МОНГОЛ УЛСЫН НЭРИЙН ӨМНӨӨС

 

Дундговь аймаг дахь сум дундын Иргэний хэргийн анхан шатны шүүхийн шүүгч Г.Б даргалж, тус шүүхийн Б танхимд нээлттэй хийсэн шүүх хуралдаанаар:

Нэхэмжлэгч: Дундговь аймгийн сумын оршин суух хаягтай, Х овогт Г.Ц/-ын ажиллаж байсан байдал тогтоолгох тухай шаардлага бүхий нэхэмжлэлтэй иргэний хэргийг хянан хэлэлцэв.

Шүүх хуралдаанд нэхэмжлэгч Г.Ц, шүүх хуралдааны нарийн бичгийн дарга Б.Ж нар  оролцов.

 

ТОДОРХОЙЛОХ нь:

Нэхэмжлэгч Г.Ц шүүхэд гаргасан нэхэмжлэлдээ: “...Миний бие 1972 онд төрсөн. Улсад 32 жил ажилласан. 1988 оны 6 сарын 10-наас 1993 оны 9 сарын 31-нийг хүртэл Дундговь аймгийн сумын Шинэ зам нэгдэлд хоньчиноор ажиллаж байгаад 1993 оноос хойш хувиараа мал малласан. Иймд холбогдох баримтуудыш үндэслэн  Дундговь аймгийн Дэлгэрхангай сумын Шинэ зам нэгдэлд хоньчиноор ажиллаж байсан жилийг тогтоож өгнө үү...” гэв. 

 

Нэхэмжлэгчийн нэхэмжлэл, шүүх хуралдаанаар хэлэлцсэн нотлох баримтуудыг шинжлэн судлаад

 

ҮНДЭСЛЭХ нь:

Нэхэмжлэгч Г.Ц нь  ажилласан жил тогтоолгохоор нэхэмжлэл гаргажээ.

Нэхэмжлэгчийн нэхэмжлэлийн шаардлага дараах баримтуудаар нотлогдон тогтоогдож байна.

-Дундговь аймгийн Татварын хэлтсийн 2020 оны 1 сарын 13-ны өдрийн 08/36 дугаартай “Шинэ зам нэгдэл”, “Говийн хангай хоршоо”-ны талаархи хуулийн этгээдийн лавлагаа /хэргийн 4-р хуудас/

-Дундговь аймгийн Дэлгэрхангай сумын Шинэ зам нэгдлээс Г.Цд олгосон 1993 оны 01-08 саруудад хамаарах “ажилласан хоног, олгосон урьдчилгаа”-ны бичилт бүхий хөдөлмөрийн дэвтрийн хуулбар /хэргийн 6-7-р хуудас/

- Дундговь аймгийн Дэлгэрхангай сумын Шинэ зам нэгдлийн даргын 1988 оны 6 сарын 20-ны өдрийн 33 дугаартай “Малчин томилох тухай” тушаалын хуулбар, хавсралт /хэргийн 9-р хуудас/

-Гэрч Н.Наранхүүгийн “ Г.Ц нь Дэлгэрхангай сумын Шинэ зам нэгдлийн Толь Бригадад 1988-1993 он хүртэл мал малласан. Би тухайн үед жолоочоор ажиллаж байсан юм. Г.Цгийн аавыг Гүрбанзар гэдэг байсан. ... " гэх мэдүүлэг /хэргийн 14-р хуудас/

-Гэрч С.Жамсранжавын “ Г.Ц нь 1988 онд 8-р ангиа төгсөөд илгээлтээр малчин болсон. 1988 оны 7 сараас эхлээд 1993 оны 9 сарын 31-нийг хүртэл буюу нэгдэл тартал Дэлгэрхангай сумын Шинэ зам нэгдэлд бог мал маллаж байсан. Би 1981-1992 он хүртэл тус нэгдэлд тоо бүртгэгчээр ... 1992-1995 тус нэгдэлд багийн даргаар ажиллаж байсан. Г.Цгийн аавыг Гүрбанзар гэдэг байсан...” гэх мэдүүлэг /хэргийн 15-р хуудас/ 

