МОНГОЛ УЛСЫН НЭРИЙН ӨМНӨӨС

Булган аймаг дахь сум дундын эрүүгийн хэргийн анхан шатны шүүхийн Ерөнхий шүүгч Э.Энэрэл даргалж тус шүүхийн хуралдааны танхимд нээлттэй хийсэн шүүх хуралдаанд:

шүүх хуралдааны нарийн бичгийн дарга М.Долгор,

улсын яллагч Э.Гантулга,

шүүгдэгч З.И******* нарыг оролцуулан

Булган аймгийн прокурорын газраас Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан гэмт хэрэгт холбогдуулан яллах дүгнэлт үйлдэж, хэргийг хялбаршуулсан журмаар шийдвэрлүүлэхээр ирүүлсэн З.И*******т холбогдох эрүүгийн 2215003370321 дугаартай, 163/2023/0006/Э индекстэй хэргийг 2022 оны 12 дугаар сарын 20-ны өдөр хүлээн авч хянан хэлэлцэв.

Шүүгдэгчийн биеийн байцаалт:

Монгол улсын иргэн, ******* овогт *******ын И*******, Булган аймгийн Булган суманд 1994 оны 02 дугаар сарын 11-ний өдөр төрсөн, 28 настай, эрэгтэй, Булган аймгийн Булган сумын 5 дугаар багийн 12 дугаар байрны 1-02 тоотод оршин суух бүртгэлтэй, дээд боловсролтой, Цагдаагийн ажил-эрх зүйч мэргэжилтэй, эрхэлсэн тодорхой ажилгүй, ам бүл 4, эхнэр, 2 хүүхдийн хамт амьдардаг, урьд ял шийтгүүлж байгаагүй, РД: *******.

Холбогдсон хэргийн талаар:

Шүүгдэгч З.И******* нь Булган аймаг дахь Цагдаагийн газрын Могод сумын хэсгийн төлөөлөгчөөр ажиллаж байх хугацаандаа 2022 оны 04 дүгээр сарын 16-ны өдөр Монгол Улсын Зөрчлийн тухай хуулийн 14.7 дугаар зүйлийн 5 дахь хэсэгт зааснаар зөрчлийн хэрэг нээсэн Н.*******т холбогдох 2215000221 дугаартай хэрэгт зөрчил шалган шийдвэрлэх ажиллагаа явуулахдаа уг зөрчлийн хэргийг устгасан Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан гэмт хэрэгт холбогджээ.

ТОДОРХОЙЛОХ нь:

Шүүхийн хэлэлцүүлэгт шүүгдэгч З.И*******ын өгсөн мэдүүлэг, эрүүгийн 2215003370321 дугаартай хэрэгт мөрдөн шалгах ажиллагааны шатанд цугларсан яллах болон хөнгөрүүлэх талын нотлох баримтуудыг талуудын хүсэлтээр тал бүрээс нь бүрэн гүйцэд, бодит байдлаар нь харьцуулж шинжлэн судлаад шүүх дараах дүгнэлтийг хийв.

Шүүх хуралдаанаар тогтоогдсон хэргийн үйл баримтын талаар:

Шүүгдэгч З.И******* нь Булган аймаг дахь Цагдаагийн газрын Могод сумын хэсгийн төлөөлөгчөөр ажиллаж байх хугацаандаа 2022 оны 04 дүгээр сарын 16-ны өдөр Монгол Улсын Зөрчлийн тухай хуулийн тусгай ангийн 14.7 дугаар зүйлийн 5 дахь хэсэгт зааснаар зөрчлийн хэрэг нээсэн Н.*******т холбогдох 2215000221 дугаартай хэрэгт зөрчил шалган шийдвэрлэх ажиллагаа явуулахдаа уг зөрчлийн хэргийг устгасан үйл баримт, хэргийн нөхцөл байдал тогтоогдож байна.

