МОНГОЛ УЛСЫН НЭРИЙН ӨМНӨӨС

                                                                                                  Хэргийн индекс: 171/2016/0200/Э

Дархан-Уул аймаг дахь Сум дундын Эрүүгийн хэргийн анхан шатны шүүхийн шүүх хуралдааныг шүүгч П.Баттулга даргалж,  
Шүүх хуралдааны нарийн бичгийн дарга Г.Хулан
Улсын яллагчаар Дархан-Уул аймгийн прокурорын газрын хяналтын прокурор О.Доржмаа
Шүүгдэгчийн өмгөөлөгч Н.Б***
Шүүгдэгч Э.Б***нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар,

Дархан-Уул аймгийн Прокурорын газраас Эрүүгийн хуулийн тусгай ангийн 216 дугаар зүйлийн 216.2-т заасан гэмт хэрэгт Э.Б***д холбогдуулан яллах дүгнэлт үйлдэж ирүүлсэн **** тоот дугаартай эрүүгийн хэргийг  2016 оны 10 дугаар сарын 18-ны өдөр хүлээн авч хянан хэлэлцэв.

Шүүгдэгчийн биеийн байцаалт: 

Монгол улсын иргэн, ****** төрсөн, эрэгтэй, бүрэн бус дунд боловсролтой, ***** мэргэжилтэй, ам бүл *****, ******ийн хамт Дархан-Уул аймаг Дархан сум ** дугаар баг Мангиртын ** дугаар хэсгийн ** тоотод оршин суудаг, ял шийтгэлгүй, ухаан мэдрэл бүрэн, хэрэг хариуцах чадвартай, Э.Б*** РД:****

Холбогдсон хэргийн талаар:
 
Шүүгдэгч Э.Б***нь 2016 оны 09 дүгээр сарын 19-ний өдөр Дархан сумын ** дугаар багийн нутаг дэвсгэр Хабитат явах замд Монгол Улсын Замын хөдөлгөөний дүрмийн 2.7/а/-д заасан "Жолооч согтууруулах ундаа, мансууруулах бодис, сэтгэцэд нөлөөлөх эм, бэлдмэл хэрэглэсэн, мөн хөдөлгөөний аюулгүй байдлыг хангаж чадахааргүй өвчтэй буюу ядарсан үедээ тээврийн хэрэгсэл жолоодохыг хориглоно” гэснийг зөрчин согтуугаар Соната-6 маркийн **** ДАР улсын дугаартай автомашиныг жолоодон явахдаа мөн дүрмийн 8.2-т заасан “Эсрэг хөдөлгөөнтэй хоёр эгнээгээр зорчдог замд гүйцэж түрүүлэх буюу тойрон гарахаас бусад тохиолдолд эсрэг урсгал сөрөхийг хориглоно” гэснийг зөрчсөнөөс И.Ч***ын жолоодон явсан Соната-6 маркийн ** ДАХ улсын дугаартай автомашиныг мөргөж “Хос капитал” ХХК-ийн эзэмшлийн Соната-6 маркийн **ДАХ улсын дугаартай автомашинд нийт 800.000 төгрөгийн хохирол учруулсан зам тээврийн осол гаргасан байх ба ослын дараа Замын хөдөлгөөний дүрмийн 2.5/а/-д заасан “Зам тээврийн осолд холбогдсон жолооч тээврийн хэрэгслээ нэн даруй зогсоож, ослын дохионы гэрлээ асаах ба ослын зогсолтын тэмдгийг энэ дүрмийн 6.3-т заасан шаардлагын дагуу тавьж, тээврийн хэрэгсэл болон осолд холбогдол бүхий эд юмсыг байрнаас нь хөдөлгөхгүй байх үүрэг хүлээнэ” гэснийг, 2.5/б/-д заасан “зам тээврийн осолд нэрвэгдсэн хүнд эмнэлгийн анхны тусламж үзүүлж, түргэн тусламж дуудах, хэрэв бололцоогүй бол ойр байгаа эмнэлгийн байгууллагад аль тааралдсан тээврийн хэрэгслээр хүргүүлэх буюу зайлшгүй тохиолдолд өөрийн жолоодож яваа тээврийн хэрэгслээр хүргэж, эмнэлгийн ажилтанд өөрийн овог нэр, тээврийн хэрэгслийн марк, улсын дугаар, гэрчилгээг үзүүлж тэмдэглүүлээд уг газартаа буцаж ирэх үүрэг хүлээнэ” гэснийг, 2.5/в/-д заасан “Зам тээврийн ослын тухай цагдаагийн байгууллага ажилтанд мэдэгдэж, түүнийг үзсэн хүмүүсийн овог нэр, хаягийг мэдэж аваад осолд холбогдол бүхий эд мөрийн баримтын зүйлийг хамгаалан цагдаагийн байгууллагын ажилтанг иртэл хүлээх үүрэг хүлээнэ” гэснийг тус тус зөрчин зам тээврийн осол гарсан газрыг санаатай орхиж зугтаасан тээврийн хэрэгслийн хөдөлгөөний аюулгүй байдал, ашиглалтын журмын эсрэг гэмт хэрэгт холбогджээ /яллах дүгнэлтэд бичигдсэнээр/  
        
