МОНГОЛ УЛСЫН НЭРИЙН ӨМНӨӨС

 

Налайх дүүргийн Эрүүгийн хэргийн анхан шатны шүүхийн шүүгч Э.Энхжаргал даргалж,

шүүх хуралдааны нарийн бичгийн дарга Ц.Ууганчимэг,

улсын яллагч Д.Аянагүл,

хохирогч Ц.*******,

шүүгдэгч Б.******* нарыг оролцуулан тус шүүхийн хуралдааны танхимд нээлттэй хийсэн шүүх хуралдаанаар

 

Налайх, Багахангай дүүргийн прокурорын газрын хяналтын прокурор Д.Аянагүлийн Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан гэмт хэрэгт холбогдуулан яллах дүгнэлт үйлдэж ирүүлсэн ******* овогт *******ын *******өд холбогдох эрүүгийн 2307000000228 дугаартай хэргийг 2023 оны 10 дугаар сарын 25-ны өдөр хүлээн авч хянан хэлэлцэв.

 

Шүүгдэгчийн биеийн байцаалт:

Монгол Улсын иргэн, *******-ны өдөр ******* аймгийн ******* суманд төрсөн, *******тай, эрэгтэй, бүрэн дунд боловсролтой, ******* мэргэжилтэй, групп тогтоолгосон, ам бүл 4, эхнэр, 2 хүүхдийн хамт *******,, од оршин суудаг боловч ,од оршин суух, урьд ял шийтгэл үгүй,

   ******* овогт *******ын ******* /РД: /.

 

            Холбогдсон хэргийн талаар:

Шүүгдэгч Б.******* нь 2023 оны 06 дугаар сарын 20-ны өдрийн 22 цагийн орчимд *******,ны од байрлах гэртээ хардалтын улмаас эхнэр Ц.*******гийн нүүрэн тус газарт цохиж, толгойгоор нь хана мөргүүлэх, өшиглөх зэргээр халдсаны улмаас биед нь зүүн даланд шарх, зүүн дал, бугалга, хөхөнд цус хуралт гэмтэл бүхий эрүүл мэндэд нь хөнгөн хохирол санаатай учруулах гэмт хэргийг гэр бүлийн хүчирхийлэл үйлдэж хүндрүүлэх нөхцөл байдалтайгаар үйлдсэн буюу Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан гэмт хэрэгт холбогджээ.

 

ТОДОРХОЙЛОХ нь:

 

Шүүх прокуророос шүүхэд шилжүүлсэн эрүүгийн хэргийн хүрээнд, шүүгдэгч Б.*******ийн холбогдсон хэрэгт гэм буруу, эрүүгийн хариуцлага хүлээлгэхдээ Эрүүгийн хуулийн хууль ёсны, шударга ёсны, гэм буруугийн зарчмыг тус тус баримтлан шүүхийн хэлэлцүүлэгт тогтоогдсон үйл баримт, шинжлэн судалсан болон хэрэгт цугларсан нотлох баримтуудыг үндэслэн дараах дүгнэлтийг хийв.

 

Нэг. Гэм буруугийн талаар:

 

1.1. Шүүхийн хэлэлцүүлэгт талуудаас гаргасан тайлбар, мэдүүлэг:

 

Шүүгдэгч Б.******* шүүхийн  хэлэлцүүлэгт  мэдүүлэхдээ: “Хийсэн үйлдэлдээ гэмшиж байна. Би буруутай өөр хэлэх зүйлгүй” гэв.

