүрийн тэнд байж бай би банкны гүйлгээ хаахаас өмнө мөнгөө аваад ирье гэж хэлээд явсан. Банк ороод буцаад ирэх үед Сийлэгмаа явсан байсан гэв.

Шүүхийн хэлэлцүүлэгт улсын яллагчийн хүсэлтээр: 10-рт хохирогч Дашдаваагийн мэдүүлэг, 16-рт Банзагахүүгийн мэдүүлэг, 17-рт гэрч Пүрэвцэрэнгийн мэдүүлэг, гэрч Хүрэлийн мэдүүлэг, Мягмаржавын мэдүүлэг 20-рт, Ганцэцэгийн мэдүүлэг 22-рт, Оюунцэцэгийн мэдүүлэг 24-рт, Бат-Эрдэнэ 25-рт Шоовдойхүү 26-рт мэдүүлэг, хохирогч Мөнх-Эрдэнийн мэдүүлэг 56-рт, Цэдэвсүрэнгийн мэдүүлэг, гэрч Н.Хүрэлийн мэдүүлэг, гэрч Баттулгын мэдүүлэг, шинжээчийн дүгнэлт 60-61-рт, хохирогч Чимэдцогзолын мэдүүлэг, Отгоны мэдүүлэг, гэрч Цэцэгмаагийн мэдүүлэг, гэрч Пүрэвжалын мэдүүлэг, гэрч Бандийн мэдүүлэг 96-рт, гэрч Банзрагчийн мэдүүлэг 97-рт, Хохирогч Сийлэгмаагийн мэдүүлэг, гэрч Мөнх-Эрдэнийн мэдүүлэг 2-р хавтаст 28-рт, гэрч Б.Энхбаатарын мэдүүлэг 31-32-рт, гэрч Цэвээндоржийн мэдүүлэг 33-34-рт, гэрч Наранцэцэгийн мэдүүлэг 36-рт, гэрч Ариунбаярын мэдүүлэг 37-рт, гэрч Д.Оюуны мэдүүлэг 40-рт, гэрч Отгоны мэдүүлэг 42-рт, мэдүүлгийг газар дээр шалгах ажиллагааны тэмдэглэл 6-7-рт, Цэрэндоржид Алтанзулын өгсөн мөнгө 30.000 төгрөг түүнийг цагдаагийн байгууллага хурааж авсан. Гэрч Чимэдцогзолын мэдүүлэг 205-рт, Даваадэлгэрийн мэдүүлэг 206-рт, гэрч Баярцэцэгийн мэдүүлэг 207-рт, гэрч Алтанцэцэгийн мэдүүлэг 208-рт, 221-рт шүүгдэгч Хүрэлд шүүх хуралдааны тов мэдэгдэж гарын үсэг зуруулсан баримт, хэргийг мөрдөн байцаалтад буцаасан шүүгчийн захирамж байгаад үзлэг хийж шинжлэн судлав.

Шүүгдэгчийн өмгөөлөгч Д.Ариун-Эрдэнийн хүсэлтээр: 2-р хавтаст 205-рт гэрч Чимэдцогзолын мэдүүлэг, 6-рт Даваадэлгэрийн мэдүүлэг, 207-рт гэрч Баярцэцэгийн мэдүүлэг, гэрч Алтанцэцэгийн мэдүүлэг, 1-р хавтас 173-рт ял шалгуулах хуудас 3-р хавтаст 4-рт шүүгчийн захирамж зэрэг нотлох баримтад үзлэг хийж шинжлэн судлав.

Шүүгдэгчийн өмгөөлөгч Б.Болормаагийн хүсэлтээр: 2-р хавтас 10-11-рт эд зүйл хураан авсан тэмдэглэл, 16-рт эд зүйл хурааж авсан тэмдэглэл, 17-рт эд зүйл хүлээлгэн өгсөн тэмдэглэл, 1-р хавтаст 27-рт Нарлаг дэлгүүрийн худалдан авалт хийсэн баримт, 92,93,98-рт Г.Алтанзулийн хувийн байдлыг тодруулсан байцаалт зэрэг нотлох баримтад үзлэг хийж шинжлэн судлав.

Шүүгдэгчийн өмгөөлөгч Ж.Мөнхнасангийн хүсэлтээр: 1-р хавтас 6-рт эд зүйл хүлээлгэн өгсөн тэмдэглэл, 33-рт эд зүйлийн үнэлгээ, 95-рт гэрч Батхишигийн мэдүүлэг, 144-рт ял шалгах хуудас, 2-р хавтас 132-134-рт тодорхойлолтууд, 137,139-рт хохирогч Мөнх-Эрдэнийн тодорхойлолт, Бавуугарьдын тодорхойлолт зэрэг нотлох баримтад үзлэг хийж шинжлэн судлав.

