2022 оны 01 сарын 17 өдөр

Дугаар 114/ШШ2022/0001

Дархан-Уул аймаг

 МОНГОЛ УЛСЫН НЭРИЙН ӨМНӨӨС

Хэргийн индекс: 114/2021/0018/З

Дархан-Уул аймаг дахь Захиргааны хэргийн анхан шатны шүүхийн шүүх хуралдааныг шүүгч З.Энхтуяа даргалж, тус шүүхийн шүүх хуралдааны танхимд нээлттэй хийсэн шүүх хуралдаанаар

Гомдол гаргагч ******* /РД: 8258791/

Хаяг: Дархан-Уул аймаг, Дархан сум, 12 дугаар баг, 14 дүгээр хороолол Хүслийн Хотхоны байр

Хариуцагч ******* *******

Хаяг: Дархан-Уул аймаг Дархан сум, 4 дүгээр баг, Дархан сумын Засаг даргын тамгын газар

Гомдлын шаардлага: Дархан-Уул аймгийн Мэргэжлийн хяналтын Хөдөлмөрийн хяналтын улсын байцаагч *******гийн 2021 оны 11 дүгээр сарын 17-ны өдрийн 0033201 дугаартай зөрчилд шийтгэл оногдуулах шийтгэлийн хуудсыг хүчингүй болгуулах тухай зөрчлийн хэргийг хянан хэлэлцэв.

Шүүх хуралдаанд: гомдол гаргагчийн итгэмжлэгдсэн төлөөлөгч *******, хариуцагч *******, шүүх хуралдааны нарийн бичгийн дарга Б.Мандуул нар оролцов.

ТОДОРХОЙЛОХ нь: 

Гомдол гаргагч *******-аас шүүхэд болон түүний итгэмжлэгдсэн төлөөлөгч ******* шүүх хуралдаанд гаргасан гомдолдоо:- ******* *******гийн 2021 оны 11 дүгээр сарын 17-ны өдрийн 0033201 дугаартай зөрчилд шийтгэл оногдуулах тухай шийтгэлийн хуудсыг хүчингүй болгуулахаар гомдол гаргасан.

Манай сургуульд багшаар ажиллаж байсан багш ******* нь 2 сараас хойш хөдөлмөрийн гэрээний дагуу өдөрт 8 цаг ажиллах үүргээ бүрэн биелүүлээгүй, тайлан төлөвлөгөөний ажлын хурал болон заах аргын нэгдлийн хурал зэрэгт огт оролцоогүй, өөрийн харьяалах албан тушаалтанд ажил үүргээ огт дүгнүүлээгүй зэргээр гэрээгээ зөрчиж байсан тул цалин хөлсийг бууруулж тооцох сахилгын шийтгэл оногдуулах талаар 2021 оны 03 дугаар сарын 31-ний өдөр дуудаж, уулзахад ******* нь өнөөдрөөс ажиллахгүй, асуудлаа шүүхээр шийдвэрлүүлнэ гэдгээ хэлээд явсан болно. Үүнээс хойш ажлын байрандаа ирээгүй бөгөөд ажлаа тасалсан тул ажлаас нь 2021 оны 04 дүгээр сарын 09-ний өдрийн Б/58 дугаар захирлын тушаалаар ажлаас халах сахилгын шийтгэл оногдуулах шийдвэр гарсан.

Улсын байцаагчийн тавьсан актаар багш *******т 2,3 дугаар сард ажилласан хугацааны цалин, ажилласан хугацааны ээлжийн амралтын олговрыг төлөхөд татгалзах зүйлгүй. Харин хөдөлмөрийн дотоод журамд зааснаар ******* багш нь ажил үүргээ хүлээлгэж өгөөгүй, тойрох хуудсаа зуруулаагүй өдий хүрсэн тул бас хариуцлага хүлээх ёстой гэж үзэж байна. Гэтэл ******* нь уг цалин ба ээлжийн амралтын олговрыг хэний буруутайн улмаас ямар учир шалтгааны улмаас олгогдоогүй байгаа, уг хөдөлмөрийн маргаан шүүхийн журмаар явж байгаа зэрэг нөхцөл байдлуудыг анхаарч үзэлгүй ажил олгогчид Зөрчлийн тухай хуулийн 10.16 дугаар зүйлийн 9.2-т заасны дагуу шийтгэл оногдуулах үндэслэлтэй гэж үзээд 5 сая төгрөгийн шийтгэлийн хуудас оногдуулж байгааг эс зөвшөөрч шийтгэл оногдуулж байгаад гомдолтой байна. Иймд ******* *******гийн гаргасан 2021 оны 11 дүгээр сарын 17-ны өдрийн 0033201 дугаартай шийтгэлийн хуудасны 1 дүгээр заалт буюу манай байгууллагыг 5000000 /таван сая/төгрөгөөр торгосон хэсгийг хүчингүй болгуулж өгнө үү гэв.

