Шүүх | Ховд аймаг дахь сум дундын эрүүгийн хэргийн анхан шатны шүүх |
---|---|
Шүүгч | Пүрэвдоржийн Баясгалан |
Хэргийн индекс | 153/2017/0017/Э |
Дугаар | 2017/ШЦТ/17 |
Огноо | 2017-02-23 |
Зүйл хэсэг | 153.1., |
Улсын яллагч | Д.Дуламжав |
Ховд аймаг дахь сум дундын эрүүгийн хэргийн анхан шатны шүүхийн Шийтгэх тогтоол
2017 оны 02 сарын 23 өдөр
Дугаар 2017/ШЦТ/17
Ховд аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч П.Баясгалан даргалж, улсын яллагч Д.Дуламжав, шүүгдэгч Ч.Эрдэнэчулуун, шүүгдэгчийн өмгөөлөгч М.Мандалбаяр /шүүхэд төлөөлөх эрхийн үнэмлэх №1383/, шүүх хуралдааны нарийн бичгийн дарга А.Золзаяа нарыг оролцуулан тус шүүхийн танхимд нээлттэй хийсэн эрүүгийн шүүх хуралдаанаар Ховд аймгийн Прокурорын газраас Эрүүгийн хуулийн Тусгай ангийн 153 дугаар зүйлийн 153.1 дэх хэсэгт зааснаар яллах дүгнэлт үйлдэж ирүүлсэн Чогдон овогт Чимэдийн Эрдэнэчулуунд холбогдох эрүүгийн 201721000017 дугаартай, 153/2017/0017/э/ индекстэй хэргийг 2017 оны 02 сарын 14-ний өдөр хүлээн авч хянан хэлэлцэв.
Шүүгдэгчийн биеийн байцаалт
Монгол Улсын иргэн, 1966 оны 01 сарын 12-ны өдөр Ховд аймгийн Дарви суманд төрсөн 51 настай, эрэгтэй, бүрэн бус дунд боловсролтой, мэргэжилгүй, ажилгүй, Ховд аймгийн Дарви сумын Дэлгэр багт оршин суудаг улсаас авсан гавьяа шагнал, ял шийтгэлгүй, ухаан мэдрэл бүрэн, хэрэг хариуцах чадвартай, Чогдон овогт Чимэдийн Эрдэнэчулуун /ПГ66011213/
Холбогдсон хэргийн талаар: /Яллах дүгнэлтээр/
Яллагдагч Ч.Эрдэнэчулуун нь архи согтууруулах ундааны зүйл хэрэглэсэн үедээ буюу 2016 оны 12 дугаар сарын 31-ний өдөр Ховд аймгийн Дарви сумын Булган багийн нутаг дэвсгэрт Л.Энхболдын жолоодож явсан 75-04 ХОҮ улсын дугаартай РгоЬох маркийн тээврийн хэрэгслийн арын салхины шилийг чулуугаар цохиж санаатайгаар устгаж, хохирогч Л.Энхболдод 220 000 төгрөгний хохирол учруулсан гэмт хэрэгт холбогджээ.
ТОДОРХОЙЛОХ нь:
Шүүхийн хэлэлцүүлэгт талууд хавтаст хэрэгт бэхжүүлэгдсэн дараах нотлох баримтуудыг шинжлэн судлав. Үүнд:
Мөрдөн байцаалтын шатанд хохирогч, гэрч нараас хэргийн талаар мэдүүлсэн мэдүүлгүүд:
Хэргийн талаарх бусад нотлох баримтууд
Шүүгдэгч нарын хувийн байдлыг тогтоосон баримт, мөрдөн байцаалтын шатанд өгсөн гэрчийн мэдүүлгүүд.