Шүүгдэгч  З.Сумъяабазар, Н.Хүрэл, Г.Алтанзул нар нь 2016 оны 03 дугаар сарын 31-ний өдөр архи согтууруулах ундааны зүйл хэрэглэсэн үедээ бүлэглэн  Говь-Алтай аймгийн Есөнбулаг сумын Баянхайрхан баг 6-56 тоотод байрлах Банзрагчийн гэрт хууль бусаар нэвтэрч Хайсэнсэ маркын 32 инчийн телевизор, дунд үеийн цагаан өнгийн хаш хөөрөг зэргийг хулгайлж, хохирогч Д.Чимэдцогзолд 730.000 төгрөгийн хохирол учруулсан болох нь яллах өмгөөлөх талуудын хүсэлтээр шүүхийн хэлэлцүүлэгт хэлэлцэгдсэн дээрх нотлох баримтууд, хохирогч Д.Чимэдцогзолын шүүхийн хэлэлцүүлэгт мэдүүлсэн….2016 оны 5 сарын 30-ны өдөр манай хүн Жаргалан сум явсан.Би тэр шөнө гэртээ хоноогүй. Буурал ээжийнд хоноод маргааш нь 18 цагийн үед гэртээ очих үед гэрийн цоожийг эвдсэн байсан. Найздаа хүүхдээ хүргэж өгөөд цагдаа дуудсан. Гэртээ ороход зурагт, аавын хөөрөг 2 байхгүй байсан. Ширээн доогуур архины шил байсан ...гэх мэдүүлэг, иргэний нэхэмжлэгч Б.Отгоны ...2016 оны 3 дугаар сарын 31-ний орой аажуу болж байсан, яг цагаа сайн мэдэхгүй байна Зул гэдэг зүс таних залуу нэг намхан залуутай орж ирээд тэр танихгүй залуу нь надад хэлэхдээ манай эхнэр хөдөө явчихсан юм, танай дэлгүүрээс юм авах гэсэн юм тэгээд барьцаанд нь телевизор тавья 10 хоноод авчихъя гээд гуйгаад байсан тэгээд надад хэлэхдээ найзуудтайгаа гэртээ сууж байгаа юм гээд архи, пиво, чихэр, сүү гэх мэт зүйл аваад 70000 төгрөг болсон, таксины мөнгө бэлнээр өгчих гээд 2000 төгрөг нэмж аваад явсан юм...гэх мэдүүлэг, гэрч Ч.Бандийн мөрдөн байцаалтын шатанд өгсөн...3 залуу нэг 32 инчийн том нимгэн хар зурагт барьж гарч ирээд суусан тэгээд уруугаа яваад 17-р байрны үүдэнд очоод зогссон чинь 1 залуу зурагтаа бариад буусан тэгээд доод талын дэлгүүрлүү нь барьж ороод зурагтаа үлдээгээд хайрцаг дотор архи дарс хийсэн бололтой 2 том пиво барьчихсан гараад ирсэн. Тэгээд Дуган хад буудалд хүргүүлсэн..гэх мэдүүлэгүүдээр,

