МОНГОЛ УЛСЫН НЭРИЙН ӨМНӨӨС

 

 

156/2019/00126/И

Хэнтий аймаг дахь сум дундын Иргэний хэргийн анхан шатны шүүхийн шүүх хуралдааныг шүүгч Л.Цэрэндулам даргалж, тус шүүхийн Б танхимд хаалттай хийсэн хуралдаанаар,

 

Нэхэмжлэгч: .............тоотод оршин суух, Г.А (РД: ..........)-гийн нэхэмжлэлтэй,

Хариуцагч: .................. оршин суух, Ж.Б (РД: .............)-т холбогдох,

 

"гэрлэлт цуцлуулах тухай иргэний хэргийг хянан хэлэлцэв.

 

Шүүх хуралдаанд: шүүх хуралдааны нарийн бичгийн даргаар С.Мөнхтөр нар оролцов.

 

ТОДОРХОЙЛОХ нь:

 

Нэхэмжлэгч Г.А нь шүүхэд гаргасан нэхэмжлэлийн шаардлага болон тайлбартаа:...би 2008 онд Ж.Бтай танилцаж, 2009 оны 06 дугаар сарын 17-ны өдөр гэр бүл болсон юм.

Биднийг хамт амьдрах хугацаанд 2009 оны 05 дугаар сарын 22-ны өдөр охин Б мэндэлсэн. Бид зан харилцааны таарамжгүй байдал, үзэл бодлын хувьд хоорондоо таарч тохирохоо больж, хэрүүл маргаан ихээр үүсч хамтран амьдрах боломжгүй болсон тул 2011 оны 12 дугаар сараас өнөөдрийг хүртэл тус тусдаа амьдарч байна. Охин маань ээж Г.А миний асрамжид өсөж торниж байна.

Одоо бид тус тусын амьдрал зохиосон тул цаашид хамтран амьдрахгүй тул хүүхдийн тэтгэлэг тогтоолгохгүй, эд хөрөнгийн ямар нэгэн маргаан байхгүй тул бидний гэрлэлтийг цуцалж өгнө үү....(хх-ийн 1, 17 тал)

 

Нэхэмжлэгч Г.А нь шүүхэд гаргасан хүсэлтдээ:...би гэрлэлтээ цуцлуулахаар шүүхэд нэхэмжлэл гаргасан билээ.

Миний бие 7 хоногийн хугацаатай Баян-Өлгий аймагт ажлаар явах болсон тул намайг оролцуулахгүйгээр шүүх хуралдааныг хийж өгнө үү... (хх-ийн 24 тал)

Хариуцагч Ж.Б нь шүүхэд гаргасан тайлбартаа:...би Г.Атай 2008 онд гэр бүл болж 2010 он хүртэл амьдарсан. Энэ хугацаанд охин Б 2009 онд төрсөн юм.

Одоо охин Б маань ээж Агийн асрамжид байдаг. Бид тус тусдаа амьдраад 9 жил болсон. Хүүхдийн тэтгэлэг болон эд хөрөнгийн маргаан байхгүй.

Иймд бидний гэрлэлтийг цуцалж өгнө үү...(хх-ийн 19 тал)

 

Хариуцагч Ж.Б нь шүүхэд гаргасан хүсэлтдээ:...би Хэнтий аймгийн Хурх тосгонд Гурванбаянгийн соёлын төвд хөгжмийн багш ажилтай тул намайг оролцуулахгүйгээр хэргийг шийдэж өгнө үү... (хх-ийн 25 тал)

 

Шүүх хуралдаанд хавтаст хэргээс бичгийн нотлох баримтуудыг шинжлэн судлаад

 

ҮНДЭСЛЭХ нь:

 

 Нэхэмжлэгч Г.А нь хариуцагч Ж.Бас гэрлэлтээ цуцлуулах-аар шүүхэд нэхэмжлэлийн шаардлага гаргажээ.

 

Шүүх нэхэмжлэлийн шаардлагыг бүрэн хангах нь зүйтэй гэж үзэв.

 

Гэр бүлийн тухай хуулийн 7 дугаар зүйлийн 7.1-д зааснаар зохигчид 2009 оны 06 дугаар сарын 17-ны өдөр гэрлэлтээ бүртгүүлж, гэр бүл болсон болох нь №..........дугаартай гэрлэлтийн бүртгэлийн лавлагааны хуулбар, (хх-ийн 6 тал) 2009 оны 05 дугаар сарын 22-ны өдөр охин Быг төрүүлсэн болох нь төрсний № ............... дугаартай гэрчилгээний хуулбараар, (хх-ийн 10 тал)  нэхэмжлэгчийн оршин суугаа газрын тодорхойлолт, (хх-ийн 9 тал) ... зэрэг бичгийн нотлох баримтуудаар нотлогдон тогтоогдож байх тул Гэр бүлийн тухай хуулийн 12 дугаар зүйлийн 12.1, Иргэний хэрэг шүүхэд хянан шийдвэрлэх тухай хуулийн 32 дугаар зүйлийн 32.1-д зааснаар нэхэмжлэлийг хүлээн авч шийдвэрлэх үндэслэлтэй байна.