 

Хохирогч Д.******* шүүхийн хэлэлцүүлэгт  мэдүүлэхдээ: “Тухайн өдөр би найз хүүхнийхээ гэрт нь хоёулаа жоохон юм ярьж суусан. Гэтэл манай бас нэг найз залгаад надаар дусал хийлгэх гэсэн юм гэж хэлсэн. Би яаралтай тусламжийн тасагт туслах сувилагч хийдэг. Би гийнд байна ирээд авчих гэтэл манай найз гэрийг нь олохгүй яваад байх шиг байсан. Утсаар ярихад арын гудамд яваад байх шиг байхаар нь тойроод очтол нэг машин гэрэл тусгаад ирж байсан. Би найзыгаа гэж бодоод урдаас нь инээгээд очтол манай нөхөр байж байсан. Машинтай намайг хараад зогсож байсан юм билээ. Тэгээд чи гудамд машинтай залуу хүлээгээд зогсож байсан гэж хэлэхээр нь гадаа хэрэлдэхгүй гэсэндээ машинд нь суугаад гэртээ харьсан. Гэртээ ирээд “тийм юм байхгүй, ирэх ёстой байсан” гэтэл өөрөө юу ч хараагүй байж шууд зодсон. За яршиг бие нь тааруу болохоор гээд нүүрээ хамгаалаад эсэргүүцээгүй. Өвдсөнөөсөө хойш их хэрцгий болсон. Өвдсөнөөс нь хойш би хаяж явж, зайгаа барьж байгаагүй. 2-3 удаа бие нь огцом муудахад би сахиж, эмчилгээг нь хийж босгож ирж байсан. Би эмнэлэгт 24 цаг ажиллаад 72 цаг амрахдаа CU сүлжээ дэлгүүрт давхар ажиллаж, эм тариаг нь авч өгч байсан. Одоо бол хамт амьдаръя гэсэн бодол алга. 20 жил зодууллаа эцэст нь эмнэлэгт ч хэвтэж үзлээ” гэв.

 

            1.2. Шүүх хуралдаанаар тогтоогдсон хэргийн үйл баримтын талаар:

 

            Шүүгдэгч Б.******* нь 2023 оны 06 дугаар сарын 20-ны өдрийн 22 цагийн орчимд *******, 9-од байрлах гэртээ хардалтын улмаас эхнэр Ц.*******гийн нүүрэн тус газарт цохиж, толгойгоор нь хана мөргүүлэх, өшиглөх зэргээр халдсаны улмаас биед нь зүүн даланд шарх, зүүн дал, бугалга, хөхөнд цус хуралт гэмтэл бүхий эрүүл мэндэд нь хөнгөн хохирол санаатай учруулсан үйл баримт буюу хэргийн нөхцөл байдал хэрэгт авагдсан дараах нотлох баримтуудаар тогтоогдож байна. Үүнд:

           

• Хохирогч Д.*******гийн цагдаагийн байгууллагад гаргасан өргөдөл (хавтаст хэргийн 1 дэх тал),

 

