Багануур дүүргийн Эрүүгийн хэргийн анхан шатны шүүхийн эрүүгийн хэргийн шүүх хуралдааныг шүүгч Н.Нарантуяа даргалж,  

Шүүх хуралдааны нарийн бичгийн дарга Л.Отгончимэг,

Улсын яллагч Ж.Бүрэнжаргал      

Шүүгдэгч Э.Солонго  

Шүүгдэгчийн өмгөөлөгч С.Сэргэлэн нарыг оролцуулан тус шүүхийн хуралдааны танхимд нээлттэй хийв.

  Эрүүгийн хэргийн дугаар 201601070103

          Нийслэлийн Багануур дүүргийн Прокурорын газраас Эрүүгийн хуулийн тусгай ангийн 150 дугаар зүйлийн 150.1 дэх хэсэгт зааснаар яллагдагчаар татах тогтоол баталж ирүүлсэн Э.Солонгод холбогдох 201601070103 дугаартай эрүүгийн хэргийг 2016 оны 09 дүгээр сарын 05-ны өдөр хүлээн авч хянан хэлэлцэв.

                                Шүүгдэгчийн биеийн байцаалт:

            Улаан Уул овогт Энхтуулын Солонго /ВЭ82111208/, 1982 оны 11 дүгээр сарын 12-ны өдөр Улаанбаатар хот Сүхбаатар дүүрэгт төрсөн, 34 настай, эмэгтэй, Монгол Улсын иргэн, Улаанбаатар хот Сүхбаатар дүүрэг, 18 дугаар хороо, Бэлхийн 53 дугаар гудамжны 408б тоотод оршин суух, эрхэлсэн тодорхой ажилгүй, тусгай дунд боловсролтой, барилгын засал чимэглэчин мэргэжилтэй, гэр бүлийн байдал 4, 3 хүүхдийн хамт амьдардаг, Сүхбаатар дүүргийн шүүхийн 2001 оны 06 дугаар сарын 27-ны өдрийн шийтгэх тогтоолоор Эрүүгийн хуулийн тусгай ангийн 239 дүгээр зүйлийн 239.2 дахь хэсэгт зааснаар 1 жил тэнсэн харгалзах ял шийтгүүлж байсан, хэрэг хариуцах чадвартай.  

Холбогдсон хэргийн талаар:

           Шүүгдэгч Э.Солонго нь 2016 оны 03 дугаар сарын 05-ны өдөр Багануур дүүргийн 3 дугаар хорооны нутаг дувсгэрт үйл ажиллагаа явуулдаг “Талын толгой” ХХК-д ажиллаж байх хугацаандаа орлогын мөнгө болох 445.000 /дөрвөн зуун дөчин таван мянга/ төгрөгийг хувьдаа завшиж бага бус хэмжээний хохирол учруулсан гэмт хэрэгт холбогджээ.

ТОДОРХОЙЛОХ НЬ:

Шүүхийн хэлэлцүүлэгт яллах болон цагаатгах дараах нотлох баримтуудыг шинжлэн судлав.

      Шүүхийн хэлэлцүүлэгт шүүгдэгч Э.Солонго мэдүүлэхдээ:

     Би 2016 оны 3 дугаар сарын 5-нд “Талын толгой” ХХК-д үйлчлэгчээр ажиллаж байсан. 2016 оны 3 дугаар сарын 7-ны орой охин гэнэт өвдсөн гэж хадам аав ярьсан. Би орлогын мөнгөө Мөнхзаяагаас авч үлдсэн байсан болохоор хэнд өгөхөө мэдэхгүй аваад явсан. Тэгээд захиралтайгаа уулзаж чадахгүй явсаар байтал дунд охин маань өвдсөн. Тэгээд энэ хүмүүстэй холбогдох гэтэл би 9978-тай дугаараа алга болгосон, холбогдож чадахгүй байсан, оффис дээр нь очиход байхгүй байсан. Тэгээд уулзаж чадахгүй байж байгаад өдийг хүрсэн. Би 445.000 төгрөг авсан, тэр мөнгийг бүгдийг нь хүүхдийнхээ эмчилгээнд зарцуулсан байсан. Одоо бүгдийг нь буцааж төлсөн байгаа. Олон байгууллага, олон хүнд чирэгдэл учруулсандаа уучлалт гуйж байна.

            Хохирогч П.Бямбасүрэн мөрдөн байцаалтын шатанд мэдүүлэхдээ:  

