МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь сум дундын эрүүгийн хэргийн анхан шатны шүүхийн шүүх хуралдааныг шүүгч Н.Нямсүрэн даргалж,

Нарийн бичгийн дарга Х.Золжаргал,

Улсын яллагч Б.Амартүвшин,

Шүүгдэгч Б.Х нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Аймгийн Прокурорын газраас Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Б.Х-д холбогдох эрүүгийн 1738004040163 дугаар хэргийг 2017 оны 12 дугаар сарын 26-ны өдөр хүлээн авч хянан хэлэлцэв.

Шүүгдэгчийн биеийн байцаалт: Монгол улсын иргэн, Б.Х. 

Шүүгдэгч Б.Х нь 2017 оны 11 дүгээр сарын 22-ны өдөр 90-85 УНЭ улсын дугаартай портер маркийн автомашинаар зөвшөөрөлгүйгээр мод тээвэрлэсэн гэмт хэргийг үйлдсэнд холбогджээ.

Шүүхийн хэлэлцүүлгээр яллах, цагаатгах болон бусад нотлох баримтуудыг шинжлэн судлаад

ТОДОРХОЙЛОХ нь:

Шүүгдэгч Б.Х нь 2017 оны 11 дүгээр сарын 22-ны өдөр 90-85 УНЭ улсын дугаартай портер маркийн автомашинаар зөвшөөрөлгүйгээр мод тээвэрлэж явсан гэм буруутай болох нь хэрэгт авагдсан дараах нотлох баримтуудаар тогтоогдож байна. Үүнд:

Хохирогч Ч.Б-н мөрдөн шалгах ажиллагааны шатанд өгсөн: “..2017 оны 10 дугаар сард нэг удаа мод бэлтгэх эрхийн бичиг аваад тэр эрхийн бичгээрээ мод бэлтгээд авсан байсан. ...энэ газар нь улсын тусгай хамгаалалтанд байдаггүй. ...би шинжээчийн дүгнэлтэд заагдсан хэмжээгээр хохирлоо төлүүлж авна. Хохирлоо төлчихвөл өөр ямар нэгэн гомдол саналгүй” гэх мэдүүлэг /хх-ийн 16 дугаар хуудас/,

Гэрч Б.С-н мөрдөн шалгах ажиллагааны шатанд өгсөн: “...би нөхөр Б.Х-н хамт Мөрөнд ирсэн. Бид хоёр хөдөө гэрээсээ гарахдаа өөрсдийнхөө 90-85 УНЭ улсын дугаартай машин дээрээ гэрийнхээ гадаа буулгаад хураасан байсан модоо ачиж ирсэн” гэх мэдүүлэг /хх-ийн 20 дугаар хуудас/,

Мод бэлтгэх эрхийн бичиг, мод модон материалын гарал үүслийн гэрчилгээ /ххи-нй 27-28 дугаар хуудас/,

Хөвсгөл аймгийн “Дэлгэрмөрөн” сум дундын ойн ангийн инженер Ц.Э-н 18 дугаартай: “...2. Б.Хадбаатар нь мод бэлтгэж тээвэрлэхдээ Ойн тухай хуулийн 35 дугаар зүйлийн 35.4.3 дахь заалтыг зөрчсөн байна. 3. Б.Х нь мод тээвэрлэхдээ ашигласан 0104916 дугаартай мод бэлтгэх эрхийн бичиг, 1636985 дугаартай гарал үүслийн бичиг нь БОНХСайдын 2013 оны 5 дугаар сарын 15-ны өдрийн А/153 дугаар тушаалын 1 дүгээр хавсралтын 6.6 дахь хэсэгт /гарал үүслийн гэрчилгээгүй, гэрчилгээг баталгаажуулаагүй, дамжин өнгөрөх хяналтын цэгт бүртгүүлээгүй, хугацаа хэтэрсэн зэрэг зөрчилтэй мод, модон материалыг зөвшөөрөлгүй бэлтгэсэн, тээвэрлэсэн гэж үзнэ/ гэсэн заалтыг зөрчиж мод тээвэрлэсэн байна“ гэх дүгнэлт /хх-ийн 24-25 дугаар хуудас/,

