МОНГОЛ УЛСЫН НЭРИЙН ӨМНӨӨС

 

 

Дундговь аймаг дахь сум дундын иргэний хэргийн анхан шатны шүүхийн шүүгч З.Ганчимэг даргалж, тус шүүхийн Б танхимд хийсэн шүүх хуралдаанаар;

Нэхэмжлэгч: Улаанбаатар хот, Баянгол дүүрэг, 2 дугаар хороо, Энхтайваны өргөн чөлөө, 56-15 тоотод байрлах Монобилка ХХК /РД: 5708699/

Хариуцагч: Дундговь аймгийн Засаг даргын тамгын газар

Нэхэмжлэлийн шаардлага: Барилгын материалын чанарт хяналт тавих лабораторийн тоног төхөөрөмж нийлүүлэх гэрээний үүрэгт 27.000.000 төгрөг гаргуулах тухай иргэний хэргийг хянан хэлэлцэв.

Шүүх хуралдааны оролцогчид:

Нэхэмжлэгчийн итгэмжлэгдсэн төлөөлөгч Т.Маргад-Эрдэнэ,

Хариуцагчийн итгэмжлэгдсэн төлөөлөгч Б.Энхмандал, О.Мөнхзул, Э.Энхмэнд,

Шүүх хуралдааны нарийн бичгийн дарга Ж.Батдэлэг нар оролцов.

 

ТОДОРХОЙЛОХ нь:

 

Нэхэмжлэгч Монобилка ХХК нь Дундговь аймгийн Засаг даргын тамгын газарт холбогдуулан барилгын материалын чанарт хяналт тавих лабораторийн тоног төхөөрөмж нийлүүлэх гэрээний үүрэгт 27.000.000 төгрөг гаргуулахаар нэхэмжлэл гаргасан. Нэхэмжлэгч нэхэмжлэлийн шаардлагын үндэслэлээ дараах байдлаар тодорхойлж байна. Үүнд: 2018.05.25-ны өдөр Дундговь аймгийн Засаг даргын тамгын газартай №ДУГАОНӨГ/201812009 Барилгын материал чанарт хяналт тавих лабораторийн тоног төхөөрөмж нийлүүлэх гэрээг байгуулж, нийт 46 тоо бүхий тоног төхөөрөмж, багаж хэрэгслүүдийг 54 сая төгрөгөөр нийлүүлэхээр тохиролцсон болно. Манай компани нь дээрх гэрээний дагуу нийт 44 тоо бүхий тоног төхөөрөмж, багаж хэрэгслүүдийг 2018 оны 7 дугаар сард захиалагч Дундговь аймгийн Засаг даргын тамгын газрын дэргэдэх Газрын харилцаа барилга хот байгуулалтын газарт нийлүүлсэн. Үлдэх хоёр төхөөрөмж буюу шмитийн алх, дулааны алдагдал тогтоогч багажуудыг хүндэтгэн үзэх шалтгааны улмаас гэрээнд заасан хугацаанд хүлээлгэн өгөх боломжгүй нөхцөл байдал үүссэн юм. Өөрөөр хэлбэл тухайн хоёр тоног төхөөрөмжийг БНХАУ-аас импортоор оруулж ирэхээр захиалсан боловч хугацаандаа ирээгүй болно. Манай компанийн зүгээс үлдэгдэл хоёр төхөөрөмжийг нийлүүлэх хугацааг сунгах тухай албан бичгийг удаа дараа хүргүүлж байсан. Үүний дагуу хамгийн сүүлд 2018.11.30-ны өдөр хүлээлгэн өгөхөөр харилцан тохиролцож мөн хугацаандаа нийлүүлээгүй байсан шмитийн алх, дулааны алдагдал тогтоогч багажуудыг хүлээлгэж өгсөн. Захиалагч нь гэрээгээр тохиролцсон ажлын хөлсний 50 хувь буюу 27000000 төгрөгийг 2018.10.05-ны өдөр манай компанийн данс руу шилжүүлсэн. Түүнээс хойш үлдэгдэл төлбөр болох 27.000.000 төгрөгийг өнөөдрийг хүртэл хугацаанд өгөөгүй байгаа болно. Иймд дээрх гэрээний дагуу бид нийлүүлэх ёстой 46 тоо бүхий тоног төхөөрөмж, багаж хэрэгслүүдийг зохих ёсоор нийлүүлж, хүлээлгэн өгсөн учраас үлдэгдэл 27.000.000 төгрөгийг захиалагч Дундговь аймгийн Засаг даргын тамгын газраас нэхэмжилж байгаа тул нэхэмжлэлийн шаардлагыг бүхэлд нь хангаж өгнө үү гэжээ.

