З.Згийн нэхэмжлэлтэй

иргэний хэргийн тухай

 

Нийслэлийн Иргэний хэргийн давж заалдах шатны шүүхийн Ерөнхий шүүгч Ж.Оюунтунгалаг даргалж, шүүгч Д.Дэлгэрцэцэг, Ц.Ичинхорлоо нарын бүрэлдэхүүнтэй тус шүүхийн танхимд хийсэн давж заалдах шатны иргэний хэргийн шүүх хуралдаанаар

 

Сүхбаатар дүүргийн Иргэний хэргийн анхан шатны шүүхийн 2021 оны 6 дугаар сарын 28-ны өдрийн 181/ШШ2021/01296 дугаар шийдвэртэй

З.Згийн нэхэмжлэлтэй хариуцагч Мд холбогдох

2020 оны 10 дугаар сарын 14-ний өдрийн Т/003 тоот тушаал, 2021 оны 02 дугаар сарын 05-ны өдрийн Б/001 дугаартай тушаалыг тус тус хүчингүй болгуулж, ажилд эгүүлэн тогтоолгож, ажилгүй байсан хугацааны цалин олговорт 34 433 962 төгрөгийг гаргуулж, нийгмийн болон эрүүл мэндийн даатгалын дэвтэрт нөхөн бичилт хийлгүүлэх тухай иргэний хэргийг хариуцагчийн төлөөлөгчийн давж заалдах журмаар гаргасан гомдлыг үндэслэн шүүгч Ц.Ичинхорлоогийн илтгэснээр хянан хэлэлцэв.

Шүүх хуралдаанд: Нэхэмжлэгч З.З, нэхэмжлэгчийн өмгөөлөгч Ц.Мөнхбат, хариуцагчийн итгэмжлэгдсэн төлөөлөгч П.Баяр, хариуцагчийн өмгөөлөгч Д.Мөнхтуяа, П.Сарантуяа шүүх хуралдааны нарийн бичгийн дарга С.Буянхишиг нар оролцов.

Нэхэмжлэгч З.З шүүхэд гаргасан нэхэмжлэл болон шүүх хуралдаанд гаргасан тайлбартаа: З.З нь Мгийн Нийгэм, жендерийн оролцоог хангах асуудал хариуцсан захирлын албан тушаалд 2019 оны 5 дугаар сарын 15-ны өдрийн А/010 дугаартай тушаалаар томилогдсон. Гэтэл гүйцэтгэх захирал Э.С нь хувийн зан байдал, албан тушаалын давуу байдлаа урвуугаар ашиглан, үндэслэлгүйгээр сахилгын шийтгэл ногдуулсан Т/003 дугаар тушаалыг үйлдсэн байна. Сахилгын шийтгэл ногдуулсан Т/003 дугаартай тушаалд хөдөлмөрийн гэрээний 8.1.1, 8.1.4., Хүний нөөцийн гарын авлага-Хөдөлмөрийн дотоод журмын 11.2. болон Ёс зүйн дүрмийн 15.2-т тус, тус заасныг зөрчсөн гэжээ. Уг тушаалын хавсралтад зөрчил гаргасан огноо, зөрчлийн агуулга, зөрчсөн баримт бичгийн нэр холбогдох зүйл, заалтуудыг хүснэгтлэн харуулжээ. Нэхэмжлэгч нь тушаалыг гардан авч, эдгээртэй танилцаад, бүхэлд нь эс зөвшөөрч шүүхэд хандсан. Өөрөөр хэлбэл, З.З нь энэ тушаалын хавсралтад дурдсан зөрчлийг гаргаагүй, бөгөөд гаргаагүй үйлдлүүдийг гаргасан мэтээр жагсаан бичиж, арга хэмжээ авах үндэслэлтэй хэмээн үзэж буй нь З.З миний хөдөлмөрлөх эрхийг ноцтой зөрчсөн шийдвэр юм. Удирдах албан тушаалтан нь өөрийн удирдлагадаа ажиллаж буй ажилтныг ажил албаны шаардлагаар өөрийн саналыг илэрхийлж, тайлбар хийсэн, өөрийн ажиллах орчин нөхцлийн талаар хууль ёсны шаардлага тавьсны төлөө түүнийг ажлын алдаа дутагдал гаргасан, удирдлагын өмнө хүлцэнгүй дуулгавартай байсангүй гэх мэт үндэслэл болгон байгууллагын эрх ашиг, сонирхлыг хөндсөн мэт журам, гэрээний үндэслэлүүдийг тушаалд дурдсан атлаа эдгээр зөрчлийг гаргасныг нотолсон баримтгүйгээр өөрийн хүсэлд нийцүүлж, ажилтны хөдөлмөрлөх эрхийг зөрчсөн. Тиймээс Мгийн гүйцэтгэх захирал Э.Сын үйлдсэн 2020 оны 10 дугаар сарын 14-ний өдрийн Т/003 дугаартай сануулах арга хэмжээ авсан сахилгын шийтгэлийг хүчингүй болгуулахаар 2020 оны 11 дүгээр сарын 05-ны өдөр тус шүүхэд нэхэмжлэл гаргасан, дээрх шаардлагыг эцэслэн шийдвэрлээгүй байхад буюу 2021 оны 02 дугаар сарын 05-ны өдөр ажил олгогч нь Б/001 дугаартай тушаалаар З.Зг ажлаас үндэслэлгүйгээр халсан. Дээрх Б/001 дугаартай тушаал нь Монгол Улсын их хурлаас 2019 оны 01 дүгээр сарын 31-ний өдөр соёрхон баталсан Мянганы сорилтын компакт гэрээний 3 дугаар зүйлийн 3.1-т хөтөлбөр хэрэгжүүлэх гэрээнд заасны дагуу хөтөлбөрийг хэрэгжүүлнэ, 3.2-т а)Засгийн газар нь хөтөлбөрийн хэрэгжилтийг удирдан зохион байгуулах, хяналт тавих үндсэн үүрэг хүлээнэ гэж тус, тус заасны дагуу Засгийн газрын хүлээж буй үүрэг хариуцлага биелэгдэхгүй, зөрчил бий болоход хүргэсэн, 2019 оны 3 дугаар сарын 05-ны өдөр Гадаад харилцааны яамаар төлөөлүүлэн Монгол Улсын Засгийн газар болон Мянганы Сорилтын Корпорациар төлөөлүүлэн Америкийн Нэгдсэн Улс хооронд байгуулсан Хөтөлбөр хэрэгжүүлэх гэрээний 2.9(c)(vii) болон 2.9(d) хэсэгт зааснаар, АНУ-ын Мянганы Сорилтын Корпорациас урьдчилж бичгээр зөвшөөрөл авсан байх тусгай шаардлагыг санаатайгаар зөрчсөн, ММСС УТҮГ-ын дүрмийн 4.3(d0)-д ажлаас чөлөөлөхийн өмнө АНУ-ын Мянганы сорилтын корпорациас зөвшөөрөл авч батлуулна гэж заасныг тус, тус зөрчсөн. Монгол улсын эдийн засгийн өсөлтийг хангах замаар ядуурлыг бууруулах эрхэм зорилгоор АНУ-ын ард түмний буцалтгүй тусламжаар хэрэгжиж буй онцгой чухал хөтөлбөр арга хэмжээг амжилттай хэрэгжүүлэх өндөр хариуцлагатай чиг үүргийг хүлээсэн ММСС УТҮГ-ын гүйцэтгэх захирлын дээрх хууль, журмыг зөрчсөн хууль бус шийдвэр нь Мянганы сорилтын компакт гэрээний 1.1-д заасан сайн засаглалын зарчим, үнэт зүйлийг илтэд алдагдуулахуйц, Хөтөлбөр хэрэгжүүлэх гэрээний биелэлтийг хууль, эрх зүйн маргаантай байдалд оруулж, үүгээрээ Монгол улсын хүн амын эрүүл мэнд, эдийн засгийн өсөлтөд чухал ач холбогдолтой хөтөлбөр арга хэмжээ амжилттай хэрэгжих нөхцлийг эрсдэлд оруулахуйц, олон улсын гэрээ, дотоодын хууль тогтоомж, байгууллагын дүрэм, журмаар тогтоосон шаардлага, нөхцлийг үл биелүүлэн, гагцхүү өөрийн эрх ямба, дур зорго, хувийн ашиг сонирхолд хөтлөгдөж, удирдах албан тушаалд томилогдсон байдалдаа хэт эрдэж бардсан хувийн зан байдал, сэтгэл хөдлөлөө албаны чиг үүрэгтэй хутгасан ёс зүйгүй энэ үйлдэл нь АНУ-ын ард түмний төлөөлөл, тэдгээрийн дуу хоолой, хууль ёсны шаардлагыг илтэд үл хүндэтгэн хөсөр орхигдуулсан, гуравдагч хөрштэй харилцах сайн харилцаанд сэв суулгах эрсдэлтэй байна. Бие муудаж эмчилгээ хийлгэж байх үед ч гэсэн дарамталсан и-мэйл илгээж байсан. 2020 оны 9 дүгээр сарын 22-ны өдөр хурал болсон бөгөөд энэ хуралд Америкийн талын орлогч захирал, П.Баяр, Э.С, С.Зоригт нар оролцсон. Хурал дээр ...Э.С авилга, хээл хахуультай холбоотой и-мэйл өгсөн байсан үүүнийгээ нотол, н.Э захирлыг шан харамж нэхсэн гэдгийгээ нотол, үгүй бол н.Энийн хөдөлмөрийн гэрэг цуцаллаа... гэж дарамталсан. Энэ үйл явдлын дараа надад сахилгын шийтгэл ногдуулсныг би эс зөвшөөрч шүүхэд нэхэмжлэл гаргасан. Намайг ажлаас халах зорилгоор хөдөлмөрийн гэрээнд өөрчлөлт оруулсан. Дараа нь 2021 оны 02 дугаар сарын 05-ны өдөр намайг ажлаас халсан. Намайг ажлаас халсан тушаалд дурдсан сахилгын зөрчлүүдийг давтан гаргасан гэж байгааг би хүлээн зөвшөөрөхгүй байна. Хүний нөөцийн бодлогын баримт бичгийг өөрсдөө зөрчсөн. Би хөдөлмөрийн дотоод журмын дагуу ажилласан бөгөөд намайг нууц зөрчсөн гэж байгааг хүлээн зөвшөөрөхгүй байна. Мөн намайг ажилд орохдоо худал бичиг баримт бүрдүүлж байсан гэж байгааг хүлээн зөвшөөрөхгүй бөгөөд би бүх баримтаа өгч, бүгдийг үнэн зөв мэдүүлсэн байгаа. Энэ талаар Алексээс ирсэн и-мэйлд тодорхой бичсэн. 1 000 000 ам.долларын Канадын төслийн ажилд намайг буруутгасан байсан бөгөөд би бүх хийсэн ажлаа танилцуулдаг. 2020 оны 8 дугаар сард аудит ороод сайн гэсэн дүгнэлт гарч байсан. Намайг давхар ажил эрхэлж байсан гэдэг нь худлаа. 2020 оны 6, 7 дугаар сард ШУТИС-д ажиллаагүй. Ажилтныг ажлаас чөлөөлөхдөө ММСК-аас зөвшөөрөл авах ёстой байдаг. Хөдөлмөрийн дотоод журам-Хүний нөөцийн бодлогын баримт бичгийн 4.4-т 2 тал харилцан зөвшөөрсөн стандарт хөдөлмөрийн гэрээний загварт ямар нэгэн нэмэлт, өөрчлөлт оруулахаар бол АНУ-ын Мянганы сорилтын корпораци болон удирдах зөвлөлөөр хэлэлцүүлж, урьдчилсан зөвшөөрөл авч батлуулсан байхаар заасан. ММСС өөрөө өөрийнхөө Хөдөлмөрийн дотоод журам-Хүний нөөцийн бодлогын баримтад заасан гүйцэтгэлийн менежментийн журмаа зөрчсөн. Энэ баримт бичигт сахилгын зөрчлийг хэрхэн шийдвэрлэх талаар тодорхой заасан бөгөөд гүйцэтгэх захирал жил бүр тушаал гарган 5 хүний бүрэлдэхүүнтэй санал, гомдол хүлээн авч хянах, байнгын хороог томилох бөгөөд тэрхүү хорооны гишүүдээс баримт нотолгоо цуглуулах, санал гомдол, сахилгын зөрчил зэрэгтэй холбоотой бусад хороо, дэд хороог тухай бүр бүрдүүлж ажиллана. Байгууллагын удирдлагыг төлөөлөн захиргааны асуудал хариуцсан захирал, ажилтнуудын төлөөлөлтэй хамтран нэр дэвшигчдийн жагсаалтыг гаргах ба түүнээс гүйцэтгэх захирал 5 гишүүнийг сонгож, нэг гишүүнийг даргаар сонгоно. Хороог жил бүр шинэчлэн байгуулахдаа хуучин гишүүдээс дор хаяж 2 хүнийг улираан сонгоно гэх мэт маш нарийн зааж өгсөн байхад уг журамд заасныг зөрчсөн бөгөөд Т/003 тушаалаар сахилгын шийтгэл ногдуулахдаа дээрх журмыг баримтлаагүй. Хөдөлмөрийн дотоод журмын 15.1-д заасныг зөрчсөн. Хөдөлмөрийн тухай хуулийн 40 дүгээр зүйлийн 40.1.4-т зааснаар сахилгын зөрчлийг давтан гаргасан зүйл байхгүй, ажил олгогчийн хэлээд байгаа зөрчлүүд нь тогтоогдохгүйгээс гадна З.Зд тухай бүрд танилцуулаагүй бөгөөд тайлбар өгөх боломжийг олгоогүй. Хөдөлмөрийн тухай хуулийн 40 дүгээр зүйлийн 40.1.4-т заасан үндэслэлээр ажлаас нь чөлөөлж байгаа тохиолдолд мөн хуулийн 40 дүгээр зүйлийн 40.2 дахь хэсэгт заасны дагуу 30 хоногийн өмнө ажилтанд мэдэгдэх ёстой байтал мэдэгдээгүй. Хөдөлмөрийн дотоод журамд сахилгын зөрчлийг хянах санал гомдлын хороо байгуулагдаж, түүгээр хэлэлцээд, ярилцлага авах гэх мэт ажиллагаа хийж, санал гомдлыг хянах хороогоор орох зэрэг маш нарийн зохицуулалтыг зааж өгсөн байхад тийм зүйл огт болоогүй. Сахилгын зөрчил удаа дараа гаргасан, хөдөлмөрийн гэрээнд заасан ноцтой зөрчил гаргасан гэж байгаа нь баримтаар тогтоогдоогүй байна. Тиймээс З.З би өөрийгөө ажлаас хууль бусаар чөлөөлөгдсөн гэж үзэж байгаа тул хөдөлмөрлөх эрхийг ноцтой зөрчсөн Т/003 болон Б/001 дугаартай тушаалуудыг хүчингүй болгож, ММСС-ийн Нийгэм, жендерийн асуудал хариуцсан захирлын албан тушаалд эгүүлэн тогтоолгож, ажилгүй байсан хугацааны цалингийн олговорт 34 433 962 төгрөгийг гаргуулж, нийгмийн болон эрүүл мэндийн даатгалын дэвтэрт нөхөн бичилт хийлгүүлж өгнө үү гэжээ.