Шүүхийн хэлэлцүүлэгт дараах нотлох баримтуудыг шинжлэн судлав. Үүнд:

Шүүгдэгч Э.Б***гийн мөрдөн байцаалтад болон шүүхийн хэлэлцүүлэгт өгсөн: ”...2016 оны 9 дүгээр сарын 19-ний өдөр 11 цагийн үед би ажил руугаа явах гээд гэрээсээ гарсан.  Гэтэл миний машины гэрэл муудсан байсан болохоор би Г*** гээд найзындаа очсон. Г*** гэдэг найзынхаа гэрт очоод Г***, түүний эхнэр О*** бид гурав 0.75 литрийн Улаанбаатар нэртэй 1 шил архи хувааж уусан. Тэгээд би гэр рүүгээ харих гээд явж байсан чинь улаан худгийн харалдаа 4 хүн зогсож байхаар нь би тэр хүмүүсийг аваад “Олон улсын худалдааны төв” хүргэж өгөөд эргээд явж байсан чинь зам дээр нэг эмэгтэй байхаар нь аваад цаашаа явж байсан. Гэтэл зам дээр явж байсан И.Ч***ын машиныг мөргөсөн. Тэгээд айсандаа сандраад цаашаа явсан. Тэнд 300 метрийн цаана автобусны буудал байдаг. Тэнд очоод зогссон. Тэгээд удалгүй цагдаа нар миний араас ирээд намайг буцаагаад ослын газар авчраад хэмжилт хийж үзлэг хийсэн. Тэгээд намайг эрүүлжүүлэхэд хийгээд миний машиныг журмын хашаанд хийсэн. Хийсэн хэрэгтээ харамсаж, гэмшиж байна. Би дахиж ийм алдаа гаргахгүй. Надад хөнгөн ял оногдуулж өгнө үү” гэх мэдүүлэг /хэргийн 68-69, 71 дүгээр хуудас/ 

