2019 оны 09 сарын 04 өдөр                                   Дугаар 139/ШШ2019/00360                                                      Дундговь аймаг

МОНГОЛ УЛСЫН НЭРИЙН ӨМНӨӨС

 

 

Дундговь аймаг дахь сум дундын Иргэний хэргийн анхан шатны шүүхийн шүүгч Г.Б даргалж, тус шүүхийн ‘’Б’’ танхимд нээлттэй хийсэн шүүх хуралдаанаар:

 Нэхэмжлэгч Дундговь аймгийн Г сумын                             оршин суух хаягтай, Б овогт Жын Д /ЗГ /-ын ажиллаж байсан байдал тогтоолгох тухай 139/2019/00386/И индекстэй иргэний хэргийг хянан хэлэлцэв.

 Шүүх хуралдаанд нэхэмжлэгч Ж.Д  шүүх хуралдааны нарийн бичгийн дарга Б.Ж   оролцов.

                                                                                    ТОДОРХОЙЛОХ нь:

Нэхэмжлэгч Ж.Д шүүхэд гаргасан нэхэмжлэлдээ:    Б овогт Жын Д миний бие 1966 онд Гурвансайхан суманд төрсөн, эмэгтэй 53 настай, 1982 онд Гурвансайхан сумын ЕБС-ын 8-р анги төгсөөд Илгээлтийн эзэн малчнаар 1982 оны 6 сарын 20-ны өдрөөс  1993 оны 3 сарын 01-ний өдрийг хүртэл тасралтгүй Давших зам нэгдэлд хоньчиноор бог мал маллаж байсан.  8-р анги төгсөөд анх Давших зам нэгдэлд мал малласан үеийн хөдөлмөрийн дэвтэр  Давших зам нэгдлийн контор, Засаг даргын тамгын газрын конторын барилга 2000 онд гал түймэрт өртөн шатахад Нийгмийн даатгалын байцааагч Содномпэлийн  ширээнд байсан баримт бичгийн хамт устаж үрэгдсэн.   1991-1993 онуудад мал маллаж байсан хөдөлмөрийн  дэвтрийн хуулбар, малчин мэргэжлийн үнэмлэх  тухай үед хамт мал маллаж байсан хүмүүсийн гэрчийн мэдүүлэг   зэрэг баримтуудыг үндэслэн  Дундговь аймгийн Гурвансайхан сумын  Давших зам нэгдэлд 1982 оны 6 сарын 20-ны өдрөөс 1993 оны 3 сарын 01-ний өдрийг  хүртэл малчинаар ажиллаж байсан болохыг тогтоож өгнө үү гэжээ.

 Нэхэмжлэгчийн нэхэмжлэл, шүүх хуралдаанаар хэлэлцсэн нотлох баримтуудыг шинжлэн судлаад

                                                                                              ҮНДЭСЛЭХ нь:

Нэхэмжлэгч Ж.Д нь 1982 оны 6  сарын 20-ны өдрөөс 1993 оны 3 сарын 01-ний өдрийг хүртэл Дундговь аймгийн Гурвансайхан сумын Давших зам нэгдэлд малчинаар ажиллаж байсан болохыг тогтоолгохоор нэхэмжлэлийн шаардлагыг   гаргажээ.

Ж.Дт хамаарах 1982 оны 6  сарын 20-ны өдрөөс 1993 оны 3 сарын 01-ний өдрийг хүртэл Дундговь аймгийн Гурвансайхан сумын Давших зам нэгдэлд малчинаар ажиллаж байсан талаархи баримт архивт хадгалагдаагүй болох нь Дундговь аймгийн Архивын тасгийн 2019 оны 8 сарын 16-ны өдрийн 269 дугаартай тодорхойлолтоор, хөдөлмөрийн дэвтрээ үрэгдүүлсэн болох нь Дундговь аймгийн Онцгой байдлын газрын  гамшгаас хамгаалах улсын байцаагчийн  2019 оны 8 сарын 19-ний өдрийн 8 дугаартай дүгнэлтээр тус тус  нотлогдож байх тул нэхэмжлэлийг шүүхээр хянан шийдвэрлэх нь зүйтэй байна. /хх-ийн 11, 17/

Шүүх хэрэгт авагдсан дараах бичгийн нотлох баримтуудыг шинжлэн судалсан болно. 

