МОНГОЛ УЛСЫН НЭРИЙН ӨМНӨӨС

Увс аймаг дахь Захиргааны хэргийн анхан шатны шүүхийн шүүгч Д.Алтанцэцэг даргалан тус шүүхийн танхимд хийсэн шүүх хуралдаанаар,

Гомдол гаргагч: А.С-ын итгэмжлэгдсэн төлөөлөгч, Б.М,

Хариуцагч: Увс аймгийн Татварын хэлтсийн татварын улсын байцаагч Э.Х-д холбогдуулан гаргасан,

Увс аймгийн Татварын хэлтсийн улсын байцаагч Э.Х-ийн 2021 оны 05 сарын 11-ний өдрийн 0176463 дугаартай шийтгэлийн хуудсыг хүчингүй болгуулах тухай гомдол бүхий зөрчлийн хэргийг хянан хэлэлцэв.

Шүүх хуралдаанд: Гомдол гаргагч А.С, өмгөөлөгч Б.Цагцалмаа, шүүх хуралдааны нарийн бичгийн дарга Г.Алтанлхам нар оролцов.

ТОДОРХОЙЛОХ нь:

 Гомдол гаргагч А.С-ын итгэмжлэгдсэн төлөөлөгч Б.М шүүхэд ирүүлсэн гомдолдоо: “ А.С нь Увс аймгийн Ховд суманд 2020 оны 10 сард болсон орон нутгийн иргэдийн Төлөөлөгчдийн Хурлын төлөөлөгч сонгох сонгуульд нэр дэвшин оролцсон.Увс аймгийн Ардчилсан нам нь Ховд сумын Ардчилсан намыг дотоод дүрэм журмын хүрээнд шууд удирдлагаар хангах,тухайн намын нэрийн өмнөөс сонгуульд нэр дэвшиж байгаа тул нэгдсэн журмаар нэр бүхий 21 нэр дэвшигчийн дансны жагсаалтыг нэгтгэж,сумын Ардчилсан намын тогтоолыг үйлдүүлж,Увс аймгийн Төрийн аудитын газарт бүртгүүлэхийг хүсч 2020 оны 09 сарын 25-ны өдөр Ховд сумын Ардчилсан намаас фейсбүүкийн чатаар аймгийн Ардчилсан намд хүргүүлсэн. Аймгийн Ардчилсан нам ямар шалтгаанаар хоцруулсныг мэдэхгүй байна.

Тухайн хуулийн заалтад тухайн нэр дэвшигч заавал өөрийн биеэр бүртгүүлэх үүрэгтэй гэж заасан заалт байхгүй. Нэр дэвшигч миний бие нь хуулийн заалт зөрчсөн гэж үзвэл миний хууль бус ажиллагаанаас болж төрийн байгууллага,аж ахуйн нэгж,иргэн,хуулийн этгээд,нам,эвсэлд нэг ч төгрөгийн бодит хохирол учруулаагүй болно.

Иймд Увс аймгийн Татварын хэлтсийн татварын улсын байцаагч Э.Х-ийн 2021 оны 05 сарын 11-ний өдрийн 0176463 дугаартай шийтгэлийн хуудсыг хүчингүй болгож өгнө үү” гэжээ.

Гомдол гаргагч А.С шүүх хуралдаанд гаргасан тайлбартаа: “ Би 2020 онд Ховд сумын Ардчилсан намаас орон нутгийн сонгуульд нэр дэвшсэн.Нэр дэвшигч нар сонгуулийн зардлын дансаа бүртгүүлээгүй асуудалтай холбоотой Увс аймгийн Татварын хэлтэс манай суманд очиж ажилласан.Тухайн үед сонгуулийн зардлын дансаа нээлгээд Ховд сумын Ардчилсан намд дансны мэдээллээ хүлээлгэн өгсөн. Ховд сумын Ардчилсан намаас аймгийн Ардчилсан намд хүргүүлсэн.Аймгийн Ардчилсан нам яагаад Аудитын газарт бүртгүүлээгүйг би мэдэхгүй байна.Татварын хэлтсээс 10 сая төгрөгийн торгуулийн шийтгэл оногдуулсныг хүлээн зөвшөөрөхгүй байгаа тул гомдлыг шүүхэд гаргасан байгаа.Шийтгэлийн хуудсыг хүчингүй болгож өгнө үү” гэв.