 -Гэрч Т.Цэцэгсүрэнгийн “Г.Ц нь 1988 онд 8-р ангиа төгсөөд илгээлтээр гараад хөдөө ирэхэд би төв дээр ажиллаж байсан. 1988-1993 оныг хүртэл Дундговь аймгийн Дэлгэрхангай сумын Шинэ зам нэгдэлд хоньчиноор ажиллаж байсан. Тухайн үед би аж ахуйн няраваар ажиллаж байсан юм. Г.Цгийн аавыг Гүрбанзар гэдэг байсан. ... Ээжийг Цэрмаа гэдэг байсан. ...” гэх мэдүүлэг /хэргийн 16-р хуудас/ зэрэг  шууд баримтууд,

-Н.Наранхүүгийн 1991 оны 05 сарын 23 өдөр нэгдлийн даргын  1991 оны 19-р тушаалаар Зил-130 машины жолоочоор томилсон, Шинэ зам ХК-ны захирлын 1993 оны 13-р тушаалаар жолоочийн үүрэгт ажлаас чөлөөлсөн тухай бичилт бүхий хөдөлмөрийн дэвтрийн хуулбар /хэргийн 27-29-р хуудас/

                -Т.Цэцэгсүрэнгийн 1989 оны 03 сарын 27 өдөр сумын хүүхдийн цэцэрлэгийн аж ахуйн няраваар томилогдсон, 1994 оны 08 сарын 31 өдөр цэцэрлэгийн аж ахуйн няраваас чөлөөлөгдсөн  тухай бичилт бүхий хөдөлмөрийн дэвтрийн хуулбар /хэргийн 28-30-р хуудас/

            -С.Жамсранжавын 1986 оны 08 сарын 14 өдөр Шинэ зам нэгдлийн тоо бүртгэгчээр томилогдсон, тухай тушаалын бичилт бүхий хөдөлмөрийн дэвтрийн хуулбар /хэргийн 31-32/

            -Дундговь аймгийн дэлгэрхангай сумын Шинэ зам нэгдлийн ерөнхий хорооны даргын 1992 оны 10 сарын 26 өдрийн 39 дугаартай “1992 оны 10 сарын 01-ээс Толь бригадын тоо бүртгэгч С.Жамсранжав, .. нарыг ажлаас чөлөөлсүгэй.” гэх тушаалын хуулбар /хэргийн 33-р хуудас/ зэрэг дам баримтууд болно.

 

 

Иймд нэхэмжлэлийн шаардлагыг бүрэн хангахаар шийдвэрлэв.

 

   Иргэний хэрэг шүүхэд хянан шийдвэрлэх тухай 115 дугаар зүйлийн 115.2.1, 116, 118, 133 дугаар зүйлийн 133.1.1-д заасныг удирдлага болгон ТОГТООХ НЬ: 

 

1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.6-д  зааснаар Х овогт Г.Ц//-ыг 1988 оны 06 сарын 10-аас 1993 оны 08 сарын 31-нийг дуустал Дундговь аймгийн Дэлгэрхангай сумын Шинэ зам нэгдэлд малчинаар ажиллаж байсан болохыг  тогтоосугай.

1. Иргэний хэрэг шүүхэд хянан шийдвэрлэх тухай хуулийн 57-р зүйлийн 57.1, Улсын тэмдэгтийн хураамжийн тухай хуулийн 7-р зүйлийн 7.1.2-д зааснаар нэхэмжлэгчийн улсын тэмдэгтийн хураамжинд төлсөн 70200 төгрөгийг төсвийн орлогод хэвээр үлдээсүгэй.
2. Иргэний хэрэг шүүхэд хянан шийдвэрлэх тухай хуулийн 119, 120 дугаар зүйлд зааснаар нэхэмжлэгч энэ шийдвэрийг эс зөвшөөрвөл гардан авснаас хойш 14 хоногийн дотор Дундговь аймгийн Эрүү, Иргэний хэргийн давж заалдах шатны шүүхэд гомдол гаргах эрхтэйг заасугай. 

 

 

 

 

 

 ДАРГАЛАГЧ ШҮҮГЧ                       Г.Б