Нэхэмжлэгчийн итгэмжлэгдсэн төлөөлөгч Б.Маргад-Эрдэнэ шүүх хуралдаанд гаргасан тайлбартаа: Нэхэмжлэгч Монобилка ХХК нь Дундговь аймаг дахь сум дундын иргэний хэргийн анхан шатны шүүхэд 2021 оны 11 дүгээр сарын 14-ний өдөр нэхэмжлэл гаргасан. Тухайн нэхэмжлэлийг тус шүүхээс компанийн улсын бүртгэлийн гэрчилгээ нь Баян-Эрдэнэ гэдэг гүйцэтгэх захирал байж байгаад Батчимэг болсон учир Батчимэг нь нэхэмжлэл гаргах эрхтэй байна гэсэн агуулгаар нэхэмжлэлийг буцаасан. 2021 оны 12 дугаар сарын 07-ны өдөр нэхэмжлэлийг хүлээн авахаас татгалзсан үндэслэлийг нь зөвтгөж нэхэмжлэл гаргасан. Нэхэмжлэгч Монобилка ХХК 2018 оны 5 дугаар сарын 25-ны өдөр хариуцагч Дундговь аймгийн Засаг даргын тамгын газартай барилгын материал чанарт хяналт тавих лабораторийн тоног төхөөрөмж нийлүүлэх гэрээг байгуулж нийт 46 тооны тоног төхөөрөмж, багаж хэрэгслүүдийг 54.000.000 төгрөгөөр нийлүүлэхээр харилцан тохиролцсон. Ямар нэр бүхий тоног төхөөрөмжүүд вэ гэдэг талаар шүүхэд нотлох баримтаар өгсөн учир нэг бүрчлэн дурдах шаардлагагүй гэж үзэж байна. Манай компани дээрх гэрээний дагуу 44 ширхэг тоног төхөөрөмж багаж хэрэгслүүдийг 2018 оны 7 дугаар сард захиалагч Дундговь аймгийн Засаг даргын тамгын газрын дэргэдэх Газрын харилцаа барилга хот байгуулалтын газарт нийлүүлсэн. Үлдсэн 2 тоног төхөөрөмж буюу шмитийн алх, дулааны алдагдал тогтоогч багажуудыг гэрээнд заасан хугацаанд хүлээлгэн өгөх боломжгүй нөхцөл байдал үүссэн. Тус 2 тоног төхөөрөмжийг Бүгд Найрамдах Хятад ард улсаас импортоор оруулж ирэхээр захиалсан боловч хугацаандаа ирээгүйгээс болж захиалагчид хүлээлгэн өгөх боломжгүй болсон. Энэ талаар захиалагч талд албан бичгийг удаа дараа хүргүүлж байсан. Манай компанийн зүгээс үндсэн гэрээтэй холбоотой асуудлаар албан бичгээр болон утсан холбоогоор харилцана гэж заасны дагуу Дундговь аймгийн Засаг даргын тамгын газарт үлдэгдэл 2 тоног төхөөрөмжийг нийлүүлэх хугацааг сунгах тухай албан бичгийг тухай бүрд нь хүргүүлж байсан. Үүний дагуу хамгийн сүүлд 2018 оны 12 дугаар сард 2 тоног төхөөрөмж буюу шмитийн алх, дулааны алдагдал тогтоогч багажуудыг хүлээлгэж өгөхөөр гэрээний хугацааг сунгах хүсэлтийг хүргүүлж уг хугацаандаа захиалагчид хүлээлгэж өгсөн болно. Захиалагч нь гэрээгээр тохиролцсон ажлын хөлсний 50 хувь буюу 27.000.000 төгрөгийг 2018 оны 10 дугаар сарын 5-ны өдөр манай компанийн данс руу шилжүүлсэн. Түүнээс хойш үлдэгдэл төлбөр болох 27.000.000 төгрөгийг өнөөдрийг хүртэл хугацаанд төлөөгүй. Төлөөгүй шалтгаанаа санхүүжилт орж ирсний дараа төлнө гэж мэдэгдэж байсан. Бид 46 тооны багаж тоног төхөөрөмжийг зохих ёсоор нийлүүлсэн учир үлдэгдэл 27.000.000 төгрөгийг захиалагч Дундговь аймгийн Засаг даргын тамгын газраас гаргуулж бидний хохирлыг гаргуулж өгнө үү гэв.

