МОНГОЛ УЛСЫН НЭРИЙН ӨМНӨӨС

 

Баянзүрх дүүргийн Иргэний хэргийн анхан шатны шүүхийн шүүгч Э.Энэбиш даргалж, тус шүүхийн танхимд хийсэн шүүх хуралдаанаар,

Нэхэмжлэгч: Х.У,

Хариуцагч: М.Д,

Орон сууц хөлслөх гэрээний үүрэгт 3,013,000 төгрөг гаргуулах нэхэмжлэлтэй иргэний хэргийг хянан хэлэлцэв.

Шүүх хуралдаанд: Нэхэмжлэгч Х.У, шүүх хуралдааны нарийн бичгийн дарга Б.Ганчимэг нар оролцов.

ТОДОРХОЙЛОХ нь:

Нэхэмжлэгч Х.У шүүхэд гаргасан нэхэмжлэл болон шүүх хуралдаанд гаргасан тайлбартаа: Х.У миний бие 2017 оны 05 дугаар сарын 15-ны өдөр Баянзүрх дүүргийн ***** тоот 18мкв 1 өрөө байраа Орон сууц хөлслөх гэрээ байгуулан Х.А*******д сарын 400,000 мянган төгрөгөөр нэг жилийн хугацаатай хөлслүүлсэн. Гэрээн дээр сарын төлбөрийг 400,000 төгрөг гэж бичсэн боловч бид хоорондоо харилцан тохиролцож сард 350,000 төгрөг авахаар болсон. Бид түрээсийн гэрээний хугацаа дуусахад дахин нэг жилээр сунгасан бөгөөд орон сууц хөлслөх гэрээг сунгахдаа Х.А******* нь хөдөө ажилтай байсан тул Х.А*******гийн зөвшөөрлөөр түүний хүүхэд М******* овогтой Дтай гэрээгээ шинэчлээд байгуулчих гэж хэлсний дагуу шинээр орон сууц хөлслөх гэрээг Дын нэр дээр байгуулж 2019 оны 07 сарыг хүртэл манай байранд амьдарч байгаад гарсан.

Манай байрыг хөлслөгч байрыг маань хөлсөлж байхдаа 2018 оны 01 сард мөнгөө өгөөгүй 2018 оны 03 сард 150,000 төгрөг, үүнээс хойш cap болгон дутуу өгсөөр байгаад одоо нийт 3,013,000 төгрөгийг түрээсийн төлбөрт өгөөгүй байгаа. Би М.Даас байрны түрээсийн төлбөр нэхэж шүүхэд нэхэмжлэл гаргасан боловч оршин суугаа хаяг дээрээ байхгүй байсан учир эрэн сурвалжлуулахад дээрх хаяг дээрээ амьдарч байгаа нь тогтоогдсон тул орон сууц хөлслөх гэрээний дагуу дутуу төлсөн түрээсийн төлбөр 3,013,000 төгрөгийг М.Даас гаргуулж өгнө үү гэв.

ҮНДЭСЛЭХ нь:

Нэхэмжлэгч, хариуцагчид холбогдуулан 2017 оны 05 дугаар сарын 15-ны өдрөөс 2019 оны 07 дугаар сарын 26-ны өдрийн хугацаанд түүний өмчлөлийн Баянзүрх дүүргийн ****** тоотод орших 18 м.кв талбай бүхий нэг өрөө орон сууцыг нэг сарын 350,000 төгрөгөөр /талууд гэрээндээ 400,000 төгрөг гэж заасан ч амаар хэлэлцэн 350,000 төгрөг болгосон гэх/ тохиролцон хөлслүүлсэн тухай тайлбарлаж, 2018 оны 01 дүгээр сараас эхлэн хариуцагч орон сууцыг чөлөөлж өгөх хүртэл хугацаанд дутуу төлөгдсөн хөлс  гэх 3,013,000 төгрөг нэхэмжилжээ.

Нэхэмжлэлийн шаардлагын зарим хэсгийг хангаж шийдвэрлэв.

