МОНГОЛ УЛСЫН НЭРИЙН ӨМНӨӨС

 

         Орхон аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Ж.Байгалмаа даргалж

 

         Улсын яллагч Ч.Сэлэнгэ

         Шүүгдэгч Б.Баярбат

         Шүүгдэгчийн өмгөөлөгч О.Сарантуул

         Шүүх хуралдааны нарийн бичгийн дарга О.Шинэцэцэг нарыг оролцуулан тус шүүхийн танхимд нээлттэй хийсэн шүүх хуралдаанаар

 

         Орхон аймгийн Прокурорын газраас Эрүүгийн хуулийн 145 дугаар зүйлийн 145.2-т заасан гэмт хэрэгт яллах дүгнэлт үйлдэж ирүүлсэн Б.Баярбатад холбогдох эрүүгийн 201614000501 тоот хэргийг хянан хэлэлцэв.

 

         Биеийн байцаалт: Монгол улсын иргэн 1993 оны 09 дүгээр сарын 21-ний өдөр Булган аймгийн Бүрэгхангай суманд төрсөн, 23 настай, эрэгтэй, бүрэн бус дунд боловсролтой, мэргэжилгүй, эрхэлсэн ажилгүй, ам бүл 3, ээж, хүүгийн хамт Булган аймгийн Бүрэгхангай сумын 2-р багт  оршин суух, гавъяа шагналгүй, урьд нь 2012 оны 06 сарын 04-ний өдрийн 49 дугаартай шийтгэх тогтоолоор Эрүүгийн хуулийн тусгай ангийн 148 дугаар зүйлийн 148.2, 153 дугаар зүйлийн 153.1-д зааснаар 2 жил 2 сарын хорих ял оногдуулж мөн хугацаагаар тэнсэж хянан хагалзсан, 2014 оны 07 сарын 29-ны өдрийн 69 дугаартай шийтгэх тогтоолоор Эрүүгийн хуулийн тусгай ангийн 145 дугаар зүйлийн 145.2-д зааснаар 2 жилийн хорих ялаар шийтгүүлж, 2015 оны 07 сарын 07-нд тэнсэн суллагдсан хэрэг хариуцах чадвартай гэх Сахалт овогт Баасангийн Баярбат /РД: ГВ 93092111/

 

         Шүүгдэгч Б.Баярбат нь 2016 оны 11 сарын 06-ны өдөр Орхон аймаг Баян-Өндөр сумын Яргуйт багийн Хөтөлийн 3-б-19 тоотод оршин суух иргэн Батсоёмбын байшингийн цонхоор нэвтрэн орж 52 инчийн Самсунг маркийн ЛСД зурагт улаан өнгийн D8810 гэсэн бичигтэй гар утас, Шанель маркийн үнэртэй ус зэргийг хулгайлж 1.280.000 төгрөгийн хохирол учруулсан гэмт хэрэгт холбогдожээ.

 

                                                              ТОДОРХОЙЛОХ нь:

 

              Шүүхийн хэлэлцүүлэгт дараах нотлох баримтуудыг шинжлэн судлав. Үүнд:

 

- Шүүгдэгч Б.Баярбатын шүүхийн хэлэлцүүлэгт өгсөн: Би 2016 оны 11 сарын 06-ны өдөр найзындаа очихоор явж байгаад З-Б-ийн 19 тоот айлын хашаанд орж гэрээс нь телевизор, гар утас, үнэртэй ус зэргийг  хулгайлж гарч яваад баригдсан. Тэгээд цагдаагийн газарт очсон. Хулгайлсан эд зүйлээ буцааж өгсөн. Ажилгүй болохоор хулгай хийсэн. Хийсэн хэрэгтээ гэмшиж байна. Дахиж ийм хэрэг үйлдэхгүй гэсэн мэдүүлэг,

 