Гомдол гаргагчийн өмгөөлөгч Б.Цагцалмаа шүүх хуралдаанд гаргасан тайлбартаа :” Аймгийн Ардчилсан нам сумдын Ардчилсан намыг удирдлагаар хангаж ажиллаж байсан.Сумын Ардчилсан нам нийт нэр дэвшигчдийн дансны мэдээллийг нэгтгээд Увс аймгийн Ардчилсан намын Хэрэг эрхлэх газрын дарга Г.Болор-Эрдэнэд 2020 оны 9 сарын 24-ний орой фейсбүүк хувь чатаар явуулсан байгаа.Аймгийн Ардчилсан нам дансны мэдээллийг хүлээн авсан.Хүлээн авсан дансны мэдээллийг Төрийн аудитын газарт хүлээлгэж өгөх үүрэгтэй байсан.А.С нь нээлгэсэн сонгуулийн зардлын дансандаа хандив хүлээн аваагүй,гүйлгээ хийгдээгүй тул зардлын тайлан гаргах боломжгүй талаараа Увс аймаг дахь Төрийн аудитын газарт өргөдлөө гаргаж өгсөн байгаа.Шийтгэлийн хуудас хуульд нийцээгүй тул шийтгэлийн хуудсыг хүчингүй болгох үндэслэлтэй ”гэв.

Хариуцагч татварын улсын байцаагч Э.Х шүүхэд ирүүлсэн тайлбартаа:” Увс аймгийн иргэдийн Төлөөлөгчдийн Хурлын 2020 оны ээлжит сонгуулийн Ховд сумын 4-р тойрогт Ардчилсан намаас нэр дэвшигч А.С нь сонгуулийн зардлын дансны дугаар,банкны нэрийг Увс аймаг дахь Төрийн аудитын газарт бүртгүүлээгүй гэх зөрчлийн талаар Увс аймаг дахь Төрийн аудитын газраас ирүүлсэн зөвлөмж,гомдол мэдээллийг 2021 оны 04 сарын 07-ны өдөр хүлээн авч Зөрчил шалган шийдвэрлэх тухай хуульд заасны дагуу тэмдэглэл үйлдэж зөрчил шалган шийдвэрлэх ажиллагаа явуулсан.

Холбогдогч А.С “би хуулийн хугацаанд дансаа нээлгээд сумын Ардчилсан намд өгсөн.Сумаас аймгийн Ардчилсан намд хүргүүлсэн.Аудитын байгууллагад хэзээ бүртгүүлснийг мэдэхгүй” гэж, гэрч Э.Түвшинжаргал “ 21 нэр дэвшигчийн дансны жагсаалтыг аймгийн Ардчилсан намын хэрэг эрхлэх газрын дарга Г.Болор-Эрдэнэд Facebook чатаар явуулсан” гэж мэдүүлсэн ,Г.Болор-Эрдэнэ Татварын хэлтэст өгсөн тайлбартаа “ Сумын намаас нэр дэвшигчдийн зардлын данс нээлгэх үйл ажиллагаа хуулийн хүрээнд зохион байгуулж нэгтгэсэн ба сүүлийн сумууд 9 сарын 28-нд ирүүлсэн тул хугацаа хэтэрсэн ч албан тоотын хамт аймгийн Аудитын газарт хүргүүлсэн боловч хугацаа хэтэрсэн гэсэн үндэслэлээр буцаасан” гэжээ.

Аймаг, нийслэл, сум, дүүргийн иргэдийн Төлөөлөгчдийн Хурлын сонгуулийн тухай хуулийн 50 дугаар зүйлийн 50.3-д зааснаар нэр дэвшигч нь сонгуулийн зардлын дансны дугаар,банкны нэрийг санал авах өдрөөс 20-оос доошгүй хоногийн өмнө төрийн аудитын салбар байгууллагад бүртгүүлэх үүрэгтэй гэж заасан ба Ардчилсан намд хүргүүлснийг Төрийн аудитын орон нутаг дахь салбар байгууллагад бүртгүүлсэн гэж үзэх үндэслэл болохгүй” гэжээ.

Шүүх хэрэгт авагдсан бөгөөд шүүх хуралдаанаар хянан хэлэлцэгдсэн бичгийн нотлох баримтуудыг шинжлэн судлаад

ҮНДЭСЛЭХ нь:

Гомдол гаргагчийн итгэмжлэгдсэн төлөөлөгч Б.М  нь Увс аймгийн Татварын хэлтсийн татварын улсын байцаагч Э.Х-ийн 2021 оны 05 сарын 11-ний өдрийн 0176463 дугаартай шийтгэлийн хуудсыг  хүчингүй болгуулах тухай гомдлыг  шүүхэд гаргасан бөгөөд шүүх хуралдаанд гомдол гаргагч А.С гомдлоо дэмжиж оролцсон болно.