Хариуцагчийн төлөөлөгч Э.С шүүхэд болон шүүх хуралдаанд гаргасан тайлбартаа: Мгийн Хүний нөөцийн бодлогын баримт бичиг, Хөдөлмөрийн дотоод журмын 15 дугаар зүйлийн 15.4-т ... ажилтны буруутай үйлдэл, зөрчлийн ноцтой байдал, үр дагавраас хамааран гүйцэтгэх захирал ажилтанд сахилгын шийтгэл оноож болно... гэж зааснаар ажилтанд сахилгын шийтгэл оногдуулах нь гүйцэтгэх захирлын бүрэн эрхийн асуудал юм. Монголын МСС нь 2019 оны 5 дугаар сарын 15-ны өдрөөс иргэн З.Зтай хөдөлмөрийн гэрээ байгуулан, Монголын МСС-ийн Нийгэм, жендэрийн оролцоог хангах асуудал хариуцсан захирлын албан тушаалд авч ажиллуулсан. Ажилтан З.Згийн гаргасан дараах зөрчлүүд холбогдох баримтаар тогтоогдсон тул Монголын МСС-ийн гүйцэтгэх захирлын 2020 оны 10 дугаар сарын 14-ний өдрийн Т/003 тоот тушаалаар сахилгын сануулах арга хэмжээг авсан нь бүрэн үндэслэлтэй. Үүнд: Ажилтан З.З нь Хөдөлмөрийн гэрээний 2.1, 2.2-т тус, тус заасан үүргийг хүлээсэн. Гэтэл З.З нь энэхүү үүргээ удаа дараа биелүүлэхгүй, зөрчсөн нь түүний олон үйлдэл, эс үйлдлээр нотлогддог. Тухайлбал, 2020 оны 8 дугаар сарын 15-ны өдөр эхлэх судалгаанд шаардлагатай 100 ширхэг гap утасны нэгжний худалдан авалтыг 2020 оны 3 дугаар улирлын захиргааны худалдан авалтын төлөвлөгөөнд нэмж тусгах хүсэлтийг цагийг нь тулган 2020 оны 8 дугаар сарын 13-ны өдөр Захиргааны асуудал хариуцсан захирал Э.Эд ирүүлсэн. Зохих бэлтгэлийг урьдчилан хангаагүй, хугацаа алдсан шалтгаанаа өөрийн мэргэжилтэн Т.Сагансэцэнгийн хариуцлагагүйгээс шалтгаалсан гэж Захиргааны асуудал хариуцсан захирал Э.Эд мэдэгдсэн боловч дараа нь ийнхүү мэдэгдээгүй гэх асуудалд мэдэн будилсан, зөрүүтэй байдлаар, үнэнч шударга бус хандаж, ор үндэслэлгүй яриа тараан, бусдын нэр хүндэд халдаж эхэлсэн. Түүнчлэн З.З нь хугацаа алдсан өөр нэг шалтгаанаа тайлбарлахдаа ...7 дугаар сарын 30-ны өдөр ээлжийн амралт нь дуусч, ажилдаа орох байсан гүйцэтгэх захирлын гарын үсэг байгаагүйгээс болсон (гүйцэтгэх захирлын орлогч гүйцэтгэх захирлын өмнөөс гарын үсэг зурахаас татгалзаж, худалдан авах баг гарын үсэг дутуу учир хүлээн авахаас татгалзсан), хэрэв та миний хэлсэн үгэнд итгэхгүй байгаа бол цагийн хуваарь, уулзалтын тэмдэглэл болон хавсаргасан баримт бичгийг шалгана уу, миний зүгээс энэ асуудал буюу алдааг албан тушаал түр орлон гүйцэтгэх хуваарийн дутуу дулимаг байдлаас, эсвэл худалдан авах ажиллагааны агент Төрийн өмчит ААН-ийн маягтын талаар сайн мэдэхгүй байснаас болсон гэж үзэж байна... гэх хоорондоо логик авцалдаагүй агуулга бүхий ор үндэсгүй и-мэйлийг 2020 оны 8 дугаар сарын 19-ний өдрийн 16:27 цагт худалдан авах ажиллагааны захирал Т.Эн, захиргааны асуудал хариуцсан захирал Э.Э нарт илгээсэн бөгөөд ингэхдээ З.З нь үнэн бодит байдлыг илт гуйвуулан, холбогдох ажилтнуудын ажил хэргийн нэр хүндэд халдсан гэдэг нь дараах баримтаар тогтоогддог.Үүнд:

а. Монголын МСС-ийн Гүйцэтгэх захирлын ээлжийн амралтын албан ёсны хуудаст ээлжийн амралт 7 дугаар сарын 30-ны өдөр биш 8 дугаар сарын 7-ны өдөр дуусах байсан.

