МОНГОЛ УЛСЫН НЭРИЙН ӨМНӨӨС

Хэргийн индекс: 166/2018/0390/Э

Дархан-Уул аймаг дахь сум дундын Эрүүгийн хэргийн анхан шатны шүүхийн Ерөнхий шүүгч Я.Туул даргалж,

Шүүх хуралдааны нарийн бичгийн дарга Ц.Ганхуяг,

Улсын яллагчаар Аймгийн прокурорын газрын хяналтын прокурор А.Оргилбаяр,

Хохирогчийн хууль ёсны төлөөлөгч Б.Удвал,

Шүүгдэгч Н /өөрөө өөрийгөө өмгөөлөх хүсэлт гаргасан тул өмгөөлөгч оролцоогүй/ нарыг оролцуулан тус шүүхийн танхимд нээлттэй хийсэн шүүх хуралдаанаар Дархан-Уул аймгийн Прокурорын газраас Эрүүгийн хуулийн тусгай ангийн 27.10 дугаар зүйлийн 1-т заасан гэмт хэрэгт холбогдуулан яллах дүгнэлт үйлдэж ирүүлсэн Н-д  холбогдох эрүүгийн 1818007810450 дугаартай хэргийг 2018 оны 11 дүгээр сарын 02-ны өдөр хүлээн авч, хянан хэлэлцлээ.

Шүүгдэгчийн биеийн байцаалт:

Монгол Улсын иргэн,   Н 1994 оны 9 дүгээр сарын 4-ний өдөр Сэлэнгэ аймгийн Ерөө сумын Бугант тосгонд төрсөн, 24 настай, эрэгтэй, бүрэн бус дунд боловсролтой, жолооч мэргэжилтэй, хувиараа хөдөлмөр эрхэлдэг, ам бүл 3, улсаас авсан гавьяа шагналгүй, ял шийтгэлгүй.

Холбогдсон хэргийн талаар:

Шүүгдэгч Н нь 2018 оны 10 дугаар сарын 01-ний өдрийн 18 цагийн орчим Дархан-Уул аймгийн Дархан сумын 6 дугаар багийн нутаг дэвсгэр болох Ханжаргалангийн 8 дугаар гудамжны асфальтан зам дээр өөрийн өмчлөлийн ****** улсын дугаартай “Хюьндэй маяти” маркийн хөх өнгийн авто машиныг жолоодон замын хөдөлгөөнд оролцож явахдаа Монгол Улсын Замын хөдөлгөөний дүрмийн 9 дүгээр бүлгийн 9.1-т заасан “жолооч хөдөлгөөний эрчим, тээврийн хэрэгслийн онцлог байдал, тээж яваа ачаа, замын болон цаг агаарын нөхцөл, хөдөлгөөний дагуу үзэгдэлтийг харгалзан тээврийн хэрэгслийн хурдыг энэ дүрэмд тогтоосон хязгаараас хэтрүүлэхгүйгээр сонгож явна”, 9.2-т “жолооч хөдөлгөөнд аюул, саад бий болохыг мэдсэн үед тээврийн хэрэгслийн хурдыг хасаж, зайлшгүй тохиолдолд зогсоох арга хэмжээг авна” гэсэн дүрмийн заалтуудыг зөрчсөний улмаас зам хөндлөн гарч гүйсэн явган зорчигч 7 настай М-г мөргөж, эрүүл мэндэд нь хүндэвтэр хохирол учруулсан гэмт хэрэгт холбогджээ. /Яллах дүгнэлтэд бичигдсэн байдлаар/

ТОДОРХОЙЛОХ нь:

1.Гэм буруугийн талаар:

Шүүгдэгч Н нь 2018 оны 10 дугаар сарын 01-ний өдрийн 18 цагийн орчим Дархан-Уул аймгийн Дархан сумын 6 дугаар багийн нутаг дэвсгэр болох Ханжаргалангийн 8 дугаар гудамжны асфальтан зам дээр өөрийн өмчлөлийн ****** улсын дугаартай “Хюьндэй маяти” маркийн хөх өнгийн авто машиныг жолоодон замын хөдөлгөөнд оролцож явахдаа Монгол Улсын Замын хөдөлгөөний дүрмийн 9 дүгээр бүлгийн 9.1-т заасан “жолооч хөдөлгөөний эрчим, тээврийн хэрэгслийн онцлог байдал, тээж яваа ачаа, замын болон цаг агаарын нөхцөл, хөдөлгөөний дагуу үзэгдэлтийг харгалзан тээврийн хэрэгслийн хурдыг энэ дүрэмд тогтоосон хязгаараас хэтрүүлэхгүйгээр сонгож явна”, 9.2-т “жолооч хөдөлгөөнд аюул, саад бий болохыг мэдсэн үед тээврийн хэрэгслийн хурдыг хасаж, зайлшгүй тохиолдолд зогсоох арга хэмжээг авна” гэсэн дүрмийн заалтуудыг зөрчсөний улмаас зам хөндлөн гарч гүйсэн явган зорчигч 7 настай М мөргөж, эрүүл мэндэд нь хүндэвтэр хохирол учруулж, Эрүүгийн хуулийн тусгай ангийн 27.10 дугаар зүйлийн 1-т заасан гэмт хэрэг үйлдсэн гэм буруутай болох нь:           