-Хохирогч Ж.Тунгалагтамирын мөрдөн байцаалтын шатанд өгсөн: ...Би алдсан эд зүйлээ бүгдийг нь буцаагаад авсан. Надад ямар нэгэн нэхэмжлэх зүйл байхгүй. Харин манай гэрт орсон хулгайчид хуулийн дагуу арга хэмжээ авч өгөхийг хүсч байна гэсэн мэдүүлэг /хх 17 ху/

 

-Гэрч Э.Мөнхсайханы  мөрдөн байцаалтын шатанд өгсөн: ...2016 оны 11 сарын 06-ны өдөр 15 цагийн орчим хариуцсан айлуудаар явж тогны бичилт хийсэн. Яргуйт багийн Хөтөлийн 3-б-19 тоотод оршин суух Ганчимэгийн хашааны гадаа ирэхэд танихгүй, өндөр нуруутай залуу хашааны үүдэнд ганцаараа зогсож байхаар нь танайх энд ирчихсэн юм уу гэхэд айл сураглаж явна гэж хэлсэн.  Би ойролцоо айлын тогны бичилтийг хийж байгаад эргээд нөгөө гудамж руугаа ороход  нөгөө залуу Ганчимэгийн хашаан дотор явж байхаар нь хулгайч юм болов уу гэж бодоод машин дотроосоо харж байхад Ганчимэгийн хашаан дотор байдаг Батсоёмбо гэдэг залуугийн байшингийн урд талын цонхоор хар өнгийн зурагт гаргаж байхыг хараад би цагдаад дуудлага өгсөн гэсэн мэдүүлэг /хх 18-р ху/

 

         - Гэрч Б.Батчимэгийн мөрдөн байцаалтын шатанд өгсөн: ...2016 оны 11 сарын 06-ны өдөр аав Баянмөнхийн гэр болох Их залуу багийн 3-а-08 тоотод байж байхад манай хажуу талын хашааны эмэгтэй Тунгалагтамир ирээд манай байшинд хулгай орчихсон байна, танай байшингийн цонхыг онгойлгочихсон байна гэж хэлсэн.
Би байшин дээрээ очоод үзэхэд ямар нэгэн зүйл алга болоогүй, цонхыг нь онгойлгочихсон  байсан гэсэн мэдүүлэг /хх 19 ху/

 

-Гэрч Х.Хишигдаваагийн мөрдөн байцаалтын шатанд өгсөн: ...2016 оны 11 сарын 07-ны өдөр ажил дээрээ байхад бэр эгч Тунгалагтамир ирээд байшинд хулгай орчихсон байна, хамт очоод ирэх үү гэхээр нь би хамт Цагдаагийн газар ирээд Тунгалагтамир эгчийн гэрт очсон. Тунгалагтамир эгч нөхөр хүүхдийн хамт 4-16-58 тоотод амьдардаг. Миний төрсөн ах Батсоёмбын эхнэр байгаа юм. Яргуйт багийн Хөтөлийн 3-б-19 тоот байшинд хүн байхгүй байсан. Тунгалагтамирын хамт байшинд очиход хар өнгийн 52 инчийн ЛСД дэлгэцтэй зурагт байхгүй байсан  гэсэн мэдүүлэг /хх 20ху/

 

         -Хэрэг учралын газарт нөхөн үзлэг хийсэн тэмдэглэл /хх 3-5 ху/

         -Гэрэл зургын үзүүлэлт /хх 6-7, 9 ху/

       -Эд зүйл хураан авсан тэмдэглэл /хх 8 ху/

       -Хураан авсан эд зүйлд үзлэг хийж, хүлээлгэн өгсөн тэмдэглэл /хх 10-12/

        -Ял шийтгэгдсэн эсэхийг шалгах хуудас /хх 41 ху/

        -Эд зүйлийн үнэлгээ /хх 23 ху/

        -Б.Баярбатыг сэжигтнээр тооцох тогтоол, сэжигтнээр байцаасан тэмдэглэл, ял сонсгон яллагдагчаар татах тогтоол, яллагдагчаар байцаасан тэмдэглэл /хх 36-37, 38-39 ху/ зэрэг болно.