Хохирогч И.Ч***ын мөрдөн байцаалтад өгсөн: “...2016 оны 09 дүгээр сарын 19-ний өдөр 14 цагийн үед би өөрийн эзэмшлийн **ДАХ улсын дугаартай Соната-6 маркийн автомашинаар Хабитатын улаан худгийн автобусны зогсоол дээрээс нэг эмэгтэй хүүхэд машиндаа суулгаад Олон улсын худалдааны төв орох чиглэлд шороон замаар явж байтал миний урдаас **ДАР улсын дугаартай саарал өнгийн Соната-6 маркийн машин ирж байсан. Би зөрөх байх гэж бодож байтал миний жолооч талаас буюу зүүн талаас мөргөчихөөд зогсохгүй чигээрээ Хабитатын тийшээ яваад өгсөн. Би тэр дороо машинаа зогсоогоод цагдаа дуудсан. Удалгүй цагдаа нар ирээд мөргөсөн машин чинь хаашаа явсан бэ гэж асуусан. Тэгэхээр нь би Хабитат тийшээ явсан гэж явсан зүг рүү нь зааж өгсөн. Тэгээд цагдаа нар яваад Э.Б***г машинтай нь авчирсан. Э.Б***г Хабитатын улаан худгийн тэнд зогсож байхад авчирсан гэж ярьж байсан. Одоо надад ямар нэгэн гомдол санал байхгүй. Э.Б*** миний машиныг 815.000 төгрөгөөр янзлуулж, засварлуулж өгсөн. Нэхэмжлэх зүйл байхгүй” гэх мэдүүлэг /хэргийн 23 дугаар хуудас/

Иргэний нэхэмжлэгч Э.П***гийн мөрдөн байцаалтад өгсөн: “...2016 оны 09 дүгээр сарын 19-ний өдөр 14 цагийн үед Олон улсын худалдааны төв орчихоод гэртээ харих гээд Хабитат явдаг таксинд суугаад би ганцаараа суусан өөр хүн байгаагүй. Тэгээд Хабитат руу шороон замаар явж байтал урдаас нэг саарал машин ирж байсан. Тэгтэл миний сууж явсан машины жолооч нөгөө урдаас ирж байсан машинтай зөрөх шиг болсон чинь мөргөчихсөн, Тэгээд чигээрээ яваад Хабитатын улаан худагны тэнд очоод зогссон. Би машинаас буугаад хүүхэд маань доошоо өвдөөд байх шиг байна гэсэн чинь жолооч Э.Б*** намайг өөр машинд суугаад эмнэлэг явчих гэсэн. Тэгээд би өөр таксинд суугаад Нэгдсэн эмнэлэгт очиж үзүүлсэн. Тухайн үед миний толгой өвдөж, дотор муухайрч байсан. Хэвлий дэх ургаа эход харуулахад гайгүй байна, жаахан доошилсон байна гэж хэлсэн. Надад Б*** 200.000 төгрөг өгсөн. Тэрүүгээр нь энд эход харуулаад бас Улаанбаатар хот орж эмнэлэгт үзүүлээд ирсэн. гэх мэдүүлэг /хэргийн 14 дүгээр хуудас/
    
Иргэний нэхэмжлэгч Ж.М***ын мөрдөн байцаалтад өгсөн: “...2016 оны 09 дүгээр сарын 19-ний өдөр 14 цагийн үед би гэрээсээ гараад Хабитатын улаан худгийн автобусны буудлаас Олон улсын худалдааны төв орохоор таксинд суугаад хөдлөөд явсан. Тэр машинд таксины жолооч ах, би арын суудал дээр нь сууж явсан. Тэгээд Хабитатаас хөдлөөд Олон улсын худалдааны төв орох шороон замаар явж байтал жолооч энэ чинь одоо яагаад байнаа тоглоод байгаа юмуу хаашаа юм гэтэл нэг саарал машин хүчтэй ирээд жолоочийн талын урд талаас мөргөчихөөд хажуугаар гараад чигээрээ зөрөөд явчихсан. Тэгээд миний сууж явсан таксины жолооч ах машинаа тэр дор нь зогсоогоод машинаасаа буугаад нөгөө машины араас дуудсан, нөгөө машин нь зогсоогүй чигээрээ яваад өгсөн. Тэр осолд орсны дараа толгой өвдөж, зүүн гарын булчин хэсгээр өвдөж байсан. Би Э.Б***гийн эхнэрээс толгой бариулах 25.000 төгрөг авч 3 хоног толгойгоо бариулсан. Боловч дахиад 2 хоног бариулах хэрэгтэй байгаа. Бас наашаа цаашаа явах гээд оюутан хүнд хэцүү байгаа учраас дахиад 20.000 төгрөг нэхэмжилж байсан боловч хохирлоо авсан” гэх мэдүүлэг /хэргийн 12  дугаар хуудас/