Энэ үйл баримт нь

Шүүхийн хэлэлцүүлэгт шүүгдэгч З.И*******ын өгсөн: Мэдүүлэг өгөхгүй, өмнө өгсөн мэдүүлэг үнэн зөв тул нэмж ярих зүйл байхгүй. Гэм буруугаа хүлээн зөвшөөрч байна гэх мэдүүлэг,

Мөрдөн шалгах ажиллагааны шатанд:

1. Гэрч Ц.*******гийн өгсөн: ...Могод сумын хэсгийн төлөөлөгчөөр ажиллаж байсан И******* нь Зөрчлийн тухай хуулийн тусгай ангийн 14.7 дугаар зүйлийн 5 дахь хэсэгт зааснаар зөрчлийн хэрэг нээсэн Н.*******т холбогдох 2215000221 дугаартай хэрэгт 2022 оны 05 дугаар сарын 04-ний өдөр шийтгэл оногдуулан албадлагын арга хэмжээ авах саналтайгаар над дээр авч ирэхээр нь би танилцаж, санд бүртгэн гарын үсгээ зурж баталгаажуулсан. Тэр хэргийг И******* нь шүүхэд хүргэж өгөөгүй байсан. Энэ нөхцөл байдлын талаар шүүхэд шилжүүлсэн хэрэг болон шүүхээр шийдвэрлүүлсэн хэргийн тулгалтыг хийж байхдаа би тогтоосон. Тэгээд Булган аймаг дахь сум дундын эрүүгийн хэргийн анхан шатны шүүхийн шүүгчийн туслах Баасандоржоор хэрэг шийдвэрлэгдсэн эсэх талаар шүүлгэн үзэхэд ийм хэрэг манай шүүхэд ирсэн бүртгэл байхгүй байна гэж байсан. Иймд хэсгийн төлөөлөгчөөр ажиллаж байсан И******* болон зөрчлийн хэрэг бүртгэх тасгийн дарга Б.*******аас хэргийг яасан талаар асуухад Б.******* нь хэргийг шүүхэд шилжүүлээгүй юм байна гэж хэлсэн. Би хэргийг олох арга хэмжээ авах талаар *******ад хэлсэн. Бас И*******аас энэ хэргийг яасан талаар би өөрөө тайлбар авсан. Тэгэхэд И******* нь хэрэг байхгүй болсон гэдгийг хэлсэн. Ямар шалтгааны улмаас хэрэг байхгүй босон гэдгийг хэлээгүй, мөн хэргийг шүүхэд хүргэж өгөөгүй гэж байсан гэх мэдүүлэг /хавтаст хэргийн 6-7 дахь тал/,

 

2.  Гэрч Б.*******ын өгсөн: ...Ингээд би Н.*******т холбогдох зөрчлийн материалыг шүүхэд шилжүүлж шийдвэрлэсэн эсэхийг тогтоохоор Булган аймаг дахь сум дундын эрүүгийн хэргийн анхан шатны шүүх, Шүүхийн шийдвэр гүйцэтгэх газруудтай холбогдож тодруулахад Намсрай овогтой ******* гэж хүнд холбогдох зөрчлийн материал шүүхэд хүргэгдэж очоогүй байсан. Тэгэхээр нь З.И*******ыг дуудаж тайлбар авахад зөрчлийн бүрдүүлсэн материал надад байгаа, гэрт байгаа аваад ирье гэж хэлж яваад хэсэг алга болчихоор нь ахиад дуудаж ирүүлээд материал хаана байна, авч ирсэн үү гэхэд гэрт юмандаа үзлээ байхгүй байна, Могод суманд хайрцагтай бичиг цаас үлдээсэн, тэрэнд байгаа байх гэж хэлсэн. Тэгээд би Могод сумын цагдаа руу залгаад И*******тай холбоотой бичиг цаас наана чинь байна уу? Н.*******т холбогдох материал байна уу? гэхэд ямар ч бичиг цаас үлдээгээгүй гэсэн. Тэгэхэд И******* үнэнээ хэлье дарга гээд би холбогдогчоо хайгаад олохгүй болонгуут нь хуурамчаар материал бүрдүүлээд хяналтын прокурор дээр аваачиж зөрчлийн хэргийн дугаар аваад шүүхэд шилжүүлэх санал дээр прокуророор гарын үсэг зуруулаад шүүхэд хүргэж өгөөгүй юм гэж тайлбарласан гэх мэдүүлэг /хавтаст хэргийн 112-113 дахь тал/,

