МОНГОЛ УЛСЫН НЭРИЙН ӨМНӨӨС

 

Хан-Уул дүүргийн Иргэний хэргийн анхан шатны шүүхийн шүүгч Д.Энхцэцэг даргалж, тус шүүхийн танхимд хийсэн шүүх хуралдаанаар,

Нэхэмжлэгч: Б.Х-ын нэхэмжлэлтэй,

Хариуцагч: Л.П-д холбогдох,

үндэслэлгүйгээр олж авсан 2 500 000 төгрөг гаргуулах тухай иргэний хэргийг хянан хэлэлцэв.

Шүүх хуралдаанд: нэхэмжлэгчийн итгэмжлэгдсэн төлөөлөгч П.Б*******,  хариуцагчЛ.П*******, шүүх хуралдааны нарийн бичгийн даргаар Б.Баянжаргал нар оролцов.

                                                                                                         ТОДОРХОЙЛОХ нь:

 

Нэхэмжлэгчийн итгэмжлэгдсэн төлөөлөгч П.Б******* шүүх хуралдаанд тайлбарлахдаа: Манай охин Солонгос улс руу явах болоод виз гаргана гэсэн сонины зарын дагуу энэ залуутай уулзсан байдаг. Өөрийн бүх бичиг баримтаа энэ хүнд өгч, 2 500 000 төгрөгийг өөрийнх нь өгсөн данс руу шилжүүлсэн байна. Тэр яриад байгаа Г******* гэдэг хүнийг бид танихгүй, уулзаж байгаагүй тул энэ хүнээс л мөнгөө нэхнэ. Тэгээд ч энэ П******* нь 2016 оны 4 сар хүртэл биднийг хүлээж бай, мөнгийг чинь найдвартай өгнө гэж явсан. Зээлийн гэрээний тухайд энэ хүн л өөрөө мөнгө авсанаа баталгаажуулж байна гээд хийсэн байдаг. Манай охин өөр шугамаар виз нь гараад явсан, энэ хүн ямар ч бичиг баримт хөөцөлдөж өгөөгүй тул бид улаан паспортоо буцаан авсан гэв.

Хариуцагч Л.П******* шүүх хуралдаанд тайлбарлахдаа: Би анхнаасаа Г*******т их итгэдэг байсан, 10-д жилийн өмнөөс мэддэг манай багшийн эхнэр юм. Намайг сонинд зар тавьчих гэсний дагуу би Солонгос улсын виз гаргана гэсэн зар тавьсан. Энэ дагуу Х******* ирж уулзаад виз гаргуулах талаар ярихад би Г*******ын талаар хэлж байсан. Мөн Г*******ын хэлсэнээр би дансны дугаараа өгч мөнгө миний дансанд орж ирсэн. Энэ мөнгийг би хэрэглээгүй, Г******* нь үүнээс гадна хэд хэдэн хүнээс мөнгө авч намайг өрөнд оруулсан. Энэ талаар би Цагдаагийн газарт өргөдөл гаргасан, би өөрөө хохирогчоор тогтоогдсон байгаа. Би энэ мөнгийг хэрэглээгүй учраас зөвшөөрөхгүй байгаа гэв. 

Хэрэгт цугларсан болон шүүх хуралдаанаар хэлэлцэгдсэн нотлох баримтуудыг шинжлэн судлаад

                                                                                                                 ҮНДЭСЛЭХ нь:

Нэхэмжлэгч Б.Х******* нь зээлийн гэрээний үүрэг 2 500 000 төгрөгийг хариуцагчаас шаардсан боловч шүүх талуудын хооронд зээлийн харилцаа үүсээгүй, харин хариуцагч Л.П*******ыг үндэслэлгүйгээр бусдаас мөнгө авсан гэж дүгнээд нэхэмжлэлийн шаардлага 2 500 000 төгрөгийг хариуцагчаас гаргуулж нэхэмжлэгчид олгохоор шийдэв.