Нэхэмжлэгч болон иргэн Х.А******* нарын хооронд 2017 оны 05 дугаар сарын 15-ны өдөр Орон сууц хөлслөх гэрээ байгуулж, гэрээний 2.1, 2.2, 2.5-д заасны дагуу дээрх орон сууцыг нэг сарын 400,000 төгрөгөөр тооцож нэг жилийн хугацаатай хөлслүүлэх, орон сууцанд хоёр хүн амьдран суухаар тохиролцжээ. Хариуцагчийн төлөөлөгч Х.А*******тай анх гэрээ байгуулсан, 2019 онд түүний зөвшөөрлөөр хүү М.Дтай гэрээг байгуулсан, Х.А******* нь хариуцагчийн төрсөн эх, тус орон сууцанд Х.А*******, М.Д нар амьдарч байсан гэж нэхэмжлэгч шүүх хуралдаанд тайлбарлаж байна.

Зохигчийн хооронд Иргэний хуулийн 302 дугаар зүйлийн 302.1-д зааснаар орон сууц хөлслөх гэрээ байгуулагджээ.

Хариуцагч 2018 оны 01 дүгээр сараас эхлэн гэрээний үүргээ зөрчин орон сууц хөлсөлсний хөлсийг хэсэгчлэн, дутуу төлж 2019 оны 07 дугаар сарын 26-ны өдөр сууцыг чөлөөлж өгөх хүртэлх хугацаанд 3,013,000 төгрөгийн хуримтлагдсан төлбөр үүссэн гэснийг нэхэмжлэгчийн шүүхэд гаргасан дансны хуулгаас хариуцагчийн төлсөн гэх төлбөрийн дүнг судлан үзэв. Нэхэмжлэгчийн дурдсанаар 2018 оны 01 дүгээр сараас 2019 оны 07 дугаар сарыг дуустах хугацааны хөлс /350,000х19=6,650,000/ 6,650,000 төгрөг болж байна. Хариуцагч 2018 оны 03 дугаар сарын 17-ны өдрөөс 2019 оны 05 дугаар сарын 20-ны өдрийн хооронд 11 удаагийн гүйлгээгээр 3,710,000 төгрөгийг төлсөн байна.

            Гэрээний үүргийг хариуцагч зөрчсөн гэх хугацааны нийт хөлс 6,650,000 төгрөгөөс хариуцагчийн төлсөн 3,710,000 төгрөгийг хасч тооцоход 2,940,000 төгрөгийн хөлсийг хариуцагч, нэхэмжлэгчид төлөх үүрэгтэй байх тул Иргэний хуулийн 302 дугаар зүйлийн 302.1, 289 дүгээр зүйлийн 289.1.2-т зааснаар дутуу төлөгдсөн хөлс 2,940,000 төгрөгийг хариуцагч М.Даас нөхөн гаргуулж нэхэмжлэгч Х.Ут олгохоор, илүү нэхэмжилсэн 73,000 төгрөгийн шаардлагыг хэрэгсэхгүй болгож шийдвэрлэв.

Шүүх хариуцагч, түүний төлөөлөгчид шүүх хуралдааны товыг Иргэний хэрэг шүүхэд хянан шийдвэрлэх тухай хуулийн 77 дугаар зүйлийн 77.1, 77.1-т зааснаар утсаар болон шуудангаар хүргүүлсэн байна. Хариуцагч товыг хүлээн авсан боловч хүндэтгэх шалтгаангүйгээр шүүхэд хүрэлцэн ирээгүй учир Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.3-т зааснаар нэхэмжлэгчээс гаргасан тайлбар болон бусад баримт нотолгоог үндэслэн хэргийг хянан шийдвэрлэв.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.2, 116, 118 дугаар зүйлийг удирдлага болгон

ТОГТООХ нь:

1. Иргэний хуулийн 302 дугаар зүйлийн 302.1-д заасныг баримтлан хариуцагч М.Даас 2,940,000 төгрөг гаргуулж нэхэмжлэгч Х.Ут олгож, нэхэмжлэлээс 73,000 төгрөгийн шаардлагыг хэрэгсэхгүй болгосугай.
2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.2, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчээс улсын тэмдэгтийн хураамжид төлсөн 63,158 төгрөгийг улсын орлогод үлдээж хариуцагч М.Даас 61,990 төгрөг гаргуулан нэхэмжлэгч Х.Ут олгосугай.
3. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, гуравдагч этгээд, тэдгээрийн төлөөлөгч, өмгөөлөгч анхан шатны шүүхийн шийдвэрийг эс зөвшөөрвөл гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

                                      ДАРГАЛАГЧ ШҮҮГЧ                                  Э.ЭНЭБИШ