Шүүгдэгч Б.Х-н мөрдөн шалгах ажиллагааны шатанд өгсөн: “...2017 оны 11 дүгээр сарын 21-ний өдөр би ... хөдөө гэрээсээ гарахдаа өөрийнхөө 90-85 УНЭ улсын дугаартай машин дээрээ гэрийнхээ гадаа буулгаад хураасан байсан модоо ачиж ирсэн. ...Цагдаа шалгаад миний авч явсан бичиг баримтыг засвартай байна гээд саатуулсан. Би өмнө нь буюу 2017 оны 10 дугаар сард авч байсан гоожингийнхоо хугацааг засчихсан юм” гэх мэдүүлэг /хх-ийн 39 дүгээр хуудас/ зэрэг дээрх нотлох баримтуудыг Эрүүгийн хэрэг хянан шийдвэрлэх тухай хуульд заасан үндэслэл журмын дагуу цуглуулж бэхжүүлсэн байх тул хэргийг шийдвэрлэхэд хамааралтай, ач холбогдолтой гэж үнэллээ.

Шүүгдэгч Б.Х нь хууль бусаар мод бэлтгэх гэмт хэрэг үйлдсэн нь нотлогдсон, гэм буруугаа сайн дураараа хүлээн зөвшөөрсөн, гэмт хэргийн улмаас учруулсан хохирлоо нөхөн төлсөн байх тул түүнд холбогдох хэргийг хялбаршуулсан журмаар шийдвэрлэж, шүүгдэгч Б.Х-г Эрүүгийн хуулийн тусгай ангийн 24.6 дугаар зүйлийн 1 дэх хэсэгт заасан зөвшөөрөлгүйгээр ойд мод бэлтгэсэн, гарал үүслийн гэрчилгээгүйгээр мод тээвэрлэсэн гэмт хэргийг үйлдсэнд гэм буруутайд тооцож, эрүүгийн хариуцлага хүлээлгэх үндэслэлтэй байна

Шүүгдэгч Б.Х нь урьд ял шийтгэл эдэлж байгаагүй болох нь ял шийтгэгдсэн эсэхийг шалгах хуудас /хх-ийн 52 дугаар хуудас/-аар тогтоогдож байна.

Шүүгдэгчид эрүүгийн хариуцлага хүлээлгэхдээ тохиолдлын шинжтэй нөхцөл байдлын улмаас анх удаа гэмт хэрэг үйлдсэн, гэмт хэрэг үйлдэж учруулсан хохирлыг нөхөн төлснийг эрүүгийн хариуцлагыг хөнгөрүүлэх нөхцөл байдалд тооцов.

Шүүгдэгч нь хохиролд 186.000 /нэг зуун наян зургаан мянга/ төгрөгийг төлж барагдуулсан тухай баримт /хх-ийн 48-49 дүгээр хуудас/ байх тул шүүгдэгч Б.Х-г бусдад төлөх төлбөргүй гэж үзлээ.

Шүүгдэгч  Б.Х-н гэм буруугаа хүлээн зөвшөөрсөн, гэмт хэрэг үйлдсэн нөхцөл байдал, учруулсан, хохирол, хор уршгийн шинж чанар, гэмт хэргийн улмаас учруулсан хохирлоо нөхөн төлсөн, хувийн байдал зэргийг харгалзан битүүмжлэгдсэн “НЭТКАПИТАЛ” банк бус санхүүгийн байгууллагын эзэмшлийн /тээврийн хэрэгслийн гэрчилгээний хуулбар хх-ийн 44 дүгээр хуудас/ 90-85 УНЭ улсын дугаартай портер маркийн ачааны автомашин, 3.1м3 хуурай шинэс модыг битүүмжилсэн 2017 оны 12 дугаар сарын 12-ны өдрийн 15 дугаартай прокурорын тогтоол /хх-ийн 6 дугаар хуудас/-ыг хүчингүй болгож, битүүмжлэгдсэн 186.000 /нэг зуун наян зургаан мянга/ төгрөгийн үнэ бүхий 3.1м3 хуурай шинэс модыг улсын орлогод оруулах нь зүйтэй байна.