Иргэний нэхэмжлэгч Г.Э***гийн мөрдөн байцаалтад өгсөн: “**ДАХ улсын дугаартай машин нь манай Хос капитал санхүүгийн байгууллагад 2016 оны 2 сарын 8-ны өдөр барьцаанд тавьж 1.200.000 төгрөг зээлсэн учраас манай байгууллагын нэр дээр байгаа юм. ...Манай байгууллагаас нэхэмжлэх зүйл байхгүй. Энэ машин барьцаанд байгаа. Машины бүрэн бүтэн байдлыг манай байгууллага хариуцахгүй. Эзэн нь өөрөө хариуцна. Манайд зээлийн төлөлтөө хэвийн хийж байгаа учраас манай байгууллагаас гомдол, санал, нэхэмжлэх зүйл байхгүй” гэх мэдүүлэг /хэргийн 18 дугаар хуудас/

Гэрч Э.О*** мөрдөн байцаалтад өгсөн: “Э.Б*** манай нөхөр Г***ийн хамт 750 граммын 1 шил архи хувааж уучихаад өдөр 12 цагийн үед гараад явсан. Э.Б*** манайхаас гарахдаа өөрийнхөө машиныг унаад эхнэртээ өгнө гээд гарсан. Э.Б***гийн гэр нь манай гэрээс 3 гудамжны цаана байдаг болохоор гэр лүүгээ явж байна гэж ойлгосон гэх мэдүүлэг /хэргийн 22 дугаар хуудас/,

Шинжээчийн 2016 оны 9 дүгээр сарын 25-ны өдрийн 36 тоот “Жолооч Э.Б*** Х.Соната маркийн **ДАР улсын дугаартай автомашин жолоодож явах үедээ Монгол Улсын Замын хөдөлгөөний дүрмийн 2 дугаар бүлэг 2.7/а/-д заасан “Жолоочид согтууруулах ундаа, мансууруулах бодис, сэтгэцэд нөлөөлөх эм, бэлдмэл хэрэглэсэн, мөн хөдөлгөөний аюулгүй байдлыг хангаж чадахааргүй өвчтэй буюу ядарсан үедээ тээврийн хзрэгсэл жолоодохыг хориглоно” гэсэн заалтыг, мөн дүрмийн 8 дугаар бүлэг 8.2-т заасан “Эсрэг хөдөлгөөнтэй хоёр эгнээгээр зорчдог замд гүйцэж түрүүлэх буюу тойрон гарахаас бусад тохиолдолд эсрэг урсгал сөрөхийг хориглоно" гэсэн заалтуудыг зөрчин зам тээврийн осол гаргасан ба ослын дараа жолооч нь мөн дүрмийн 2 дугаар бүлэг 2.5 /а/-д заасан “Зам тээврийн осолд холбогдсон жолооч тээврийн хэрэгслээ нэн даруй зогсоож, ослын дохионы гэрлээ асаах ба ослын зогсолтын тэмдгийг энэ дүрмййн 6.3-т заасан шаардлагын дагуу тавьж, тээврийн хэрэгсэл болон осолд холбогдол бүхий эд юмсыг байрнаас нь хөдөлгөхгүй байх үүрэг хүлээнэ; 2.5 /б/-д заасан “зам тээврийн осолд нэрвэгдсэн хүнд эмнэлгийн анхны тусламж үзүүлж, түргэн тусламж дуудах, хэрэв бололцоогүй бол уг хүнийг ойр байгаа эмнэлгийн байгууллагад аль тааралдсан тээврийн хэрэгслээр хүргүүлэх буюу зайлшгүй тохиолдолд өөрийн жолоодож яваа тээврийн хэрэгслээр хүргэж, эмнэлгийн ажилтанд өөрийн овог нэр, тээврийн хэрэгслийн марк, улсын дугаар, гэрчилгээг үзүүлж тэмдэглүүлээд уг газартаа буцаж ирэх үүрэг хүлээнэ; 2.5 /в/-д заасан "зам тээврийн ослын тухай цагдаагийн байгууллага (ажилтан)-д мэдэгдэж, түүнийг үзсэн хүмүүсийн овог нэр, хаягийг мэдэж аваад осолд холбогдол бүхий эд мөрийн баримтын зүйлийг хамгаалан цагдаагийн байгууллагын ажилтанг иртэл хүлээх үүрэг хүлээнэ” гэсэн заалтуудыг зөрчсөн байна. Жолооч И.Ч*** нь Соната маркийн **ДАХ улсын дугаартай автомашиныг жолоодож явах үедээ Монгол Улсын Замын хөдөлгөөний дүрэм зөрчөөгүй болно. Цагдаагийн газрын Замын цагдаагийн тасгийн зохицуулагч, цагдаагийн хошууч Г.С*** 2016 оны 09 дүгээр сарын 19-ний өдрийн уг осолтой холбогдуулан гаргасан ослын тухай тэмдэглэл үндэслэлтэй байна” гэсэн дүгнэлт /хэргийн 25 дугаар хуудас/, 