б. Монголын МСС-ийн гүйцэтгэх захирлын 2019 оны 12 дугаар сарын 05-ны өдрийн Э/01 тоот эрх олгох тухай тушаалаар ...гүйцэтгэх захирлыг төлөөлж тушаал, шийдвэр, гэрээ, хэлэлцээр, санхүүгийн болон холбогдох баримт бичигт гарын үсэг зурах... бүрэн эрхийг гүйцэтгэх захирлын орлогчид олгосон байгаагаас гүйцэтгэх захирлын орлогч нь гүйцэтгэх захирлын өмнөөс гарын үсэг зурахаас татгалзсан гэсэн нь ор үндэслэлгүй болох нь нотлогдож байна.

в. Мөн ээлжийн амралттай байгаа гүйцэтгэх захирал 7 дугаар сарын 30-ны өдөр ажилдаа орно гэх мэдээллийг Executive Secretary нар буюу гүйцэтгэх захирлын болон гүйцэтгэх захирлын орлогч нарын туслахуудын өгсөн мэдээлэл гэж хариулдаг боловч тэдгээр туслахууд 7 дугаар сарын 30-ны өдөр ажилдаа орно гэсэн мэдээлэл өгөөгүй гэж үгүйсгэсэн болно. Үүгээр мөн л ор үндэслэлгүй зүйлийг имэйлээр тарааж, бусдын ажилд саад болоод зогсохгүй, байгууллагын хэвийн үйл ажиллагааг алдагдуулж, Хүний нөөцийн бодлогын баримт бичиг- Хөдөлмөрийн дотоод журмын 15.2 дахь хэсэгт бусдыг гүтгэн доромжилж, ор үндэсгүй яриа тараах, байгууллага болон түүний удирдлагын өмнө хүлээсэн үүргээ зөрчих гэж заасныг зөрчсөн үйлдэл гаргасан байдаг.

г. Тус байгууллагын захиргааны асуудал хариуцсан захирал Э.Эийн Компакт гэрээ хүчин төгөлдөр болох хугацаа ойртох тусам байгууллагын үйл ажиллагаа жигд, сааталгүй явах шаардлага улам нэмэгдэх болно. Иймд процессын ямар нэг саатал, манай болон РА, FA-ийн ажилтнуудын анхаарал, хариуцлагатай холбоотой асуудал байвал цаг тухайд нь засаж залруулж явах нь зүйтэй болов уу.

Иймд ...шаардлагатай бол энэ талаар гүйцэтгэх захирлын орлогчтой зөвлөх, нэн ялангуяа таны өөрийн хэлсэгчлэн гэнэтийн төлөвлөөгүй шийдвэр цаашид дахин гарахаас сэргийлэх үүднээс буруу мэдээлэл өгсөн ажилтанд анхааруулга өгч, саатал үүссэн учир шалтгааныг тодруулах нь зүйтэй болов уу хэмээн зөвлөж байна гэж и-мэйлээр илгээсэн зөвлөгөөг гуйвуулан судалгааны төлөвлөлт, тэр дундаа GSI баг, мэргэжилтэн Сагансэцэн ямар ч буруу алдаатай зүйл гаргаагүй гэдгийг энэ и-мэйлээр дахин мэдэгдэж байна, тиймээс сануулга өгөх шаардлагагүй гэж захирлын хувьд нотлох баримтууд дээр үндэслэн хэлж байгааг хүлээн авна уу... гэж хариу и-мэйл илгээсэн нь асуудалд бодитой, үнэнч шударга хандаагүй төдийгүй асуудлыг гуйвуулж, захиргааны асуудал хариуцсан захирал Э.Эийн ажил хэргийн нэр хүндэд халдаж гүтгэсэн үйлдэл гэж үзнэ. Уг гомдлын мөрөөр холбогдох журмын дагуу щаардлагатай ажиллагааг явуулахаас өмнө ажилтан З.З нь гүйцэтгэх захирал Э.Ст 2020 оны 9 дүгээр сарын 15-ны өдөр бичгээр тайлбар ирүүлж, гэрээгээр хүлээсэн үүргээ үнэнч шударгаар биелүүлээгүй, ор үндэсгүй, бусдын нэр хүндэд халдсан мэдээлэл тараасан гэж буруутгагдаж байгаа зөрчлүүддээ тайлбар өгсөн байдаг. Мөн тус байгууллагын Худалдан авах ажиллагаа хариуцсан захирал Т.Энийн талаар ...CRTA гэрээг чинь хамаг мэдлэгээ ашиглаж хийж өгч байхад минь үнэлээгүй шүү, харин араас минь хутга шаасан гэх мэтээр үл ойлгогдох зүйл нэхэж, бас ямарваа нэгэн хутга шаасан гэх хуйвалдаан, гүтгэлэгийн шинжтэй зүйлд намайг буруутган давшилсан, харин CTRA гэрээ байгуулах асуудал бол албан ажил тул би түүнд ямар нэгэн зүйлийг өгч чадахгүй гэдгээ хэлсэн... гэсэн мэдээллийг өгсөн нь цаашид Хүний нөөцийн бодлогын баримт бичиг- Хөдөлмөрийн дотоод журмын Хавсралт XVI буюу Гомдол хүлээн авах, түүнийг хянан шийдвэрлэх журмын дагуу Т.Энт холбогдуулах гомдлыг тодруулж байж З.Зд холбогдох сахилгын шийтгэлийг шалган тогтоох шаардлагыг үүсгэсэн. Ингээд 2020 оны 9 дүгээр сарын 22-ны өдөр гүйцэтгэх захирал Э.С, МСК-ын суурин захирлын орлогч Эрик Гүтшоф, гүйцэтгэх захирлын орлогч С.Зоригт, Хуулийн ерөнхий зөвлөх П.Баяр, Жендэр, нийгмийн оролцоог хангах асуудал хариуцсан захирал З.З болон Хүний нөөцийн менежер Д.Мөнхгэрэл нарын бүрэлдэхүүнтэй уулзалтыг зохион байгуулсан. Гэтэл З.З нь дээрх уулзалтыг мөрдөн байцаасан шинж чанартай арга хэмжээ болж, хүчээр тайлбар, нотлох баримт гаргуулахаар оролдсон гэх ор үндэслэлгүй яриа гаргаж, байгууллагын удирдлага, хамт олны нэр хүндэд халдан захирах, захирагдах зарчмыг зөрчсөн. Мөн дээрх уулзалтын үеэр болон бусад цагт ажилтнуудын хооронд яс хаях, хооронд нь муудалцуулах, илт гүтгэх, өөрийн мэргэжлийн үг хэллэг, ойлголтыг дөвийлгөн хэрэглэж айлган сүрдүүлэх болон дарамтлах үйлдэл тус тус гаргаж байсан. Монголын МСС-ийн ажилтнууд Ёс зүйн дүрмийг байнга дагаж мөрдөх үүрэгтэй бөгөөд жил бүр Монголын МСС-ийн Хүний нөөцийн албанд энэхүү дүрмийг уншиж, ойлгосон гэдгээ бичгээр мэдэгдэх үүрэгтэй. Ёс зүйн дүрмийн аливаа зөрчлийг хэзээд үл хүлээн зөвшөөрөх бөгөөд хөдөлмөрийн гэрээг цуцлах хүртэлх сахилгын арга хэмжээг шуурхай авна. Дүрмийг Удирдах зөвлөлийн гишүүд, Монголын МСС-ийн нийт ажилтнууд болон зөвлөхүүд баримтална гэж зааснаар ажилтан З.З нь уг ёс зүйн дүрмийг удаа дараа зөрчиж, байнга бусдыг гүтгэж, ор үндэслэлгүй яриа тараах нь хэтэрч, байгууллагын гүйцэтгэх удирдлагыг гүтгэн дайрч доромжилсон, улмаар захирах, захирагдах зарчмыг зөрчсөн үйлдэл болсон.

д. Мөн 2020 оны 9 дүгээр сарын 22-ны өдөр хийсэн уулзалтын үеэр З.З нь худалдан авах ажиллагааны захирал Т.Энийн нэр хүндэд халдаж, шан харамж нэхсэн гэж гүтгэсэн үйлдлээ хүлээн зөвшөөрсөн байдаг.