 

Нэхэмжлэгч нь Хэнтий аймаг дахь сум дундын иргэний хэргийн анхан шатны шүүхийн эвлэрүүлэн  зуучлахад  эвлэрэхээр хүсэлт гаргасан боловч зохигчид нь эвлэрээгүй байна. (хх-ийн 11 тал)

 

Гэрлэгчид нь 2011 оноос тус тусдаа амьдарсан бөгөөд гэрлэлтээ цуцлуулахыг хүсэж байгаа болох нь зохигчдын шүүхэд болон шүүх хуралдаанд гаргасан тайлбар зэрэг бичгийн нотлох баримтуудаар нотлогдон тогтоогдож байна гэж шүүх дүгнэв. (хх-ийн 1, 17, 19 тал)

Иймд Гэр бүлийн тухай хуулийн 14 дүгээр зүйлийн 14.1-д: гэрлэгчдийн харилцан тохиролцсон буюу тэдний хэн нэгний нэхэмжлэлийн шаардлагын дагуу гэрлэлт цуцлах асуудлыг шүүх шийдвэрлэнэ гэж заасан байх тул гэрлэлтийг цуцлах нь зүйтэй гэж үзэв.

 

Хариуцагч Ж.Б нь охин Быг өөрийн асрамжид авах талаар болон гэрлэлт цуцлуулах талаар маргаагүй байна.

Зохигчид Гэр бүлийн тухай хуулийн 14 дүгээр зүйлийн 14.5-т зааснаар гэрлэлт цуцлах үед хүүхдүүдээ хэнийхээ асрамжид үлдээх талаар харилцан тохиролцсон байна.

Охин Б нь 2009 оны 05 дугаар сарын 22-ны өдөр төрсөн, 09 нас, 11 сартай болох нь төрсний гэрчилгээний хуулбараар, (хх-ийн 10 тал) ээжтэйгээ хамт амьдардаг бөгөөд ээждээ ээнэгшин дассан нь Хэнтий аймгийн Хэрлэн сумын 03 дугаар багийн засаг дарга Ө.Ө-ийн тодорхойлолтоор, (хх-ийн 9 тал).... зэргээр тус тус тогтоогдож байна.

Монгол улсын Үндсэн хуулийн 16 дугаар зүйлийн 16.11-д зааснаар хүүхдийн ашиг сонирхлыг төр хамгаалах, 17 дугаар зүйлийн 17.2-т зааснаар үр хүүхдээ өсгөн хүмүүжүүлэх нь иргэн бүрийн журамт үүрэг бөгөөд Хүүхдийн эрхийн конвенцын 3 дугаар зүйлийн 1-д зааснаар шүүх юуны өмнө хүүхдийн дээд ашиг сонирхлыг хангахад анхаарлаа хандуулах тул хэрэгт авагдсан дээрх нотлох баримтуудыг үндэслэн охин Быг эх Г.Агийн асрамжид үлдээхээр тогтов.

 

Зохигчдын тайлбарыг үндэслэн тэдний хооронд хамтран өмчлөх дундын эд хөрөнгийн талаар маргаагүй болохыг дурдав.

Гэр бүлийн тухай хуулийн 26 дугаар зүйлд зааснаар зохигчид нь хүүхдээ эрүүл чийрэг өсгөн бойжуулах, сэтгэхүйн хувьд төлөвшүүлэх, асран хамгаалах, тэжээн тэтгэх, суурь боловсрол эзэмшүүлэх, үндэсний ёс заншил уламжлалаа дээдлэх, хүүхдийн эрхийг хамгаалах, хөдөлмөрийн анхны дадлага олгох зэрэгт эцэг, эх тэгш эрх эдэлж, адил үүрэг хүлээхийг даалгах нь зүйтэй гэж үзэв.

 

Нэхэмжлэгч Г.А, хариуцагч Ж.Б нар нь өөрсдийнхөө эзгүйд шүүх хуралдаан хийлгүүлэх хүсэлтийг шүүхэд гаргасан байна. (хх-ийн 24, 25 тал)

 

Иймд Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.1, 100.3-д зааснаар тэднийг оролцуулахгүйгээр хэргийг шийдвэрлэв.