Шүүх эмнэлгийн шинжээчийн 1009 тоот “Ж.М***ын биед тархи доргилт тогтоогдлоо. Дээрх гэмтэл нь хатуу мохоо зүйлийн хүчин боломжтой. Уг гэмтэл нь Гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах хөнгөн зэргийн гэмтэл болно. Ж.М***ын биед учирсан гэмтэл нь цаашдын эрүүл мэнд, хөдөлмөрийн чадварт нөлөөлөхгүй” гэсэн дүгнэлт /хэргийн 29 дүгээр хуудас/,
 
Шүүх эмнэлгийн шинжээчийн 1040 тоот “Э.П***гийн биед гэмтэл тогтоогдсонгүй” гэсэн дүгнэлт /хэргийн 60 дугаар хуудас/,

Хэрэг учралын газарт үзлэг хийсэн тэмдэглэл, гэрэл зургийн үзүүлэлтүүд /хэргийн 3-4 дүгээр хуудас/, 

Зам тээврийн ослын шийдвэрлэлтийн талаарх тэмдэглэл /хэргийн 6 дугаар хуудас/, 

Тээврийн хэрэгслийн техникийн байдлыг шалгасан тухай шинжээчийн дүгнэлт гэрэл зургийн үзүүлэлтүүд /хэргийн 34-36, 41-44 дүгээр хуудас/,

Х.Соната-6 маркийн **ДАХ улсын дугаартай автомашины эвдрэлийн үнэлгээ /хэргийн 53-54 дүгээр хуудас/,

Ял шийтгэгдсэн эсэхийг шалгах хуудас /хэргийн 73 дугаар хуудас/ болон хавтаст хэрэгт авагдсан бусад бичгийн нотлох баримтуудыг шинжлэн судлав.