• Хохирогч Д.*******гийн мөрдөн шалгах ажиллагаанд өгсөн: “2023 оны 06 дугаар сарын 20-ны өдөр *******, 9-од байх гэртээ 22 цагийн орчимд ... намайг хий хардаад хүнтэй уулзлаа, хүн хүлээж байсан гээд байхаар нь би “тэгээд яадаг юм, байвал чи яах гээд байгаа юм” гээд үг сөрөөд хэлсэн чинь намайг гараа атгаж байгаад нүүр лүү хоёр цохисон. Би нүүрээ гараараа хөхрүүлэхгүй гээд хаасан чинь намайг заамдаж байгаад толгойн хажуу хэсгээр хана мөргүүлэхэд нь би муужраад доошоо явган суусан чинь хаа таарсан газраа толгой, цээж рүү зөндөө олон өшиглөсөн. Маргааш өглөө нь хүлээн авахын эмчид үзүүлээд эмнэлэгт шууд хэвтсэн. Тухайн үед эрүү хавдчихсан болохоор хугарсан гэж бодтол хавдсан боловч хугараагүй байсан. Жилдээ 3-4 удаа бол гар хүрчихдэг, айхтар зодож гэмтээгээд байхгүй юмаа гэхэд алгадах, үсдэх, толгойгоор юм мөргүүлэх зэргээр зоддог. Ер нь зодохоороо бол дандаа толгойгоор юм мөргүүлээд байдаг, эсвэл унагаад байдаг юм. Би ер нь цагдаа сэргийлэх гэж огт явж байгаагүй 2020 оны 08 дугаар сарын 13-ны өдөр намайг нэг зодоход нь нэг удаа цагдаад өгсөн. Сүүлийн жилийн хугацаанд гэхэд 2023 оны 01 дүгээр сард цагаан cap болохоос өмнөхөн (он, сарыг нь сайн санахгүй байна) ******* 9-од байхад намайг бас хий хардсанаас нь болж бид хоёр маргалдаад миний толгой руу гараараа нэг л удаа цохиж байсан, бага хүүхэд л гэрт байсан учраас уйлахаар нь дахиж гар хүрэлгүй больчихсон юм. Үүний дараа 2023 оны 03 дугаар арын 18-ны өдөр буюу цэргийн баяраар бас намайг хардаад байхаар нь би 30-40 минут гэрээс гарчхаад эргээд ороод ирэхэд “хэнтэйгээ явсан” гэж хардаад хэл амаар доромжлоод байхаар нь хөл рүү нь өшиглөчихсөн чинь намайг босож ирээд барьж аваад хана толгойгоор мөргүүлээд толгой хавдаад хөхөрчихсөн байсан. Б.******* бид хоёр гэр үл болсноос хойш нөхрийнхөө аяар л амьдарч байна, харыг нь хөдөлгөхгүй гээд найз нөхөд гэх зүйл ч байхгүй болчихсон, ажлаа л хийдэг, архи дарс ч уудаггүй, ганцаардаад амиа хорлох талаар ч бодож л байсан юм. Хоёр дахь хүүхэд төрснөөс хойш амиа хорлоно гэдэг бодлоо бүрмөсөн орхисон юм, би гэрээс гардаггүй мөртлөө л хардуулаад байдаг юм. Б.*******ийг би нэг ч удаа хуурч, өөр хүнтэй уулзалдаж байгаагүй” гэх мэдүүлэг (хавтаст хэргийн 5-7 дахь тал),

 

• Хохирогч Д.*******гийн мөрдөн шалгах ажиллагаанд дахин өгсөн: “Би Б.*******тэй 2021 оны 08 дугаар сард эргэж нийлсэн. Харин 2 сарын хугацаанд тусдаа байсан учраас огт зодсон үйлдэл гаргаагүй. 2021 оны 03 дугаар сарын 21-ний өдөр Б.******* миний түрээсэлж байсан байранд ирээд гал тогооны өрөөний үүдэнд зогсож байгаад надтай хэрүүл өдөөд бид хоёр маргалдсан. Тухайн үед манай охин Б. миний хажууд зогсож байсан тэр өдрийг андуураад хэлчихсэн байна. Эргэж нийлсний дараа дохиж зодсон асуудал энэ л байгаа” гэх мэдүүлэг (хавтаст хэргийн 9 дэх тал),

 