Хариуцагчийн итгэмжлэгдсэн төлөөлөгч Б.Энхмандал шүүх хуралдаанд гаргасан тайлбартаа: Дундговь аймгийн иргэдийн төлөөлөгчдийн хурлын тогтоолоор орон нутгийн хөгжлийн сангийн хөрөнгөөр барилгын материалын чанарт хяналт тавих лабораторийн тоног төхөөрөмж худалдан авах төсөв батлагдаж тендер зарлан Монобилка ХХК шалгарсан. 2018 оны 5 дугаар сарын 25-ны өдөр талууд гэрээнд гарын үсэг зурж баталгаажуулсан. Тус гэрээний 5.3 болон 5.4-т заасны дагуу 2018 оны 7 дугаар сарын 09-ний дотор нийлүүлэхээр тусгагдсан боловч 7 дугаар сарын 08-ны өдөр албан бичгээр гэрээ сунгах хүсэлт ирүүлснийг харгалзан үзэж харилцан тохиролцож 2018 оны 8 дугаар сарын 14-ний өдрийг хүртэл нийлүүлэх гэрээ байгуулж нэмэлт хугацааг сунгасан. Гүйцэтгэгчээс 2018 оны 8 дугаар сарын 10-ны өдрийн тоног төхөөрөмж нийлүүлэх хүсэлт ирүүлсний дагуу 8 дугаар сарын 15-ны өдөр А/355 дугаартай захирамжаар тухайн тоног төхөөрөмж хүлээн авах ажлын хэсэг томилж ажиллуулсан. Нийт 46 тоног төхөөрөмж нийлүүлэхээс 26 нэр төрлийн тоног төхөөрөмж нь техникийн үзүүлэлтийн дагуу, 2 тоног төхөөрөмж ирээгүй, 1 тоног төхөөрөмж ажиллахгүй, 17 тоног төхөөрөмж нь техникийн үзүүлэлтийн шаардлага хангахгүй байсан. Тухайн тоног төхөөрөмжийг хүлээн авах комиссоос ирээгүй 2 тоног төхөөрөмж, 1 ажиллахгүй тоног төхөөрөмж, техникийн үзүүлэлтийн шаардлага хангаагүй 17 тоног төхөөрөмжийг 14 хоногийн дотор дахин нийлүүлэх тухай хугацаатай үүрэг даалгавар өгсөн. Тухайн үүрэг даалгаврыг биелүүлээгүйгээс гэрээний 13-т заасны дагуу 4.536.000 төгрөгийн алданги тооцсон тухай Монобилка ХХК-д албан бичиг хүргүүлсэн. Тухайн компани 2018 оны 9 дүгээр сарын 10-ны өдөр гэрээгээ сунгуулах хүсэлтийг дахин ирүүлсэн. Үүний дагуу 2018 оны 10 дугаар сарын 15-ны өдрийг хүртэл гэрээгээ сунгасан. Тухайн компаниас тавьсан хүсэлтийн дагуу тоног төхөөрөмжийн үнийн 50 хувь болох 27.000.000 төгрөгийг шилжүүлсэн. Тус компанийг техникийн үзүүлэлт хангаагүй тоног төхөөрөмж мөн дутуу тоног төхөөрөмжөө нийлүүлсний үндсэн дээр үлдэгдэл мөнгөө шилжүүлэхээр ярилцсан боловч гэрээгээр хүлээсэн үүргээ биелүүлээгүй. Газрын харилцаа барилга хот байгуулалтын газрын барилгын материалын чанарт хяналт тавих үйл ажиллагааг одоог болтол саатуулж хохироосон үйл ажиллагаа байгаа тул нэхэмжлэлийн шаардлагыг хэрэгсэхгүй болгож өгнө үү гэв.