3. Цахим санд үзлэг хийсэн: Булган аймгийн прокурорын газрын зөрчлийн хэрэг бүртгэх ажиллагаанд хяналт тавих ажил хариуцсан хяналтын прокурор, хууль цаазын итгэмжит зөвлөх Ц.******* нь албан ажлын хэрэгцээнд ашиглах суурин компьютерийг ашиглан өөрийн нэвтрэх нэр, нууц дугаарыг ашиглан Прокурорын байгууллагын цахим бүртгэлийн нэгдсэн системд нэвтрэн оров. Уг системийн хайлт хэсэгт 2215000221 гэх зөрчлийн хэргийн дугаарыг хийж хайж үзэхэд уг хэргийг З.И******* шалгаж 2022 оны 05 дугаар сарын 04-ний өдөр шийтгэл оногдуулах саналыг шүүхэд хүргүүлсэн гэж бүртгэсэн байв гэх тэмдэглэл, гэрэл зургийн үзүүлэлт /хавтаст хэргийн 20-24 дэх тал/,

4. Бүртгэлийн дэвтэрт үзлэг хийсэн: Булган аймаг дахь Шүүхийн тамгын газрын мэдээлэл, лавлагааны мэргэжилтэн С.Амаржаргал нь Булган аймаг дахь сум дундын Эрүүгийн хэргийн анхан шатны шүүхийн 2022 оны прокуророос шилжүүлсэн зөрчлийн хэрэг, оролцогчийн гомдол, прокурорын дүгнэлт хүлээн авсан бүртгэл №20 гэх нүүртэй цэнхэр өнгийн хавтастай, 30 хуудас, бүртгэлийн дэвтрийг гарган өгөв. Зөрчлийн 2215000221 дугаартай Н.*******т холбогдох хэргийг 2022 оны 05 сард Булган аймаг дахь сум дундын эрүүгийн хэргийн анхан шатны шүүхээс хүлээн авсан талаар бүртгэлийн дэвтэрт тусгагдсан эсэхийг үзэхэд тусгагдаагүй, бүртгэл хийгдээгүй байна гэх тэмдэглэл /хавтаст хэргийн 25-27 дахь тал/,

5. Цагдаагийн ерөнхий газрын даргын 2021 оны 08 дугаар сарын 20-ны өдрийн Б/845 дугаартай: “ажлаас чөлөөлж томилох, цагдаагийн цол олгох тухай” тушаал /хавтаст хэргийн 109 дэх тал/,

6. Яллагдагч З.И*******ын гэмт хэрэг үйлдсэн гэм буруугаа хүлээн зөвшөөрч өгсөн: ...Тогтоолтой холбоотой санал хүсэлт байхгүй, надад сонсгож байгаа зүйл ангийг хүлээн зөвшөөрч байна. Надад тухайн зөрчлийн хэргийг санаатай алга болгох ямар ч шалтгаан байхгүй. Би ажлаа хүлээлгээд өгчихсөн, ажлаасаа гарчихсан байсан. Тэгээд нүүдэл суудал хийж байх үед л алга болсон байх. Шүүх эзэн холбогдогчтой нь зөрчлийн хэргээ авдаг болохоор би Н.*******ыг олохгүй байсан болохоор шүүхэд зөрчлийн хэргээ өгч чадаагүй юм. Түүнээс *******тай ямар нэгэн хувийн харилцаа байхгүй. Гэм буруугаа хүлээн зөвшөөрч байгаа гэх мэдүүлэг /хавтаст хэргийн 97 дахь тал/ зэрэг бичгийн нотлох баримтуудаар хөдөлбөргүй нотлогдож тогтоогдсон байна.

