МОНГОЛ УЛСЫН НЭРИЙН ӨМНӨӨС

 

 

Баянзүрх дүүргийн иргэний хэргийн анхан шатны шүүхийн шүүгч Б.Ундраа даргалж тус шүүхийн танхимд хийсэн шүүх хуралдаанаар,

 

Нэхэмжлэгч: Баянзүрх дүүргийн 26 дугаар хороо, Баянмонгол хороолол, 1 тоотод оршин суух Боржигин овогт Я.Б /регистрийн дугаар: /-ын нэхэмжлэлтэй,

 

Хариуцагч: Сүхбаатар дүүргийн 111 дугаар хороо Үндсэн хуулийн гудамж, өөрийн байранд оршин байх Нийслэлийн шийдвэр гүйцэтгэх газарт холбогдох,

 

Үнэлгээ хүчингүй болгуулах тухай иргэний хэргийг хянан хэлэлцэв.

 

Шүүх хуралдаанд: шүүх хуралдааны нарийн бичгийн дарга О.Дэжидмаа оролцов.

 

ТОДОРХОЙЛОХ нь:

 

Нэхэмжлэгч Я.Б шүүхэд гаргасан нэхэмжлэлдээ: Нийслэлийн шийдвэр гүйцэтгэх газар Сонгинохайрхан дүүргийн 9 дүгээр хороо, Баруун баян уул 45 дугаар гудамж, 25 тоот 800 м.кв өмчийн газар 48 м.кв талбайтай өвлийн сууцыг 17,691,800 төгрөгөөр үнэлсэн байна.

Уг өмчийг Зээлийн барьцаагаар барьцаалах үед талууд 48,000,000 төгрөгөөр үнэлж байсан. Гэтэл Нийслэлийн шийдвэр гүйцэтгэх газар 17,691,800 төгрөгөөр үнэлснийг зөвшөөрөхгүй.

Нийслэлийн шийдвэр гүйцэтгэх газар төлбөр төлөгч болон өмчийн эзнээс үнийн санал авч төлбөр авагч, төлбөр төлөгчийн үнийн санал зөрүүтэй байх тохиолдолд шинжээч томилох байтал үнийн санал аваагүй, шинжээчээр үнэлгээ тогтоолгосон нь хууль бус байна.

Иймд Сонгинохайрхан дүүргийн 9 дүгээр хороо, Баруун баян уул 45 дугаар гудамж, 25 тоот 800 м.кв өмчийн газар 48 м.кв талбайтай өвлийн сууцыг 17,691,800 төгрөгөөр үнэлсэн үнэлгээг хүчингүй болгож өгнө үү гэжээ.

 

Хариуцагч Нийслэлийн шийдвэр гүйцэтгэх газар шүүхэд гаргасан тайлбартаа: Баянзүрх дүүргийн Иргэний хэргийн анхан шатны шүүхийн шүүгчийн 2017 оны 01 дүгээр сарын 31-ний өдрийн 12345 дугаар захирмжаар Я.Б аас 17,908,450 төгрөгийг гаргуулж С.Э т олгохоор, төлбөр төлөгч шүүгчийн захирамжийг биелүүлээгүй тохиолдолд үүргийн гүйцэтгэлд барьцаалсан үл хөдлөх хөрөнгийг албадан дуудлага худалдаагаар худалдан борлуулж үүргийн гүйцэтгэлийг хангуулахыг Нийслэлийн шийдвэр гүйцэтгэх газарт даалгаж шийдвэрлэсэн.

Шийдвэр гүйцэтгэх ажиллагаагаар Я.Б ын үүргийн гүйцэтгэлд барьцаалсан Сонгинохайрхан дүүргийн 9 дүгээр хороо, Баруун баян уул 45 дугаар гудамж, 37 тоотод байрлах, 48 м.кв талбайтай 1 давхар байшин, 600 м.кв талбайтай гэр бүлийн хэрэгцээний газрыг битүүмжилж, хураан авч Иргэний хуулийн 177 дугаар зүйлийн 177.1-д зааснаар талуудаас үнийн санал авахад үүрэг гүйцэгэгч 80,000,000 төгрөгөөр, үүрэг гүйцэтгүүлэгч С.Э уг үнийн саналыг хүлээн зөвшөөрөөгүй ба хөндлөнгийн шинжээчээр зах зээлийн үнэлгээг тогтоолгох тухай хүсэлт гаргасан.

