Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Хэргийн индекс: 127/2018/0011/3

 

            Хэнтий аймаг дахь Захиргааны хэргийн анхан шатны шүүхийн шүүгч Г.Баясгалан би: О-гийн, “Хэнтий аймгийн Жаргалтхаан сумын Байгаль орчны хяналтын улсын байцаагчийн 2018 оны 3 дугаар сарын 06-ны өдрийн ............................... дугаар шийтгэлийн хуудсыг хүчингүй болгуулах тухай” 2018 оны 9 дүгээр сарын 26-ны өдрийн 13/10 тоот дүгнэлтээр захиргааны хэрэг үүсгэн

 

ТОДОРХОЙЛОХ нь:

 

О- тус шүүхэд ирүүлсэн дүгнэлтдээ: “...Тус аймгийн Т- нь “2018 оны 02 дугаар сарын 22-ны өдөр “Хэнтий аймгийн Жаргалтхаан сумын нутгаас иргэн Э- нь зөвшөөрөлгүйгээр ойгоос 46 ширхэг 1.5 м³ мод бэлтгэсэн” гэх үндэслэлээр Зөрчлийн тухай хуулийн 7.9 дүгээр зүйлийн 5 дахь хэсэгт зааснаар 300.000 төгрөгөөр торгох шийтгэл оногдуулсан зөрчлийн 01 дугаартай материалтай танилцаад ОЛСОН нь:

“Иргэн Э- нь Хэнтий аймгийн Жаргалтхаан сумын нутгаас зөвшөөрөлгүйгээр ойгоос 46 ширхэг 1.5 м³ мод бэлтгэсэн болох нь холбогдогчийн өгсөн мэдүүлэг, зөрчлийг хялбаршуулсан журмаар хянан шийдвэрлэх ажиллагаагаар эд зүйл, хууль бус орлогыг хураах тухай акт, хялбаршуулсан журмаар шийдвэрлэх зөрчилд шийтгэл оногдуулах тухай шийтгэлийн хуудас зэрэг нотлох баримтуудаар тогтоогдож байна.

Дээрх үйлдэл нь Эрүүгийн хуулийн тусгай ангид заасан “Хууль бусаар мод бэлтгэх” гэмт хэргийн шинжтэй байхад зөрчлийн тухай хуулийн 7.9 дүгээр зүйлийн 5 дахь хэсэгт зааснаар торгууль оногдуулж шийдвэрлэсэн нь үндэслэлгүй байх тул Монгол Улсын Зөрчил шалган шийдвэрлэх тухай хуулийн 7.2 дугаар зүйлийн 8 дахь хэсгийг удирдлага болгон 2018 оны 3 дугаар сарын 06-ны өдрийн шийтгэл оногдуулсан шийтгэлийн хуудсыг хүчингүй болгуулахаар прокурорын дүгнэлт бичив” гэжээ.

 

ҮНДЭСЛЭХ нь:

 

Хэнтий аймгийн Т- нь Хэнтий аймгийн Цэнхэрмандал сумын иргэн Э-ыг “зохих зөвшөөрөлгүйгээр хууль бусаар ойгоос 1.5-2 метрийн урттай, 46 ширхэг, 1.5 м³ мод бэлтгэсэн” гэх үндэслэлээр Зөрчлийн тухай хуулийн 7.9 дүгээр зүйлийн 5 дахь хэсэгт зааснаар 2018 оны 3 дугаар сарын 06-ны өдөр ............................... тоот шийтгэлийн хуудсаар гурван зуун нэгжтэй тэнцэх хэмжээний төгрөг буюу 300.000 төгрөгөөр торгож, нөхөн төлбөрийн 306.000 төгрөг, нийт 606.000 /зургаан зуун зургаан мянга/ төгрөг гаргуулахаар шийдвэрлэжээ.

О- нь улсын байцаагчийн дээрх шийдвэрийг хянаад, иргэн Э-ын ойгоос мод бэлтгэсэн үйлдэл нь Эрүүгийн хуулийн тусгай ангид заасан гэмт хэргийн шинжтэй гэх үндэслэл дурдаж, Зөрчил шалган шийдвэрлэх тухай хуулийн 7.2 дугаар зүйлийн 8-д заасны дагуу, шийтгэлийн хуудсыг хүчингүй болгуулахаар дүгнэлт бичиж, тус шүүхэд ирүүлсэн болно.

Прокурорын уг дүгнэлтийг Хэнтий аймгийн Т- хүлээн авч, шүүхэд хариу тайлбар ирүүлэхдээ “Прокурорын дүгнэлтийг хүлээн зөвшөөрч байна” гэжээ.

Иймд шүүх Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д заасны дагуу хариуцагчийн зөвшөөрлийг баталж, хэргийг хэрэгсэхгүй болгох үндэслэлтэй байна.

Захиргааны хэрэг шүүхэд хянан шийдвэрлэх тухай хуульд 2017 оны 5 дугаар сарын 18-ны өдрийн хуулиар оруулсан нэмэлт, өөрчлөлтөөр “гомдол” гэж ...Зөрчил шалган шийдвэрлэх тухай хуульд заасны дагуу гаргасан прокурорын дүгнэлтийг ойлгохоор заасан. Мөн, Захиргааны хэрэг шүүхэд хянан шийдвэрлэх тухай хуулийн 7 дугаар зүйлд нэмэлтээр оруулсан 7.3 дахь заалтад, гомдол хянан шийдвэрлэх ажиллагаанд Захиргааны хэрэг шүүхэд хянан шийдвэрлэх тухай хуулийн 7 дугаар зүйлийн 7.1, 7.2 дахь хэсэгт заасан зарчим /шүүх нотлох зарчим/ хамаарахгүй гэж зохицуулсныг дурдах нь зүйтэй байна.

 

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1, 111.2 дахь хэсэгт заасныг удирдлага болгон ЗАХИРАМЖЛАХ нь:

 

1. Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1 дэх хэсэгт заасныг баримтлан, О-гийн 2018 оны 9 дүгээр сарын 26-ны өдрийн 13/10 тоот дүгнэлтийг хариуцагч Хэнтий аймгийн Т- хүлээн зөвшөөрснийг баталж, хариуцагч Г.Түмэнжаргалд холбогдох захиргааны хэргийг хэрэгсэхгүй болгосугай.

2. Прокурорын дүгнэлт нь Улсын тэмдэгтийн хураамжийн тухай хуулийн 41 дүгээр зүйлийн 41.1.3-д заасны дагуу улсын тэмдэгтийн хураамжаас чөлөөлөгдөх ба Хэнтий аймгийн Прокурорын газар нь улсын тэмдэгтийн хураамж төлөөгүй болохыг дурдсугай.

3. Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2 дахь хэсэгт зааснаар шүүгчийн энэхүү захирамжид хэргийн оролцогч гомдол гаргах эрхгүй бөгөөд шүүгчийн захирамжийг шүүхийн шийдвэрийн нэгэн адил биелүүлэхийг мэдэгдсүгэй.

 

 

 

ШҮҮГЧ                               Г.БАЯСГАЛАН