Шүүгдэгч З.Сумъяабазар нь 2015 оны 11 дүгээр сарын 18-ны өдөр хохирогч Т.Бавуугарьдын Самсунг Эс-2 маркын гар утсыг, 2016 оны 01 дүгээр сарын 24-ний өдөр хохирогч Ж.Дашдаваагийн Айфоне 4-Эс маркын гар утсыг утсаар яриад өгье гэж хэлж хуурч, давтан үйлдлээр залилан мэхэлж авсан, мөн 2016 оны 02 дугаар сарын 29-ний өдрийн орой 16 цаг 30 минутын үед Говь-Алтай аймгийн Есөнбулаг сумын төвд Түмэн багт Бадмаараг-Алтай дэлгүүрийн гадаа согтууруулах ундааны зүйл хэрэглэсэн үедээ нийгмийн хэв журам зөрчиж догшин авирлаж танхайран хохирогч Ж.Мөнх-Эрдэнийг зодож бие мах бодид нь хөнгөн зэргийн гэмтэл учруулсан болох нь хохирогч Ж.Дашдаваагийн мөрдөн байцаалтын шатанд өгсөн...Тэр залуу утасаа өгч бай найз охиноо дуудах гэхээр нь би утасаа өгчихөөд дахин аяга угааж байгаад харсан чинь нөгөө хүмүүс яваад алга болсон байсан. Би өөрийн 99748895 гэсэн дугаарлуу залгасан чинь эхлээд дуудаад аваагүй тасарсан, дараа нь дахин залгасан чинь өмнөөс тасалсан, гурав дахь удаа залгасан чинь холбогдох боломжгүй гэж хэлсэн, тэгээд л утасаа алдчихсан ...гэх мэдүүлэг, хохирогч Т.Бавуугарьдын мөрдөн байцаалтын шатанд өгсөн ...Сумъяабазар намайг утсаа өгч байгаад нэг яриад өгье гэж хэлээд миний утасыг аваад яриад нэгдсэн эмнэлэгрүү яваад орчихсон. Би ангийхаа Мягмаржав гэдэг хүүхэдтэй 30 орчим минут хүлээгээд Сумъяабазар гарч ирээгүй болохоор нь Мягмаржавын утаснаас өөрийнхөө 99535884 гэсэн дугаарлуу залгаад ярьсан чинь би хүүхэдтэй уулзаж байна гэхээр нь би сургууль дээр очоод хүлээж байя чи аваад очоорой энэ дугаарлуу залга гэж хэлээд би сургуульруу явсан. Очоод хүлээсэн боловч Сумъяабазар нь ирээгүй би өөрөө залгаж үзсэн чинь миний утас холбогдох боломжгүй байсан...гэх мэдүүлэг, иргэний нэхэмжлэгч Д.Банзагахүүгийн мөрдөн байцаалтын шатанд өгсөн...С.Бат-Эрдэнэ утсаар яриад манай найз гар утас зарах гэж байгаа юм та худалдаад аваач гэж хэлсэн, надад 150000 төгрөгөөр зарна гэхээр нь би 100000 төгрөг байна гэж хэлсэн. Бат-Эрдэнэ тэр утсыг манайд аваачиж өгчихөөд надруу дахиад яриад нэг данс өгсөн тэр дансанд би 100000 төгрөг хийсэн юм. Тэр өдрөөс хойш 2 хоногийн дараа би Говь-Алтай аймагт ирээд нөгөө утас хаана байна гэхэд энэ гээд хар өнгөтэй Iphone 4s маркийн гар утас байсан. Тэгээд удаагүй байхад цагдаа Барсбаатар ирээд надаас тэр утсыг хурааж авсан ...гэх мэдүүлэг, гэрч  Я.Пүрэвцэрэнгийн мөрдөн байцаалтын шатанд өгсөн...Сумъяабазар нь манай нөхөр Дашдаваагаас утсаа өгч бай ахаа би нэг ярьчихаад өгье гэж хэлээд утас аваад яриад гарч явсан. Тэгээд араас нь гарч ирсэн чинь алга болчихсон байсан.... гэх мэдүүлэг, хохирогч Ж.Мөнх-Эрдэнийн мөрдөн байцаалтын шатанд өгсөн....архи ууж дуусаад намайг ундаа аваад өг гэхээр нь би надад мөнгө байхгүй гэж хэлсэн чинь намайг алгадаж авсан, би буцаагаад алгадсан чинь хоёулаа гараад учраа олъё гээд Сумъяабазар түрүүлж гарсан. Намайг араас нь гарч ирсэн чинь довжооноос буух хооронд хавсарч унагаасан, тэгээд миний гар эвгүй болоод босох гэсэн чинь миний нүүрлүү гараараа цохьсон. Тэгээд би ухаан алдсан байсан...гэх мэдүүлэг, 2016 оны 3 сарын 3-ны өдрийн шинжээчийн ...Ж.Мөнх-Эрдэнийн биед тархи доргилт, баруун дээд, доод зовхи, баруун бугалга шуунд цус хуралт, дээд уруул, зүүн дээд зовхи, баруун зулай, хүзүүнд зулгаралт гэмтэл тогтоогдлоо. Дээрх гэмтэл нь мохоо зүйлийн үйлчлэлээр үүсгэгдэнэ. Гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах гэмтлийн хөнгөн зэрэгт хамаарна...гэх дүгнэлтээр,

 Шүүгдэгч Н.Хүрэл нь 2016 оны 09 дүгээр сарын 05-ны өдөр зарлагдсан анхан шатны шүүх хуралдаанд хүндэтгэн үзэх шалтгаангүйгээр ирээгүй, шүүн таслах ажиллагаанаас зориуд зайлсхийсэн болох нь гэрч Б.Даваадэлгэрийн мөрдөн байцаалтын шатанд өгсөн...Н.Хүрэл нь 2016 оны 9 дүгээр сарын 05-ны өдөр шүүх хурал болно гэдгийг мэдэж байсан. Шүүх хуралын дараа Чимэдцогзол бид 2 Хүрэлийг хайгаад явж байхад Сумъяабазартай таарсан, тэгээд Хүрэлийн талаар асуусан чинь нэг найзтайгаа хамт хөдөө явна, шөнөдөө амжаад ирнэ гээд миний гар утсыг явсан гэж хэлсэн...гэх мэдүүлэг, гэрч Д.Чимэдцогзолын  мөрдөн байцаалтын шатанд өгсөн... Хүрэл ах байнга л шүүх дээр очиж цагаа бүртгүүлдэг учраас шүүх хуралдаан 2016 оны 9 дүгээр сарын 05-ны өдөр болно гэдгийг сайн мэдэж байсан...гэх мэдүүлэг, гэрч Ц.Баярцэцэгийн мөрдөн байцаалтын шатанд өгсөн... Н.Хүрэлд шүүх хурал 2016 оны 9 дүгээр сарын 05-ны өдөр болно гэдэг товыг 2016 оны 8 дугаар сарын 31-ний өдөр танилцуулсан. Шүүх хуралдааны товыг танилцуулахдаа би өөрийн биеэр танилцуулаад гарын үсэг зуруулсан юм...гэх мэдүүлэг, 2-р хавтас хэргийн 174-р хуудсанд байгаа зарлан дуудах хуудас хүлээн авсан тухай баримт, 2-р хавтас хэргийн 194-р хуудсанд байгаа Говь-Алтай аймаг дахь Цагдаагийн газрын 2016 оны 9 дүгээр сарын 07-ны өдрийн Н.Хүрэлийг шүүхэд албадан хүргүүлсэн тухай албан тоотоор,