Мөрдөгч дээр дурдсан нотлох баримтуудыг Эрүүгийн хэрэг хянан шийдвэрлэх тухай хуульд заасан үндэслэл журмын дагуу цуглуулж, бэхжүүлсэн байх бөгөөд эдгээр нь өөр хоорондоо агуулгын хувьд зөрөөгүй, энэ хэрэгт хамааралтай, ач холбогдолтой, хэргийн бодит байдлыг тогтоож, хэргийг эцэслэн шийдвэрлэхэд хангалттай байх тул шүүхийн шийдвэрийн үндэслэл болгон үнэлж дараах дүгнэлтийг хийв.

Нэг. Гэмт хэрэг үйлдсэн гэм буруугийн талаар:

Хэрэгт цугларч шүүх хуралдаанаар шинжлэн судлагдсан гэрч Ц.*******, Б.******* нарын мэдүүлэг, прокурорын байгууллагын цахим бүртгэлийн нэгдсэн системд үзлэг хийсэн тэмдэглэл, бүртгэлийн дэвтэрт үзлэг хийсэн тэмдэглэл зэрэг нотлох баримтуудыг харьцуулан судалж, эх сурвалжийг шалгахад шүүгдэгч З.И******* нь Булган аймаг дахь цагдаагийн газрын Могод сумын хэсгийн төлөөлөгч буюу хууль сахиулагчаар ажиллаж байх хугацаандаа 2022 оны 04 дүгээр сарын 16-ны өдөр Монгол Улсын Зөрчлийн тухай хуулийн тусгай ангийн 14.7 дугаар зүйлийн 5 дахь хэсэгт зааснаар зөрчлийн хэрэг нээсэн Н.*******т холбогдох 2215000221 дугаартай хэрэгт зөрчил шалган шийдвэрлэх ажиллагаа явуулахдаа уг зөрчлийн хэргийг устгасан болох нь нотлогдож тогтоогдлоо.

Монгол Улсын Эрүүгийн хуулийн тусгай ангийн 21.1 дүгээр зүйлийн 2 дахь хэсэгт “Энэ гэмт хэргийг хууль сахиулагч, ... үйлдсэн бол” гэж гэмт хэргийн субъектийг заасан.

Эрүүгийн хуулийн ерөнхий ангийн 4.2 дугаар зүйлийн тайлбар хэсэгт “хууль сахиулагч” гэж цагдаа, тагнуул, шүүхийн шийдвэр гүйцэтгэх, төрийн тусгай хамгаалалтын албаны алба хаагч, хуулиар тусгайлан эрх олгосон эрх бүхий этгээд, байгаль хамгаалагчийг ойлгоно гэж заасан байх ба Булган аймаг дахь Цагдаагийн газрын Могод сумын хэсгийн төлөөлөгч, цагдаагийн ахлах дэслэгч З.И******* нь Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан гэмт хэргийн субъект мөн байна.

Эрүүгийн хуулийн ерөнхий ангийн 2.1 дүгээр зүйлийн 1 дэх хэсэгт зааснаар Эрүүгийн хуулийн тусгай ангид заасан нийгэмд аюултай гэм буруутай үйлдэл, эс үйлдэхүйг гэмт хэрэгт тооцох бөгөөд Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан гэмт хэргийн шинжийг бүрэн хангасан, “хэрэг шалган шийдвэрлэхэд ач холбогдол бүхий нотлох баримтыг устгасан” бол эрүүгийн хариуцлага хүлээлгэхээр хуульчилжээ.

Эрүүгийн хуулийн тусгай ангийн 21.1 дүгээр зүйлд заасан “нотлох баримтыг хуурамчаар үйлдэх, устгах” гэмт хэрэг нь хэлбэрийн бүрэлдэхүүнтэй ба хохирол, хор уршиг учирсан эсэхээс үл хамааран нотлох баримтыг хадгалах, хамгаалах үүрэг бүхий албан хаагч нотлох баримтыг устгасан үйлдэл хийснээр гэмт хэргийн шинжийг бүрэн агуулсан гэж үзнэ.