 

Шүүхийн хэлэлцүүлгийн үед шинжилсэн нотлох баримтууд нь энэ хэрэгт хамааралтай, хуульд заасан журмаар цугларсан, хэрэг хянан шийдвэрлэхэд хангалттай байна гэж үзэв.   

          Шүүгдэгч Б.Баярбат нь 2016 оны 11 сарын 06-ны өдөр Орхон аймаг Баян-Өндөр сумын Яргуйт багийн Хөтөлийн 3-б-19 тоотод оршин суух иргэн Батсоёмбын байшингийн цонхоор нэвтрэн орж 52 инчийн Самсунг маркийн ЛСД зурагт, улаан өнгийн D8810 гэсэн бичигтэй гар утас, Шанель маркийн үнэртэй ус зэргийг хулгайлж, нийт 1.280.000 төгрөгийн хохирол учруулсан гэмт хэргийг үйлдсэн болох нь шүүхийн хэлэлцүүлэгт шүүгдэгчийн хэргээ хүлээн мэдүүлсэн мэдүүлэг болон хохирогч Ж.Тунгалагтамир /хх 17 ху/, гэрч Э.Мөнхсайхан /хх 18р ху/, Б.Батчимэг /хх 19 ху/, Х.Хишигдаваа /хх 20 ху/ нарын мэдүүлгүүд, хохирлын үнэлгээ /хх 23 ху/ зэрэг шүүхийн хэлэлцүүлэгт шинжлэн судлагдсан бусад бичгийн нотлох баримтуудаар хангалттай нотлогдон тогтоогдож байна.

 

              Эрүүгийн хуулийн тусгай ангийн 145 дугаар зүйлийн 145.2-т заасан гэмт хэргийн бүрэлдэхүүний шинжийг бүрэн хангаж байх тул шүүгдэгч Б.Баярбатыг бусдын орон байранд нэвтэрч эд хөрөнгийг хулгайлах гэмт хэргийг үйлдсэн гэм буруутайд тооцож, хуульд заасан баривчлах ялыг ял оногдуулах үндэслэлтэй гэж дүгнэв.

 

           Шүүгдэгч Б.Баярбат нь Булган аймгийн сум дундын шүүхийн 2012 оны 06 сарын 04-ний өдрийн 49 тоот шийтгэх тогтоолоор Эрүүгийн хуулийн тусгай ангийн 148 дугаар зүйлийн 148.2, 153 дугаар зүйлийн 153.1-д зааснаар 2 жил 2 сарын хорих ял оногдуулж, мөн хугацаагаар тэнсэж хянан харгалзсан, Сум дундын 4 дүгээр шүүхийн 2014 оны 07 сарын 29-ны өдрийн 69 дугаартай шийтгэх тогтоолоор Эрүүгийн хуулийн тусгай ангийн 145 дугаар зүйлийн 145.2-д зааснаар 2 жилийн хорих ялаар шийтгүүлж, Булган аймаг дахь Сум дундын эрүүгийн хэргийн анхан шатны шүүхийн 2015 оны 07 сарын 07-ны өдрийн 46 тоот шүүгчийн захирамжаар хорих яд эдлэхээс хугацааны өмнө тэнсэн суллаж, хянан харгалзах хугацааг 10 сараар тогтоосон байх бөгөөд уг хугацааг Анхны ардчилсан сонгууль болж байнгын ажиллагаатай парламент байгуулагдсаны 25 жилийн ойг тохиолдуулан Өршөөл үзүүлэх тухай хуулийн 6 дугаар зүйлийн 6.1.2 дахь хэсэгт зааснаар хэрэгсэхгүй болгож, харин Эрүүгийн хуулийн ерөнхий ангийн 78 дугаар зүйлийн 78.2.3-т заасан ялтай байдал арилаагүй байна гэж үзэв.