Хариуцагчийн итгэмжлэгдсэн төлөөлөгч О.Мөнхзул шүүх хуралдаанд гаргасан тайлбартаа: Хүлээж авах комисс Засгийн газрын 221 дүгээр тогтоолын дагуу тоног төхөөрөмж хүлээн авах актыг албан ёсоор баталгаажуулаагүй учир энэ ажлыг хүлээж аваагүй. Гүйцэтгэгч компаниас 2 тоног төхөөрөмж хил хаагдсаны улмаас гэж ярилаа. Хил хаагдсан гэдэг талаар баримт байхгүй. Тухайн 2 тоног төхөөрөмжийн мөнгөн дүн нь техникийн тодорхойлолт дээр 15.400.000 төгрөгийн үнэтэй тоног төхөөрөмж байгаа. Үүний санхүүжилтийг манайхаас өгөх боломжгүй. Шаардлага хангахгүй байгаа 17 тоног төхөөрөмж болон 1 тоног төхөөрөмжийг шалгахад ажиллаагүй. Эдгээр 18 тоног төхөөрөмж шаардлага хангаагүй гэдгээр санхүүжилт олгоогүй. Шаардлага хангасан 26 тоног төхөөрөмжийн санхүүжилтийг олгосон гэв.

Хариуцагчийн итгэмжлэгдсэн төлөөлөгч Э.Энхмэнд шүүх хуралдаанд гаргасан тайлбартаа: Тодорхой хэлэх тайлбаргүй гэв.

Хавтаст хэрэгт авагдсан баримтын тухайд: Нэхэмжлэгч талаас барилгын материалын чанарт хяналт тавих лабораторийн тоног төхөөрөмж нийлүүлэх гэрээ, 2018.07.09-ний өдрийн тоног төхөөрөмж нийлүүлэх ажлын нэмэлт гэрээ+1, 2018.09.12-ны өдрийн тоног төхөөрөмж нийлүүлэх ажлын нэмэлт гэрээ+2, Монобилка ХХК-ийн 2018.08.13-ны өдрийн 1/655 тоот комисс ажиллуулах албан бичиг, Монобилка ХХК-ийн 2018.09.10-ны өдрийн 1/700, 2018.10.15-ны өдрийн 1/789 тоот, 2018.10.31-ний өдрийн 1/487 тоот гэрээ сунгах албан бичгүүд, Монобилка ХХК-ийн Хаан банкны 5315629719 тоот дансны хуулга, Монгол Улсын хилийн гадна үйлдвэрлэгдсэн бөгөөд импортоор оруулж ирсэн барааны үнийн хуваарь зэрэг баримтыг ирүүлсэн ба нэхэмжлэгчийн хүсэлтээр шүүх 2018.05.25-ны өдрийн барилгын материалын чанарт хяналт тавих лабораторийн тоног төхөөрөмж нийлүүлэх гэрээ, 2018.09.12-ны өдрийн №ДУГАОНӨГ/201812009+2 барилгын материалын чанарт хяналт тавих лабораторийн тоног төхөөрөмж нийлүүлэх ажлын нэмэлт гэрээг бүрдүүлсэн байна.