 

1. Дундговь аймгийн Гурвансайхан сумын Давших зам нэгдлээс Ж.Дт олгосон  1991 оны 01 сараас 1993 оны 02 сарыг дуустал хугацааны цалингийн бичилт бүхий хөдөлмөрийн дэвтрийн нортариатчаар гэрчлүүлсэн хуулбар /хх-ийн 04-05/
2. Тамгын газрын барилга шатахад нйигмийн даатгалын байцаагч Ц.С- ийн ширээнд байсан бичиг баримтын жагсаалт /тус жагсаалтын 1995 оноос өмнөх дэвтэр хэсгийн 16 дугаарт Ж Д, 9 жил 2 сар гэсэн бичиглэлтэй/-ийн  нотариатчаар гэрчлүүлсэн хуулбар /хх-ийн 07/
3. Давших зам нэгдлийн  контор шатахад үрэгдсэн зүйлийн тодорхойлолт /тодорхойлолтын 7 дугаарт, Давших зам нэгдэлд 1995 оноос өмнө ажиллаж байсан хүмүүсийн хөдөлмөрийн дэвтэр, 9 дугаарт Давших зам хоршооны гишүүдийн бүртгэл гэсэн бичиглэлтэй/-ын нотариатчаар гэрчлүүлсэн хуулбар /хх-ийн 08-09/
4. Дундговь аймгийн Татварын хэлтсийн 2019 оны 8 сарын 16-ны өдрийн 08/494 дугаартай “Гурвансайхан сумын Давших зам нэгдэл, Давших зам ХК,  Давших зам ББХК, Давших зам хоршоо”-ны талаархи хуулийн этгээдийн улсын бүртгэлийн лавлагаа /хх-ийн 10/
5. Ж.Дд Давших зам нэгдлээс олгосон 1988 оны 2 сарын 05-ны өдрийн “Баярын бичиг” 1984 оны “Дурсамж”,  1985 оны 9 сарын 01-ний өдрийн “Диплом”,  1986 оны 1 сарын 27-ны өдрийн “Баярын бичиг” /хх-ийн 13-16/
6. Гэрч Ж.О-ийн  “... Ж.Д 1982-1992 он хүртэл Дундговь аймгийн Гурвансайхан сумын Давших зам нэгдлийн Чулуут бригадад бага мал маллаж байсан хүн. Би 1975-2000 он хүртэл Дундговь аймгийн Гурвансайхан сумын Давших зам нэгдлийн Чулуут бригадад малчин байсан. Бид нэг бригадын хүмүүс учраас энэ хүнийг малчин байсан гэж мэдэж байна. Өөр газар ажиллаагүй, сумандаа л малчин байсан хүн... сайн малчин хүн байсан  ” гэх мэдүүлэг /хх-ийн 20/
7. Гэрч Д.Н-ын  “Ж.Д 1982 онд 8 дугаар анги төгсөөд илгээлтээр гарсан. 1982-1993 он хүртэл Дундговь аймгийн Гурвансайхан сумын Давших зам нэгдлийн Элгэн бригадад бог мал маллаж байсан хүн байгаа юм. Би 1981 оноос одоог хүртэл Дундговь аймгийн Гурвансайхан сумын Давших зам нэгдэл, Давших зам хоршоонд мал маллаж байгаа хүн. Ж.Дтай бид нар нэг нутгийн хүмүүс, нэг нэгдэлд ажиллаж байсан учраас энэ хүний талаар мэдэж байна. 1984 онд бид хоёр хамгийн залуу сайн малчин болж байсан юм. Өөр газар ажиллаагүй, сумандаа л малчин байсан хүн.    Ж.Д 1984 онд сайн малчин болж байсан, сайшаалын үнэмлэх, баярын бичиг олон удаа авч байсан, он сарыг нь нарийн санахгүй байна.” гэх мэдүүлэг /хх-ийн 21/
8. Гэрч Д.М-ийн  “ Ж.Д 1982-1992 он дуустал Дундговь аймгийн Гурвансайхан сумын Давших зам нэгдлийн Элгэн бригадад бага мал маллаж байсан хүн. Би 1964-1993 он хүртэл Дундговь аймгийн Гурвансайхан сумын Давших зам нэгдлийн Чулуут бригадад адуу малладаг, малчин байсан. Бид нэг суманд  малчин байсан гэж мэдэж байна. Өөр газар ажиллаагүй, сумандаа л малчин байсан хүн.... сайн малчин хүн байсан.” гэх мэдүүлэг /хх-ийн 22/ зэрэг шууд нотлох баримтууд,
9. Ж.О-ийг  1975 оны 1 сарын 03-ны өдрөөс 1993 оны 12 сарын 31-ний өдрийг хүртэл тус тус  Гурвансайхан сумын Давших зам нэгдэлд малчинаар ажиллаж байсан болохыг тогтоосон тухай Дундговь аймаг дахь Сум дундын шүүхийн 2000 оны 11 сарын 07-ны өдрийн 276 дугаартай шийдвэрийн хуулбар /хх-ийн 27/
10. Д.М-ойг  1967 оны 1 сарын 01-ний өдрөөс 1979 оны 1 сарын 1-ний өдрийг хүртэл, 1983 оны 1 сарын 01-ний өдрөөс 1993 оны 01 сарын 01-ний өдрийг хүртэл Гурвансайхан сумын Давших зам нэгдэлд малчинаар ажиллаж байсан болохыг тогтоосон тухай Дундговь аймаг дахь Сум дундын шүүхийн 2000 оны 11 сарын 07-ны өдрийн 275 дугаартай шийдвэрийн хуулбарууд /хх-ийн 28/
11. Д.Н-ыг 1981 оны 6 сарын 22-ны өдрөөс 1992 оны 03 сарын 23 өдрийг хүртэл, 1992 оны 04 сарын 01 өдрөөс 2000  оны 12 сарын 31-ний өдрийг дуустал Дундговь аймгийн Гурвансайхан сумын Давших зам нэгдэл, Давших зам ХК-д  малчинаар ажиллаж байсан болохыг тогтоосон  Дундговь аймаг дахь Сум дундын иргэний хэргийн анхан шатны шүүхийн 2018 оны 5 сарын 10-ний өдрийн 139/ШШ2018/00349 дугаартай шүүхийн шийдвэрийн хуулбар /хх-ийн 40-42/ зэрэг  дам нотлох баримтууд болно.