Шүүгдэгчийн мөрдөн байцаалтын шатанд болон шүүхийн хэлэлцүүлэгт өгсөн мэдүүлэг:
Шүүх хэргийн байдлыг тал бүрээс нь бүрэн, бодитой шинжлэн судалвал:
Шүүгдэгч Ч.Эрдэнэчулуун нь архи согтууруулах ундааны зүйл хэрэглэсэн үедээ буюу 2016 оны 12 дугаар сарын 31-ний өдөр Ховд аймгийн Дарви сумын Булган багийн нутаг дэвсгэрт Л.Энхболдын жолоодож явсан 75-04 ХОҮ улсын дугаартай РгоЬох маркийн тээврийн хэрэгслийн арын салхины шилийг чулуугаар цохиж санаатайгаар устгаж, хохирогч Л.Энхболдод 220 000 төгрөгний хохирол учруулсан гэмт хэрэг үйлдсэн болох нь хэрэгт авагдсан, шүүхийн хэлэлцүүлэгт хэлэлцүүлэгдсэн нотлох баримтыг цуглуулж, бэхжүүлэх, шалгах ажиллагаа нь хуулийн дагуу явагдсан хохирогч Л.Энхболдын мэдүүлэг /хх-ийн 29 дүгээр хуудас/, гэрч Ц.Бямбацэрэн, Ш.Бекбол, П.Ганзориг нарын мэдүүлэг /хх-ийн 33, 39, 77 дугаар хуудас/, хэрэг учралын газарт нөхөн үзлэг хийсэн тэмдэглэл, гэрэл зургийн үзүүлэлтүүд /хх-ийн 4-5 дугаар хуудас/, тээврийн хэрэгсэлд үзлэг хийсэн тэмдэглэл /хх-ийн 12-13 дугаар хуудас/, мэдүүлгийг газар дээр нь шалгах ажиллагаа явуулсан тэмдэглэл /хх-ийн 14-15 дугаар хуудас/, шинжилгээг шинжилгээний байгууллагаас гадуур хийлгэх тогтоол, Эд зүйлийн үнэлгээ /хх-ийн 21-22 дугаар хуудас/, шүүгдэгч Ч.Эрдэнэчулууны мөрдөн байцаалтын шатанд болон шүүхийн хэлэлцүүлэгт хэргээ хүлээн мэдүүлсэн мэдүүлэг зэрэг нотлох баримтуудаар тогтоогдож байна.
Шүүх сэтгэцийн дүгнэлт №01 /хх-ийн 24-27 дугаар хуудас/ болон шинжээч П.Хосбаярын мэдүүлэг/хх-ийн 76 дугаар хуудас/-ээр шүүгдэгч Ч.Эрдэнэчулуун нь сэтгэцийн өвчингүй, хэрэг хариуцах чадвартай байх тул түүнийг гэмт хэрэг үйлдсэн гэм буруутайд тооцож ял шийтгэл оногдуулах хууль зүйн үндэслэлтэй байна.
Энэ хэрэгт шүүгдэгч Ч.Эрдэнэчулуун нь цагдан хоригдсон хоноггүй, иргэний бичиг баримтыг шүүхэд ирүүлээгүй, гадаадад зорчих эрхийг түдгэлзүүлээгүй болохыг тус тус дурдах нь зүйтэй.
Шүүхээс шүүгдэгч Ч.Эрдэнэчулуунд ял шийтгэл оногдуулахдаа анх удаа хүндэвтэр гэмт хэрэг үйлдсэн /ял шийтгэгдсэн эсэхийг шалгах хуудас хх-ийн 58 дугаар хуудас/, үйлдсэн хэрэгтээ чин санаанаасаа гэмшиж байгаа /шүүх хуралдааны тэмдэглэл/, бусдад төлөх төлбөргүй /хохирогч Л.Энхболдын мэдүүлэг хх-ийн 29 дүгээр хуудас/, гэмт хэргийн нийгмийн аюулын шинж чанар, хэр хэмжээ, шүүгдэгчийн хувийн болон эрүүл мэндийн байдал /гэрч Ч.Цэвээнсүрэн, П.Алтансүх, Ч.Мөнхбат, Н.Наранчимэг, Б.Насанжаргал нарын мэдүүлэг хх-ийн 30, 32, 34, 35, 37 дугаар хуудас, Ховд аймгийн Дарви сумын Ерөнхий боловсролын сургуулийн 2017 оны 01 сарын 16-ны өдрийн 10 тоот тодорхойлолт хх-ийн 49 дүгээр хуудас, Ховд аймгийн Дарви сумын Дэлгэр багийн Засаг даргын 22 тоот тодорхойлолт хх-ийн 50 дугаар хуудас, Дарви сумын Засаг даргын Тамгын газрын 2017 оны 01 сарын 26-ны өдрийн 2/49 тоот тодорхойлолт хх-ийн 59 дүгээр хуудас, Ч.Эрдэнэчулууны амбулаторийн карт хх-ийн 67-73 дугаар хуудас/, амьдралын түвшин /Дарви сумын Засаг даргын Тамгын газрын 2017 оны 02 сарын 06 тоот албан бичиг хх-ийн 84 дүгээр хуудас/ зэргийг харгалзан түүнд оногдуулах ялыг биечлэн эдлүүлэх шаардлагагүй гэж үзэв.