Шүүгдэгч З.И******* нь нотлох баримтыг устгасан дээрх үйлдэл нь гэм буруугийн санаатай хэлбэртэй, нийгэмд аюултай, Эрүүгийн хуулийн тусгай ангид заасан хэрэг шалган шийдвэрлэх ажиллагааны эсрэг нотлох баримтыг устгах гэмт хэргийн шинжийг агуулсан байх бөгөөд шүүгдэгч З.И******* нь хэргийн зүйлчлэл болон гэм буруугийн талаар маргаагүй байна.

Хэргийн зүйлчлэл тохирсон, прокурорын яллах дүгнэлт үндэслэлтэй байх тул Эрүүгийн хуулийн ерөнхий ангийн 2.1 дүгээр зүйлийн 1 дэх хэсэгт “Энэ хуулийн тусгай ангид заасан нийгэмд аюултай гэм буруутай үйлдэл, эс үйлдэхүйг гэмт хэрэгт тооцно” гэж заасны дагуу шүүгдэгч З.И*******ыг Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан хэрэг шалган шийдвэрлэхэд ач холбогдол бүхий нотлох баримтыг устгах гэмт хэрэг үйлдсэн гэм буруутайд тооцов.

Шүүх хуралдаанд оролцсон улсын яллагч шүүгдэгч З.И*******ыг “нотлох баримтыг устгасан” гэмт хэрэг үйлдсэн гэм буруутайг нотолж, яллах талын байр сууринаас, шүүгдэгч өөрийн гэм бурууг хүлээн зөвшөөрч, ялыг хөнгөрүүлэх байр сууринаас тус тус оролцсон болно.

Гэмт хэргийн улмаас учирсан хохирлын тухай:

Шүүгдэгч З.И*******ын үйлдсэн гэмт хэрэг нь хэрэг шалган шийдвэрлэх ажиллагааны эсрэг хэлбэрийн бүрэлдэхүүнтэй гэмт хэрэг бөгөөд материаллаг хохирол, хор уршиг учраагүй, бодит хохирол учирсан байхыг шаардахгүй хэлбэрийн шинжтэй гэмт хэрэг тул шүүгдэгчийг бусдад төлөх төлбөргүй гэж шүүх дүгнэв.

Хоёр: Шүүгдэгчид хүлээлгэх эрүүгийн хариуцлагын талаар:

Шүүгдэгч З.И*******ыг хэрэг шалган шийдвэрлэхэд ач холбогдол бүхий нотлох баримтыг устгасан гэмт хэрэг үйлдсэн гэм буруутайд тооцсон тул Эрүүгийн хуулийн ерөнхий ангийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ” гэж заасны дагуу Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан эрүүгийн хариуцлага хүлээлгэх хууль зүйн үндэслэлтэй, шүүгдэгч З.И*******ын хэрэг хариуцах чадвар, сэтгэцийн байдлын талаар эргэлзээтэй байдал тогтоогдоогүй байна.

Шүүхийн хэлэлцүүлэгт шинжлэн судлагдсан бичгийн нотлох баримтаар шүүгдэгч З.И*******т эрүүгийн хариуцлага хүлээлгэхэд Эрүүгийн хуулийн ерөнхий ангийн 6.5, 6.6 дугаар зүйлд заасан эрүүгийн хариуцлагыг хөнгөрүүлэх болон хүндрүүлэх нөхцөл байдал тогтоогдоогүйг харгалзан үзэх нь зүйтэй гэж үзэв.