-Шүүгдэгч Х.Н-н шүүхийн хэлэлцүүлэгт өгсөн: “…2018 оны 10 дугаар сарын 01-ний өдөр 12 цагийн үед хоосон ачааны машинтайгаа Дархан руу гараад явж байтал ­Ерөө, Бугант хоёрын хооронд Баянгол гэдэг газар эхнэр нөхөр 2 тааралдсан. Машиныг нь өөрийнхөө машин дээрээ ачаад Дархан руу хөдлөөд орой 18 цаг өнгөрч байхад Дархан руу орж ирсэн. Тэгээд Дархан руу Сэлэнгээс орж ирэхэд байдаг “Гэгээ” дэлгүүрийн хажуугаар зүүн гар тийшээ эргээд гэр хороолол дунд байдаг асфальтан замаар яваад авто засварын газар очиж машиныг буулгах гээд эргээд явж байсан. Миний баруун гар талаас гэр хорооллын гудамжнаас 2-3 хүүхэд гүйгээд гараад  ирэхээр нь сигналдаад тоормосоо гишгэсэн чинь 2 хүүхэд нь буцаад гүйсэн. Нэг хүүхэд нь машины урдуур зам хөндлөн гүйсэн. Тэгээд би тэр хүүхдийг мөргөхгүй гээд зүүн гар тал руугаа даялаад дарсан чинь тэр хүүхэд бас миний машиныг дагаад гүйсэн. Тэгээд тоормослоод зогсоход тэр хүүхдийг машиныхаа зүүн гар талынхаа урд хэсгээр мөргөхөд тэр хүүхэд ч зам дээр унасан. Би сандраад тэр хүүхдийг тойрч машинаа зам чөлөөлж, замынхаа баруун гар талыг шахаж тавиад машинаасаа буусан. Хүүхэд дээр гүйгээд ирсэн чинь мөргүүлсэн хүүхэд замын хойд талд шороон зам, асфальтан зам хоёрын зааг дээр уначихсан, тэндээсээ уйлаад зам дээр мөлхөж байсан. Хүүхдийг тэвэрч аваад эргээд хартал зүүн талаас эмнэлгийн машин явж таараад би эмнэлгийн машиныг зогсоогоод хүүхдийг тэврээд эмнэлгийн машинд суугаад эмнэлэг орсон.

...гэм буруугийн асуудал дээр маргаан байхгүй. Хохирогчийн эмчилгээний зардал, хоол ундны материал авч өгөх зэрэгт 1300000 төгрөг зарцуулсан.” гэх мэдүүлэг,

-Насанд хүрээгүй хохирогчийн хууль ёсны төлөөлөгч Б.У-ын шүүхийн хэлэлцүүлэгт өгсөн: “2018 оны 10 дугаар сарын 1-ний өдөр би тэр өдөр заслын ажил хийж байхад биржийн ар талын “Гэгээ” дэлгүүрийн арын зам дээр хүүхэд аваарт орсон гэсэн. Би ажил дээрээсээ эмнэлэг дээр очиход эмнэлэг дээр ирээгүй байсан, удалгүй эмнэлэг дээр тэврээд ороод ирсэн. Манай хүүхэд нүдний хагалгаанд ороод удаагүй байсан бөгөөд нүдний хагалгаанд орсон талаараа машинд мөргүүлсэн байсан. Хөмсөг нь задарсан шархтай, нуруу нь зулгарсан, хөл нь хугарсан байсан бөгөөд одоо ч нугас нуруу, толгой нь өвдөөд унтаж чадахгүй байгаа. Гипс авах болоогүй байгаа гээд аваагүй байгаа. Эмч нар 2018 оны 11 дүгээр сарын 26-ны өдөр ирээрэй гэсэн. Шүүгдэгчийн зүгээс 790000 төгрөг өгсөн. Мах, гурил, түлээ нүүрс авч өгч байсан боловч эдгээр нь ямар үнэтэй гэдгийг би хэлж мэдэхгүй байна. Хүүхдийнхээ цаашдын эмчилгээний зардалд 1 сая төгрөг нэхэмжилнэ.” гэх мэдүүлэг,