• Хохирогч Д.*******гийн мөрдөн шалгах ажиллагаанд 3 дахь удаагаа өгсөн “Миний нөхөр Б.******* нь 2023 оны 06 дугаар сарын 20-ны өдөр ******* 9-од байхдаа намайг хий хардаж, миний биед халдаж байсан. Тухайн үед миний нүүрэн тус газарт цохиж, толгойгоор хана мөргүүлж, өшиглөж байсан. 2020 оны 08 дугаар сарын 13-ны өдөр тоотод хамт амьдарч байхдаа намайг гэрээс гаргахгүй, “чи муу хэнтэйгээ уулзах гээд байгаа юм” гээд миний мөр рүү нэг удаа цохисон. Тухайн үед би айсандаа гэрээс гарч зугтах гэж байгаад халтирч унаж байсан. Тэгээд бид 1 жил гаруй хугацаанд тусдаа байцгаасан. Гэтэл 2021 оны 06 дугаар сарын 21-ний өдөр Б.******* одоо амьдарч байгаа ******* 9-од гэртээ байхад хүүхдүүдтэйгээ уулзана гэж ирээд гал тогооны үүдэнд зогсож байснаа надтай хэрүүл өдөөд бид хоёр маргалдсан. Тэгтэл гэрээс гарахдаа миний нүүрэн тус газар руу нэг удаа цохичхоод гараад явсан. Би өмнөх мэдүүлэгтээ “харыг нь хөдөлгөхгүй гээд ажлаа л хийдэг, архи дарс ч уудаггүй, ганцаардаад амиа хорлох талаар бодож л байсан юм” гэж мэдүүлэг өгөхдөө Б.*******өд уур хүрч байсан тул тэгээд л ийм утгатай мэдүүлэг өгчихсөн юм. Б.******* нь миний биед гар хүрч цохиж, зодож байснаас бусад байдлаар намайг хорьж цагдаж, миний эд хөрөнгө захиран зарцуулах эрхийг зөрчиж, ямар нэгэн байдлаар намайг сэтгэл санааны дарамтад оруулж байгаагүй” гэх мэдүүлэг (хавтаст хэргийн 115 дахь тал),

 

• Гэрч Д.ийн мөрдөн шалгах ажиллагаанд өгсөн: “2023 оны 06 дугаар сарын 21-ний өдөр манай төрсөн эгч Д. над руу залгаад “Д.******* нөхөртөө зодуулсан эмнэлэгт байна, чи явж очоод юу болсныг нь асуугаач” гэхээр нь зөвшөөрөөд Налайх дүүргийн эмнэлэг дээр иртэл манай дүү Д.*******г эмнэлэг дээр ирээд үзүүлтэл шууд хэвтүүлсэн байсан. Би болсон асуудлын талаар асуутал нөхөр нь урьд шөнө хардаад зодсон гэж байсан. Хажууд нь хүн байгаагүй гэсэн” гэх мэдүүлэг (хавтаст хэргийн 14 дэх тал),

 

• Гэрч Б.гийн мөрдөн шалгах ажиллагаанд өгсөн: “Ээжийн төрсөн эгч Д. над руу залгаад “аав чинь өнгөрсөн шөнө ээжид чинь гар хүрээд ээж чинь одоо Яаралтай түргэн тусламжийн тасагт хүргэгдсэн байгаа” гэхээр нь ... би тэр дор нь ажлаасаа гараад ээжийн байгаа эмнэлэгт очсон. Очиход ээж толгой нь хавдчихсан, хоолойн дээр нь гарын ором гарчихсан, баруун гар мөр хэсгээрээ хөхөрсөн, нурууны ар хэсгээрээ хөхөрсөн, зулгарсан, хөл дээрээ тогтож чадахгүй байсан. Аав огцом ууртай, маш их хартай байнга л хардаж, огцом уурлаж ээж рүү шууд дайрдаг түрэмгий зан авиртай” гэх мэдүүлэг (хавтаст хэргийн 13 дахь тал),

 

• Налайх дүүргийн шүүх шинжилгээний хэлтсийн шинжээчийн 2023 оны 07 дугаар сарын 04-ний өдрийн 266 дугаартай “ийн *******гийн биед зүүн даланд шарх, зүүн дал, бугалга, хөхөнд цус хуралт гэмтэл тогтоогдлоо. Хатуу мохоо зүйлийн олон удаагийн цохигдох үйлдлээр үүсгэгдэнэ. Шүүх эмнэлгийн Гэмтлийн зэрэг тогтоох журмын 2.4.1-т зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна. Ерөнхий хөдөлмөрийн чадварын тогтонги алдалтанд нөлөөлөхгүй. Тухайн хэрэг болсон гэх цаг хугацаанд үүсгэгдсэн шинэ гэмтэл байна” гэх дүгнэлт (хавтаст хэргийн 24-25 дахь тал) зэрэг болно.