Хариуцагч ******* ******* шүүхэд болон шүүх хуралдаанд гаргасан тайлбартаа:- Шинэ алхам сургуульд холбогдох зөрчлийн 2118000463 дугаартай хэрэг аймгийн Прокурорын газраас 2021 оны 10 дугаар сарын 14-ны өдөр харьяаллын дагуу шилжиж ирсэн. Шинэ алхам сургууль нь багш *******ийн 2021 оны 02,03 дугаар саруудын цалинг тогтоосон хугацаанд олгоогүй болохыг нотлох баримтаар тогтоож Зөрчлийн тухай хуулийн 10.16 дугаар зүйлийн 9.2 дахь хэсэгт заасны дагуу хуулийн этгээдийг 5000 нэгжтэй тэнцэх хэмжээний торгоно гэснийг үндэслэн торгох шийтгэл ноогдуулсан.

Зөрчлийн хэрэгт авагдсан баримтаар багш ******* нь 2019 оны 3 дугаар сарын 19-ний өдөр хөдөлмөрийн гэрээ байгуулан ажиллаж байгаад, 2021 оны 02 дугаар сарын 24-ний өдөр өөрийн хүсэлтээр ажлаас чөлөөлөгдөх хүсэлт өгч, Шинэ алхам сургуулийн 2021 оны 03 дугаар сарын 01-ний өдрийн Б/55 дугаартай захирлын тушаалаар ажлаас чөлөөлсөн байна. Ингээд багш болон сурагчдын эцэг, эхийн хүсэлтээр 2021 оны 03 дугаар сарын 07-ны өдрийн Б/56 дугаар захирлын тушаалаар *******ийг ажилд буцаан томилсон байна. Үүний дараа багш *******ийг хөдөлмөрийн гэрээ, хөдөлмөрийн дотоод журамд заасан үүргээ зөрчиж 5 хоногийн ажил тасалсан гэж 2021 оны 04 дүгээр сарын 09-ний өдрийн Б/58 дугаар захирлын тушаалаар ажлаас халах сахилгын шийтгэл оногдуулсан шийдвэр гарсан байдаг. Энэ тушаалын 2 дугаар заалтаар ажил хүлээлцэх асуудлыг аймгийн Онцгой комиссын шийдвэрийн дагуу хатуу хөл хорионы хугацаа дууссанаас хойш 2 өдрийн дотор зохион байгуулахыг, 3 дугаар заалтаар санхүүгийн тооцоо хийж дуусгахыг нягтлан бодогч А.Ундармаад үүрэг болгосон байдаг. Гэтэл ажил хүлээлцэх ажил сунжирч ажилласан хугацааны цалин, мөн ажилласан хугацаанд олгох ээлжийн амралтын олговрыг олгоогүй болох нь нотлогдсон тул улсын байцаагчийн 2021 оны 11 дүгээр сарын 16-ны өдрийн 10-06-027/41 тоот актаар хохирлын нөхөн төлүүлэх акт тогтоосон ба уг актыг сургууль зөвшөөрч гардан авсан, энэ талаар гомдол гаргаагүй байна.

Шинэ алхам сургуулийг Хөдөлмөрийн тухай хуулийн 49 дүгээр зүйлийн 49.1, 60 дугаар зүйлийн 60.1- д заасан зөрчлийг гаргасан байна гэж үзээд мөн хуулийн 141 дүгээр зүйлийн 141.2-д зааснаар Зөрчлийн тухай хуулийн 10.16 дугаар зүйлийн 9.2-т ажилтны цалин хөлсийг хүндэтгэн үзэх шалтгаангүйгээр тогтоосон хугацаанд нь олгоогүй, эсхүл саатуулсан гэсэн үндэслэлээр 5000 нэгжтэй тэнцэх хэмжээний буюу 5000000 төгрөгөөр торгох шийтгэл оногдуулсан,үүнийгээ үндэслэлтэй гэж үзэж байна гэв.

ҮНДЭСЛЭХ нь: 

Гомдол гаргагч Шинэ алхам сургууль НҮТББ нь хариуцагч ******* *******гийн 2021 оны 10 дугаар сарын 17-ны өдрийн 0033201 дугаартай шийтгэлийн хуудсаар 5000 нэгжтэй тэнцэх хэмжээний төгрөг буюу 5000000/таван сая/ төгрөгөөр торгох шийтгэл оногдуулсныг эс зөвшөөрч шүүхэд гомдол гаргажээ.