Шүүгдэгч нь цагдан хоригдсон хоноггүй болохыг дурдах нь зүйтэй байна.

Эрүүгийн хэрэг хянан шийдвэрлэх тухай хуулийн 36.2, 36.3, 36.6, 36.7, 36.8, 36.10 дугаар зүйлд заасныг тус тус удирдлага болгон

ТОГТООХ нь:

1. Шүүгдэгч Б.Х-г зөвшөөрөлгүйгээр ойд мод бэлтгэсэн, гарал үүслийн гэрчилгээгүйгээр мод тээвэрлэсэн гэмт хэргийг үйлдсэнд гэм буруутайд тооцсугай.
2. Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар шүүгдэгч Б.Х-г 450 нэгжтэй тэнцэх хэмжээний буюу 450.000 /дөрвөн зуун тавин мянга/ төгрөгөөр торгох ялаар шийтгэсүгэй.
3. Эрүүгийн хуулийн ерөнхий ангийн 5.3 дугаар зүйлийн 4 дэх хэсэгт зааснаар ялтан Б.Х-д  оногдуулсан 450 /дөрвөн зуун тавь/ нэгжтэй тэнцэх хэмжээний буюу 450.000 /дөрвөн зуун тавин мянга/ төгрөгөөр торгох ялыг 2018 оны 03 дугаар сарын 01-ний өдрийн дотор хэсэгчлэн төлж барагдуулахаар тогтсугай.
4. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар ялтан торгох ялыг шүүхээс тогтоосон хугацаанд биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солихыг  дурдсугай.
5. Ялтны ял эдлэлтэд хяналт тавихыг Хөвсгөл аймаг дахь Шүүхийн шийдвэр гүйцэтгэх албанд даалгасугай.
6. Эрүүгийн хуулийн ерөнхий ангийн 7.5 дугаар зүйлийн 3, 4 дэх хэсэгт зааснаар “НЭТКАПИТАЛ” банк бус санхүүгийн байгууллагын эзэмшилтэй, 90-85 УНЭ улсын дугаартай портер маркийн ачааны автомашин, 3.1м3 хуурай шинэс модыг битүүмжилсэн 2017 оны 12 дугаар сарын 12-ны өдрийн 15 дугаартай прокурорын тогтоолыг хүчингүй болгож, 186.000 /нэг зуун наян зургаан мянга/ төгрөгийн үнэ бүхий 3.1м3 хуурай шинэс модыг улсын орлогод оруулсугай.
7. Эрүүгийн 1738004040163 дугаартай хэрэгт шүүгдэгч нь цагдан хоригдсон хоноггүй, бусдад төлөх төлбөргүй болохыг тус тус дурдсугай.
8. Шийтгэх тогтоол нь танилцуулан сонсгомогц хүчинтэй болох ба давж заалдах гомдол эсэргүүцэл гаргасан тохиолдолд тогтоолын биелэлтийг түдгэлзүүлж шийтгэх тогтоол хуулийн хүчин төгөлдөр болтол шүүгдэгч Б.Х-д урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.
9. Эрүүгийн хэрэг хянан шийдвэрлэх тухай хуулийн 38.1 дүгээр зүйлийн 1, 38.2 дугаар зүйлийн 1 дэх хэсэгт зааснаар шийтгэх тогтоолыг гардан авснаас хойш 14 хоногийн дотор ялтан, хохирогч, тэдгээрийн өмгөөлөгч, хууль ёсны төлөөлөгч давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

ДАРГАЛАГЧ, ШҮҮГЧ                                  Н.НЯМСҮРЭН