Хариуцагчаас: Дундговь аймгийн Засаг даргын 2018.08.15-ны өдрийн А/355 дугаар комисс томилох тухай захирамж, Дундговь аймгийн барилгын материал лабораторийн тоног төхөөрөмж, бараа материал хүлээн авах ажлын хэсгийн 2018.08.15-ны өдрийн хурлын тэмдэглэл, Монобилка ХХК-ийн 2018.08.14-ний өдрийн 1/664 тоот санхүүжилт олгохыг хүссэн албан бичиг, Монобилка ХХК-ийн 2018.03.25-ны өдрийн 1/19, 1/20, 1/21 тоот мэдэгдэл, барааны жагсаалт, бараа нийлүүлэлтийн хуваарь, Монгол Улсын хилийн гадна үйлдвэрлэгдсэн бөгөөд импортоор оруулж ирсэн барааны үнийн хуваарь, техникийн тодорхойлолт, Монобилка ХХК-ийн 2018.10.05-ны өдрийн 1/317, 2018.10.15-ны өдрийн 1/486 тоот, 2018.10.31-ний өдрийн 1/487, 2018.12.01-ний өдрийн 1/477 тоот гэрээ сунгах албан бичгүүд зэрэг баримтыг шүүхэд гаргаж өгсөн байна.

 

ҮНДЭСЛЭХ нь:

 

Шүүх нэхэмжлэлийн шаардлагыг хангах үндэслэлтэй гэж үзэв.

Нэхэмжлэгч нэхэмжлэлийн шаардлагын үндэслэлээ 2018 оны 5 дугаар сарын 25-ны өдөр Монобилка ХХК, Дундговь аймгийн Засаг даргын тамгын газар нарын хооронд барилгын материалын чанарт хяналт тавих лабораторийн 46 ширхэг тоног төхөөрөмжийг нийт 54.000.000 төгрөгөөр нийлүүлэхээр гэрээ байгуулсан. Нэхэмжлэгч тал гэрээний дагуу 44 тоо ширхэг бүхий тоног төхөөрөмжийг 2018 оны 7 дугаар сард захиалагч талд нийлүүлсэн, үлдсэн хоёр төхөөрөмж болох шмитийн алх, дулааны алдагдал тогтоогч багажуудыг хүндэтгэн үзэх шалтгааны улмаас гэрээнд заасан хугацаанд нийлүүлэх боломжгүй болсон. Тус багажийг БНХАУ-аас импортоор оруулж ирэхээр захиалсан хэдий ч хугацаандаа ирээгүй учир захиалагч талд энэ талаар албан бичгээр мэдэгдэж хоёр тал гэрээг сунгаж үлдэгдэл тоног төхөөрөмжийг 2018.11.30-ны өдөр нийлүүлэхээр тохиролцож бид уг багажийг уг хугацаанд захиалагч талд хүлээлгэн өгсөн. Захиалагч нь гэрээний дагуу ажлын хөлсийн 50 хувь болох 27.000.000 төгрөгийг 2018 оны 10 дугаар сарын 05-ны өдөр манай талд шилжүүлсэн бөгөөд үлдэгдэл санхүүжилт 27.000.000 төгрөгийг төлөөгүй талаар тайлбарлаж, нэхэмжлэлийн шаардлагаа нотлох үүднээс барилгын материалын чанарт хяналт тавих лабораторийн тоног төхөөрөмж нийлүүлэх гэрээ, 2018.07.09-ний өдрийн тоног төхөөрөмж нийлүүлэх ажлын нэмэлт гэрээ+1, 2018.09.12-ны өдрийн тоног төхөөрөмж нийлүүлэх ажлын нэмэлт гэрээ+2, Монобилка ХХК-ийн 2018.08.13-ны өдрийн 1/655 тоот комисс ажиллуулах албан бичиг, Монобилка ХХК-ийн 2018.09.10-ны өдрийн 1/700, 2018.10.15-ны өдрийн 1/789 тоот, 2018.10.31-ний өдрийн 1/487 тоот гэрээ сунгах албан бичгүүд зэрэг баримтыг үндэслэн Дундговь аймгийн Засаг даргын тамгын газраас барилгын материалын чанарт хяналт тавих лабораторийн тоног төхөөрөмж нийлүүлэх гэрээний үүрэгт 27.000.000 төгрөгийг гаргуулах үндэслэлтэй гэж тодорхойлж байна.