 

Дээрх нотлох баримтууд нь тухайн хэрэгт хамааралтай, агуулгын хувьд зөрүүгүй, үйл баримтыг хангалттай тогтоож чадсан, мөрдөн шалгах ажиллагааны явцад Эрүүгийн хэрэг хянан шийдвэрлэх тухай хуулиар тогтоосон нотлох баримт цуглуулах, бэхжүүлэх талаарх журам, шаардлагыг зөрчсөн болон хэргийн оролцогчийн эрх, хууль ёсны ашиг сонирхлыг зөрчсөн, хязгаарласан зөрчил тогтоогдоогүй тул шүүх тэдгээр баримтыг хууль ёсны, үнэн зөв баримтууд гэж үнэлсэн болно.

 

Шүүгдэгч Б.******* нь бүрэн дунд боловсролтой, монгол хэл, бичиг мэддэг бөгөөд Эрүүгийн хэрэг хянан шийдвэрлэх тухай хуулийн 34.10 дугаар зүйлийн 4 дэх хэсэгт зааснаар өөрийгөө өмгөөлөх хүсэлтийг шүүхэд бичгээр гаргасан тул шүүх хуралдааныг өмгөөлөгчгүйгээр явуулж, шүүгдэгчийн өөрийгөө өмгөөлөх эрхийг хангасан болохыг тэмдэглэв.

 

1.3. Эрх зүйн дүгнэлт:

 

            Эрүүгийн хуулийн тусгай ангийн 11.6 дугаар зүйлд заасан “Хүний эрүүл мэндэд хөнгөн хохирол санаатай учруулах” гэмт хэрэг нь хүний эрүүл мэндийн халдашгүй байдлын эсрэг гэмт хэрэг бөгөөд гэмт этгээд хүний эрүүл мэндийн халдашгүй байдалд гэм буруугийн санаатай хэлбэрээр халдаж, энэхүү үйлдлийн улмаас хүний эрүүл мэндэд хөнгөн хохирол учирсан байх субьектив болон обьектив шинжийг хангахыг шаарддаг.

 

            Эрүүгийн хуулийн тусгай ангийн 11.6 дугаар зүйлийн 2 дахь хэсэгт Хүний эрүүл мэндэд хөнгөн хохирол санаатай учруулах гэмт хэргийг энэ хуулийн 10.1 дүгээр зүйлийн 2 дахь хэсгийн 2.8-д заасан гэр бүлийн хүчирхийлэл үйлдэж учруулсан тохиолдолд хүндрүүлэх нөхцөл байдалтайгаар хүний эрүүл мэндэд хөнгөн хохирол санаатай учруулсан гэж үзнэ. 

 

Гэр бүлийн хүчирхийлэлтэй тэмцэх тухай хуулийн 3 дугаар зүйлд “гэр бүлийн хамаарал бүхий харилцаатай хүн гэж эхнэр, нөхөр, гэр бүлийн бусад гишүүн, хамтран амьдрагч, …этгээдийг” ойлгох ба мөн хуулийн 5 дугаар зүйлийн 5.1.1-д “гэр бүлийн хүчирхийлэл гэж энэ хуулийн 3 дугаар зүйлд заасан этгээд энэ хуулийн үйлчлэлд хамаарах хүний сэтгэл санаанд дарамт учруулах, эдийн засаг, бэлгийн эрх чөлөө, бие махбодид халдсан үйлдэл, эс үйлдэхүйг” ойлгохоор тус тус хуульчилжээ.