Талууд Иргэний хуулийн 177 дугаар зүйлийн 177.1-д зааснаар үл хөдлөх хөрөнгийн үнэлгээг харилцан тохиролцож тогтоогоогоогүй тул Шүүхийн шийдвэр гүйцэтгэх тухай хуулийн 55 дугаар зүйлийн 55.2.2-т зааснаар үл хөдлөххөрөнгийн зах зээлийн бодит үнэлгээг тогтоолгохоор хөрөнгийн үнэлгээний Хөрөнгө эстимэйт ХХК-ийг томилон үнэлгээ тогтоолгосон.

Шүүхийн шийдвэр гүйцэтгэх тухай хуулийн 42 дугаар зүйлийн 42.2-т Шинжээч шинжилгээ хийж дүгнэлт гаргахдаа Шүүхийн шинжилгээний тухай хуульд заасан журмыг баримтлах-аар заасан бөгөөд Шүүхийн шинжилгээний тухай хуулийн 17 дугаар зүйлийн 17.4-т шинжээч өөрийн гаргасан дүгнэлтийн үнэн зөвийг хариуцахаар заасан.

Иймд Нийслэлийн шийдвэр гүйцэтгэх газар үнэлгээтэй холбоотой асуудлыг хариуцахгүй бөгөөд шийдвэр гүйцэтгэх ажиллагаа хуулийн дагуу явагдсан тул нэхэмжлэлийн шаардлагыг бүхэлд нь хэрэгсэхгүй болгож өгнө үү гэжээ.

 

ҮНДЭСЛЭХ нь:

 

Нэхэмжлэгч Я.Б нь хариуцагч Нийслэлийн шийдвэр гүйцэтгэх газарт холбогдуулан Сонгинохайрхан дүүргийн 9 дүгээр хороо, Баруун баян уул 45 дугаар гудамж, 25 тоот 800 м.кв өмчийн газар 48 м.кв талбайтай өвлийн сууцыг 17,691,800 төгрөгөөр үнэлсэн үнэлгээг хүчингүй болгуулах тухай нэхэмжлэл гаргажээ.

Хариуцагч нь шийдвэр гүйцэтгэх ажиллагааг хуулийн дагуу явагдсан гэж нэхэмжлэлийг эс зөвшөөрч маргаж байна.

Нэхэмжлэлийг бүхэлд нь хэрэгсэхгүй болгож шийдвэрлэв.

Баянзүрх дүүргийн Иргэний хэргийн анхан шатны шүүхийн шүүгчийн 2017 оны 01 дүгээр сарын 31-ний өдрийн 12345 дугаар захирамжаар Я.Б аас 17,908,450 төгрөгийг гаргуулж С.Э т олгохоор, төлбөр төлөгч шүүгчийн захирамжийг биелүүлээгүй тохиолдолд үүргийн гүйцэтгэлд барьцаалсан үл хөдлөх хөрөнгийг албадан дуудлага худалдаагаар худалдан борлуулж үүргийн гүйцэтгэлийг хангуулахыг Нийслэлийн шийдвэр гүйцтгэх газарт даалгаж шийдвэрлэжээ.

Тус шийдвэрийн дагуу шийдвэр гүйцэтгэх ажиллагаа явагдаж, Нийслэлийн шийдвэр гүйцэтгэх газрын 2018 оны 01 дүгээр сарын 29-ний өдрийн Шинжээч томилох тухай 34 тоот тогтоолоор шүүхийн шийдвэрт дурдагдсан барьцаа хөрөнгө болох Сонгинохайрхан дүүргийн 9 дүгээр хороо, Баруун баян уул 45 дугаар гудамж, 37 тоотод байрлах, 48 м.кв талбайтай 1 давхар байшин, 600 м.кв талбайтай гэр бүлийн хэрэгцээний газрын үнэлгээний талаар төлбөр авагч, төлөгч нар тохиоролцоогүй үндэслэлээр орон сууцны зах зээлийн үнэлгээг тогтоолгохоор хөндлөнгийн шинжээч томилжээ.