Хариуцагч татварын улсын байцаагч Э.Хгээс шүүхэд “шүүх хуралдаанд оролцох боломжгүй тул өөрийг нь байлцуулахгүйгээр шүүх хуралдааныг хийлгүүлэх” тухай хүсэлтийг ирүүлсэн болно.

Шүүхээс хэрэгт авагдсан нотлох баримтууд, хэргийг шүүх хуралдаанаар хянан хэлэлцэх үед гаргасан гомдол гаргагч,өмгөөлөгч, хариуцагчийн тайлбар зэргийг тал бүрээс нь үнэлэн дүгнээд Увс аймгийн Татварын хэлтсийн татварын улсын байцаагч Э.Х-ийн үйлдсэн 2021 оны 05 сарын 11-ний өдрийн 0176463 дугаартай шийтгэлийн хуудсыг хүчингүй болгож шийдвэрлэв.

Гомдол гаргагч болон түүний өмгөөлөгчөөс “ Сонгуулийн зардлын дансны мэдээллийг аймгийн Ардчилсан намд хуулийн хугацаанд хүргүүлсэн, хуулийн заалт зөрчсөн гэж үзвэл хууль бус ажиллагаанаас болж байгууллага, аж ахуйн нэгж, иргэнд нэг ч төгрөгийн бодит хохирол учруулаагүй,аудитын байгууллагад ямар нэг зөрчилгүй сонгуулийн зардлын дансны тайлангаа хугацаанд нь гаргаж өгсөн ” тухай тайлбар гарган маргаж байна.

Хариуцагч улсын байцаагчаас “Холбогдогч А.С нь сонгуулийн зардлын дансны дугаар,банкны нэрийн мэдээллийг Увс аймаг дахь төрийн аудитын газарт бүртгүүлээгүй тул Зөрчлийн тухай хуулийн 17.1 дүгээр зүйлийн 21 дэх хэсэгт заасны дагуу шийтгэл оногдуулсан” гэсэн тайлбар гаргаж гомдлыг хүлээн зөвшөөрөхгүй байр суурийг илэрхийлжээ.

Увс аймгийн Татварын хэлтсийн татварын улсын байцаагч Э.Х-ийн  үйлдсэн 2021 оны 05 дугаар сарын 11-ний өдрийн 0176463 дугаартай шийтгэлийн хуудсаар А.С  Зөрчлийн тухай хуулийн 17.1 дүгээр зүйлийн 21-д заасан “сонгуулийн зардлын дансны дугаар, банкны нэрийг Увс аймаг дахь Төрийн аудитын газарт бүртгүүлээгүй зөрчил гаргасан нь холбогдогчийн мэдүүлэг,гэрчийн мэдүүлэг, бусад нотлох баримтуудаар нотлогдон тогтоогдсон гэж үзэн 10.000.000 төгрөгөөр торгох шийтгэл оногдуулжээ.

А.С-д холбогдох зөрчлийн хэргийг эрх бүхий албан тушаалтан болох татварын улсын байцаагчийн 2021 оны 04 сарын 13-ны өдрийн 106 дугаартай тогтоолоор нээсэн байх бөгөөд зөрчлийн хэрэгт зөрчлийн талаар  гомдол мэдээлэл хүлээн авсан тэмдэглэл, Увс аймаг дахь Төрийн аудитын газраас аймгийн Татварын хэлтэст хүргүүлсэн баримт,холбогдогчийн мэдүүлэг, гэрч Э.Түвшинжаргалын мэдүүлэг, Г.Болор-Эрдэний тайлбар,Ховд сумын Ардчилсан намын 2020.09.23-ны өдрийн 31 дугаартай албан бичиг, зөрчил шалган шийдвэрлэх ажиллагааны тэмдэглэл,шийтгэлийн хуудас, хариу мэдэгдэх хуудас зэрэг баримтууд авагдсан байна.