-Гэмт хэргийн талаарх гомдол, мэдээлэл хүлээн авсан тэмдэглэл /хэргийн 5/,

-Хэргийн газрын үзлэг хийсэн тэмдэглэл, гэрэл зургийн үзүүлэлт /хэргийн 6-10/,

-Зам тээврийн ослын газарт хийсэн тэмдэглэл, бүдүүвч зураг /хэргийн 11-12/,

-Насанд хүрээгүй хохирогчийн насыг тоолсон тухай тэмдэглэл, төрсний гэрчилгээний хуулбар /хэргийн 14-15/,

-Эд хөрөнгө битүүмжилсэн тухай тогтоол /хэргийн 16/,

-“Капитал Зууч” ХХК-ны гаргасан хөрөнгийн үнэлгээний тайлан /хэргийн 20-21/,

-Насанд хүрээгүй хохирогч У.М-ийн мөрдөн байцаалтын шатанд өгсөн: “Би он, сар, өдрийг нь санахгүй байна. Тэр өдөр би ах******ы хамт эгч ******ийн гэрээс гараад өөрийнхөө гэр лүү алхаад явж байтал тэр машин намайг ирж мөргөсөн. Машин миний зүүн талаас мөргөөд би машин зам дээр унаад баруун хөмсөгнөөс цус гарсан. Тэгээд би уйлаад байж байтал эмнэлэг дээр ирсэн байсан. Яаж эмнэлэг дээр ирснийг санахгүй байна.

... миний нуруу, хөл өвдөж байна. Хичээлдээ явахгүй хэвтэж байгаа.” гэх мэдүүлэг /хэргийн 26-27/,

-Гэрч Э.Л-ын мөрдөн байцаалтын шатанд өгсөн: "...миний унаж явсан машин маань Сэлэнгэ аймгийн Ерөө сумын нутаг Баянголын хөтөл гэх газарт эвдэрсэн. Тэгээд 3 хоног машин хүлээж байгаад өнөөдөр буюу 2018 оны 10 дугаар сарын 01-ний өдөр нэг цэнхэр толгойтой ачааны машин таараад ачуулсан. Би тухайн ачааны машины жолоочийн хажууд суугаад Дархан орж ирсэн. Тэгээд Дархан захын ар талд байдаг засварын газар буулгах гээд Сэлэнгэ талаас орж ирээд захын арын замаар салаад эргэж байхад нь би тамхи асаах гээд тонгойж байтал жолооч дуут дохио өгөөд тоормос гишгэсэн. Тэгэхээр нь би “яасан, юу болсон бэ?” гэж асуусан чинь жолооч “хүүхэд дайрчихлаа” гээд машинаа зогсоогоод буугаад явсан. Тэгээд би машинаас буухад түргэний машин бид хоёрын эргэж орж ирсэн уулзвараас эргээд орж ирсэн. Эмнэлгийн машинд хүүхдээ өргөж оруулаад, жолооч өөрийн машинаа замын голоос хөдөлгөөд замын хажуу руу шахаж зогсоогоод эмнэгийн машинд суугаад яваад өгсөн. Би машин хүүхэд мөргөсөн газрын хажууд зогсож байтал цагдаа нар ирсэн.” гэх мэдүүлэг /хэргийн 34/,

-Гэрч Д.Д-ийн мөрдөн байцаалтын шатанд өгсөн: “...манай нөхөр жолооч 2 машинаасаа бууж харагдсан. Тэгээд би таксинаасаа буугаад ирсэн чинь машины жолооч залуу гүйж ирээд зам дээр нэг жаахан хүүхэд мөлхөж байгаа юм шиг тонгойчихсон байсан. Тэгээд тэр залуу хүүхдийг тэврээд өргөхөд цаанаас нь эмнэлгийн машин гарч ирсэн. Эмнэлгийн машиныг зогсоогоод тэр хүүхдийг аваад явсан. Бид хоёрыг машин харж байгаарай гэж хэлсэн. Машиныг нь хараад байж байтал цагдаа нар ирсэн.’ гэх мэдүүлэг /хэргийн 36/,

-Насанд хүрээгүй гэрч Ц.М-ны мөрдөн байцаалтын шатанд өгсөн: “бид 2 замынхаа урд талд “Гэгээ” хүнсний дэлгүүрийн талын зам дагаад замын шороо хэсгээр гэр лүүгээ явж байсан. Би зам хөндлөн гараагүй. Мөнхтөр зам хөндлөн гарсан үгүйг мэдэхгүй байна. Миний урд талд явж байсан, нэг мэдсэн машинд мөргүүлчихсэн зам дээр хэвтэж байсан.” гэх мэдүүлэг /хэргийн 38/,