 

Гэр бүлийн тухай хуулийн 26 дугаар зүйлийн 26.4-т зааснаар зохигчид нь гэрлэлтээ цуцлуулсан тохиолдолд Гэр бүлийн тухай хуулийн 26 дугаар зүйлийн 26.2-т заасан эцэг, эхийн хүүхдээ хүмүүжүүлэх үүрэг хэвээр байхыг анхааруулах нь зүйтэй гэж үзэв.

 

 

Монгол улсын Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118,132 дугаар зүйлийн 132.6-д заасныг удирдлага болгон

 

ТОГТООХ нь:

 

1. Гэр бүлийн тухай хуулийн 14 дүгээр зүйлийн 14.1-т зааснаар нэхэмжлэгч  Г. А (РД: ........), хариуцагч  Ж. Б (РД: .........) нарын гэрлэлтийг цуцалсугай.

2. Гэр бүлийн тухай хуулийн 14 дүгээр зүйлийн 14.5, 14.7-д зааснаар 2009 оны 05 дугаар сарын 22-ны өдөр төрсөн охин Быг эх Г.Агийн асрамжинд үлдээсүгэй.

3. Зохигчид нь хамтран өмчлөх, дундын эд хөрөнгийн талаар маргаангүй, нэхэмжлэгч нь хариуцагчаас хүүхдийн тэтгэлэг нэхэмжлэхгүй гэснийг дурдсугай.

4. Гэр бүлийн тухай хуулийн 26 дугаар зүйлийн 26.4-т зааснаар зохигчид нь гэрлэлтээ цуцлуулсан тохиолдолд Гэр бүлийн тухай хуулийн 26 дугаар зүйлийн 26.2-т зааснаар хүүхдээ эрүүл чийрэг өсгөн бойжуулах, сэтгэхүйн хувьд төлөвшүүлэх, хүүхдээ асран хамгаалах, тэжээн тэтгэх, хүүхдээ үндэсний ёс заншил, уламжлалаа дээдлэх үзлээр хүмүүжүүлэх, түүнд суурь боловсрол эзэмшүүлэх, хөдөлмөрийн анхны дадлага олгох зэрэг... эцэг, эх нь хүүхдээ хүмүүжүүлэх үүрэгтэй болохыг дурдсугай.

5. Иргэний хэрэг шүүхэд хянан шийдвэрлэх тухай хуулийн  60 дугаар зүйлийн 60.1, 56 дугаар зүйлийн 56.1, улсын тэмдэгтийн хураамжийн тухай хуулийн 7 дугаар зүйлийн 7.1.2, 41 дүгээр зүйлийн 41.1.1-д зааснаар нэхэмжлэгч Г.А нь улсын тэмдэгтийн хураамжаас чөлөөлөгддөг болохыг дурдаж, түүний улсын тэмдэгтийн хураамжид төлсөн 70 200 төгрөгийг улсын төсөвт хэвээр үлдээж, хариуцагч Ж.Бас 70 200 төгрөгийг гаргуулж, нэхэмжлэгчид олгосугай.

6. Гэр бүлийн тухай хуулийн 14 дүгээр зүйлийн 14.9-д зааснаар шийдвэрийн хувийг Хэнтий аймгийн иргэний гэр бүлийн бүртгэлийн хэлтэст хүргүүлэхийг шүүгчийн туслах А.Цэрэндуламд даалгасугай.

7. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.4, 119.7-д зааснаар энэ шийдвэрийг танилцуулан сонсгож, 7 хоног өнгөрснөөс хойш 14 хоногийн дотор шүүх хуралдаанд оролцсон тал шүүхэд хүрэлцэн ирж шийдвэрийг өөрөө гардан авах үүргээ биелүүлээгүй нь давж заалдах журмаар гомдол гаргах хугацааг тоолоход саад болохгүй болохыг дурдасугай.

8. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.1, 120.2-т зааснаар энэ шийдвэр нь танилцуулан сонсгосноор хүчинтэй болох бөгөөд зохигчид тэдгээрийн төлөөлөгч, өмгөөлөгч нар нь анхан шатны шийдвэрийг гардан авснаас хойш 14 хоногийн дотор Хэнтий аймаг дахь эрүү, иргэний хэргийн давж заалдах шатны шүүхэд давж заалдах гомдол гаргаж болохыг дурьдсугай.

 

 

 

ДАРГАЛАГЧ ШҮҮГЧ                               Л.ЦЭРЭНДУЛАМ