Хариуцагч Дундговь аймгийн Засаг даргын тамгын газар ...2018.08.15-ны өдөр тоног төхөөрөмжийг хүлээн авах комисс томилж ажиллуулахад гүйцэтгэгч тал гэрээгээр нийт 46 ширхэг тоног төхөөрөмж нийлүүлэхээс 26 ширхэг тоног төхөөрөмж нь техникийн үзүүлэлтийн дагуу, 2 тоног төхөөрөмж ирээгүй, 1 тоног төхөөрөмж ажиллаагүй, 17 тоног төхөөрөмж техникийн үзүүлэлт хангаагүй нь тогтоогдсон. Ийнхүү бидний зүгээс нэмэлт 14 хоногийн дотор гэрээгээр хүлээсэн үүргээ биелүүлж дахин тоног төхөөрөмж нийлүүлэх үүрэг өгсөн ч одоог хүртэл биелүүлээгүй учир бид гэрээний 13-т заасны дагуу 4.536.000 төгрөгийн алданги тооцсон тухай албан бичгийг хавсралтын хамт хүргүүлсэн. Мөн гүйцэтгэгч тал захиалагч талд гэрээгээр нийлүүлэх тоног төхөөрөмжөө хүлээлгэн өгөөгүй. Ийнхүү гүйцэтгэгч тал гэрээгээр хүлээсэн үүргээ биелүүлээгүй бидний үйл ажиллагааг саатуулж, хохироож байгаа, бид уг тоног төхөөрөмжийг ашиглаагүй, гүйцэтгэгчээс нийлүүлсэн тоо ширхгээрээ байгаа гэж тайлбарлан нэхэмжлэлийн шаардлагыг үгүйсгэж байна.

Хэрэгт авагдсан баримтуудаас үзэхэд талуудын хооронд 2018.05.25-ны өдөр барилгын материалын чанарт хяналт тавих лабораторийн тоног төхөөрөмж нийлүүлэх гэрээ байгуулсан байх бөгөөд гэрээгээр тодорхойлолтод заагдсан тоног төхөөрөмжийг гүйцэтгэгч нь 2018.07.09-ний өдрийн дотор захиалагч талд нийлүүлэх, ажлын төсөвт өртөг нийтдээ 54.000.000 төгрөг байхаар талууд тохиролцсон, улмаар захиалагч санхүүжилтийг тоног төхөөрөмжийг комисст хүлээлгэн өгч ажил хүлээлцсэн акт гарснаас хойш ажлын 5 хоногийн дотор олгохоор гэрээний нөхцөлд заасан байна.

Дээрх гэрээг талуудын эрх бүхий этгээдүүд гарын үсэг зурж, тамга тэмдэг дарж баталгаажуулсан байх бөгөөд шүүх талуудын хооронд Иргэний хуулийн 243 дугаар зүйлийн 243.1-д зааснаар худалдах, худалдан авах гэрээ байгуулагдсан, хүчин төгөлдөр гэрээ байна гэж дүгнэв.

Худалдах, худалдан авах гэрээгээр худалдагч нь биет байдлын доголдолгүй, эрхийн зөрчилгүй барааг худалдан авагчийн өмчлөлд шилжүүлэх буюу бараа бэлтгэн нийлүүлэх, худалдан авагч нь худалдагчид гэрээгээр тохиролцсон үнийг төлж, худалдан авсан хөрөнгөө хүлээн авах үүргийг тус тус хүлээдэг.

Талууд гэрээнд, нийлүүлэх барааны тоо хэмжээ, шинж чанарын талаар заагаагүй байх хэдий ч зохигчдын тайлбараар 46 ширхэг тоног төхөөрөмж нийлүүлэхээр тохиролцсон, гэрээ хэрэгжих явцад гүйцэтгэгч тал нийлүүлэх тоног төхөөрөмжөөс 2 төрлийн багаж импортоор орж ирээгүй хүлээгдэж байгаа шалтгаанаар гэрээний хугацааг сунгах хүсэлтийг захиалагчид хүргүүлсний улмаас талуудын хооронд байгуулсан гэрээг 2018.10.15-ны өдрийг хүртэл сунгасан, 2018.10.04-ний өдөр захиалагч тал санхүүжилтийн 50 хувь болох 27.000.000 төгрөгийг гүйцэтгэгчид шилжүүлсэн үйл баримт хэрэгт авагдсан баримтаар тогтоогдож байх ба зохигчдын хэн алин нь энэ талаар маргахгүй байна.