Орон нутгийн иргэдийн Төлөөлөгчдийн Хурлын төлөөлөгчийг сонгох 2020 оны ээлжит сонгууль 2020 оны 10 сарын 15-ны өдөр зохион байгуулагдсан ба Увс аймаг дахь Төрийн аудитын газрын дарга бөгөөд тэргүүлэх аудиторын 2021 оны 01 сарын 14-ний өдрийн А/04 дугаартай тушаалаар Нам,эвсэл,нэр дэвшигчийн сонгуулийн зардлын санхүүжилт,түүний гүйцэтгэлд хийсэн нийцлийн аудитын тайланг баталжээ.

Аудитын тайлангаар орон нутгийн 2020 оны ээлжит сонгуульд оролцсон 2 нам,389 нэр дэвшигч сонгуулийн зардлын дансны дугаар,банкны нэрийг Увс аймаг дахь Төрийн аудитын газар бүртгүүлээгүйг хавсралтаар гаргаж Татварын хэлтсийн даргад Зөрчлийн тухай хуульд заасан арга хэмжээг авах тухай зөвлөмжийг хүргүүлжээ.

Аудитын тайланд Ховд сумын 4-р тойрогт Ардчилсан намаас нэр дэвшигч А.С нь Сонгуулийн зардлын дансны дугаар,банкны нэрийн мэдээллийг Увс аймаг дахь Төрийн аудитын газарт бүртгүүлээгүй талаар дурдагдсан тул Татварын хэлтсийн татварын улсын байцаагчаас Зөрчил шалган шийдвэрлэх ажиллагаа явуулж,шийтгэлийн хуудсыг үйлдсэн байна.

Аймаг, нийслэл, сум, дүүргийн иргэдийн Төлөөлөгчдийн Хурлын Сонгуулийн тухай хуулийн 50 дугаар зүйлийн 50.3-д “Нам, эвсэл болон нэр дэвшигч нь сонгуулийн зардлын дансны дугаар, банкны нэрийг санал авах өдрөөс 20-оос доошгүй хоногийн өмнө төрийн аудитын орон нутаг дахь салбар байгууллагад мэдэгдэж, бүртгүүлэх үүрэгтэй “ гэж заажээ.

Үйл баримтын хувьд орон нутгийн 2020 оны ээлжит сонгуулийн үеэр Увс аймгийн иргэдийн Төлөөлөгчдийн Хуралд Ардчилсан намаас нэр дэвшигч А.С нь сонгуулийн зардлын дансны дугаар, банкны нэрийг хуульд заасан хугацааны дотор Увс аймаг дахь Төрийн аудитын газарт хүргүүлээгүй нь аудитын тайлан, Ардчилсан намын 2020 оны 09 сарын 29-ний өдрийн 30 дугаартай дансны мэдээлэл хүргүүлэх тухай албан бичиг, гэрч М.Батсуурийн “ Ардчилсан намын хэрэг эрхлэх газрын 2020 оны 09 сарын 29-ний өдрийн 30 дугаартай албан бичиг манай байгууллагад ирээгүй” гэх мэдүүлэг,холбогдогчийн “ дансны мэдээллээ сумын Ардчилсан нам өгсөн” гэх мэдүүлэг, гэрч Т.Намжилын “Увс аймгийн Ардчилсан намаас аймгийн иргэдийн Төлөөлөгчдийн Хуралд нэр дэвшсэн иргэдийн болон Улаангом сумын Ардчилсан намын хорооноос нэр дэвшсэн иргэдийн дансны мэдээллийг 2020 оны 9 сарын 25-ны өдөр ирүүлснийг бүртгэж авсан. Харин бусад сумдын материалыг 9 сарын 25-ны өдрийн дотор ирүүлээгүй.2020 оны 9 сарын 29-ний өдрийн 30 дугаартай албан бичгийг надад өгсөн зүйл байхгүй ”гэх мэдүүлэг, гэрч П.Энхсаруулын “ орон нутгийн сонгуулийн үеэр Ардчилсан намын хэрэг эрхлэх газрын дарга Г.Болор-Эрдэнэ сумуудаас сонгуульд нэр дэвшсэн иргэдийн дансны мэдээллийг өөрөө цуглуулан Төрийн аудитын газарт бичгээр хүргүүлэхээр надад өгсөн.2020 оны 09 сарын 29-ний өдөр албан бичгийг Аудитын газрын Намжил гэх хүнтэй уулзахад хугацаа хэтэрсэн байна,хүлээж авах боломжгүй гэж хэлсэн тул албан бичгээ буцааж Г.Болор-Эрдэнэ даргад хүргэж өгсөн” гэх мэдүүлэг зэргээр тогтоогджээ.