            Би Багануур дүүргийн 3 дугаар хорооны нутаг дэвсгэрт үйл ажиллагаа явуулдаг “Талын толгой” ХХК-д менежерийн ажил хийдэг юм. Манай “Талын толгой” ХХК нь амралт сувилалын чиглэлээр үйл ажиллагаа явуулдаг юм. Тэгээд 2016 оны 03 дугаар сарын 02-ны өдөр Ч.Заяахүү гэж эмэгтэйг няраваар, Э.Солонго гэх эмэгтэйг үйлчлэгчээр ажилд авахаар болоод 7 хоногийн хугацаатай туршилтаар ажиллуулаад 7 хоногийн дараа хөдөлмөрийн гэрээ байгуулж үндсэн ажилтнаар авах гэж байсан юм. Тэгээд Э.Солонго, Ч.Заяахүү нар 2016 оны 03 дугаар сарын 02-ны өдрөөс ажиллаж эхэлсэн ба 2016 оны 03 дугаар сарын 05-ны өдөр манай сувилал амралтын газарт Багануур дүүргээс хүмүүс ирж амарсан байсан. Тэгээд уг хүлээн авалтын орлогын мөнгө болох 445.000 төгрөгийг Ч.Заяахүү, Э.Солонго нар аваад одоог хүртэл сураггүй болчихсон гэж манай захирал М.Гончиг надад хэлсэн юм. Одоо бол гомдол санал нэхэмжлэх зүйл байхгүй эвлэрсэн болно.  

             Гэрч Т.Алтанзул мөрдөн байцаалтын шатанд мэдүүлэхдээ:

            “...2016 оны 03 дугаар сарын 04-ний өдөр манай байгууллагын ажилчид алба хаагч нар мартын найман болон цэргийн баяр тэмдэглэх гэж Багануур дүүргийн 3 дугаар хороо “Талын толгой” гэх амралтын газарт очсон юм. Уг амралтын газар очиход үйлчилгээний ажилтан гээд Заяа, Солонго гэх хоёр эмэгтэй байсан. Тэгээд манай байгууллагын хүмүүс дээрх амралт дээр очоод би байр хоолны мөнгийг цуглуулаад амралтын газрын ажилтан болох Солонго гэх том биетэй эмэгтэйд эхлээд 567.000 төгрөг өгсөн. Тэгээд би өрөөндөө ороод хувцасаа солиод байж байтал Солонго гэх эмэгтэй орж ирээд үлдэгдэл тооцоогоо шууд хийчих гэж хэлэхээр нь ажилчидаасаа хоёр, хоёр мянган төгрөг хураагаад нийт 44.000 төгрөг болгоод Солонго гэх эмэгтэйд өгсөн. Тэгээд манай байгууллагын ажилчид тэр орой баярлачихаад маргааш өдөр нь явах гэж байтал Солонго гэх эмэгтэй ирээд танай ажилчид шөнө цэвэр ус ундаа авч уусан мөнгийг нь өгөөрэй гэж хэлэхээр нь би ажилчидаасаа мөнгө аваад 40.000 төгрөг өгсөн. Заяа гэх эмэгтэйд би мөнгө өгөөгүй. Харин тэр том биетэй Солонго гэх эмэгтэйд мөнгөнүүдийг өгч байсан. Солонго гэх эмэгтэй мөнгө авчихаад жижиг хуучин хэрэглэж байсан дэвтэр дээр гарын үсэг зуруулаад яваад байсан” гэсэн мэдүүлэг /хх-ийн 43 дугаар хуудас/        

            Ял шийтгэлийн талаар: Э.Солонго нь урьд ял шийтгэгдсэн эсэхийг шалгах хуудсаар урьд ял шийтгэгдэж байгаагүй гэсэн тодорхойлолт /хх-ийн 67 дугаар хуудас/

            Шүүхээс хэргийн талаар тогтоосон байдал болон тэдгээрт өгсөн шүүхийн дүгнэлтийн талаар:

          Шүүгдэгч Э.Солонго нь 2016 оны 03 дугаар сарын 05-ны өдөр Багануур дүүргийн 3 дугаар хорооны нутаг дувсгэрт үйл ажиллагаа явуулдаг “Талын толгой” ХХК-д ажиллаж байх хугацаандаа орлогын мөнгө болох 445.000 /дөрвөн зуун дөчин таван мянга/ төгрөгийг хувьдаа завшиж бага бус хэмжээний хохирол учруулсан гэмт хэргийг үйлдсэн болох нь хохирогч П.Бямбасүрэнгийн мөрдөн байцаалт болон шүүхийн хэлэлцүүлэгт өгсөн мэдүүлэг, гэрч Т.Алтанзулын мөрдөн байцаалтын шатанд өгсөн “...2016 оны 03 дугаар сарын 04-ний өдөр манай байгууллагын ажилчид алба хаагч нар мартын найман болон цэргийн баяр тэмдэглэх гэж Багануур дүүргийн 3 дугаар хороо “Талын толгой” гэх амралтын газарт очсон юм. Уг амралтын газар очиход үйлчилгээний ажилтан гээд Заяа, Солонго гэх хоёр эмэгтэй байсан. Тэгээд манай байгууллагын хүмүүс дээрх амралт дээр очоод би байр хоолны мөнгийг цуглуулаад амралтын газрын ажилтан болох Солонго гэх том биетэй эмэгтэйд эхлээд 567.000 төгрөг өгсөн. Тэгээд би өрөөндөө ороод хувцасаа солиод байж байтал Солонго гэх эмэгтэй орж ирээд үлдэгдэл тооцоогоо шууд хийчих гэж хэлэхээр нь ажилчидаасаа хоёр, хоёр мянган төгрөг хураагаад нийт 44.000 төгрөг болгоод Солонго гэх эмэгтэйд өгсөн. Тэгээд манай байгууллагын ажилчид тэр орой баярлачихаад маргааш өдөр нь явах гэж байтал Солонго гэх эмэгтэй ирээд танай ажилчид шөнө цэвэр ус ундаа авч уусан мөнгийг нь өгөөрэй гэж хэлэхээр нь би ажилчидаасаа мөнгө аваад 40.000 төгрөг өгсөн. Заяа гэх эмэгтэйд би мөнгө өгөөгүй. Харин тэр том биетэй Солонго гэх эмэгтэйд мөнгөнүүдийг өгч байсан. Солонго гэх эмэгтэй мөнгө авчихаад жижиг хуучин хэрэглэж байсан дэвтэр дээр гарын үсэг зуруулаад яваад байсан” гэсэн мэдүүлэг зэргээр шүүгдэгч Э.Солонго нь өөрт итгэмжлэн хариуцуулсан эд хөрөнгийг завшиж бусдад бага бус хэмжээний хохирол учруулсан гэм буруутай байх тул, Э.Солонгыг Эрүүгийн хуулийн тусгай ангийн 150 дугаар зүйлийн 150.1 дэх хэсэгт зааснаар гэм буруутайд тооцох үндэслэлтэй байна.