е. Худалдан авах ажиллагааны захирал Г.Энтай ярилацах үедээ өөрийн гар утсаар бүх яриаг нууцаар бичиж авсан талаараа мэдэгдэж, гар утсаараа бусдын зөвшөөрөлгүй бичлэг хийж, түүнийгээ ашиглан хууль хүчний байгууллага, Хүний эрхийн үндэсний комисст хандана гэж олны өмнө бусдыг удаа дараа сүрдүүлэх үйлдэл гаргасан нь ажилтнууд нэг нэгэндээ итгэхгүй байх, байгууллагын үйл ажиллагаанд үл итгэх таагүй уур амьсгалыг тус тус бүрдүүлсэн.

ё. 2020 оны 9 дүгээр сарын 18-ны өдөр хуулийн ерөнхий зөвлөх П.Баярт хандан 2020 оны 9 дүгээр сарын 17-нд CEO, Э, Эн захирал нартай удаан уулзсан. Ер нь үүсээд байгаа нөхцөл байдал тодорхой тул Маргаан таслах комисст хүсэлт гаргахгүй, хандахгүй байхаар шийдлээ.Ямар нэгэн нөлөөлөлгүй дүгнэлт гаргана гэдэгт итгэхгүй байна гэсэн утгатай имэйлийг бичсэн нь тус байгууллагаас холбогдох журмын дагуу байгуулсан санал, гомдлын хороонд итгэхгүй байгаагаа мэдэгдсэн, энэ нь байгууллагын дүрэм журмыг хүндэтгэн үзэх шалтгаангүйгээр мөрдөхгүй байхыг бусдад уриалж, байгууллагын хэвийн үйл ажиллагаанд сөргөөр нөлөөлөх нөхцлийг бүрдүүлсэн Хүний нөөцийн бодлогын баримт бичиг-Хөдөлмөрийн дотоод журмын 14.4-т заасныг зөрчсөн үйлдэл болсон гэж үзэж байна.

Ажилтан З.Згийн гаргасан дээрх зөрчлүүд нь хавсаргасан баримтаар тогтоогддог бөгөөд Хөдөлмөрийн гэрээний 8 дугаар зүйлийн 8.1.1, 8.1,4-т заасныг зөрчсөн. Монголын МСС-ийн ажилтнууд Ёс зүйн дүрмийг дагаж мөрдөх үүрэгтэй. З.Згийн гаргасан чигч шударга бус, итгэл эвдсэн, ёс зүйгүй, бусдын нэр хүндэд халдсан, ор үндэслэлгүй зүйлийг тараадаг зэрэг үйлдлийг таслан зогсоох зорилгоор ажилтанд сахилгын сануулах арга хэмжээ авсан болно. Ажлаа хариуцлагатай, бодит үр дүнтэй, чанартай, төлөвлөсөн цаг хугацаандаа гүйцэтгэхийг сануулах, шаардах бүрийд З.Згийн зүгээс асуудлыг гуйвуулж, байнга өөрийгөө өмгөөлөх, бусдаас бурууг эрэх, хүний эрх, жендерийн тэгш байдлыг хангах нэрийдлээр дээд байгууллагуудад хандах зэргээр гүйцэтгэх захирлыг удаа дараа айлган сүрдүүлж байхад гүйцэтгэх захирал хүлцэнгүй хандаж ирсэн. Харин илт ноцтой зөрчил буюу ёс зүйгүй байдал, удирдлага, чиглэлийг санаатайгаар үл тоомсорлох, шударга бус байдал гаргах, худал болон буруу ташаа мэдээлэл тараах, мэдүүлэг өгөх, үүрэг хариуцлагаа тогтмол үл тоомсорлох зэрэг зөрчлүүд гаргах, эсхүл Монгол Улсын хууль тогтоомж, Монголын МСС-ийн буюу МСК-ийн бодлого, дүрэм, журмыг удаа дараа зөрчсөн тохиолдолд тухайн ажилтантай байгуулсан хөдөлмөрийн гэрээг шууд цуцлах журамтай болно. Иймд ажилтанд З.Зд сануулах сахилгын шийтгэл оногдуулсан Мгийн гүйцэтгэх захирлын 2020 оны 10 дугаар сарын 14-ний өдрийн Т/003 тоот тушаал үндэслэлтэй болсон төдийгүй Монгол Улсын Хөдөлмөрийн тухай хуулийн 131 дүгээр зүйлийн 131.1.1 дэх заалтад нийцсэн тул нэхэмжлэлийн энэ шаардлагыг хэрэгсэхгүй болгож өгнө үү. Мгийн Гүйцэтгэх захирлын 2021 оны 02 дугаар сарын 05-ны өдрийн Б/001 дугаартай тушаалаар нэхэмжлэгч З.З нь хөдөлмөрийн гэрээгээр хүлээсэн үүргээ удаа дараа зөрчсөн, хөдөлмөрийн ноцтой зөрчил гаргасан нь тогтоогдсон тул Хөдөлмөрийн тухай хуулийн 40 дүгээр зүйлийн 40.1.4-т заасныг үндэслэн түүнтэй байгуулсан хөдөлмөрийн гэрээг хугацаанаас нь өмнө цуцласан. Монголын МСС-ийн Хүний нөөцийн бодлогын баримт бичиг-Хөдөлмөрийн дотоод журмын 15 дугаар зүйлийн 15.4-т аливаа нөхцөлгүйгээр нэн даруй халагдах ажилтанд мэдэгдэл хүргүүлэхгүй бөгөөд нөхөн олговор олгохгүй. Ажлаас ингэж халагдсан ажилтантай цаашид дахиж хөдөлмөрийн болон бусад гэрээний харилцаанд орохыг хатуу хориглоно гэж зааснаар мэдэгдэл хүргүүлэхгүйгээр хөдөлмөрийн гэрээг цуцалж ажлаас нь нэн даруй чөлөөлсөн.

Нэг. З.З нь түүнтэй байгуулсан хөдөлмөрийн гэрээний 2.1, 2.2, 2.3, 8.1.1, 8.1.4-т тус тус заасан үүргээ зөрчсөн, З.З нь энэхүү үндсэн үүргээ гүйцэтгэн ажиллах мэргэжлийн болон бусад шаардлагатай суурь мэдлэг, ур чадвар маш муу, тухайн ажлын байранд тавигдаж буй дүн шинжилгээ хийх болон бусад ур чадварын шаардлагыг хангахгүй, ямар ч санаачлагагүй, хариуцлагагүй байдаг нь удаа дараагийн алдаа дутагдал, тэдгээрээс улбаатай ёс зүйн зөрчлөөс харагдаж байгаа тухай Монголын МСС-ийн гүйцэтгэх захирлын орлогчийн гаргасан ажил байдлын тодорхойлолтоор тогтоогддог. МСК-ийн зүгээс Монголын МСС-д тавьдаг хөдөлмөрийн харилцааны суурь зарчмуудыг ноцтой зөрчсөн. Манай улсад анх удаа хэрэгжүүлэх гэж буй усны салбарын томоохон дэд бүтцийн төслийн үйл ажиллагаанд сөргөөр нөлөөлөхүйц таагүй уур амьсгал, үл итгэлцлийг хамт олны дунд бий болгож, төслийг хэрэгжүүлж буй хоёр байгуулагын хооронд үл ойлголцол үүсгэсэн гэж З.Згийн ажлыг дүгнэсэн. Мөн дүгнэлтэндээ дээр дурдсан асуудлууд болон дүгнэлтийг харгалзан үзэж, Хөтөлбөр хариуцсан захирлын хувьд цаашид З.Зтай хамтран ажиллах боломжгүйг мэдэгдэж, түүний хөдөлмөрийн гэрээг Компакт гэрээ, Компакт гэрээг хэрэгжүүлэх хэлэлцээр, Монголын МСС-ийн хөдөлмөрийн дүрэм журам болон холбогдох бусад хууль тогтоомжид нийцүүлэн цуцлах саналтай байна гэсэн байна.

Ажилтан З.З нь түүнтэй байгуулсан хөдөлмөрийн гэрээний 2.1, 2.2, 2.3, 8.1,1, 8.1.4-т заасан үүргээ дараах байдлаар зөрчсөн нь тогтоогддог. Үүнд:

1. Монголын МСС-ийн гүйцэтгэх захирлын орлогч 2020 оны 01 дүгээр сарын 23-ны өдөр зохион байгуулсан Үндэсний статистикийн хороотой хийх Төлбөр төлөх эрмэлзлийн судалгааны асуулга сайжруулах албан ёсны уулзалтад хэлэх үгийг бэлдэх үүргийг З.Зд даалгасан. Гэтэл үүрэг даалгаврыг өөрөө биш мэргэжилтэн Т.Сагансэцэнээр бэлдүүлэн 2020 оны 01 дүгээр сарын 22-ны өдөр гүйцэтгэх захирлын орлогчийн туслахад ирүүлсэн нь маш хангалтгүй байсан. З.З нь Баруун эх үүсвэрийг шинээр байгуулах төслийн Барилга угсралтын ажлын багц-2 буюу Ус гүн цэвэршүүлэх үйлдвэр барих тендерийн баримт бичгийн хавсралт болох Нийгэм, жендерийн нэгдсэн төлөвлөгөөг 2020 оны 6 дугаар сараас хойш бэлдэж байгаа гэсээр ирсэн хэдий ч уг тендерийн баримт бичгийг 2020 оны 12 дугаар сарын 4-ний өдөр МСК-аас Зөвшөөрөл авахаар илгээхэд бүрдэлд зохих ёсоор оруулаагүй.