 

            Хууль зүйн хувьд шүүгдэгч Б.*******ийн үйлдэл нь идэвхтэй, ухамсартай үйлдэл бөгөөд хохирогч Д.*******гийн эрх чөлөөнд халдаж, хөнгөн зэргийн гэмтэл учруулж, хор уршигт зориуд хүргэсэн байх тул түүнийг гэм буруугийн санаатай хэлбэрээр хүний эрүүл мэндэд хөнгөн хохирол учруулсанд тооцно.

 

            Шүүгдэгч Б.*******ийн үйлдлийн улмаас хохирогчийн биед эрүүл мэндийг түр хугацаагаар сарниулах хөнгөн гэмтэл учирсан нь шинжээчийн дүгнэлтээр тогтоогдсон тул хүний эрүүл мэндэд хөнгөн хохирол учирсан гэж үзнэ.

 

Шүүгдэгч Б.*******, хохирогч Д.******* нар нь 2006 онд гэрлэлтээ албан ёсоор бүртгүүлсэн, дундаасаа 2 хүүхэдтэй, гэр бүлийн хамаарал бүхий харилцаатай хүмүүс байх бөгөөд шүүгдэгч нь хардалтын улмаас хэрүүл маргаан үүсгэж, хохирогчийн биед халдсан, уг үйлдэлд хохирогчийг буруутгах үндэслэл тогтоогдоогүй, мөн шүүгдэгч нь хохирогчийг байнга хий хардаж, биед халдаж байсан зэргээс дүгнэхэд шүүгдэгчийг тухайн гэмт хэргийг гэр бүлийн хүчирхийлэл үйлдэж үйлдсэн гэж үзэхээр байна.

 

Иймд улсын яллагчийн дүгнэлтийг хүлээн авч, шүүгдэгч Б.*******ийг хүний эрүүл мэндэд хөнгөн хохирол санаатай учруулах гэмт хэргийг Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.8-д заасан “гэр бүлийн хүчирхийлэл үйлдэж” хүндрүүлэх нөхцөл байдалтайгаар үйлдсэн буюу Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан гэмт хэрэг үйлдсэн гэм буруутайд тооцох хууль зүйн үндэслэлтэй байна гэж шүүх дүгнэв.

 

            Гэмт хэргийн улмаас учирсан хохирол, хор уршгийн талаар:

 

            Гэмт хэргийн улмаас хохирогч Д.*******гийн эрүүл мэндэд хөнгөн хохирол учирсан бөгөөд хохирогч нь баримтаар нэхэмжилсэн зүйлгүй, шүүхийн хэлэлцүүлэгт “нэхэмжлэх зүйл байхгүй” гэж мэдүүлсэн тул шүүгдэгч Б.*******ийг хохирогчид төлөх төлбөргүйд тооцов.

 

            Харин иргэний нэхэмжлэгч Ж. нь “Хохирогч Д.*******д эрүүл мэндийн даатгалын сангаас тусламж үйлчилгээ үзүүлсэн 212,500 төгрөгийн зардлыг гаргуулах” гэсэн нэхэмжлэлийн шаардлага гаргасан.

 

            Иргэний хуулийн 513 дугаар зүйлийн 513.1 дэх хэсэгт “Бусдын амь нас, эрүүл мэндэд гэм хор учруулсантай холбогдуулан төлбөр төлсөн нийгмийн даатгал, нийгмийн хангамжийн буюу бусад хуулийн этгээд нь гэм буруутай иргэн болон хуулийн этгээдээс төлбөр, тусламжаа буцаан нэхэмжлэх эрхтэй” гэж, Эрүүл мэндийн даатгалын тухай хуулийн 12 дугаар зүйлийн 12.1 дэх хэсэгт “Дараах зардлыг доор дурдсан этгээдээр нөхөн төлүүлнэ: 12.1.1. гэмт хэрэг, зөрчлийн улмаас эрүүл мэнд нь хохирсон даатгуулагчийн эрүүл мэндийн тусламж, үйлчилгээний зардлын төлбөрийг холбогдох хууль хяналтын байгууллага хариуцан буруутай этгээдээр эрүүл мэндийн даатгалын байгууллагад нөхөн төлүүлнэ” гэж тус тус хуульчилжээ.