Хэргийн бодит байдлыг нотолж байгаа дээрх баримтуудыг үнэлэхэд гэрч, хохирогч, шүүгдэгчийн мэдүүлэг зэргийг хуульд заасан журмын дагуу бэхжүүлж авсан, хохирогч, гэрчүүдийн мэдүүлгүүдийн агуулга нь зөрүүгүй, хэрэгт цугларсан баримтууд нь тухайн хэргийн үйлдлийг хангалттай нотолж байна.

Иймд нотлох баримтуудыг тухайн хэрэгт хамааралтай, эргэлзээгүй, эх сурвалж нь тогтоогдсон хууль ёсны, үнэн зөв баримтууд гэж дүгнэж байна.

          Гэм хорын хохирол болон бусад байдлын талаар:

         Улсын яллагчаас энэ хөнгөн хэргийн хөөн хэлэлцэх хугацаа дууссан тул хэргийг хэрэгсэхгүй болгох саналтай байгаа гэдгийг хүлээн авах нь зүйтэй байна.   

Шүүгдэгчид холбогдох иргэний бичиг баримт шүүхэд шилжиж ирээгүй, бусдад төлөх төлбөргүй, эд мөрийн баримтаар хураагдан ирсэн зүйлгүй, цагдан хоригдсон хоноггүй, эд хөрөнгө битүүмжлээгүй, энэ хэрэгт гарсан байцаан шийтгэх ажиллагааны зардал тодорхойлж ирүүлээгүй болно. Хохирол болох 445.000 төгрөгийг төлж барагдуулсан байна.

Монгол улсын Эрүүгийн байцаан шийтгэх хуулийн 248 дугаар зүйлийн 248.1.1, 24.1, 24.1.2, 283, 286, 290, 294, 295, 296, 297, 298 дахь хэсэгт заасныг удирдлага болгон ТОГТООХ НЬ:

1. Улаан Уул овогт Энхтуулын Солонгыг бусдын эд хөрөнгийг завшсаны улмаас бусдад бага бус хэмжээний хохирол учруулсан гэмт хэрэгт гэм буруутайд тооцсугай.
2. Эрүүгийн байцаан шийтгэх хуулийн 24 дүгээр зүйлийн 24.1.2 дахь хэсэгт заасныг баримтлан Улаан Уул овогт Энхтуулын Солонгод холбогдуулан Эрүүгийн хуулийн тусгай ангийн 150 дугаар зүйлийн 150.1 дэх хэсэгт зааснаар яллагдагчаар татах тогтоол баталж ирүүлсэн эрүүгийн хэргийг хэрэгсэхгүй болгосугай.
3. Эрүүгийн хуулийн ерөнхий ангийн 72 дугаар зүйлийн 72.1, 72.1.1 дэх хэсэгт тус тус зааснаар Энхтуулын Солонгыг эрүүгийн хариуцлагаас чөлөөлсүгэй.
4. Э.Солонгод холбогдох иргэний бичиг баримт шүүхэд шилжиж ирээгүй, бусдад төлөх төлбөргүй, эд мөрийн баримтаар хураагдан ирсэн зүйлгүй, цагдан хоригдсон хоноггүй, эд хөрөнгө битүүмжлээгүй, энэ хэрэгт гарсан байцаан шийтгэх ажиллагааны зардал тодорхойлж ирүүлээгүй болохыг тус тус дурдсугай.
5. Шүүгдэгч Э.Солонгод урьд авсан гадагш явж болохгүй тухай баталгааг хүчингүй болгосугай.
6. Шийтгэх тогтоолд давж заалдах гомдол гаргах, эсэргүүцэл бичих эрх бүхий этгээд тогтоолыг гардуулснаас хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд давж заалдах гомдол гаргах, эсэргүүцэл бичих эрхтэй болохыг дурьдсугай.

                      ДАРГАЛАГЧ, ШҮҮГЧ                                    Н.НАРАНТУЯА