Талуудын маргаантай зүйл нь хариуцагч нэхэмжлэгчийг биет байдлын доголдолтой барааг нийлүүлсэн, барааг акт үйлдэж албан ёсоор хүлээн аваагүй, гэрээгээр хүлээсэн үүргээ зохих ёсоор биелүүлээгүй талаар, харин нэхэмжлэгч хариуцагчийг барааны биет байдлын доголдлын талаар шаардлага гаргах хөөн хэлэлцэх хугацаа хэтрүүлсэн, бид тоног төхөөрөмжийг гэрээнд заасан ёсоор хүлээлгэн өгсөн учир үлдэгдэл ажлын хөлс 27.000.000 төгрөгийг гаргуулан авах үндэслэлтэй гэж тус тус маргаж байна.

Иргэний хуулийн 251 дүгээр зүйлийн 251.1 дэх хэсэгт Гэрээгээр тогтоосон тоо, хэмжээ, чанар бүхий эд хөрөнгийг биет байдлын хувьд доголдолгүй гэж үзнэ, мөн хуулийн 251.2 дахь хэсэгт Хэрэв гэрээнд эд хөрөнгийн чанарын талаар заагаагүй бол гэрээнд заасан зориулалтаар ашиглах боломжтой эд хөрөнгийг биет байдлын доголдолгүй гэж үзнэ гэж заасан бөгөөд талуудын хооронд байгуулсан гэрээнд гэрээний зүйл болох тоног төхөөрөмжийн чанар, техник үзүүлэлтийн талаар тухайлан тохиролцоогүй ч гэрээний 10-т гүйцэтгэгч нь техникийн нөхцөлийн дагуу шаардлага хангаагүй лабораторийн тоног төхөөрөмжийг нийлүүлсэн бол буцаах саналыг захиалагч тавихаар тохиролцсон байна.

Хариуцагчийн итгэмжлэгдсэн төлөөлөгч Б.Энхмандал шүүхийн хэлэлцүүлэгт ...гүйцэтгэгчээс нийлүүлсэн техникийн үзүүлэлт хангаагүй 17 ширхэг тоног төхөөрөмж, ажиллахгүй болсон 1 төхөөрөмж, хэвийн ажиллаж байгаа 26 тоног төхөөрөмжийг бид үйл ажиллагаанд огт ашиглаагүй, анх хүлээн авсан тоо ширхгээрээ хадгалагдаж байгаа гэж тайлбарлах боловч гэрээнд заасны дагуу шаардлага хангаагүй тоног төхөөрөмжийг буцаах талаар гүйцэтгэгчид санал тавьсан эсэх талаар тодорхойгүй, барааг доголдолтой гэж үзсэн бол Иргэний хуулийн 254 дүгээр зүйлийн 254.1 дэх хэсэгт заасны дагуу эд хөрөнгийн доголдлыг арилгуулахаар шаардлага гаргах эрхтэй, мөн хуулийн 254.6 дахь хэсэгт зааснаар тоног төхөөрөмжийг шилжүүлэн авснаас хойш 6 сарын дотор дээрх шаардлагыг гаргах эрхтэй байна. Гэвч хариуцагч тал энэхүү шаардлага гаргах хөөн хэлэлцэх хугацааг хэтрүүлсэн байх тул хариуцагчийн энэ үндэслэлээр маргааны үйл баримтыг татгалзаж буй тайлбар нь үндэслэл бүхий байж чадаагүй тул хариуцагчийн тайлбар, татгалзлыг шүүх хүлээн авах үндэслэлгүй гэж үзлээ.