Хавтаст хэргийн 100-110, 120-122 дугаар талд авагдсан урьд ял шийтгэгдсэн эсэхийг шалгах хуудас, төрийн албан хаагчийн анкет, боловсролын гэрчилгээний хуулбар, дипломын хуулбар, ажлаас чөлөөлж, томилох цагдаагийн цол олгох тухай Цагдаагийн ерөнхий газрын даргын 2021 оны 08 дугаар сарын 20-ны өдрийн тушаал, албанаас чөлөөлж, цагдаагийн цол хураах тухай Цагдаагийн ерөнхий газрын даргын 2022 оны 07 дугаар сарын 21-ний өдрийн тушаал, иргэний үнэмлэхийн лавлагаа, иргэний оршин суугаа газрын хаягийн бүртгэлийн лавлагаа, үл хөдлөх хөрөнгийн жагсаалтын лавлагаа зэрэг түүний хувийн байдлыг тодорхойлсон баримтуудаар шүүгдэгч З.И******* нь ам бүл 4, эхнэр, хүүхдүүдийн хамт Булган аймгийн Булган сумын 5 дугаар багийн 12 дугаар байрны 1-02 тоотод амьдардаг, одоогоор эрхэлсэн тодорхой ажилгүй, нэр дээр гэр бүлийн хэрэгцээний газар, үл хөдлөх хөрөнгө буюу хувийн сууц, нийтийн зориулалттай орон сууцтай, урьд ял шийтгүүлж байгаагүй зэрэг түүний хувийн болон хөрөнгө, орлогын байдал тогтоогдсон байна.

Шүүх шүүгдэгчид эрүүгийн хариуцлага хүлээлгэхдээ Эрүүгийн хариуцлагын зорилго, хууль ёсны, шударга ёсны, гэм буруугийн зарчмыг баримтлан гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагын хөнгөрүүлэх, хүндрүүлэх нөхцөл байдал зэргийг тал бүрээс нь харгалзан эрүүгийн хариуцлага хүлээлгэх нь зүйтэй гэж үзэв.

Шүүгдэгч З.И******* нь гэмт хэрэг үйлдсэн гэм буруугаа сайн дураараа хүлээн зөвшөөрч хэргийг хялбаршуулсан журмаар хянан шийдвэрлүүлэх хүсэлт гаргасныг прокурор хүлээн авч 2022 оны 12 дугаар сарын 16-ны өдрийн 148 дугаартай тогтоолоор хангаж, түүнд холбогдох хэргийг Эрүүгийн хэрэг хянан шийдвэрлэх тухай хуулийн 17.3 дугаар зүйлийн 3 дахь хэсэгт зааснаар хялбаршуулсан журмаар хянан шийдвэрлүүлэхээр яллах дүгнэлт үйлдэж шүүхэд ирүүлсэн байна.

Шүүгдэгч З.И*******ын үйлдсэн гэмт хэрэг нотлогдсон, шүүгдэгч гэмт хэрэг үйлдсэн гэм буруугаа сайн дураар хүлээн зөвшөөрсөн, хэргийн зүйлчлэл болон прокурорын сонсгосон ялын төрөл, хэмжээг зөвшөөрч үүсэх үр дагаврыг ойлгосон, төлөх төлбөргүй байх тул хэргийг хялбаршуулсан журмаар шийдвэрлэж улсын яллагчийн санал болгосон ялын төрөл, хэмжээний хүрээнд шүүгдэгч З.И*******ыг Эрүүгийн хуулийн ерөнхий ангийн 6.7 дугаар зүйлийн 1 дэх хэсгийн 1.2 дахь заалтад заасныг журамлан мөн хуулийн тусгай ангийн 21.1 дүгээр зүйлийн 2 дахь хэсэгт зааснаар 1 жилийн хугацаагаар тэнсэж, тэнссэн хугацаанд Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5 дахь заалтад заасан оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэх үүрэг хүлээлгэх албадлагын арга хэмжээ авах нь түүний гэм буруугийн болон хувийн байдалд тохирно гэж шүүх дүгнэв.

Энэ хэрэгт шүүгдэгч З.И******* нь цагдан хоригдсон хоноггүй, шийтгэх тогтоол уншин сонсгосноор хүчинтэй болохыг дурдаж, тогтоол хүчин төгөлдөр болтол шүүгдэгч З.И*******т авсан хувийн баталгаа гаргах таслан сэргийлэх арга хэмжээг хэвээр үргэлжлүүлэв.