 

            Хэрэгт авагдсан, шүүх хуралдаанаар шинжлэн судлагдсан нотлох баримтуудыг шууд   болон дам   байдлаар үнэлж,  нэхэмжлэлийн шаардлагыг бүрэн хангахаар шийдвэрлэв.

 

 Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн  133.1.1-д  заасныг удирдлага болгон  ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн  135 дугаар зүйлийн 135.2.6-д зааснаар Б овогт Жын Д /ЗГ /-ыг  1982 оны 06 сарын 20-ны өдрөөс 1993 оны 3 сарын 01-ний өдрийг хүртэл Дундговь аймгийн Гурвансайхан сумын “Давших зам” нэгдэл, Давших зам ХК” -д малчнаар ажиллаж байсан болохыг  тогтоосугай.

2. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-т зааснаар нэхэмжлэгч Ж.Дын улсын тэмдэгтийн хураамжид төлсөн 70.200 /далан мянга хоёр зуу/ төгрөгийг төсвийн орлогод хэвээр үлдээсүгэй. 

3. Иргэний хэрэг шүүхэд хянан шийдвэрлэх тухай хуулийн 119, 120 дугаар зүйлд зааснаар нэхэмжлэгч энэ шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор Дундговь аймгийн Эрүү, иргэний хэргийн давж заалдах шатны шүүхэд давж заалдах гомдол гаргах эрхтэйг дурдсугай.

 

 

 

 

 

ДАРГАЛАГЧ ШҮҮГЧ                      Г.Б