2021 оны 01 дүгээр сарын 05-ны өдрийн менежментийн хурлаар гүйцэтгэх захирал нь З.Зд Cowater-ийн төслийн багийн ахлагчийг солих ажлын явцыг тухайн өдөртөө багтан танилцуулах, мөн ажлын төлөвлөгөөг танилцуулах үүрэг даалгавар өгсөн боловч мөн л биелүүлээгүй. Монгол Улсын хууль тогтоомж, Монголын МСС буюу МСК-ын бодлогыг удаа дараа зөрчсөн тохиолдолд тухайн ажилтны хөдөлмөрийн гэрээг шууд цуцлана гэж зааснаар З.Зтай байгуулсан хөдөлмөрийн гэрээг цуцлах нэг үндэслэл болсон.

З.З нь түүнтэй байгуулсан хөдөлмөрийн гэрээний 6.2, 6.3-т заасан үүргээ тус тус зөрчсөн талаар:

Хөдөлмөрийн гэрээний 6.2 дахь хэсэгт Ажилтан нь (i) түүнийг өмнөх ажил олгогч ажлаас халж байгаагүй, эсхүл (И) залилан, хөрөнгө шамшигдуулах, санаатайгаар хор хохирол учруулах гэмт хэрэгт холбогдон яллагдаж байгаагүй, одоогийн, эсхүл өмнөх ажил олгогчид сөргөөр нөлөөлөх аливаа бусад үйлдэлд холбогдож байгаагүй болохоо үүгээр нотлов, 6.3 дахь хэсэгт Уг албан тушаалд ажиллахаар гаргасан Ажилтны өргөдөл дэх мэдээлэл бүх талаар үнэн зөв хийгээд бүрэн бүтэн бөгөөд төөрөгдөл үүсэхээс сэргийлсэн аливаа мэдээллийг өргөдлөөс санаатайгаар орхигдуулаагүй болохыг үүгээр нотлов гэж заасныг зөрчиж Монголын МСС-д өгсөн Төрийн албан хаагчийн анкет болон Монголын МСС-ийн сонгон шалгаруулалтын үед өгсөн CV дээр ажилласан байгууллага болон ажилласан хугацааг зөрүүтэй бичсэн байдаг. З.З нь мөн сонгон шалгаруулалтын үеэр өгсөн намтар дээрх боловсролын мэдээлэл дээр докторын зэрэг хамгаалах сэдвээ тухайн ажлын байранд тааруулан Жендэрийн эрх тэгш байдал гэх сэдвээр хамгаалж байгаа мэтээр худал мэдээлж, албан тушаалд сонгогдох давуу тал болгон ашигласан ба үндсэн хамгаалж буй сэдэв нь Улаанбаатар хотын хог хаягдлын менежмент гэсэн сэдэв болох нь тогтоогдсон. Түүнчлэн 2018 оны 9 дүгээр сарын 11-ний өдрийн Монгол Улсын дээд шүүхийн хяналтын шатны Иргэний хэргийн шүүх хуралдааны 001/ХТ2018/01141 дугаар топгоолоос Хүчирхийллийн эсрэг үндэсний төвийн Гүйцэтгэх захирлын албан тушаалаас ажил олгогчийн санаачлагаар хөдөлмөрийн гэрээ цуцлагдаж байсан, хөдөлмөрийн гэрээний хугацаа дууссан үндэслэлээр ажилд эгүүлэн тогтоохоос татгалзсан нь тогтоогдсон. Өөрөөр хэлбэл өмнөх ажил олгогч нь ажлаас халж байсныг З.З нь нуун дарагдуулсан байдаг. Иймд Хүний нөөцийн бодлогын баримт бичиг-Хөдөлмөрийн дотоод журмын 2.2 дахь хэсэгт ажилтан өөрийн ажлын туршлага, боловсрол, мэргэжлийн зэрэг дэв, хэлний мэдлэг, ял шийтгэл авч байсан эсэх, улс төрийн үйл ажиллагааны талаар болон ажилд томилогдохтой холбоотой өөр бусад баримт бичиг, мэдээллийг санаатайгаар худал, ташаа мэдүүлсэн, хуурамчаар үйлдсэн, ажил олгогчийг төөрөгдүүлсэн бол сахилгын шийтгэл оноох, улмаар хөдөлмөрийн гэрээг шууд цуцлах үндэслэл болно, 11.2 дахь хэсэгт ажилтан нь сонгон шалгаруулалтын явцад санаатайгаар хуурамч мэдээлэл, хуурамч баримт бичиг өгвөл хөдөлмөрийн гэрээг шууд цуцлахаар, Хөдөлмөрийн гэрээний 4.3 дахь хэсэгт сонгон шалгаруулалтын явцад санаатайгаар хуурамч мэдээлэл, хуурамч баримт бичиг өгсөн нь тогтоогдсон тохиолдолд хөдөлмөрийн гэрээг шууд цуцлахаар тус тус зохицуусныг үндэслэн З.Зтай байгуулсан Хөдөлмөрийн гэрээг цуцалсан.

Гурав. З.З нь түүнтэй байгуулсан хөдөлмөрийн гэрээний 6.2, 6.3-т заасан үүргээ тус тус зөрчсөн талаар:

Дөрөв. З.З нь түүнтэй байгуулсан хөдөлмөрийн гэрээний 7.1-т заасан үүргээ тус тус зөрчсөн талаар:

Хөдөлмөрийн гэрээний 7.1 дэх хэсэгт ...Тухайн мэдээлэл нь ажилтнаас ямар нэг хамааралгүйгээр, олон нийтэд нээлттэй эх сурвалжид нийтлэгдсэнээс бусад тохиолдолд ажилтан нь Монголын МСС-ийн ажилтны хувиар болон өөрийн эрхлэх ажил үүрэг, энэхүү гэрээ, Монголын МСС-ийн ажил хэрэг, үйл ажиллагаатай холбоотойгоор хүлээж авсан мэдээлэл, харилцаа холбоо, баримт бичгийг нууц мэдээлэлд тооцож, нууцлалыг хадгална. Ажилтны ажил үүргийн хүрээнд тухайн мэдээлэл, харилцаа холбоо, баримт бичгийг ил болгохоор зааснаас бусад тохиолдолд Ажилтан нь тэдгээрийг задруулахгүй бөгөөд ажлын бус зориулалтаар ашиглахгүй. Түүнчлэн, Ажилтан нь Монголын МСС-аас тухай бүр боловсруулан баталсан нууцлалын аливаа бодлого, дүрэм, журмыг дагаж мөрдөхийг үүгээр зөвшөөрөв. Энэ заалт нь энэхүү гэрээг хүчингүй болгосон, эсхүл дуусгавар болсны дараа хүчин төгөлдөр үйлчилсэн хэвээр байна... гэж тус тус заасныг зөрчиж 2020 оны 12 дугаар сарын 07-ны өдрийн Удирдлагын багийн цахим хурлыг Гүйцэтгэх захирлын орлогчийг эсэргүүцэн дур мэдэн хаяж гарсан. Монголын МСС-ийн зүгээс МСК-д 2021 оны 01 дүгээр сарын 13-ны өдөр 2021 оны 01 дүгээр сарын 27-ны өдөр тус тус зөвшөөрөл авах албан имейлүүдийг нотлох баримтын хамт хүргүүлж байсан. 2021 оны 2 дугаар сарын 4-ний өдөр хийсэн уулзалтын тэмдэглэлээс харахад Монголын МСС нь зөвшөөрөл авах журмыг баримталж ажилласан байдаг. Ажилтантай байгуулсан хөдөлмөрийн гэрээг ажил олгогчийн санаачилгаар цуцлахдаа Хүний нөөцийн бодлогын баримт бичиг-Хөдөлмөрийн дотоод журмын 11.2 дугаар зүйлд ажил олгогчийн санаачилгаар хөдөлмөрийн гэрээг цуцлахад Монгол улсын Хөдөлмөрийн тухай хуулийн холбогдох зүйл заалтыг баримтлан, үндэслэл шалтгааныг сайтар баримтжуулсан байна гэж зааснаар З.Зтай байгуулсан хөдөлмөрийн гэрээг Хөдөлмөрийн тухай хуулийн 40 дүгээр зүйлийн 40.1.4-т заасан үндэслэлээр цуцалсан. Иймд ажилтан З.Зтай байгуулсан хөдөлмөрийн гэрээг цуцалж, ажлаас нэн даруй чөлөөлсөн Монголын МСС УТҮГ-ын гүйцэтгэх захирлын 2021 оны 02 дугаар сарын 05-ны өдрийн Б/001 тоот тушаал үндэслэлтэй болсон төдийгүй Монгол Улсын Хөдөлмөрийн тухай хуулийн 38 дугаар зүйлийн 38.1.2 болон 40 дүгээр зүйлийн 40.1.4. дэх заалтад нийцсэн тул нэхэмжлэлийг бүхэлд нь хэрэгсэхгүй болгож өгнө үү гэжээ.