Хариуцагчийн итгэмжлэгдсэн төлөөлөгч О.Мөнхзул шүүхийн хэлэлцүүлэгт ...Засгийн газрын 221 дүгээр тогтоолын дагуу тоног төхөөрөмж хүлээн авах маягт гэж байдаг. Тэр маягт албан ёсоор баталгаажаагүй учраас манай тал тоног төхөөрөмжийг хүлээж аваагүй гэж тайлбарлах бөгөөд гэрээнд тоног төхөөрөмжийг хэрхэн хүлээн авах талаар талууд тохиролцоогүй боловч Иргэний хуулийн 243 дугаар зүйлд барааг хүлээн авах нь худалдан авагчийн үүрэгт байхаар заасан байна. Мөн хариуцагчийн итгэмжлэгдсэн төлөөлөгчийн тайлбараар гүйцэтгэгчээс нийлүүлсэн нийт 46 ширхэг тоног төхөөрөмжийг захиалагчийн хадгалалтад байгаа талаар шүүхийн хэлэлцүүлэгт тайлбарласныг үндэслэн хариуцагчийн татгалзал үндэслэлгүй байна.

Мөн хариуцагч талаас гэрээний гэрээний 13-т заасны дагуу гүйцэтгэгч тал тоног төхөөрөмж нийлүүлэх ажлыг гэрээт хугацаандаа гүйцэтгээгүй бол хэтэрсэн хоног тутамд гүйцэтгээгүй үүргийн үнийн дүнгийн 0.3 хувиар алданги ногдуулахаар заасны дагуу гүйцэтгэгчээс 4.536.000 төгрөгийн алданги тооцсон боловч энэхүү алдангийг нэхэмжлэхгүй талаар хариуцагчийн итгэмжлэгдсэн төлөөлөгч Б.Энхмандал шүүхийн хэлэлцүүлэгт тайлбарласан болно.

Иймд нэхэмжлэгч гэрээний зүйлийг худалдан авагчид нийлүүлсэн, хариуцагч нь гэрээнд заасан төлбөр төлөх үүргээ гүйцэтгээгүй нь хэрэгт цугларсан бичгийн баримт, зохигчдын тайлбараар нотлогдсон тул барилгын материалын чанарт хяналт тавих лабораторийн тоног төхөөрөмж нийлүүлэх гэрээний үүрэгт 27.000.000 төгрөгийг хариуцагчаас гаргуулж нэхэмжлэгчид олгох нь зүйтэй гэж шүүх үзлээ.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118 дугаар зүйлд заасныг тус тус удирдлага болгон ТОГТООХ нь:

 

1. Иргэний хуулийн 243 дугаар зүйлийн 243.1 дэх хэсэгт зааснаар хариуцагч Дундговь аймгийн Засаг даргын тамгын газраас 27.000.000 /хорин долоон сая/ төгрөгийг гаргуулж нэхэмжлэгч Монобилка ХХК-д олгосугай.

2. Улсын тэмдэгтийн хураамжийн тухай хуулийн 7 дугаар зүйлийн 7.1.1, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 57 дугаар зүйлийн 57.1 дэх хэсэгт зааснаар нэхэмжлэгч Монобилка ХХК-аас улсын тэмдэгтийн хураамжид төлсөн 292.950 /хоёр зуун ерэн хоёр мянга есөн зуун тавин/ төгрөгийг улсын орлогод хэвээр үлдээж, хариуцагч Дундговь аймгийн Засаг даргын тамгын газраас 292.950 /хоёр зуун ерэн хоёр мянга есөн зуун тавин/ төгрөгийг гаргуулж нэхэмжлэгч Монобилка ХХК-д олгосугай.

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2 дахь хэсэгт зааснаар шийдвэр танилцуулан сонсгомогц хуулийн хүчинтэй болох ба зохигчид, тэдгээрийн төлөөлөгч нар нь анхан шатны шүүхийн шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор Дундговь аймгийн Эрүү, иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

 

ДАРГАЛАГЧ, ШҮҮГЧ З.ГАНЧИМЭГ