МОНГОЛ УЛСЫН НЭРИЙН ӨМНӨӨС

 

Хэргийн индекс: 135/2020/00492/И

Дархан-Уул аймаг дахь сум дундын Иргэний хэргийн анхан шатны шүүхийн шүүгч Д.Оюундарь би даргалж, тус шүүхийн шүүх хуралдааны танхимд хийсэн иргэний шүүх хуралдаанаар

Нэхэмжлэгч: ... аймаг, ... сум, .. баг, ... хороолол, ... байрны ... тоотод оршин суух Б овгийн Ш-ын М /РД:..., утас: .../-ийн нэхэмжлэлтэй,

Хариуцагч: ... аймаг, ... сум, ... баг, ... хороолол, ... байрны ... тоотод оршин суух Б овгийн С-ын Э /РД: ..., утас:.../-д холбогдох

 “Гэрлэлт сэргээлгэх тухай” нэхэмжлэлийн шаардлагатай

Шүүх хуралдаанд шүүх хуралдааны нарийн бичгийн дарга Э.Ундрам оролцов.

ТОДОРХОЙЛОХ нь:

Нэхэмжлэгч Ш.М, хариуцагч С.Э нар нь шүүхэд гаргасан нэхэмжлэл, хүсэлтдээ:

“... Миний бие нь С-ын Э-тай 2008 онд гэр бүл болж 10 жил амьдарсан. Би 2011 онд Франц улсад биеэ эмчлүүлэх гэж очоод 5 жил болсон. Эмчилгээ хийлгэх хугацаанд асран хамгаалагч хэрэгтэй болж тэр орны иргэнтэй гэр бүл болж амьдарч байгаад 2019 онд гэртээ ирсэн. Бид 1998 оны 2 сарын 10-нд гэр бүл болж ... тоот гэр бүлийн батлах авч байсан, цаашид энэ гэр бүлийн батлахаа сэргээлгэх хүсэлтэй тул сэргээж өгнө үү.” гэжээ.

Шүүх хуралдаанаар хэлэлцэгдсэн болон хэрэгт авагдсан нотлох баримтуудыг шинжлэн судлаад,

ҮНДЭСЛЭХ нь:

Нэхэмжлэгч Ш.М, хариуцагч С.Э нар нь шүүхэд гэрлэлтээ сэргээлгэх тухай нэхэмжлэлийн шаардлага гаргасан.

Хэрэгт авагдсан бөгөөд шүүх хуралдаанаар хэлэлцэгдсэн нотлох баримтуудааар дараах байдал тогтоогдож байна.

 Нэхэмжлэгч Ш.М, хариуцагч С.Э нар 2000 оны 11 дүгээр сарын 10-ны  өдөр Гэр бүлийн тухай хуулийн 7 дугаар зүйлийн 7.1-д зааснаар гэрлэлтээ иргэний гэр бүлийн байдлын гэрлэсний бүртгэлд бүртгүүлжээ.

Нэхэмжлэгч Ш.М, хариуцагч С.Э нар нь тусдаа амьдрах шаардлага бий болж 2018 оны 02 сарын 15-ны өдөр гэрлэлтээ цуцлуулсан болох нь тэдний шүүхэд гаргасан тайлбар болон хэрэгт авагдсан нотлох баримт болох  ДУАСДИХАШШ-ийн 2017 оны 11 дүгээр сарын 08-ны өдрийн ... тоот шийдвэр, ... дугаартай гэрлэлт цуцалсны бүртгэлийн гэрчилгээ, ДУАУБХ-ийн 2020 оны 04 сарын 10-ны өдрийн ... дугаартай албан тоот, түүний хавсралтаар “С-ын Э /РД:.../, Ш-ын М /РД:/ нар нь гэрлэлтээ цуцлуулсныг 2018 оны 02 сарын  15-ны өдрийн ...-рт бүртгүүлсэн, гэрлэлтээ цуцлуулснаас хойш гэрлэлт бүртгэлгүй” болох нь тогтоогдож байна.

Гэр бүлийн тухай хуулийн 15 дугаар зүйлийн 15.1-д “Гэрлэлтээ цуцлуулсан хүмүүс эвлэрснээ хамтран илэрхийлж өргөдөл гаргасан бөгөөд өөр хүнтэй гэрлээгүй бол гэрлэлтийг сэргээнэ” гэснээр Б овгийн Ш-ын М /РД:/, Боржигон овгийн С-ын Э /РД: .../ нарын гэрлэлтийг сэргээх нь зүйтэй.

Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1-т Шүүхээс эрх зүйн маргааныг шийдвэрлэхтэй холбогдсон үйлчилгээ үзүүлсний төлөө зохигчоос төлж байгаа мөнгөн хөрөнгийг улсын тэмдэгтийн хураамж гэнэ. Улсын тэмдэгтийн хураамжийг урьдчилан нэхэмжлэгчээр төлүүлнэ. Улсын тэмдэгтийн хураамжийг энэ хуульд заасны дагуу төлнө гэснээр нэхэмжлэгчийн улсын тэмдэгтийн хураамжид 2020 оны 04 дүгээр сарын 03-ны өдөр төлсөн улсын тэмдэгтийн хураамж 70,200 төгрөгийг төрийн сангийн орлогод хэвээр үлдээж шийдвэрлэв.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116, 118 дугаар зүйл, 132 дугаар зүйлийн 132.6-д заасныг удирдлага болгон

ТОГТООХ нь:

1. Гэр бүлийн тухай хуулийн 15 дугаар зүйлийн 15.1-т зааснаар Боржигон овгийн Ш-ын М /РД:.../, Б овгийн С-ын Э /РД:.../ нарын гэрлэлтийг сэргээсүгэй.
2. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-д зааснаар хүсэлт гаргагчийн улсын тэмдэгтийн хураамжид 2020 оны 04 дүгээр сарын 03-ны өдөр төлсөн 70,200 төгрөгийг Төрийн сангийн орлогод хэвээр үлдээсүгэй.  
3. Иргэний улсын бүртгэлийн тухай хуулийн 9 дүгээр зүйлд зааснаар гэрлэлтийг сэргээн бүртгэхийг Дархан-Уул аймгийн Иргэний гэр бүлийн бүртгэлийн байгууллагад даалгасугай.
4. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2-т зааснаар энэхүү шийдвэр танилцуулан сонсгомогц хүчинтэй болох бөгөөд зохигч, тэдгээрийн төлөөлөгч буюу өмгөөлөгч шийдвэрийг эс зөвшөөрвөл гардан авснаас хойш 14 хоногийн дотор Дархан-Уул аймгийн Иргэний хэргийн Давж заалдах шатны шүүхэд давж заалдах гомдол гаргах эрхтэй, мөн хуулийн 119 дүгээр зүйлийн 119.4, 119.7-т зааснаар шийдвэрийг гардаж авах үүргээ биелүүлээгүй нь давж заалдах журмаар гомдол гаргах хугацааг тоолоход саад болохгүйг дурдсугай.

 

 

ДАРГАЛАГЧ ШҮҮГЧ                                       Д.ОЮУНДАРЬ