ШҮҮХ: Хөдөлмөрийн тухай хуулийн 128 дугаар зүйлийн 128.1.2.,69 дүгээр зүйлийн 69.1 дэх хэсэгт заасныг баримтлан М УТҮГ-ын гүйцэтгэх захирлын 2020 оны 10 дугаар сарын 14-ний өдрийн Сануулах сахилгын шийтгэл ногдуулах тухай Т/003 тоот тушаалыг хүчингүй болгож, нэхэмжлэгч З.Зг М УТҮГ-ын Нийгэм, жендерийн оролцоог хангах асуудал хариуцсан захирлын ажилд эгүүлэн тогтоож, М УТҮГ-аас 29 709 305 төгрөг гаргуулан З.Зд олгон, нэхэмжлэлийн шаардлагаас үлдэх 4 724 657 төгрөгийн шаардлагыг хэрэгсэхгүй болгож, Хөдөлмөрийн тухай хуулийн 46 дугаар зүйлийн 46.2-т заасныг баримтлан ажилгүй байсан хугацааны дээрх цалингийн олговроос нийгмийн даатгал, эрүүл мэндийн даатгалын шимтгэлийг хуульд заасан хэмжээгээр нөхөн суутгаж зохих байгууллагад шилжүүлэн, нийгмийн болон эрүүл мэндийн даатгалын дэвтэрт бичилт хийхийг хариуцагчид даалгаж, Улсын тэмдэгтийн хураамжийн тухай хуулийн 7 дугаар зүйлийн 7.1.1, 41 дүгээр зүйлийн 41.1.3., 41.1.5, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1 дэх зааснаар зохигч нь улсын тэмдэгтийн хураамжаас чөлөөлөгддөг болохыг дурдаж шийдвэрлэсэн байна.

Хариуцагчийн төлөөлөгч Э.С давж заалдах журмаар гаргасан гомдолдоо: Анхан шатны шүүхээс З.Зд ажилгүй байсан хугацааны буюу 2021 оны 02 дугаар сарын 05-ны өдрөөс анхан шатны шүүхийн шийдвэр гарах өдөр хүртэлх хугацааны буюу 2021 оны 06 дугаар сарын 28-ны өдрийг хүртэлх хугацааны цалин олговорт 29 709 305 төгрөгийг олгохоор шийдвэрлэсэнд гомдолтой байна. Учир нь Мгийн Гүйцэтгэх захирлын 2019 оны 05 дугаар сарын 15-ны өдрийн А/010 дугаар тушаалаар З.З нь Монголын МСС-тай хөдөлмөрийн гэрээ байгуулан "Нийгэм жендэрийн оролцоог хангах асуудал хариуцсан захирлын албан тушаалд 1 (нэг) жилийн хугацаагаар ажиллахаар томилогдсон байдаг. Хөдөлмөрийн тухай хуулийн 23 дугаар зүйлийн 23.1, 23.2, 23.1.1, 23.2.1-т зааснаар Монголын МСС болон З.З нар нь 2019 оны 5 дугаар сарын 15-ны өдөр 1 (нэг) жилийн хугацаатай хөдөлмөрийн гэрээг байгуулсан байдаг ба 2020 оны 05 дугаар сарын 15-ны өдөр хөдөлмөрийн гэрээний хугацаа дуусахаар байна. Гэвч Хөдөлмөрийн тухай хуулийн 23 дугаар зүйлийн 23.3 дах хэсэгт зааснаар хөдөлмөрийн гэрээний хугацаа анх заасан хугацаагаар буюу 1 (нэг) жилээр сунгагдаж 2021 оны 05 дугаар сарын 15-ны өдөр дуусгавар болсон. Өөрөөр хэлбэл З.Зтай байгуулсан хөдөлмөрийн гэрээ нь дуусгавар болсон бөгөөд энэхүү гэрээний дагуу 2021 оны 05 дугаар сарын 15-ны өдрөөс хойшхи хугацааны цалин хөлсийг гэрээ дуусгавар болсон гэх үндэслэлээр З.Зд шаардах эрх үүсэхгүй юм. Хөдөлмөрийн тухай хуулийн 37 дугаар зүйлийн 37.1.3-т зааснаар хөдөлмөрийн гэрээ дуусгавар болсон байна. Анхан шатны шүүхээс 2021 оны 05 дугаар сарын 15-ны өдөр хөдөлмөрийн гэрээний хугацаа дууссан байна гэж анхан шатны шүүх хуралдаанаас гарсан шийдвэрээ танилцуулахдаа тайлбарлсан бөгөөд хөдөлмөрийн гэрээний хугацааг шүүхийн санаачлагаар сунгах хуулийн үндэслэлгүй болно.

Анхан шатны шүүхээс "М УТҮГ-ын дүрмийн 4.3-т заасны дагуу "М УТҮГ-т Нийгэм жендэрийн оролцоог хангах асуудал хариуцсан захирлаар ажиллаж байсан З.Зг ажлаас халахдаа /чөлөөлөхдөө/ "М УТҮГ-ын дүрэм, Хөтөлбөр хэрэгжүүлэх гэрээ, Хүний нөөцийн гарын авлага-Хөдөлмөрийн дотоод журам зэрэгт тусгасан дээрх заалтуудын дагуу МСК-аас зөвшөөрөл аваагүй байна" гэж дэслэснийг хуулийг буруу тайлбарлаж хэрэглэсэн гэж үзэж байна. Мгийн Гүйцэтгэх захирлын Б/001 дугаар тушаалаар Монголын МСС-ийн Нийгэм, жендэрийн оролцоог хангах асуудал хариуцсан захирлын албан тушаалаас З.Зг чөлөөлсөн. Ийнхүү чөлөөлсний дараа 2021 оны 02 дугаар сарын 21-ний өдөр Мянганы сорилтын корпорацаас Нийгэм, жендэрийн оролцоог хангах асуудал хариуцсан захирлын албан тушаалд сонгон шалгаруулалт зарлаж, шинээр ажилтан сонгон шалгаруулах зөвшөөрлийг олгосон. Үүнийг Иргэний хуулийн 53 дугаар зүйлийн 53.1 дэх хэсэгт зааснаар АНУ-ын Мянганы сорилтын корпорациас хожим дэмжин зөвшөөрсөн гэж үзэж байна.

Гурав: Шүүхээс хэрэглэвэл зохих хууль тогтоомжийг огт хэрэглээгүй. Уг Засгийн газрын 2016 оны 176 дугаар тогтоолоор батлагдсан "Гадаадын тусламж авах, зарцуулах, удирдах, бүртгэх, тайлагнах журам"-ын 15.5-т "... ажилтнууд нь төсөл хэрэгжүүлэгч байгууллагын төсвийн шууд захирагч болон төслийн зохицуулагч нартай хөлсөөр ажиллах гэрээ байгуулна. Хөлсөөр ажиллах гэрээг байгуулахдаа гадаадын тусламжийн асуудал эрхэлсэн Засгийн газрын гишүүний баталсан Хөлсөөр ажиллах гэрээний загвар болон Ажлын байрны тодорхойлолтын загвармаягтыг баримтална"гэж, мөн 15.6- т "Төсөл хэрэгжүүлэх нэгжийн ажилтнуудтай байгуулах хөлсөөр ажиллах гэрээг 1 жилээс ихгүй хугацаагаар байгуулах бөгөөд гэрээ нь тухайн хуанлийн жилийн эцсээр дуусгавар байхаар зохион байгуулна" гэж тус тус зохицуулсан байна. М нь Нийгэм жендэрийн асуудал хариуцсан захирал З.Зтай "Хөдөлмөрийн гэрээ байгуулсан байх боловч дээрх хууль тогтоомжуудад нийцсэн эсэхийг-шүүх анхаарч үзэх ёстой байсан. Хөлсөөр ажиллах гэрээг цуцлах үндэслэл ажил олгогчийн санаачлагаар хөдөлмөрийн гэрээг цуцлах үндэслэлээс ялгаатай хуульчлагдсан байдаг бөгөөд З.Згийн гаргасан удаа дараагийн зөрчлүүд нь хөлсөөр ажиллах гэрээг цуцлах хангалттай шалтгаан, үндэслэл болно гэж үзэж байна.

Дөрөв: Анхан шатны шүүхээс Хүний нөөцийн гарын авлага-Хөдөлмөрийн дотоод журмын 11.2-т дараах тохиолдлуудыг ноцтой зөрчилд тооцож хөдөлмөрийн гэрээг ажил олгогчийн санаачлагаар цуцална. Үүнд: гээд а-о хүртэл 14 зөрчлийг тоочин заасан.