Шүүгдэгч  Г.Алтанзул нь 2016 оны 05 дугаар сарын 25-наас 26-нд шилжих шөнө давтан үйлдлээр “Нарлаг” хүнсний дэлгүүрт хууль бусаар нэвтэрч бэлэн мөнгө, эд зүйл хулгайлж иргэн Ш.Сийлэгмаад 1166500 мянган төгрөгийн хохирол учруулсан болох нь хохирогч Ш.Сийлэгмаагийн мөрдөн байцаалтын шатанд өгсөн...Шөнө унтаж байгаа 04 цаг өнгөрөөгөөд босч бие засаад гэртээ орж ирээд хэвтэж байтал тар гэх төмрийн чимээ гарсан. Дахиад чимээ чагнатал ямар нэгэн чимээ гараагүй. Тэгээд өглөө 08 цаг арай болоогүй байхад манай хүр дүү Дандар тухайн шөнө манайд хоносон байснаа босоод хадам ээжийнд очих гээд машинаа асааж гараад дэлгүүрийн урдуур өнгөртөл манай дэлгүүрийн цонхны төмөр хаалтыг татаад хөшөөд порчиг онгорхой байсныг хараад буцаж ирээд үзтэл дэлгүүрлүү хулгай орсон байсан. Тэгэхээр нь дэлгүүрлүү орж үзэлгүйгээр цагдаа дуудсан.. гэх мэдүүлэг, эд мөрийн баримтаар хураагдсан СD дэх бичлэг, хэрэг учралын газар үзлэг хийсэн тэмдэглэл, гэрэл зургийн үзүүлэлтүүд, бэлэн мөнгө хураан авсан тогтоолууд болон гэрч нарын мэдүүлэгүүд болон  яллах, өмгөөлөх талуудын хүсэлтээр шүүхийн хэлэлцүүлэгт хэлэлцэгдсэн дээрх нотлох баримтууд, хавтаст хэрэгт авагдсан бусад нотлох баримтуудаар тус тус нотлогдон тогтоогдож байна гэж шүүх дүгнэлээ.        

Шүүгдэгч Г.Алтанзул, З.Сумъяабазар, Н.Хүрэл нарт холбогдох үйлдлийг Говь-Алтай аймгийн Прокурорын газраас зүйлчилж ирүүлсэн зүйлчлэл зөв байх тул шүүхээс З.Сумъяабазарыг бусдын эд хөрөнгийг давтан үйлдлээр залилан мэхэлж авсан, бусдыг илтэд үл хүндэтгэн, нийгмийн хэв журмыг ноцтой зөрчиж, догшин авирлаж танхайрсан, бусдын эд хөрөнгийг бүлэглэж хулгайлах гэмт хэрэг үйлдсэн гэм буруутайд, шүүгдэгч Г.Алтанзулыг бусдын эд хөрөнгийг бүлэглэж, давтан үйлдлээр хулгайлах гэмт хэрэг үйлдсэн гэм буруутайд,  шүүгдэгч Н.Хүрэлийг бусдын эд хөрөнгийг бүлэглэж хулгайлсан, шүүн таслах ажиллагаанаас зориуд зайлсхийсэн гэмт хэрэг үйлдсэн үйлдсэн гэм буруутайд тус тус тооцож ял шийтгэл оногдуулах үндэслэлтэй байна үзэв.

Шүүгдэгч  Г.Алтанзулын өмгөөлөгч Б.Болормаагийн шүүх хуралдаанд гаргасан ....Г.Алтанзул нь хохирогч Сийлэгмаагийн дэлгүүрээс 287000 төгрөг авсан гэж ярьдаг боловч  хохирогч Сийлэгмаа нь 1000000 гаруй төгрөг алдсан гэдэг, хохирол бодит байдлаар тогтоогдоогүй тухайн дэлгүүрт бараа нийлүүлдэг газрын паданууд хавтаст хэрэгт байхгүй, Сийлэгмаагийн дэлгүүрт сарын сүүлд 1600000 төгрөгний орлого орох талаар тодорхойгүй байх тул хэргийг нэмэлт мөрдөн байцаалтанд буцааж өгнө үү ...гэсэн хүсэлтийг шүүх хүлээн авах үндэслэлгүй гэж үзлээ.