Шүүгдэгч Ч.Эрдэнэчулуун нь бусдад төлөх төлбөргүй тул түүний Г1604000038 дугаарт бүртгэлтэй Дарви сумын Булган багийн Сутай хорооллын 6 дугаар гудамжны эхэнд байрлах гэр бүлийн хэрэгцээний газрыг битүүмжилсэн мөрдөн байцаагчийн 2017 оны 01 сарын 17-ны өдрийн “Эд хөрөнгө битүүмжлэх тогтоол”-ыг хүчингүй болгох үндэстэй байна.
Монгол Улсын Эрүүгийн байцаан шийтгэх хуулийн 283, 286, 290 дүгээр зүйлийн 290.3, 294, 297 дугаар зүйлийн 297.1.1, 297.1.2, 297.1.4, 298 дугаар зүйлийн 298.1.2, 298.1.4-т тус тус заасныг удирдлага болгон
ТОГТООХ нь:
1.Чогдон овогт Чимэдийн Эрдэнэчулууныг бусдын эд хөрөнгийг санаатайгаар устгасан гэмт хэрэг үйлдсэн гэм буруутайд тооцсугай.
2. Шүүгдэгч Ч.Эрдэнэчулууныг Эрүүгийн хуулийн тусгай ангийн 153 дугаар зүйлийн 153.1 дэх хэсэгт зааснаар 1 /нэг/ жилийн хугацаагаар хорих ялаар шийтгэсүгэй.
3. Эрүүгийн хуулийн ерөнхий ангийн 52 дугаар зүйлийн 52.5-д зааснаар Ч.Эрдэнэчулуунд оногдуулсан 1 /нэг/ жилийн хугацаагаар хорих ялыг жирийн дэглэмтэй эрэгтэйчүүдийн хорих ангид эдлүүлсүгэй.
4. Энэ хэрэгт шүүгдэгч Ч.Эрдэнэчулуун нь цагдан хоригдсон хоноггүй, бусдад төлөх төлбөргүй, иргэний бичиг баримтыг шүүхэд ирүүлээгүй, гадаадад зорчих эрхийг түдгэлзүүлээгүй болохыг тус тус дурдсугай.
5. Эрүүгийн хуулийн ерөнхий ангийн 61 дүгээр зүйлийн 61.1, 61.4 дэх хэсэгт зааснаар шүүгдэгч Ч.Эрдэнэчулуунд оногдуулсан 1 /нэг/ жилийн хугацаагаар хохих ялыг тэнсэж, 1 /нэг/ жилийн хугацаагаар хянан харгалзаж, Ч.Эрдэнэчулууны засрал хүмүүжилд хяналт тавихыг Ховд аймгийн Цагдаагийн газарт даалгасугай.
6. Эрүүгийн байцаан шийтгэх хуулийн 88 дугаар зүйлийн 88.1.7-д зааснаар эд мөрийн баримтаар хураан авсан шүүгдэгч Ч.Эрдэнэчулууны амбулаториор эмчлүүлэгчийн картын хуулбарыг уг хэргийг хадгалах хугацаа дуустал үлдээсүгэй.
7.Эрүүгийн байцаан шийтгэх хуулийн 134 дүгээр зүйлийн 134.10-д зааснаар Ч.Эрдэнэчулууны хувьд ногдох хөрөнгө болох Г1604000038 дугаарт бүртгэлтэй Дарви сумын Булган багийн Сутай хорооллын 6 дугаар гудамжны эхэнд байрлах гэр бүлийн хэрэгцээний газрыг битүүмжилсэн мөрдөн байцаагчийн 2017 оны 01 сарын 17-ны өдрийн “Эд хөрөнгө битүүмжлэх тогтоол”-ыг хүчингүй болгосугай.
8. Шийтгэх тогтоол нь танилцуулан сонсгосноор хүчинтэй болох ба Эрүүгийн байцаан шийтгэх хуулийн 301 дүгээр зүйлийн 301.1 дэх хэсэгт зааснаар шийтгэх тогтоол хүчин төгөлдөр болтол шүүгдэгч Ч.Эрдэнэчулуунд урьд бусдын батлан даалтад өгөхөөр авсан таслан сэргийлэх арга хэмжээ авсныг хэвээр хэрэглэсүгэй.
9.Шийтгэх тогтоолд давж заалдах гомдол гаргах, эсэргүүцэл бичих эрх бүхий этгээд шийтгэх тогтоолыг эс зөвшөөрвөл тогтоолыг гардуулснаас хойш 14 хоногийн дотор Ховд аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.
ДАРГАЛАГЧ ШҮҮГЧ П.БАЯСГАЛАН