Нэхэмжлэгч З.З нь Хүний нөөцийн гарын авлага Хөдөлмөрийн дотоод журамд заасан дээрх ноцтой зөрчлүүдийг гаргасан болох нь хэрэгт авагдсан баримтуудаар хангалттай нотлогдохгүй байна ..." гэж шийдвэрлсэнд гомдолтой байна. Учир нь З.Зд сануулах сахилгын шийтгэл оногдуулсан Монголын Мгийн гүйцэтгэх захирлын 2020 оны 10 дугаар сарын 14-ний өдрйин Т/003 дугаар тушаалаар сахилгын шийтгэл оногдуулсан, 2021 оны 02 дугаар сарын 05-ны өдрийн Б/001 дугаар тушаалаар тус тус нэхэмжлэгч З.З нь хөдөлмөрийн гэрээгээр хүлээсэн үүргээ удаа дараа зөрчсөн, хөдөлмөрийн ноцтой зөрчил гаргасан нь тогтоогдсон тул Хөдөлмөрийн тухай хуулийн 40 дүгээр зүйлийн 40.1.4-т заасныг үндэслэн түүнтэй байгуулсан хөдөлмөрийн гэрээг хугацаанаас нь өмнө цуцалсан байдаг. З.З нь энэхүү үндсэн үүргээ гүйцэтгэх ажиллах мэргэжлийн болон бусад шаардлагатай суурь мэдлэг, ур чадвар маш муу, тухайн ажлын байранд тавигдаж буй дүн шинжилгээ хийх болон бусад ур чадварын шаардлагыг хангахгүй байгаа нь удаа дараагийн алдаа дутагдал, тэдгээрээс улбаатай ёс зүйн зөрчлөөс харагдаж байгаа тухай Монголын МСС-ийн Гүйцэтгэх захирлын орлогчийн гаргасан ажил байдлын тодорхойлолтоор тоггоогддог. Ажилтан З.З нь түүнтэй байгуулсан хөдөлмөрийн гэрээний 2.1-т "А Хавсралтад заасан ажил үүрэг ("Ажил үүрэг" гэх)-ийг үнэнч шударга, шаргуу байдлаар, мэргэжлийн болон ёс зүйн хамгийн өндөр хэм хэмжээнд нийцүүлэн, цаг хугацаанд нь гүйцэтгэх бөгөөд ингэхдээ өөрийн мэргэшлийн чадавхын хүрээнд Монголын МСС-ийн эрх ашгийг эн тэргүүнд тавьж буюу Монголын МСС-аас зааварласны дагуу ажиллана" 2.2-т "Ажпын цаг, хүч чармайлтаа бүхэлд нь Монголын МСС-ийн ажил хэрэг, үйл ажиллагаанд зориулна..." 2.3-т "Холбогдох хууль тогтоомж, Монголын МСС-ийн бодлогын болон байгууллагын дотоод баримт бичиг, тэдгээрт тухай бүр орсон нэмэлт өөрчлөлт, түүнчлэн Ажил үйлчилгээтэй холбогдуулан Монголын МСС-аас өгсөн аливаа удирдамж, чиглэлд нийцүүлж ажиллана" 8.1,1-т "Ашиг сонирхлын зөрчил болон ёс зүйтэй холбоотой Монголын МСС-ийн бодлого, дүрэм, журмыг дагаж мөрдөх..." 8.1.4- т "Ажилтан нь албан үүрэг болон амин хувийн ажил хэргийг гүйцэтгэхдээ өөртөө болон Монголын МСС-ийн итгэх итгэлийг нэмэгдүүлж, цэгц шударга байдлыг хадгалах зарчмыг баримтална" гэж тус тус заасан үүргээ зөрчсөн нь хэрэгт авагдсан нотлох баримтаар тогтоогддог. Иймд дээрх үндэслэлүүдээр анхан шатны шүүхийн шийдвэрт өөрчлөлт оруулж нэхэмжлэлийн шаардлагыг бүхэлд нь хэрэгсэхгүй болгож өгнө үү. Жич: М УТҮГ нь Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар улсын тэмдэгтийн хураамжаас чөлөөлөгдөнө гэжээ.

ХЯНАВАЛ:

Анхан шатны шүүхийн шийдвэр Иргэний хэрэг шүүхэд хянан шийдвэрлэх тухай хуулийн 116 дугаар зүйлийн 116.2 дахь хэсэгт заасан Шүүхийн шийдвэр хууль ёсны бөгөөд үндэслэл бүхий байна гэсэн шаардлагыг хангаагүй байна гэж үзлээ.

Нэхэмжлэгч З.З нь хариуцагч М УТҮГ-т холбогдуулан 2020 оны 10 дугаар сарын 14-ний өдрийн Т/003 тоот, 2021 оны 2 дугаар сарын 05-ны өдрийн Б/001 дугаартай тушаалуудыг хүчингүй болгуулж, урьд эрхэлж байсан ажилд эгүүлэн тогтоолгож, ажилгүй байсан хугацааны олговорт 34 433 962 төгрөг гаргуулах, нийгмийн болон эрүүл мэндийн даатгалын дэвтэрт нөхөн бичилт хийлгүүлэх тухай нэхэмжлэлийн шаардлага гаргасныг хариуцагч эс зөвшөөрч маргажээ.

Хэрэгт авагдсан нотлох баримтаас үзэхэд М УТҮГ-ын гүйцэтгэх захирлын 2020 оны 10 дугаар сарын 14-ний өдөр Т/003 тоот тушаалаар Нийгэм, жендерийн оролцоог хангах асуудал хариуцсан захирал З.Зд сахилгын сануулах арга хэмжээ авч, уг тушаалдаа Хөдөлмөрийн гэрээний 8.1.1., 8.1.4, Хүний нөөцийн гарын авлага-хөдөлмөрийн дотоод журмын 11.2, ёс зүйн дүрмийн 15.2.т заасныг,

2021 оны 2 дугаар сарын 05-ны өдөр Б/001 тоот тушаалаар З.Зтай байгуулсан хөдөлмөрийн гэрээг цуцалж, түүнийг үүрэгт ажлаас нь халахдаа Хөдөлмөрийн тухай хуулийн 38 дугаар зүйлийн 38.1.2, 40 дүгээр зүйлийн 40.1.4, Хүний нөөцийн гарын авлага-хөдөлмөрийн дотоод журмын 2.2, 11.2, хөдөлмөрийн гэрээний 2.1-2.3, 6.1-6.3, 8.1.1, 8.1.4 дэх заалтуудыг тус тус баримталсан байна. /1хх.9-11, 2хх.205/

Хөдөлмөрийн тухай хуулийн 40 дүгээр зүйлийн 40.1.4-т Ажилтан хөдөлмөрийн сахилгын зөрчлийг давтан гаргасан, эсхүл хөдөлмөрийн харилцааг шууд зогсоохоор хөдөлмөрийн гэрээнд тухайлан заасан ноцтой зөрчил гаргасан тохиолдолд ажил олгогчийн санаачилгаар хөдөлмөрийн гэрээг цуцлахаар заажээ.

Хуульд заасан сахилгын зөрчлийг давтан гаргасан эсхүл хөдөлмөрийн харилцааг шууд зогсоохоор гэрээнд тухайлан заасан ноцтой зөрчил гаргасан нь тогтоогдсон байх шаардлагатай бөгөөд зөрчил гаргасан эсэх асуудлаар зохигчид маргаж байгаа тохиолдолд ажил олгогчийн зүгээс ажилтны гаргасан зөрчлийг нотлох үүрэгтэй болно.

Хэрэгт авагдсан нотлох баримтаас үзэхэд ажил олгогчийн зүгээс ажилтан З.Згийн гаргасан зөрчлийг эргэлзээгүй баримтаар нотолсон дотоод зохицуулалтын журамд заасны дагуу зохих хороог байгуулан түүний дагуу арга хэмжээ авсан гэдэг нөхцөл байдлаа нотолсон баримтыг шүүхэд гаргаагүй, уг байдал нь хэргийн баримтаар тогтоогдохгүй байна.

Тухайлбал, анхан шатны шүүх ажил олгогч байгууллага Хүний нөөцийн гарын авлага-хөдөлмөрийн дотоод журмын хавсралт 17-д заасан журмыг баримтлаагүй сахилгын шийтгэлийг ногдуулсан, мөн ажил олгогч ажилтанг ажлаас халсан үндэслэл нь уулзалтын тэмдэглэлүүдээр нотлогдоно гэж тайлбар гаргаж байгаа боловч, уг уулзалтуудаар ямар асуудлыг шийдвэрлэж байсан болон нэхэмжлэгчийн гаргасан зөрчлүүд дээр тухай бүр нь тайлбар авч байсан байдлаа нотлоогүй гэж дүгнэсэн нь буруу биш юм. Иймд анхан шатны шүүх ажил олгогч М УТҮГ-ын сахилгын шийтгэл ногдуулсан болон ажлаас чөлөөлсөнтэй холбоотой тушаалуудыг хууль бус гэж үзснийг буруутгах боломжгүй юм. Иймд ажил олгогч нь ажилтанд сануулах сахилгын шийтгэл болон ажлаас чөлөөлөх тушаалуудыг гаргахдаа үндэслэлээ нотолж чадаагүй гэж үзсэн анхан шатны шүүхийн дүгнэлт үндэслэлтэй.

Иймд анхан шатны шүүх ажил олгогч М УТҮГ-ын гүйцэтгэх захирлын 2020 оны 10 дугаар сарын 14-ний өдрийн Т/003 тоот тушаал, 2021 оны 02 дугаар сарын 05-ны өдрийн Б/001 дугаартай тушаалыг тус тус хүчингүй болгож шийдвэрлэснийг буруутгах боломжгүй байна.

Иргэний хэрэг шүүхэд хянан шийдвэрлэх тухай хуулийн 166 дугаар зүйлийн 166.4 дэх хэсэгт зааснаар давж заалдах журмаар хэрэг хянан шийдвэрлэж буй шүүх зөвхөн гомдолд дурдсан үндэслэлээр хязгаарлалгүй хэргийг бүхэлд нь хянах үүргийг хүлээдэг.

Хэрэгт авагдсан нотлох баримтаас үзэхэд М УТҮГ нь З.Зтай 2019 оны 5 дугаар сарын 15-ны өдрөөс 2020 оны 5 дугаар сарын 15-ны өдрийг хүртэл 1 жилийн хугацаатай хөдөлмөрийн гэрээг байгуулжээ. /1хх.108-122/

Харин анхан шатны шүүх хөдөлмөрийн гэрээний хугацаа дуусахад ажил олгогч ажилтанг ажлаас нь чөлөөлөөгүй, ажилтан ажлаа үргэлжлүүлэн хийсээр байсан тул Хөдөлмөрийн тухай хуулийн 23 дугаар зүйлийн 23.3 дахь хэсэгт зааснаар уг гэрээний хугацааг жил бүрийн 5 дугаар сарын 15-ны өдрөөс мөн хугацаагаар сунгагдсанд тооцно гэж дүгнэж нэхэмжлэгч З.Зг Нийгэм, жендерийн оролцоог хангах асуудал хариуцсан захирал ажилд нь эгүүлэн тогтоосон хууль зүйн үндэслэл муутай болсон байна гэж давж заалдах шатны шүүх дүгнэв.