Учир нь Г.Алтанзул нь хохирогч Сийлэгмаагийн дэлгүүр хууль бусаар нэвтрэн орж 1166500 төгрөгний хохирол учруулсан болох нь хохирогч Ш.Сийлэгмаагийн мөрдөн байцаалтын шатанд мэдүүлсэн дээрхи мэдүүлэг, шүүх хуралдаанд гэрчээр мэдүүлэг өгсөн Т.Наранцэцэгийн ...2016 оны 5 дугаар сарын 25-ны өдөр Сийлэгмаа нь зээлсэн барааныхаа 593000 төгрөг өгөх ёстой байснаа өгөх гээд манай ажил дээр ирсэн гэтэл би тэр үед ажлаасаа гарч таараад банкны гүйлгээ хаахаас өмнө явчихаад ирье хүлээж бай гэж хэлээд  буцаад иртэл Сийлэгмаа явчихсан. Тэгээд маргааш нь Сийлэгмаа эгч өөрөө манай дэлгүүрт шөнө хулгай орчихлоо тэгээд чамд өгөх гэж байсан мөнгө алга болсон хэд хоног хүлээж байгаа тэгж байгаад өгье гэж хэлсэн. Ер нь зээл аваад найдвартай төлдөг..гэх мэдүүлэг, гэрч Ц.Ариунбаярын шүүхийн хэлэлцүүлэгт өгсөн...2016 оны 5 сарын 18-ны өдөр манайхаас Нарлаг дэлгүүр бараа зээлж авсан. 2016 оны 5 сарын 25-ны өдөр мөнгө бэлэн болсон гэж надад хэлсэн. Би ажил үүргийн хуваарийн дагуу ажлаа хийдэг. 2016 оны 5 сарын 25-ны өдөр Нарлаг дэлгүүр орж мөнгө авах өдөр биш байсан. 2016 оны 5 сарын 26-ны өдөр мөнгө авах гээд очиход мөнгө ингээд алдчихлаа байхгүй гэж байсан.442800 төгрөг авах ёстой байсан юм. Надтай үдээш хойш утсаар ярьсан би тэр өдөр нь очиж чадаагүй маргааш нь очсон. Тэгээд сарын сүүлээр мөнгөө өгсөн...гэх мэдүүлэг, 2016 оны 5 сарын 26-ны өдрийн бэлэн мөнгө хураан авсан тэмдэглэлүүд, эд мөрийн баримтаар хураан авсан CD-нд байгаа бичлэг зэрэг нотлох баримтуудаар нотлогдож байна гэж дүгнэв. Өөрөөр хэлбэл хохирогч Ш.Сийлэгмаагийн дэлгүүрт Ц.Ариунбаярт өгөх байсан 593000,  Т.Наранцэцэгт нар өгөх байсан  442800 төгрөг байсан болох нь тогтоогдож байна.

Шүүгдэгч Н.Хүрэлийн өмгөөлөгч Д.Ариун-Эрдэнийн шүүх хуралдаанд гаргасан...Эрүүгийн хуулийн 261 дүгээр зүйл ангийг хүлээн зөвшөөрөхгүй байна. Н.Хүрэл нь цагаа бүртгүүлж байгаад амжаад ирнэ гэж бодож хөдөө яваад амжиж ирээгүй. Цагдаагийн байгууллага Н.Хүрэлийг албадан авч ирүүлээгүй. Би Даваадэлгэртэй яриад Н.Хүрэлийг ирж цагаа бүртгүүл гэж хэлэх үед 14 цагт өөрөө ирсэн. Түүнээс энэ хүнийг эрэн сурвалжилсан хайсан зүйл байгаагүй. Шүүн таслах ажиллагаанаас зориудаар зайлсхийсэн гэж үзэхгүй тул хэргийг хэрэгсэхгүй болгож өгнө үү.. гэсэн хүсэлтийг шүүх хүлээн авах үндэслэлгүй байна.

Шүүгдэгч Н.Хүрэл нь 2016 оны 9 дүгээр сарын 5-ны өдөр зарлагдсан шүүх хуралдааны товыг мэдсээр байж ирээгүй тул  97 дугаартай шүүгчийн захирамжаар шүүх хуралдааныг хойшлуулж шүүгдэгч Н.Хүрэлийг нэн даруй албадан ирүүлэхийг Говь-Алтай аймаг дахь Цагдаагийн газарт даалгажээ. Улмаар 2016 оны 9 дүгээр сарын 7-ны өдөр Цагдаагийн газраас Н.Хүрэлийг шүүхэд албадан ирүүлж 98 дугаартай  шүүгчийн захирамжаар цагдан хорих таслан сэргийлэх арга хэмжээ авсан болох нь 2016 оны 9 дүгээр сарын 5-ны өдрийн шүүх хуралдааны тэмдэглэл, 2-р хавтаст хэргийн 174-р хуудсанд байгаа зарлан дуудах хуудасыг хүлээн авсан тухай баримт, Н.Хүрэлийг албадан ирүүлсэн тухай Цагдаагийн газрын 2016 оны 9 сарын 7-ны өдрийн 33/2443 дугаартай албан тоот, хавтаст хэрэгт авагдсан гэрч нарын мэдүүлэгүүдээр нотлогдон тогтоогдож байна. Түүнчлэн   шүүгдэгч Н.Хүрэл нь 2016 оны 5 дугаар сарын 31-ний өдөр зарлагдаж байсан шүүх хуралдаанд мөн хүндэтгэн үзэх шалтгаангүйгээр ирээгүйн улмаас цагдан хорих таслан сэргийлэх арга хэмжээ авагдаж байсныг дурьдах нь зүйтэй байна.