 

            Хохирогч Д.*******гийн биед бусдын буруутай үйлдлийн улмаас гэмтэл учирсан байх бөгөөд Эрүүл мэндийн даатгалын сангаас 212,500 төгрөгийн эмчилгээний зардал гарсан байх тул хуульд заасны дагуу гэм буруутайд тооцогдсон шүүгдэгч Б.*******өөс уг зардлыг гаргуулж, Эрүүл мэндийн даатгалын ерөнхий газарт олгох нь зүйтэй байна.

 

            Хоёр. Эрүүгийн хариуцлагын талаар:

 

Шүүх хуралдаанд улсын яллагч “шүүгдэгч Б.*******өд Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар 2 сарын хугацаагаар зорчих эрхийг хязгаарлах ял оногдуулах, хязгаарлалтын бүсийг Налайх дүүргийн нутаг дэвсгэрээр тогтоох” гэсэн дүгнэлт гаргасан ба уг ялын дүгнэлттэй холбогдуулан шүүгдэгч, хохирогч нар санал, тайлбар гаргаагүй болно.

 

Шүүгдэгч Б.******* нь урьд эрүүгийн хариуцлага хүлээж байсан эсэхийг шалгах хуудсаар Цагдаагийн ерөнхий газрын бүртгэлийн санд бүртгэгдээгүй буюу ял шийтгэлгүй байх ба шүүгдэгчид эрүүгийн хариуцлага хүлээлгэхэд Эрүүгийн хуулийн ерөнхий ангийн 6.5, 6.6 дугаар зүйлд заасан хөнгөрүүлэх, хүндрүүлэх нөхцөл байдал тогтоогдоогүй.

 

Шүүх шүүгдэгч Б.*******өд эрүүгийн хариуцлага хүлээлгэхэд гэмт хэрэг үйлдсэн нөхцөл байдал (эхнэрээ хий хардаж олон удаагийн цохигдох үйлдлээр буюу хана мөргүүлэх, өшиглөх, цохих зэргээр гэмтэл учруулсан байдал), учирсан хохирол, хор уршгийн шинж чанар (хохирогчийн эрүүл мэндэд хөнгөн хохирол учирсан), хувийн байдал (гэм буруугаа хүлээн зөвшөөрсөн, бөөрний бусад архаг дутмагшил өвчний улмаас хөдөлмөрийн чадвар алдалт 80% тогтоолгосон, долоо хоногт 1-2 удаа гемодиализын эмчилгээнд ордог байдал, группын мөнгөнөөс өөр орлогогүй) зэргийг харгалзан улсын яллагчийн гаргасан саналын хүрээнд Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар 2 сарын хугацаагаар зорчих эрхийг хязгаарлах ял оногдуулж, 2 сарын хугацаанд Улаанбаатар хотын Налайх дүүргийн нутаг дэвсгэрээс явахыг хориглох, эрх бүхий байгууллагын зөвшөөрөлтэйгөөр оршин суух газраа өөрчлөх, зорчих үүргийг хүлээлгэж, түүнд хяналт тавихыг Шүүхийн шийдвэр гүйцэтгэх газарт даалгаж шийдвэрлэв.

 

Шүүгдэгч нь шүүхээс тогтоосон хугацаанд зорчих эрхийг хязгаарлах ялыг  биелүүлээгүй бол шүүх зорчих эрхийг хязгаарлах ялын эдлээгүй үлдсэн хугацааны нэг хоногийг хорих ялын нэг хоногоор тооцож хорих ялаар солихыг анхааруулж, урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлж шийдвэрлэв.