Учир нь, Хөдөлмөрийн тухай хуулийн 23 дугаар зүйлийн 23.3 дахь хэсэгт Хөдөлмөрийн хугацаатай гэрээний хугацаа дуусмагц талууд түүнийг цуцлах санал тавиагүй бөгөөд ажилтан ажлаа гүйцэтгэсээр байгаа бол уг гэрээг анх заасан хугацаагаар сунгагдсанд тооцно гэж заасан бөгөөд талуудын хооронд байгуулсан хөдөлмөрийн гэрээний хугацаа 2021 оны 5 дугаар сарын 15-ны өдөр дууссан байна.

Хөдөлмөрийн тухай хуулийн 23 дугаар зүйлийн 23.2.2-т энэ хуулийн 23.2.1-д заасан хөдөлмөрийн гэрээг талууд харилцан тохиролцсоноор хугацаатай байгуулахаар заасан нь ажилтан, ажил олгогчийн тохиролцооны үндсэн дээр тодорхой үндэслэл шаардлага үүссэн тохиолдолд хөдөлмөрийн гэрээг хугацаатай байгуулах нөхцлийг заажээ.

Талуудын хооронд байгуулагдсан хөдөлмөрийн гэрээгээр хүлээж буй ажил үүрэгтэй холбоотой нөхцөлүүдийг зохигчид нэг бүрчлэн тохирсон, ажилтан өөрөө үүнийг хүлээн зөвшөөрч гарын үсгээ зуржээ. Иймд хөдөлмөрийн гэрээг нэг жилийн хугацаатай байгуулсан бөгөөд тус гэрээнд цаашид үргэлжлүүлэн ажиллуулах, гэрээг талуудын хүсэл зоригийн илэрхийлэлгүйгээр сунгах талаар заагаагүй байна.

Хөдөлмөрийн тухай хуулийн 23 дугаар зүйлийн 23.3 дахь хэсэгт ажил олгогч татгалзаагүй байх болон ажил үүргээ үргэлжлүүлэн гүйцэтгэж байгаа гэх урьдчилсан нөхцөл бүрдсэн юм. Өөрөөр хэлбэл Хөдөлмөрийн тухай хуульд зааснаар гэрээг сунгах эсэх, хугацаагүй гэрээ байгуулах эсэх нь ажил олгогчийн эрх, талуудын харилцан тохиролцох асуудал юм. Гэрэээгээр тохирсон хугацаа дууссан боловч ажил олгогч ажилтанг ажилд авахыг зөвшөөрснөөр мөн хугацаагаар сунгагдсанд тооцогдоно.

Ажил олгогч ажилтан З.Зд сахилгын шийтгэл ногдуулсан болон түүнтэй байгуулсан хөдөлмөрийн гэрээг цуцалж, ажлаас халсан асуудлыг ажилтан эс зөвшөөрч шүүхэд хандан хөдөлмөрийн эрх зүйн маргаан үүссэн гэсэн, ажил олгогч уг нэхэмжлэлийн шаардлагыг эс зөвшөөрч маргасан ажил олгогч ажилтанг ажиллуулахыг татгалзаагүй, ажилтан ажил үүргээ үргэлжлүүлэн гүйцэтгэж байгаа гэж үзэх үндэслэл тогтоогдоогүй байна.

Өөрөөр хэлбэл, гэрээгээр тохирсон хөдөлмөрийн гэрээний хугацаа дууссан, цаашид сунгагдана гэж үзэх хууль зүйн үндэслэл тогтоогдоогүй байх тул хөдөлмөрийн гэрээний хугацааг 2021 оны 5 дугаар сарын 15-ны өдөр дуусгавар болсон гэж үзнэ.

Дээрх үндэслэлээр анхан шатны шүүхийн шийдвэрт нэхэмжлэгч З.Зг М УТУГ-ын Нийгэм, жендерийн оролцоог хангах асуудал хариуцсан захирлын ажилд эгүүлэн тогтоолгох нэхэмжлэлийн шаардлагыг хэрэгсэхгүй болгосон өөрчлөлтийг шүүхийн шийдвэрт оруулах нь зүйтэй байна.

Ажил олгогчоос ажилгүй байсан хугацааны олговор буюу хууль бус тушаал гаргаж ажлаас чөлөөлсөн хугацаа буюу 2021 оны 5 дугаар сарын 15-ны өдрийг хүртэлх хугацааны олговорт 19 669 838 төгрөгийг хариуцагч байгууллагаас гаргаж нэхэмжлэгчид олгож, нэхэмжлэлийн шаардлагын үлдэх 14 764 124 төгрөгийг хэрэгсэхгүй болгох нь зүйтэй байна. Улсын тэмдэгтийн хураамжийн тухай хуулийн 41 дүгээр зүйлийн 41.1.1-т зааснаар төсвийн байгууллагын нэхэмжлэл тэмдэгтийн хураамжаас чөлөөлөгдөхөөр заасан тул нэхэмжлэгчийн нэхэмжлэлийн шаардлагаас 19 669 838 төгрөгт ногдох улсын тэмдэгтийн хураамжийг хариуцагч байгууллагаас гаргуулж улсын орлого болгох нь зүйтэй .

Иргэний хэрэг шүүхэд хянан шийдвэрлэх тухай хуулийн 167 дугаар зүйлийн 167.1.2-т заасныг удирдлага болгон ТОГТООХ нь:

 

1.   Сүхбаатар дүүргийн Иргэний хэргийн анхан шатны шүүхийн 2021 оны 06 сарын 28-ны өдрийн 181/ШШ2021/01296 дугаар шийдвэрийн

тогтоох хэсгийн 1, 2 дахь заалтыг нэгтгэн уг заалтад ...Хөдөлмөрийн тухай хуулийн 128 дугаар зүйлийн 128.1.2-т заасан үндэслэл тогтоогдохгүй байх тул З.Зг М УТУГ-ын Нийгэм, жендерийн оролцоог хангах асуудал хариуцсан захирлын ажилд эгүүлэн тогтоолгох шаардлагыг хэрэгсэхгүй болгож, Хөдөлмөрийн тухай хуулийн 46 дугаар зүйлийн 46.2-т заасныг баримтлан ажилгүй байсан хугацааны дээрх цалингийн олговроос нийгмийн даатгал, эрүүл мэндийн даатгалын шимтгэлийг хуульд заасан хэмжээгээр нөхөн суутгаж зохих байгууллагад шилжүүлэн, нийгмийн болон эрүүл мэндийн даатгалын дэвтэрт бичилт хийхийг хариуцагчид даалгуулах шаардлагыг хэрэгсэхгүй болгож, Хөдөлмөрийн тухай хуулийн 69 дүгээр зүйлийн 69.1 дэх хэсэгт зааснаар ажилгүй байсан хугацааны нөхөн олговорт 19 669 838 төгрөгийг хариуцагч байгууллагаас гаргуулж нэхэмжлэгчид олгож, үлдэх 14 764 124 төгрөгийг хэрэгсэхгүй болгосугай гэж,

тогтоох хэсгийн 3 дахь заалтыг Улсын тэмдэгтийн хураамжийн хуулийн тухай 7 дугаар зүйлийн 7.1.1, 41.1.5-т зааснаар нэхэмжлэгч улсын тэмдэгтийн хураамжаас чөлөөлөгддөг болохыг дурдаж, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 60 дугаар зүйлийн 60.1 дэх хэсэгт зааснаар хариуцагчаас тэмдэгтийн хураамжид 256 299 төгрөг гаргуулан улсын орлогод оруулсугай гэж тус тус өөрчлөн, шийдвэрийн бусад заалтыг хэвээр үлдээсүгэй.

2.   Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар нэхэмжлэгч З.Згийн давж заалдах журмаар гаргасан гомдол улсын тэмдэгтийн хураамжаас чөлөөлөгдсөн болохыг дурдсугай.

3.   Иргэний хэрэг шүүхэд хянан шийдвэрлэх тухай хуулийн 167 дугаар зүйлийн 167.3, 172 дугаар зүйлийн 172.1 дэх хэсэгт зааснаар магадлал танилцуулан сонсгомогц хүчинтэй болох бөгөөд зохигч, гуравдагч этгээд, тэдгээрийн төлөөлөгч буюу өмгөөлөгч эс зөвшөөрвөл гардан авсан, эсхүл хүргүүлснээс хойш 14 хоногийн дотор хяналтын журмаар Улсын Дээд шүүхэд гомдол гаргах эрхтэй болохыг тайлбарласугай.

4.   Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.4, 119.7 дахь хэсэгт зааснаар магадлалыг танилцуулан сонсгож, 14 хоног өнгөрснөөс хойш 14 хоногийн дотор шүүх хуралдааны оролцогч талууд шүүхэд хүрэлцэн ирж магадлалыг өөрөө гардан авах үүргээ биелүүлээгүй нь хяналтын журмаар гомдол гаргах хугацааг тоолоход саад болохгүй бөгөөд шүүх хуралдаанд оролцоогүй талд магадлалыг гардуулснаар гомдол гаргах хугацааг тоолохыг мэдэгдсүгэй.

 

 

ЕРӨНХИЙ ШҮҮГЧ Ж.ОЮУНТУНГАЛАГ

ШҮҮГЧИД Д.ДЭЛГЭРЦЭЦЭГ

 

Ц.ИЧИНХОРЛОО