Шүүх шүүгдэгч З.Сумъяабазарыг бусдын эд хөрөнгийг давтан үйлдлээр залилан мэхэлж авсан, архи согтууруулах ундааны зүйл хэрэглэсэн үедээ бусдын эд хөрөнгийг бүлэглэж хулгайлсан, мөн согтуугаар бусдыг илтэд үл хүндэтгэн нийгмийн хэв журмыг бүдүүлэгээр зөрчиж догшин авирлаж танхайрсан гэмт хэрэг үйлдсэнийг Эрүүгийн хуулийн 56 дугаар зүйлийн  56.1.1, 56.1.10 дахь хэсгүүдэд заасныг баримтлан хүндрүүлэх нөхцөл байдалд тооцов. Түүнчлэн үйлдсэн гэмт хэрэгтээ чин санаанаасаа гэмшээгүй нь түүний шүүх хуралдаанд мэдүүлж байгаа мэдүүлэг болон хувийн байдлаар тогтоогдсон, мөн иргэний нэхэмжлэгч Банзагахүүд 100000 төгрөг төлөөгүйг  гэмт хэрэг үйлдэж учруулсан хохирлоо сайн дураараа нөхөн төлсөн гэж үзэхээргүй байх тул хөнгөрүүлэх нөхцөл байдал тогтоогдохгүй байна гэж үзээд  ял оногдуулахдаа харгалзаж үзэв.

Шүүх шүүгдэгч Н.Хүрэлийг гэмт хэрэг давтан үйлдсэнийг  Эрүүгийн хуулийн 56 дугаар зүйлийн 56.1.1 дэх хэсэгт заасныг баримтлан хүндрүүлэх , гэмт хэрэг үйлдэж учруулсан хохирлоо сайн дураараа нөхөн төлсөнийг Эрүүгийн хуулийн 55 дугаар зүйлийн 55.1.3 дахь хэсэгт заасныг баримтлан хөнгөрүүлэх нөхцөл байдалд тус тус тооцож, улмаар үйлдсэн гэмт хэрэгтээ чин санаанаасаа гэмшээгүй нь шүүх хуралдаанд мэдүүлж байгаа мэдүүлэг болон түүний хувийн байдлаар тогтоогдож байх тул ял оногдуулахдаа харгалзаж үзэж оногдуулсан ялыг биечлэн эдлүүлэх нь зүйтэй гэж үзлээ. 

 Шүүгдэгч Г.Алтанзул нь 2011 оны 6 сарын 28-ны өдрийн 01/А дугаартай шийтгэх тогтоолоор Эрүүгийн хуулийн 181 дүгээр зүйлийн 181.3, 145 дугаар зүйлийн 145.2 дахь хэсэгт зааснаар 7 жил 1 сарын хугацаагаар хорих ялаар шийтгүүлж чанга дэглэмтэй хорих ангид ял эдэлж байгаад 2015 оны 11 дүгээр сарын 9-ний өдөр Анхны ардчилсан сонгууль болж байнгын ажиллагаатай парламент байгуулагдсаны 25 жилийн ойг тохиолдуулан өршөөл үзүүлэх тухай хуулиар эдлээгүй үлдсэн хорих ялаас өршөөн хэлтрүүлж суллагдсан байх тул түүнийг ялтай байхдаа гэмт хэрэг үйлдсэнийг Эрүүгийн хуулийн 56 дугаар зүйлийн  56.1.12  дахь хэсэгт заасныг баримтлан хүндрүүлэх нөхцөл байдалд  тооцож, мөн гэмт хэрэг үйлдэж учруулсан хохирлоо сайн дураараа нөхөн төлөөгүй нь хавтаст хэрэгт авагдсан нотлох баримтууд, шүүхийн хэлэлцүүлэгт мэдүүлсэн мэдүүлэгүүдээр тогтоогдож байх тул түүнд оногдуулах хорих ялыг биечлэн эдлүүлэх нь зүйтэй гэж үзлээ.

Энэ хэрэгт эд мөрийн баримтаар “Их Монгол” гэсэн бичиглэлтэй архины шил 1 ширхэг хураагдсан, шүүгдэгч З.Сумъяабазар нь хохирогч Дашдаваа, Мөнх-Эрдэнэ, Чимэдцогзол нарт төлөх төлбөргүй, иргэний нэхэмжлэгч Банзагахүүд 100000 төгрөг төлөөгүй, шүүгдэгч Г.Алтанзул нь хохирогч Ш.Сийлдэгмаад 180000 төгрөгийн хохирол төлсөн, хохирогч Чимэдцогзолд төлөх төлбөргүй, Г.Алтанзул, З.Сумъяабазар нарын иргэний цахим үнэмлэх шүүхэд ирээгүй, шүүгдэгч нараас гаргуулах байцаан шийтгэх ажиллагааны зардалгүй зэргийг тус тус дурьдах нь зүйтэй байна.