 

           Шүүх шүүгдэгчид ял оногдуулахдаа шүүгдэгчийн үйлдсэн хэрэгтээ чин санаанаасаа гэмшиж байгаа, хохирол төлбөргүй зэрэг байдлыг Эрүүгийн хуулийн ерөнхий ангийн 55 дугаар зүйлийн 55.1.3, 55.1.9 дэх хэсэгт зааснаар хөнгөрүүлэх нөхцөл байдалд тооцов.

 

           Энэ хэргийн улмаас хохирогч Ж.Тунгалагтамирт 1.280.000  хохирол учирсан бөгөөд мөрдөн байцаалтын шатанд хохирогч Ж.Тунгалагтамирт 52 инчийн хар өнгийн самсунг маркийн ЛСД зурагт, залгуур, удирдлага, улаан өнгийн D8810 гэсэн дугаартай гар утас, chanel гэсэн бичигтэй үнэртэй ус зэрэг эд зүйлийг буцаан өгсөн байх тул энэ шүүх хуралдаанаар шийдвэрлэх хохирол төлбөргүй байна.

 

            Шүүгдэгчийн цагдан хоригдсон 45 хоногийг түүний ял эдэлсэн хугацаанд оруулан тооцож, энэ хэрэгт хураагдсан эд мөрийн баримтгүй, битүүмжилсэн хөрөнгөгүй, түүний иргэний бичиг баримт шүүхэд ирээгүйг тус тус дурьдав.

 

Монгол Улсын Эрүүгийн байцаан шийтгэх хуулийн 283, 286, 294 дүгээр зүйлийн 294.2, 295, 296, 297, 298 дугаар зүйлүүдэд тус тус заасныг удирдлага болгон                                         

ТОГТООХ нь:

 

    1. Шүүгдэгч Сахалт овогт Баасангийн Баярбатыг бусдын орон байранд нэвтэрч эд хөрөнгийг хулгайлах гэмт хэргийг үйлдсэн гэм буруутайд тооцсугай.

2. Эрүүгийн хуулийн тусгай ангийн 145 дугаар зүйлийн 145.2-т зааснаар шүүгдэгч  Б.Баяртбатыг эд хөрөнгө хураахгүйгээр 4 /дөрөв/ сарын баривчлах ялаар шийтгэсүгэй.

3.  Эрүүгийн хуулийн ерөнхий ангийн  51 дүгээр зүйлийн 51.1-д зааснаар шүүгдэгч Б.Баярбатад оногдуулсан 4 сарын баривчлах ялыг тодорхой дэглэм бүхий байранд ганцаарчлан эдлүүлсүгэй.

4. Эрүүгийн хуулийн ерөнхий ангийн 59 дүгээр зүйлийн 59.1, 59.2-д зааснаар шүүгдэгч Б.Баярбатын цагдан хоригдсон 45 хоногийг түүний ял эдэлсэн хугацаанд оруулан тооцсугай.

5. Энэ хэрэгт хураагдсан эд мөрийн баримтгүй, битүүмжилсэн хөрөнгөгүй, шүүгдэгч бусдад төлөх төлбөргүй, түүний иргэний бичиг баримт шүүхэд ирээгүйг тус тус дурьдсугай.

6. Шийтгэх тогтоол хүчин төгөлдөр болтол шүүгдэгч Б.Баярбатад урьд авсан цагдан хорих таслан сэргийлэх арга хэмжээг хэвээр үргэлжлүүлж, түүний эдлэх ялыг энэ өдрөөс эхлэн тоолсугай.

     7. Шийтгэх тогтоол нь танилцуулан сонсгосноор хүчинтэй болох бөгөөд ялтан, хохирогч, тэдгээрийн өмгөөлөгч, хууль ёсны төлөөлөгч нар эс зөвшөөрвөл түүнийг гардуулснаас хойш 14 хоногийн дотор Орхон аймгийн Эрүүгийн хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй.

 

                   ДАРГАЛАГЧ ШҮҮГЧ                                          Ж.БАЙГАЛМАА