Шүүх хуралдаан дээр гомдол гаргагчийн итгэмжлэгдсэн төлөөлөгч ******* нь улсын байцаагчийн актаар тус сургуулийн багшаар ажиллаж байсан багш *******ийн ажилласан хугацааны цалин хөлс, ээлжийн амралтын олговрыг олгоход татгалзах зүйлгүй, харин улсын байцаагчийн шийтгэлийн хуудасны 1 дүгээр заалтаар манай байгууллагыг 5000000 /таван сая/ төгрөгөөр торгосон хэсгийг хүчингүй болгуулахаар гомдол гаргасан гэж гомдлын шаардлагаа тодруулсан болно.

Гомдол гаргагч нь тус сургуульд багшаар ажиллаж байсан *******ийн цалин хөлс, ээлжийн амралтын олговрыг хэний буруутай үйлдлийн улмаас, ямар учир шалтгааны улмаас олгогдоогүй байгаа, маргаан шүүхийн журмаар явж байгаа зэрэг нөхцөл байдлуудыг анхаарч үзэлгүй ажил олгогчид шийтгэл оногдуулсанд гомдолтой гэж маргаж байна.

Шүүх гомдол гаргагчаас гомдлын шаардлагын хүрээнд гомдол гаргагч, түүний итгэмжлэгдсэн төлөөлөгч, хариуцагчаас шүүхэд болон шүүх хуралдаанд гаргасан тайлбар, хуульд заасан журмын дагуу хэрэгт авагдсан нотлох баримтад үнэлэлт өгч дараах үндэслэлээр гомдлын шаардлагыг хэрэгсэхгүй болгож шийдвэрлэлээ.

Гомдлын ******* *******гийн гаргасан 2021 оны 11 дүгээр сарын 17-ны өдрийн 0033201 дугаартай зөрчилд шийтгэл оногдуулах тухай шийтгэлийн хуудасны 1 дүгээр заалт буюу 5 000000 /таван сая/ төгрөгөөр торгосон хэсгийг хүчингүй болгуулах шаардлагын тухайд:

Хариуцагч ******* нь Дархан-Уул аймгийн Прокурорын газраас харьяаллын дагуу шилжүүлж ирүүлсэн Шинэ алхам сургууль НҮТББ-д холбогдох хэрэгт зөрчлийн хэрэгт зөрчил хянан шийдвэрлэх ажиллагаа явуулж тус сургууль нь багш *******ийн 2021 оны 02,03 дугаар сард ажилласан хугацааны цалин, хөлс 209487.06 төгрөг, мөн ажилласан хугацааны ээлжийн амралтын олговор 2172463.56 төгрөгийг хүндэтгэн үзэх шалтгаангүйгээр олгоогүй болохыг тогтоосон байна.

Иймээс Шинэ алхам сургууль НҮТББ-д багш *******т дээрх цалин хөлс, ээлжийн амралтын олговрыг нөхөн олгуулахаар сургуулийн захирал,нягтлан бодогч нарт хариуцуулж 2021 оны 10 дугаар сарын 16-ны өдрийн 10-06-027/41 тоот улсын байцаагчийн актыг гаргасан байх ба дээрх улсын байцаагчийн актын талаар талууд мараагүй байна.

Улмаар хариуцагч 2021 оны 11 дүгээр сарын 17-ны өдрийн 0033201 дугаар шийтгэлийн хуудсаар гомдол гаргагч байгууллагыг Хөдөлмөрийн тухай хуулийг зөрчсөн гэж үзэж Зөрчлийн тухай хуулийн 10.16 дугаар зүйлийн 9 дүгээр хэсгийн 9.2-т ажилтны цалин хөлсийг хүндэтгэн үзэх шалтгаангүйгээр тогтоосон хугацаанд нь олгоогүй, эсхүл саатуулсан гэсэн үндэслэлээр 5000 нэгжтэй тэнцэх буюу 5000000/ таван сая/ төгрөгөөр торгосон шийдвэр гаргажээ.