Нэхэмжлэгч Я.Б нь барьцаа хөрөнгийг 80,000,000 төгрөгөөр үнэлж буйгаа 2017 оны 12 дугаар сарын 22-ны өдөр Нийслэлийн шийдвэр гүйцэтгэх газарт бичгээр гаргасан, төлбөр төлөгч барьцаа хөрөнгийг 80,000,0000 төгрөгөөр үнэлсэн болохыг Эд хөрөнгө хураах тухай 1234567897 дугаар тогтоолд тусгасан байх бөгөөд төлбөр авагч С.Э нь барьцаа хөрөнгийн зах зээлийн үнийг шинжээч томилуулан тогтоолгох хүсэлтийг 2018 оны 01 дүгээр сарын 11-ний өдөр Нийслэлийн шийдвэр гүйцэтгэх газарт гаргажээ.

Шинжээч Хөрөнгө эстимэйт ХХК нь барьцаа хөрөнгийг үнэлж 2018 оны 02 дугаар сарын 14-ны өдрийн байдлаар 17,691,800 төгрөгөөр үнэлсэн байна.

Нэхэмжлэгч нь дээрх шинжээчийн дүгнэлт эс зөвшөөрч буй үндэслэлээ нотлоогүй тул үнэлгээг эс зөвшөөрч гаргасан нэхэмжлэлийн шаардлагыг хангах үндэслэлгүй гэж үзлээ.

Хуулийн хүчин төгөлдөр шийдвэрийг биелүүлэх ажиллагааны хүрээнд шийдвэр гүйцэтгэгч нь Шүүхийн шийдвэр гүйцэтгэх тухай хуулийн 44 дүгээр зүйлийн 44.2.9-т заасан ажиллагааг явуулах бүрэн эрхтэй бөгөөд төлбөр төлөгч, төлбөр авагч нар үл хөдлөх эд хөрөнгийн үнэлгээний талаар тохиролцоогүй байх тул мөн хуулийн 55 дугаар зүйлийн 55.1, 55.2.2-т зааснаар шийдвэр гүйцэтгэх тодорхой ажиллагаа явуулж хөрөнгийн үнэлгээг тогтоолгосон ажиллагаа нь хууль зөрчөөгүй, нэхэмжлэгчийн хөрөнгийг үнэгүйдүүлсэн гэж үзэх хэрэгт цугларсан нотлох баримтаар тогтоогдохгүй байна.

 

Иргэний хэрэг шүүхэд хянан шийдвэрлэх тухай хуулийн 145 дугаар зүйлийн 115.1, 115.2.3, 116, 118 дугаар зүйлд заасныг удирдлага болгон

ТОГТООХ нь:

 

1. Иргэний хуулийн 177 дугаар зүйлийн 177.1, Шүүхийн шийдвэр гүйцэтгэх тухай хуулийн 55 дугаар зүйлийн 55.1, 55.2.2-т зааснаар хариуцагч Нийслэлийн шийдвэр гүйцэтгэх албанд холбогдох Сонгинохайрхан дүүргийн 9 дүгээр хороо, Баруун баян уул 45 дугаар гудамж, 25 тоот 800 м.кв өмчийн газар 48 м.кв талбайтай өвлийн сууцыг 17,691,800 төгрөгөөр үнэлсэн үнэлгээг хүчингүй болгуулах тухай нэхэмжлэгч Я.Б ын нэхэмжлэлийг бүхэлд нь хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1-д зааснаар нэхэмжлэгч улсын тэмдэгтийн хураамжид төлсөн 70,200 төгрөгийг улсын орлогод хэвээр үлдээсүгэй.

3. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, тэдгээрийн төлөөлөгч, өмгөөлөгч шийдвэрийг эс зөвшөөрвөл гардан авснаас хойш 14 хоногийн дотор Нийслэлийн иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

ДАРГАЛАГЧ, ШҮҮГЧ Б.УНДРАА