Шүүгдэгч Э.Б*** нь согтууруулах ундааны зүйл хэрэглэсэн үедээ Дархан-Уул аймгийн Дархан сумын ** дугаар баг Хабитат явах замд 2016 оны 9 дүгээр сарын 19-ний өдөр **ДАР улсын дугаартай Соната-6 маркийн тээврийн хэрэгслийг жолоодож яваад иргэн И.Ч***ын эзэмшлийн **ДАХ улсын дугаартай автомашиныг мөргөж зам тээврийн осол гарсан газрыг санаатай орхиж зугтаасан “Зам тээврийн ослын үед жолооч үүргээ биелүүлэхгүй байх, зугтаах” гэмт хэргийг үйлдсэн болох нь шүүгдэгч Э.Б***/хэргийн 68-69, 71 дүгээр хуудас/, хохирогч И.Ч*** /хэргийн 23 дугаар хуудас/, иргэний нэхэмжлэгч  Ж.М*** /хэргийн 12  дугаар хуудас/, Э.П*** /хэргийн 14 дүгээр хуудас/ нарын мэдүүлэг, Шинжээчийн 2016 оны 9 дүгээр сарын 25-ны өдрийн 36 тоот дүгнэлт /хэргийн 25 дугаар хуудас/, Шүүх эмнэлгийн шинжээчийн 1009 тоот дүгнэлт /хэргийн 29 дүгээр хуудас/ болон бусад бичгийн баримтуудаар нотлогдон тогтоогдож байх тул түүнд Эрүүгийн хуулийн тусгай ангийн 216 дугаар зүйлийн 216.2-т зааснаар ял сонсгож, яллах дүгнэлт үйлдэж ирүүлсэн хуулийн зүйл, хэсэг тохирсон байна.

Иймд шүүгдэгч Э.Б***г зам тээврийн осол гарсан газрыг санаатай орхиж зугтаасан гэмт хэрэг үйлдсэн гэм буруутад тооцож, Эрүүгийн хуулийн тусгай ангийн 216 дугаар зүйлийн 216.2-т зааснаар ял шийтгэл оногдуулах үндэслэлтэй байна. 

Хохирогч И.Ч***ын “Э.Б*** миний машиныг 815.000 төгрөгөөр янзлуулж, засварлуулж өгсөн. Нэхэмжлэх зүйл байхгүй” гэх мэдүүлэг, иргэний нэхэмжлэгч Хос капитал санхүүгийн байгууллагын итгэмжлэгдсэн төлөөлөгч Г.Э***гийн “...Манай байгууллагаас гомдол, санал, нэхэмжлэх зүйл байхгүй” гэх мэдүүлэг, Э.П***гийн “...Надад Э.Б*** 200.000 төгрөг өгсөн... ” гэх мэдүүлэг. Мөн Э.П***гийн 100.000 төгрөг хүлээн авсан, одоо гомдол, нэхэмжлэх зүйлгүй гэсэн баримт /хэргийн 106 дугаар хуудас/, Ж.М***ын мэдүүлэгт Э.Б***гийн эхнэрээс 25.000 төгрөг авч 3 хоног толгойгоо бариулсан. Одоо дахиад 20.000 төгрөг нэхэмжилж байна гэх боловч Э.Б***нь 2016 оны 10 дугаар сарын 26-ны өдөр Ж.М***т 20.000 төгрөг хүлээлгэн тухай баримтыг нотариатаар гэрчлүүлэн авч ирсэн байх тул шүүгдэгч Э.Б***г хохирогч нарт төлөх төлбөргүй гэж үзлээ.

Шүүгдэгч Э.Б***нь согтуурсан үедээ гэмт хэрэг үйлдсэн нь хүндрүүлэх нөхцөл байдалд тооцогдох боловч түүний хувийн байдал, гэмт хэрэг үйлдэж учруулсан хохирлоо сайн дураараа нөхөн төлсөн зэргийг харгалзан үзэж түүнд оногдуулсан хорих ялыг биечлэн эдлүүлэх шаардлагагүй гэж үзэв. 

Эрүүгийн байцаан шийтгэх хуулийн  283. 284, 286. 290 дугаар зүйлийн 290.3, 295, 296, 297, 298 дугаар зүйлүүдэд заасныг удирдлага болгон

                                                       ТОГТООХ нь: 

1. Шүүгдэгч Э.Б***г зам тээврийн осол гарсан газрыг санаатай орхиж зугтаасан гэмт хэрэг үйлдсэн гэм буруутайд тооцсугай.

2. Эрүүгийн хуулийн тусгай ангийн 216 дугаар зүйлийн 216.2-т  зааснаар шүүгдэгч Э.Б***г  1 /нэг/ жил 6 /зургаа/ сарын хугацаагаар хорих ял шийтгэсүгэй. 