 

Шүүх хуралдааны явцад нэхэмжлэгч Б.Х******* нь “Солонгос улс руу виз” гаргана гэсэн зарын дагуу хариуцагч Л.П*******тай холбогдож, улмаар түүний Хаан банкны дансанд 2015.11.04-нд 2 000 000 төгрөг, 2015.11.13-нд 500 000 төгрөгийг тус тус шилжүүлсэн болох нь талуудын тайлбар, гэрч Г.Г*******ын мэдүүлэг, мөнгөн шилжүүлгийн баримтаар тус тус тогтоогдсон байна.  

 

Талуудын хооронд 2 500 000 төгрөгийг 3 сарын хугацаатай зээлдүүлсэн мэтээр 2015.11.04-ний өдөр зээлийн гэрээ байгуулж, гарын үсэг зурсан байх боловч мөнгө зээлдүүлээгүй, зээлийн харилцаа үүсээгүй болохыг зохигчид хүлээн зөвшөөрсөн болно.

 

Иргэний хэрэг шүүхэд хянан шийдвэрлэх тухай хуулийн 25 дугаар зүйлийн 25.2, 25.2.1, 25.2.2-т зааснаар нэхэмжлэгч Б.Х*******, түүний итгэмжлэгдсэн төлөөлөгч нар хэргийн талаар үнэн зөв тайлбар гаргах, нэхэмжлэлийн шаардлага болон үндэслэл, түүнтэй холбоотой баримтыг өөрөө нотлох, нотлох баримтыг гаргаж өгөх үүрэгтэй бөгөөд хуулиар хүлээсэн үүргээ биелүүлээгүй байна гэж үзлээ.

 

Хариуцагч Л.П*******, гэрч Г.Г******* нар нь удаа дараа Солонгос улсын виз гаргаж өгөх зорилгоор бусдаас мөнгө авч байсан байх бөгөөд нэхэмжлэгч Б.Х*******аас дээрх зорилгоор 2 500 000 төгрөгийг хариуцагчаар дамжуулан Г.Г******* нь авсанаа хүлээн зөвшөөрсөн байна.

 

Гэвч нэхэмжлэгч Б.Х******* нь анх хариуцагч Л.П*******ын зарын дагуу холбогдож, түүний дансанд мөнгө шилжүүлсэн байх тул Иргэний хуулийн 492 дугаар зүйлийн 492.1, 492.1.1-д зааснаар хариуцагч тал бусдын эд хөрөнгийг үндэслэлгүйгээр олж авсан байна гэж үзэх үндэстэй, нэхэмжлэгч нь шаардах эрхтэй байна.

 

Хариуцагч Л.П******* нь хамтран ажиллаж байсан Г.Г*******ын талаар өөрийг нь залилсан гэх үндэслэлээр Цагдаагийн байгууллагад гомдол гаргасан байх тул өөрт учирсан хохирлоо шийдвэрлүүлэх боломжтой байна.  

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116, 118дугаар зүйлд заасныг удирдлага болгон

 

                                                                                                                    ТОГТООХ нь:

 

1. Иргэний хуулийн 492 дугаар зүйлийн 492.1, 492.1.1, 493 дугаар зүйлийн 493.1-д зааснаарЛ.П*******ас 2 500 000 төгрөг гаргуулж Б.Х*******д олгосугай.

 

2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 60 дугаар зүйлийн 60.1, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаархариуцагчаас 54 950 төгрөгийг гаргуулж Б.Х*******д  олгож, нэхэмжлэгчийн улсын тэмдэгтийн хураамжид 54 950 төгрөгийг улсын төсвийн орлогод хэвээр үлдээсүгэй.

 

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2-т зааснаар шийдвэрийг танилцуулан сонсгомогц хуулийн хүчинтэй болохыг дурьдсугай.

4. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар шийдвэрийг зохигчид, тэдгээрийн төлөөлөгч болон өмгөөлөгчид гардаж авснаас хойш 14 хоногийн дотор Нийслэлийн давж заалдах шатны шүүхэд гомдол гаргах эрхтэй болохыг дурдсугай.

 

 

 

 

 

 

 

ДАРГАЛАГЧ                                  Д.ЭНХЦЭЦЭГ