Шүүгдэгчийн З.Сумъяабазарын өмгөөлөгч Мөнхнасангийн шүүх гаргасан ...З.Сумъяабазар нь хохирогч Дашдаваагийн гар утасны үнийг бүрэн төлж барагдуулсан тул ажиллагаагүй болсон гэх айфоне 4эс гар утсыг Дашдаваагаас авч шүүгчдэгч З.Сумъяабзарт буцаан олгож өгнө үү ...гэсэн хүсэлтийг хүлээн авах үндэслэлтэй гэж үзлээ.

Мөн 2016 оны 4 сарын 8-ны өдрийн эд хөрөнгө битүүмжлэх тогтоолоор битүүмжилсэн шүүгдэгч Г.Алтанзулын унаж явсан Хенсим маркын цэнхэр өнгийн мотоцикль нь иргэн Т.Гантулгын эзэмшилийнх бөгөөд шүүгдэгч нар нь бусдын эд зүйлийг хулгайлах гэмт хэрэг үйлдэхдээ уг мотоциклийг унаж яваагүй болох нь тогтоогдож байх тул дээрхи эд хөрөнгийг битүүмжлэлээс чөлөөлөх нь зүйтэй байна.

    Эрүүгийн байцаан шийтгэх хуулийн 283, 286, 294, 297, 298 дугаар зүйлүүдэд заасныг удирдлага болгон ТОГТООХ нь:

1. Шүүгдэгч Их мянган овогт Зоригтын Сумъяабазарыг бусдын эд хөрөнгийг давтан үйлдлээр залилан мэхэлж авах, бусдыг илтэд үл хүндэтгэн, нийгмийн хэв журмыг ноцтой зөрчиж, догшин авирлаж танхайрах, бусдын эд хөрөнгийг бүлэглэж хулгайлах гэмт хэрэг үйлдсэн гэм буруутайд, шүүгдэгч Номгон овогт Гансүхийн Алтанзулыг бусдын эд хөрөнгийг бүлэглэж давтан үйлдлээр хулгайлах гэмт хэрэг үйлдсэн гэм буруутайд, шүүгдэгч Шаншин овогт Нэргүйн Хүрэлийг бусдын эд хөрөнгийг бүлэглэж хулгайлах, шүүн таслах ажиллагаанаас зориуд зайлсхийсэн гэмт хэрэг үйлдсэн гэм буруутайд тус тус тооцсугай.

2. Шүүгдэгч З.Сумъяабазарыг Эрүүгийн хуулийн 148 дугаар зүйлийн 148.2 дахь хэсэгт зааснаар эд хөрөнгийг хураахгүйгээр 2 жил 6 сарын хугацаагаар хорих, 145 дугаар зүйлийн 145.2 дахь хэсэгт зааснаар эд хөрөнгийг хураахгүйгээр 5 сарын хугацаагаар баривчлах, 181 дүгээр зүйлийн 181.2.1 дэх хэсэгт зааснаар 3 жил 2 сарын хугацаагаар хорих ялаар, шүүгдэгч Г.Алтанзулыг Эрүүгийн хуулийн 145 дугаар зүйлийн 145.2 дахь хэсэгт зааснаар эд хөрөнгийг хураахгүйгээр 2 жил 6 сарын хугацаагаар хорих ял, шүүгдэгч Н.Хүрэлийг Эрүүгийн хуулийн 145 дугаар зүйлийн 145.2 дахь хэсэгт зааснаар эд хөрөнгийг хураахгүйгээр 5 сарын хугацаагаар баривчлах, 261 дүгээр зүйлийн 261.1 дэх хэсэгт зааснаар 1 жил 4 сарын хугацаагаар хорих ялаар тус тус шийтгэсүгэй.

3. Эрүүгийн хуулийн 57 дугаар зүйлийн 57.1 дэх хэсэгт зааснаар З.Сумъяабазарт Эрүүгийн хуулийн 181 дүгээр зүйлийн 181.2.1 дэх хэсэгт зааснаар оногдуулсан 3 жил 2 сарын хорих ялд нь Эрүүгийн хуулийн 148 дугаар зүйлийн 148.2 дахь хэсэгт зааснаар оногдуулсан 2 жил 6 сарын хорих ял, 145 дугаар зүйлийн 145.2 дахь хэсэгт зааснаар оногдуулсан 5 сарын хугацаагаар баривчлах ялын заримыг нэмж нэгтгэн биечлэн эдлэх ялыг 3 жил 4 сарын хугацаагаар хорих ялаар, ялтан Н.Хүрэлд Эрүүгийн хуулийн 261 дүгээр зүйлийн 261.1 дэх хэсэгт зааснаар оногдуулсан 1 жил 4 сарын хорих ялд нь 145 дугаар зүйлийн 145.2 дахь хэсэгт зааснаар оногдуулсан 5 сарын хугацаагаар баривчлах ялыг багтааж жинхэнэ эдлэх ялыг 1 жил 4 сарын хугацаагаар тус тус тогтоосугай.