А.С нь сонгуулийн зардлын дансыг нээлгэсэн боловч дансанд ямар нэг гүйлгээ хийгдээгүй тул зардлын дансны тайланг гаргах боломжгүй тухай өргөдөл 2020 оны 11 сарын 11-ний өдөр гаргасныг Увс аймаг дахь Төрийн аудитын газар хүлээн авсан байна.

Зөрчлийн тухай хуулийн 17.1 дүгээр зүйлийн 21-д “Сонгуулийн зардлын дансыг бүртгүүлэх, зардлын дансанд мөнгөн хөрөнгийг төвлөрүүлж, зарцуулах талаар хуульд заасан журмыг зөрчсөн бол хүнийг арван мянган нэгжтэй тэнцэх хэмжээний төгрөгөөр, хуулийн этгээдийг нэг зуун мянган нэгжтэй тэнцэх хэмжээний төгрөгөөр торгоно “ гэж заажээ.

“Хуульд заасан журмыг зөрчсөн” тохиолдолд Сонгуулийн зардлын дансыг бүртгүүлээгүй эс үйлдэхүйг зөрчилд тооцохоор Зөрчлийн тухай хуульд заасан тул Аймаг,нийслэл,сум,дүүргийн иргэдийн Төлөөлөгчдийн Хурлын Сонгуулийн тухай хуулийн холбогдох заалтуудыг тайлбарлан хэрэглэхээр байна.

Аймаг,нийслэл,сум,дүүргийн иргэдийн Төлөөлөгчдийн Хурлын Сонгуулийн тухай хуулийн 8-р бүлэгт сонгуулийн зардлын талаар зохицуулсан байх ба уг хуулийн 57 дугаар зүйлийн 57.2.5-д “зардлын тайлан гаргах, хүлээн авах, нийтэд мэдээлэх, танилцуулахтай холбоотой журам, маягт батлах” бүрэн эрхийг Төрийн аудитын орон нутгийн салбар байгууллага хэрэгжүүлэхээр заасан байна.

Увс аймаг дахь Төрийн аудитын газрын дарга бөгөөд тэргүүлэх аудиторын 2020 оны 10 дугаар сарын 14-ний өдрийн А/74 дүгээр тушаалаар батлагдсан “Аймаг, нийслэл, сум, дүүргийн иргэдийн Төлөөлөгчдийн Хурлын сонгуульд оролцож байгаа нам, эвсэл, нэр дэвшигчдийн сонгуулийн зардлын тайлан гаргах, зардлын тайланд аудит хийх, хянах, дүнг нийтэд мэдээлэх, танилцуулах журам”-ыг баталсан байна.

Уг журмын 1.1-д “энэ журмын зорилго нь Аймаг,нийслэл,сум,дүүргийн иргэдийн Төлөөлөгчдийн Хурлын сонгуульд оролцож байгаа, нам, эвсэл, нэр дэвшигч сонгуулийн санхүүжилтээ хуулиар хүлээн зөвшөөрсөн, бодитой эх үүсвэрээс бүрдүүлж,зориулалтын дагуу зарцуулсан талаар тайлагнах, түүнд дүгнэлт гаргах,сонгуулийн санхүүжилтийг сонгогч иргэн,олон нийтэд нээлттэй, ил тод байлгах нөхцлийг бүрдүүлэхэд оршино” гэжээ.

Өөрөөр хэлбэл хуульд заасны дагуу сонгуулийн зардлын данстай холбогдох харилцааг илүү нарийвчлан зохицуулсан журам батлагдсан тул сонгуулийн зардлын дансаа бүртгүүлээгүй шалтгаан нөхцөл,зардлын дансны тайлагналт зэрэгт дүгнэлт хийн тухайн хууль, журмаар хамгаалагдсан харилцаа хэрхэн зөрчигдсөнийг тодорхойлох шаардлагатай.

Нэр дэвшигч сонгуулийн зардлын данс нээлгэх,бүртгүүлэх, зардлын дансны тайланг гаргах ажиллагаа, түүний үр дүн нь Аймаг,нийслэл,сум,дүүргийн иргэдийн Төлөөлөгчдийн Хурлын Сонгуулийн тухай  хуулийн болон Увс аймаг дахь Төрийн аудитын газрын дарга бөгөөд тэргүүлэх аудиторын 2020 оны 10 дугаар сарын 14-ний өдрийн А/74 дүгээр тушаалаар батлагдсан “Аймаг,нийслэл,сум,дүүргийн иргэдийн Төлөөлөгчдийн Хурлын сонгуульд оролцож байгаа нам, эвсэл, нэр дэвшигчдийн сонгуулийн зардлын тайлан гаргах,зардлын тайланд аудит хийх,хянах,дүнг нийтэд мэдээлэх,танилцуулах журам”-ын зохицуулалтын зорилго,агуулгад нийцсэн байхыг шаардана.