3. Эрүүгийн хуулийн ерөнхий ангийн 52 дугаар зүйлийн 52.5-т зааснаар Э.Б***д оногдуулсан 1 /нэг/ жил 6 /зургаа/ сарын хугацаагаар хорих ялыг жирийн дэглэмтэй хорих ангид  эдлүүлсүгэй.

4. Эрүүгийн хуулийн ерөнхий ангийн 61 дүгээр зүйлийн 61.1-т зааснаар Э.Б***д оногдуулсан 1 /нэг/ жил 6 /зургаа/ сарын хугацаагаар хорих ялыг биечлэн эдлүүлэх шаардлагагүй гэж үзэн тэнсэж 1 /нэг/ жилийн хугацаагаар хянан харгалзсугай. 
  
5. Эрүүгийн хуулийн ерөнхий ангийн 61 дүгээр зүйлийн 61.4-т зааснаар Э.Б***гийн засрал хүмүүжилд хяналт тавьж ажиллахыг Дархан-Уул аймаг дахь Цагдаагийн газарт даалгасугай. 

6. Эрүүгийн хуулийн ерөнхий ангийн 61 дүгээр зүйлийн 61.5-т зааснаар тэнсэгдсэн ялтан Э.Б***нь тэнсэж хянан харгалзсан хугацаанд захиргааны шийтгэл хүлээвэл Цагдаагийн газрын саналыг үндэслэн хорих ялыг биечлэн эдлүүлэх эсэхийг шүүх шийдвэрлэх болохыг сануулсугай.  

7. Иргэний хуулийн 497 дугаар зүйлийн 497.1, 510 дугаар зүйлийн 510.1 дэх хэсэгт зааснаар  шүүгдэгч Э.Б***нь хохирогч И.Ч***ад 815.000 /найман зуун арван таван мянга/ төгрөг, иргэний нэхэмжлэгч Э.П***д 300.000 /гурван зуун мянга/ төгрөг, иргэний нэхэмжлэгч Ж.М***т 45.000 /дөчин таван мянга/ төгрөгийн хохирол тус тус төлсөн, одоо төлөх төлбөргүйг дурдсугай.   
  
8. Шүүгдэгч Э.Б***нь энэ хэрэгт цагдан хоригдоогүй, эд хөрөнгө  битүүмжлээгүй, иргэний бичиг баримт шүүхэд ирээгүй, эд мөрийн баримтаар хураагдаж ирсэн зүйлгүй болохыг тус тус дурдсугай. 

9. Эрүүгийн байцаан шийтгэх хуулийн 297 дугаар зүйлийн 297.1.4-т зааснаар шийтгэх тогтоол хүчин төгөлдөр болтол Э.Б***д урьд авсан батлан даалтад өгөх таслан сэргийлэх арга хэмжээг үргэлжлүүлсүгэй.

10. Эрүүгийн байцаан шийтгэх хуулийн 299 дүгээр зүйлийн 299.3-т зааснаар шийтгэх тогтоол танилцуулан сонсгосноор хүчинтэй болох бөгөөд шийтгэх тогтоолыг эс зөвшөөрвөл ялтан, хохирогч, тэдгээрийн өмгөөлөгч нар тогтоолыг гардуулснаас хойш 14 хоногийн дотор Дархан Уул аймгийн Эрүүгийн хэргийн  давж заалдах шатны шүүхэд давж заалдах  гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.
    
11. Эрүүгийн байцаан шийтгэх хуулийн 306 дугаар зүйлийн 306.1-т зааснаар энэхүү шийтгэх тогтоолд давж заалдах гомдол гаргасан, эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол биелүүлэх хүртэл Э.Б***д урьд авсан бусдын батлан даалтад өгөх  таслан сэргийлэх арга хэмжээг хэвээр үргэлжлүүлсүгэй.

                        
ДАРГАЛАГЧ, ШҮҮГЧ                         П. БАТТУЛГА