Шүүгдэгч З.И******* нь бусдад төлөх төлбөргүй, түүнээс эрүүгийн хэрэг хянан шийдвэрлэх ажиллагааны зардал нэхэмжлээгүй, хэрэгт эд мөрийн баримтаар хураагдсан болон битүүмжлэгдсэн эд зүйл, иргэний бичиг баримтгүй болохыг тус тус дурдаж шийдвэрлэв.

 

Монгол Улсын шүүхийн тухай хуулийн 22 дугаар зүйлийн 22.4 дэх хэсгийн 22.4.1 дэх заалт, Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5 дахь хэсэг, 36.1 дүгээр зүйлийн 1 дэх хэсэг, 36.2 дугаар зүйлийн 1, 2, 3, 4 дэх хэсэг, 36.6 дугаар зүйл, 36.7 дугаар зүйл, 36.8 дугаар зүйл, 36.10 дугаар зүйлийн 1, 2, 3, 4 дэх хэсэг, 36.13 дугаар зүйлийн 1 дэх хэсэг, 38.1 дүгээр зүйлийн 1 дэх хэсэгт заасныг тус тус удирдлага болгон

ТОГТООХ нь:

 

1. Шүүгдэгч ******* овогт *******ын И*******ыг Эрүүгийн хуулийн тусгай ангийн 21.1 дүгээр зүйлийн 2 дахь заасан хэрэг шалган шийдвэрлэхэд ач холбогдол бүхий нотлох баримтыг устгасан гэмт хэрэг үйлдсэн гэм буруутайд тооцсугай.

 

2. Эрүүгийн хуулийн ерөнхий ангийн 6.7 дугаар зүйлийн 1 дэх хэсгийн 1.2 дахь заалтад заасныг журамлан Эрүүгийн хуулийн тусгай ангийн 21.1 дүгээр зүйлийн 2 дахь хэсэгт зааснаар 1 /нэг/ жилийн хугацаагаар тэнсэж, үүрэг хүлээлгэх албадлагын арга хэмжээ хэрэглэсүгэй.

 

3. Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5 дахь заалтад зааснаар шүүгдэгч З.И*******т оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэж, түүнд хяналт тавихыг Шүүхийн шийдвэр гүйцэтгэх газарт даалгасугай.

 

4. Эрүүгийн хуулийн ерөнхий ангийн 7.3 дугаар зүйлийн 4, 5 дахь хэсэгт зааснаар шүүгдэгч З.И******* нь тэнссэн хугацаанд шүүхээс хүлээлгэсэн үүргийг биелүүлээгүй, түүнчлэн энэ хуулийн тусгай ангид заасан санаатай гэмт хэрэг үйлдсэн бол шүүх уг албадлагын арга хэмжээ авагдсан шийдвэрийг хүчингүй болгож, энэ хуулийн 6.1 дүгээр зүйлд заасан журмаар ял оногдуулахыг сануулсугай.

 

5. Энэ хэрэгт шүүгдэгч З.И*******т нь цагдан хоригдсон хоноггүйг дурдаж, шийтгэх тогтоол уншин сонсгосноор хүчинтэй болох бөгөөд тогтоол хүчин төгөлдөр болтол шүүгдэгч З.И*******т авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

6. Шүүгдэгч З.И******* нь бусдад төлөх төлбөргүй, Эрүүгийн хэрэг хянан шийдвэрлэх ажиллагааны зардал нэхэмжлээгүй, хэрэгт эд мөрийн баримтаар хураагдсан болон битүүмжлэгдсэн эд зүйл, иргэний бичиг баримтгүйг тус тус дурдсугай.

 

7. Шийтгэх тогтоолыг гардан авснаас хойш 14 хоногийн дотор Булган аймгийн Эрүү, Иргэний хэргийн давж заалдах шатны шүүхэд шүүгдэгч, тэдгээрийн өмгөөлөгч давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

ДАРГАЛАГЧ, ЕРӨНХИЙ ШҮҮГЧ                                 Э.ЭНЭРЭЛ