4. Эрүүгийн хуулийн 52 дугаар зүйлийн 52.5 дахь хэсэгт зааснаар ялтан З.Сумъяабазарт оногдуулсан 3 жил 4 сарын хугацаагаар хорих ялыг, ялтан Н.Хүрэлд оногдуулсан 1 жил 4 сарын хугацаагаар хорих ялыг, ялтан Г.Алтанзулд оногдуулсан 2 жил 6 сарын хугацаагаар хорих ялыг тус тус жирийн дэглэмтэй эрэгтэйчүүдийн хорих ангид эдлүүлсүгэй.

5. Эрүүгийн хуулийн 59 дүгээр зүйлийн 59.1 дэх хэсэгт зааснаар ялтан З.Сумъяабазарын цагдан хоригдсон 74 хоног, ялтан Н.Хүрэлийн цагдан хоригдсон 120,  ялтан Г.Алтанзулын цагдан хоригдсон 119 хоногийг ял эдэлсэн хугацаанд нь оруулан тоолсугай.

6. Ялтан Г.Алтанзул, З.Сумъяабазар, Н.Хүрэл нарыг цагдан хорьж ял эдлэх хугацааг энэ өдрөөс эхлэн тоолсугай.

7. Эрүүгийн байцаан шийтгэх хуулийн 88 дугаар зүйийн 88.1.3, 88.1.7 дахь хэсгүүдэд зааснаар эд мөрийн баримтаар хураагдсан “Их Монгол” гэсэн нэртэй архины шилийг устгаж, CD-г хэргийн хадгалах хугацаа дуустал хэрэгт үлдээсүгэй.

8. Эрүүгийн байцаан шийтгэх хуулийн 134 дүгээр зүйлийн 134.10 дахь хэсэгт зааснаар мөрдөн байцаагчийн тогтоолоор битүүмжилсэн 152100248 моторын дугаартай, Бүгд Найрамдах Хятад Ард улсад үйлдвэрлэгдсэн цэнхэр өнгийн мотоциклийг битүүмжлэлээс чөлөөлсүгэй.

9. Иргэний хуулийн 497 дугаар зүйлийн 497.1 дэх хэсэгт зааснаар ялтан Г.Алтанзулаас 986500 төгрөгийг гаргуулж хохирогч Ш.Сийлэгмаад, ялтан З.Сумъяабазараас 100000 төгрөг гаргуулж иргэний нэхэмжлэгч Банзагахүүд тус тус олгож, хохирогч Ж.Дашдаваагаас ажиллагаагүй болсон гэх айфоне 4эс гар утсыг авч ялтан З.Сумъяабазарт буцаан олгосугай.

10.  Энэ хэрэгт ялтан нараас гаргуулах байцаан шийтгэх ажиллагааны зардалгүй, ялтан З.Сумъяабазар нь хохирогч Ж Дашдаваа, Ж.Мөнх-Эрдэнэ, Д.Чимэдцогзол нарт төлөх төлбөргүй, ялтан Г.Алтанзул нь хохирогч Ш.Сийлдэгмаад 180000 төгрөгийн хохирол төлсөн, хохирогч Д.Чимэдцогзолд төлөх төлбөргүй, ялтан Г.Алтанзул, З.Сумъяабазар нарын иргэний цахим үнэмлэх шүүхэд ирээгүй  зэргийг тус тус дурдсугай.

11. Ялтан Н.Хүрэлийн иргэний цахим үнэмлэхийг шийтгэх тогтоол хүчин төгөлдөр болмогц Шүүхийн шийдвэр гүйцэтгэх албанд шилжүүлсүгэй.

12.Шийтгэх тогтоол хүчин төгөлдөр болтол ялтан Г.Алтанзул, З.Сумъяабазар, Н.Хүрэл нарыг цагдан хорьсугай.  

13.Эрүүгийн байцаан шийтгэх хуулийн 299 дүгээр зүйлийн 299.3 дахь хэсэгт зааснаар шийтгэх тогтоолыг танилцуулан сонсгосноор хүчинтэй болохыг дурдсугай.

14. Эрүүгийн байцаан шийтгэх хуулийн 303 дугаар зүйлийн 303.1, 304 дүгээр зүйлийн 304.1 дэх хэсэгт зааснаар шийтгэх тогтоолыг гардуулснаас хойш 14 хоногийн дотор ялтан, хохирогч, тэдгээрийн өмгөөлөгч, хууль ёсны төлөөлөгч Говь-Алтай аймгийн Эрүү, Иргэний хэргийн хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг тайлбарласугай.

15. Эрүүгийн байцаан шийтгэх хуулийн 306 дугаар зүйлийн 306.1 дэх хэсэгт зааснаар шийтгэх тогтоолд давж заалдах гомдол, эсэргүүцэл бичигдсэн тохиолдолд шийтгэх тогтоолын биелэлтийг түдгэлзүүлж, шүүгдэгч нарт авсан цагдан хорих  таслан сэргийлэх арга хэмжээг хэвээр үргэлжлүүлсүгэй.                  

 

ДАРГАЛАГЧ, ШҮҮГЧ                             Ч.МӨНХТУЯА