Нэр дэвшигч А.С-ын хувьд сонгуулийн зардалд ашиглахаар нээлгэсэн дансаа холбогдох байгууллагад бүртгүүлээгүй боловч уг дансаараа ямар нэг гүйлгээ хийгээгүй, бусдаас хандив аваагүй байх бөгөөд энэ талаараа Увс аймаг дахь Төрийн аудитын газарт өргөдөл гаргасныг хүлээн авсан байдлаас дүгнэхэд А.Сыг  холбогдох хууль,журмыг зөрчсөн гэж үзэх үндэслэл тогтоогдохгүй байна.

Иймд А.С-ын сонгуулийн зардлын дансаа бүртгүүлээгүй эс үйлдэхүйг  Зөрчлийн тухай хуулийн 17.1 дүгээр зүйлийн 21-д заасан “Сонгуулийн зардлын дансыг бүртгүүлэх, зардлын дансанд мөнгөн хөрөнгийг төвлөрүүлж, зарцуулах талаар хуульд заасан журмыг зөрчсөн” гэх зөрчлийн шинжийг агуулаагүй гэж дүгнэж, Увс аймгийн Татварын хэлтсийн улсын байцаагч Э.Х-ийн үйлдсэн 2021 оны 05 сарын 11-ний өдрийн 0176463 дугаартай шийтгэлийн хуудсыг хүчингүй болгож шийдвэрлэх нь зүйтэй гэж үзлээ.

Гомдлыг хангаж шийдвэрлэсэн тул А.С-ын улсын тэмдэгтийн хураамжид урьдчилан төлсөн 70200 төгрөгийг төрийн санд хэвээр үлдээн,хариуцагч улсын байцаагчийн харьяалах Увс аймгийн Татварын хэлтсээс 70200 төгрөгийг гаргуулан А.С-д олгох нь зүйтэй байна.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.3.1, 106.3.12, 107 дугаар зүйлийн 107.5 дахь хэсэг, Зөрчил шалган шийдвэрлэх тухай хуулийн 2.1 дүгээр зүйлийн 2 дахь хэсэгт заасныг удирдлага болгон ТОГТООХ нь:

1. Зөрчлийн тухай хуулийн 17.1 дүгээр зүйлийн 21, Аймаг,нийслэл,сум,дүүргийн иргэдийн Төлөөлөгчдийн Хурлын Сонгуулийн тухай хуулийн 50 дугаар зүйлийн 50.3, 57 дугаар зүйлийн 57.2.8-д заасныг тус тус баримтлан гомдол гаргагч А.С-ын   гомдлыг хангаж, Увс аймгийн Татварын хэлтсийн татварын улсын байцаагч Э.Х-ийн үйлдсэн 2021 оны 05 дугаар сарын 11-ний өдрийн 0176463 дугаартай шийтгэлийн хуудсыг хүчингүй болгосугай.

2. Захиргааны хэрэг шүүхэд хянан шийдвэрлэх тухай хуулийн 48 дугаар  зүйлийн 48.1,48.2, Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсгүүдэд зааснаар гомдол гаргагч А.С-ын улсын тэмдэгтийн хураамжид урьдчилан төлсөн 70200 төгрөгийг төрийн санд хэвээр үлдээн, Увс аймгийн Татварын хэлтсээс 70200 төгрөгийг гаргуулан А.С-д олгосугай.

3.Захиргааны хэрэг шүүхэд хянан шийдвэрлэх тухай хуулийн 113 дугаар зүйлийн 113.2 дахь хэсэгт заасны дагуу энэхүү шийдвэрийг эс зөвшөөрвөл гардан авсан өдрөөс хойш хэргийн оролцогчид, тэдгээрийн төлөөлөгч, өмгөөлөгч таван хоногийн дотор Захиргааны хэргийн давж заалдах шатны шүүхэд давж заалдах гомдол гаргах эрхтэйг дурдсугай.

             

 

 

ДАРГАЛАГЧ, ШҮҮГЧ                                        Д.АЛТАНЦЭЦЭГ