Шинэ алхам сургууль НҮТББ нь хөдөлмөрийн дотоод журмын 10.1.1-д Ажилтанд ажил олгогчтой хийсэн хөдөлмөрийн гэрээний дагуу үндсэн цалин, үр дүнгийн урамшуулал,бусад нэмэгдлийг тооцож олгоно, 10.1.6-д Ажилтны урьдчилгаа цалин хөлсийг сар бүрийн 14-ны өдөр, сүүлийн цалинг дараа сарын 28-ны өдөр буюу сард 2 удаа олгох ...цалин хөлсийг олгоно гэж заасан байх бөгөөд багш *******т 2021 оны 2,3 дугаар сарын ажилласан хугацааны цалин хөлс, ээлжийн амралтыг дээрх журмын дагуу олгоогүй болох нь гомдол гаргагч болон хариуцагчийн гомдол, тайлбар, гэрч *******ийн ... өнөөдрийг хүртэл цалин хөлс, ээлжийн амралтын олговрыг сургууль олгоогүй байгаа гэсэн шүүхэд өгсөн мэдүүлэг, *******ийн 2021 оны 02, 03 дугаар сарын цалингийн болон ээлжийн амралтын олговрын тооцоолол, улсын байцаагчийн 2021 оны 10 дугаар сарын 16-ны өдрийн 10-06-027/41 тоот акт зэргээр нотлогдож байна.

Иймд Шинэ алхам сургууль НҮТББ нь Хөдөлмөрийн тухай хуулийн 49 дүгээр зүйлийн 49.1-д Ажилтны цалин хөлсийг хийснээр, цагаар, бусад хэлбэрээр хөдөлмөрийн үр дүнд нь тохируулан олгоно, 60 дугаар зүйлийн 60.1-д Ажилтны цалин хөлсийг сард хоёр ба түүнээс дээш удаа, тогтоосон өдөр олгоно гэж заасныг зөрчсөн болох нь тогтоогдож байх тул хариуцагч нь зөрчлийн хэргийг хянан шийдвэрлэж, 2021 оны 11 дүгээр сарын 17-ны өдрийн 0033201 дүгээр шийтгэлийн хуудасны 1 дүгээр заалтаар 5000000/ таван сая/ төгрөгөөр торгох шийтгэл оногдуулсан захиргааны акт нь Захиргааны ерөнхий хуулийн 4 дүгээр зүйлийн 4.2.5-д зорилгодоо нийцсэн, бодит нөхцөлд тохирсон, шийдвэр нь үндэслэл бүхий байх зарчимтай нийцэж байна гэж дүгнээд гомдол гаргагчийн гомдлын шаардлагыг хэрэгсэхгүй болгож шийдвэрлэх нь зүйтэй гэж шүүх үзлээ.

Захиргааны хэрэг хянан шийдвэрлэх тухай хуулийн 106 дугаар зүйлийн 106.1, 106.3, 106.3.14 дэх хэсэгт заасныг тус тус удирдлага болгон

ТОГТООХ нь:

1.Захиргааны ерөнхий хуулийн 4 дүгээр зүйлийн 4.2.5, Зөрчлийн тухай хуулийн 10.16 дугаар зүйлийн 9 дэх хэсгийн 9.2 дэх хэсэгт зааснаар гомдол гаргагч Шинэ алхам сургууль НҮТББ-аас гаргасан ******* *******гийн гаргасан 2021 оны 11 дүгээр сарын 17-ны өдрийн 0033201 дугаартай зөрчилд шийтгэл оногдуулах тухай шийтгэлийн хуудасны 1 дүгээр заалт буюу 5 000 000 /таван сая/ төгрөгөөр торгосон хэсгийг хүчингүй болгуулах гомдлын шаардлагыг хэрэгсэхгүй болгосугай.

2. Захиргааны хэрэг шүүхэд хянан шийдвэрлэх тухай хуулийн 47 дугаар зүйлийн 47.1, 51 дүгээр зүйлийн 51.1-д зааснаар гомдол гаргагч Шинэ алхам сургууль НҮТББ-аас улсын тэмдэгтийн хураамжид урьдчилан төлсөн 70200 /далан мянга хоёр зуун/ төгрөгийг улсын орлогод хэвээр үлдээсүгэй.

3. Захиргааны хэрэг шүүхэд хянан шийдвэрлэх тухай хуулийн 113 дугаар зүйлийн 113.2 дахь хэсэгт зааснаар гомдол гаргагч, түүний итгэмжлэгдсэн төлөөлөгч, хариуцагч нар шийдвэрийг эс зөвшөөрвөл шийдвэрийг гардан авсан өдрөөс хойш 5 хоногийн дотор Захиргааны хэргийн давж заалдах шатны шүүхэд гомдол гаргах эрхтэй болохыг дурдсугай.

 
 

 

 ДАРГАЛАГЧ,ШҮҮГЧ                            З.ЭНХТУЯА