 

Шүүгдэгч Б.******* нь цагдан хоригдсон хоноггүй, энэ хэрэгт эд мөрийн баримтаар хураагдсан, битүүмжлэгдсэн зүйлгүй, хэрэг хянан шийдвэрлэх ажиллагааны зардалгүй болохыг тус тус дурдах нь зүйтэй байна.

 

Эрүүгийн хэрэг хянан шийдвэрлэх тухай хуулийн 36.2 дугаар зүйлийн 1, 4, 36.6, 36.7, 36.8, 37.1 дүгээр зүйлд заасныг тус тус удирдлага болгон

 

ТОГТООХ нь:

 

1.  ******* овогт *******ын *******ийг Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан гэр бүлийн хүчирхийлэл үйлдэх хэлбэрээр хүний эрүүл мэндэд хөнгөн хохирол санаатай учруулах гэмт хэрэг үйлдсэн гэм буруутайд тооцсугай.

 

2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгч Б.*******ийг 2 (хоёр) сарын хугацаагаар зорчих эрхийг хязгаарлах ялаар шийтгэсүгэй.

 

3. Эрүүгийн хуулийн ерөнхий ангийн 5.5 дугаар зүйлийн 1 дэх хэсэгт зааснаар шүүгдэгч Б.*******ийг 2 (хоёр) сарын хугацаанд Улаанбаатар хотын Налайх дүүргийн нутаг дэвсгэрээс явахыг хориглох, эрх бүхий байгууллагын зөвшөөрөлтэйгөөр оршин суух газраа өөрчлөх, зорчих үүргийг хүлээлгэж, түүнд хяналт тавихыг түүний оршин суугаа газрын Шүүхийн шийдвэр гүйцэтгэх хэлтэст даалгасугай.

 

4. Эрүүгийн хуулийн ерөнхий ангийн 5.5 дугаар зүйлийн 3 дахь хэсэгт зааснаар шүүгдэгч Б.******* нь зорчих эрхийг хязгаарлах ялыг биелүүлээгүй бол шүүх зорчих эрхийг хязгаарлах ялын эдлээгүй үлдсэн хугацааны 1 (нэг) хоногийг хорих ялын 1 (нэг) хоногоор тооцож хорих ялаар солихыг мэдэгдсүгэй.

 

5. Иргэний хуулийн 497 дугаар зүйлийн 497.1, 513 дугаар зүйлийн 513.1 дэх хэсэг, Эрүүл мэндийн даатгалын тухай хуулийн 12 дугаар зүйлийн 12.1.1-т зааснаар шүүгдэгч Б.*******өөс 212,500 (хоёр зуун арван хоёр мянга таван зуу) төгрөгийг гаргуулж Эрүүл мэндийн даатгалын ерөнхий газарт олгосугай.

 

6. Шүүгдэгч Б.******* нь хохирогчид төлөх төлбөргүй, энэ хэрэгт эд мөрийн баримтаар хураагдсан, битүүмжлэгдсэн зүйлгүй, хэрэг хянан шийдвэрлэх ажиллагааны зардалгүй болохыг тус тус дурдсугай.

 

7. Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1 дэх хэсгийн 1.5-д зааснаар шийтгэх тогтоол хүчин төгөлдөр болтол шүүгдэгч Б.*******өд урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шүүхийн шийтгэх тогтоол уншин сонсгосноор хүчинтэй болохыг дурдсугай.

 

9. Эрүүгийн хэрэг хянан шийдвэрлэх тухай хуулийн 38.2 дугаар зүйлийн 1 дэх хэсэгт зааснаар шийтгэх тогтоолыг эс зөвшөөрвөл прокурор, дээд шатны прокурор, оролцогч шийтгэх тогтоол гардан авсан буюу хүргүүлснээс хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд давж заалдах гомдол гаргах, прокурор эсэргүүцэл бичих эрхтэй болохыг дурдсугай.

 

 

 

 

 

ДАРГАЛАГЧ, ШҮҮГЧ                                           Э.ЭНХЖАРГАЛ