-“Н нь “Хюьндэй Маяти” маркийн ****** улсын дугаартай тээврийн хэрэгслийг жолоодож явах үедээ Монгол Улсын Замын хөдөлгөөний дүрмийн 9 дүгээр бүлгийн 9.1-т заасан “Жолооч хөдөлгөөний эрчим, тээврийн хэрэгслийн онцлог байдал, тээж яваа ачаа, замын болон цаг агаарын нөхцөл, хөдөлгөөний дагуу үзэгдэлтийг харгалзан тээврийн хэрэгслийн хурдыг энэ дүрэмд тогтоосон хязгаараас хэтрүүлэхгүйгээр сонгож явна”, 9.2-т “жолооч хөдөлгөөнд аюул, саад бий болохыг мэдсэн үед тээврийн хэрэгслийн хурдыг хасаж, зайлшгүй тохиолдолд зогсоох арга хэмжээг авна” гэсэн заалтыг тус тус зөрчсөн.

 У.Мөнхтөрийн асран хамгаалагч ээж Б.У нь Зөрчлийн тухай хуулийн 14.7 дугаар зүйлийн 54-т зааснаар “Эцэг, эх асран хамгаалагч, бүх шатны боловсролын байгууллагын холбогдох албан тушаалтан  арав хүртлэх насны хүүхдийг харгалзах хүнгүйгээр замын хөдөлгөөнд оролцуулахыг хориглоно” гэсэн заалтыг зөрчсөн байна.

”А” цэгийг ослын газарт үлдсэн явган зорчигчийн цусны мөр, тээврийн хэрэгслийн мөр зэргээр үндэслэн авсан болно.

 Зам тээврийн осол гарсан үндсэн шалтгаан нь Н нь “Хюьндэй маяти” маркийн*******улсын дугаартай тээврийн хэрэгслийг жолоодож явах үедээ МУ-ын ЗХД-ийн хариулт 1-т тусгагдсан заалтыг зөрчсөн учраас зам тээврийн осол гарсан. Тээврийн хэрэгслүүдийн хурдыг тогтоох боломжгүй болно.” гэх Замын цагдаагийн тасгийн зохицуулагч, цагдаагийн дэслэгч Б.Нямцогтын 2018 оны 10 дугаар сарын 11-ний өдрийн 43 дугаартай дүгнэлт /хэргийн 41-42/,

-“У.Мө-н биед зүүн шилбэ ясны битүү хугарал, баруун хөмсөгний шарх, баруун, зүүн нүдний зовхи, хацар, хамар, зүүн шанаа, баруун, зүүн тохой, сарвуу, шуу, өвдөг, гуяны зулгаралт, цус хуралт, баруун нүдний зовхи, баруун шилбэ, тавхайн зөөлөн эдийн няцрал гэмтэл тогтоогдлоо. Дээрх гэмтэл нь хатуу мохоо зүйлийн хүчин үйлчлэлээр буюу хүчтэй цохигдох, унах үед юм мөргөх үед үүсгэгдэх боломжтой. Шүүх эмнэлгийн гэмтлийн зэрэг тогтоох журмын 2.3.1-д зааснаар эрүүл мэндийг удаан хугацаанд сарниулах тул гэмтлийн хүндэвтэр зэрэгт хамаарна. Цаашид эрүүл мэнд, ерөнхий хөдөлмөрийн чадварын тогтонги алдалтанд нөлөөлөхгүй.” гэх 2018 оны 10 дугаар сарын 04-ний өдрийн 1005 дугаартай шинжээчийн дүгнэлт /хэргийн 46/,

- “Автотээврийн үндэсний төвийн Дархан салбарын техник оношлогооны 2018 оны 10 дугаар сарын 04-ний өдрийн 56 дугаартай шинжээчийн дүгнэлт, гэрэл зургийн үзүүлэлт /хэргийн 50-54/,

-Хохиролтой холбоотой баримтууд /хэргийн 79-85/,

-Эмчлүүлэгчийн хэрэглэсэн эмийн хуудас, өвчний түүхийн хуулбар /хэргийн 86-97/,

-Хохирлын мөнгө хүлээн авсан тухай баримт /хэргийн 119/ болон хавтаст хэрэгт авагдсан бусад нотлох баримтуудаар тогтоогдож байх ба шүүгдэгч нь хэргээ хүлээн мэдүүлж, хэргийн зүйлчлэл, гэм буруугийн талаар маргаагүй байна.

Гэмт хэргийн улмаас хохирогч У.М-ийн биед “зүүн шилбэ ясны битүү хугарал, баруун хөмсөгний шарх, баруун, зүүн нүдний зовхи, хацар, хамар, зүүн шанаа, баруун, зүүн тохой, сарвуу, шуу, өвдөг, гуяны зулгаралт, цус хуралт, баруун нүдний зовхи, баруун шилбэ, тавхайн зөөлөн эдийн няцрал” бүхий гэмтэл учирсан бөгөөд энэ нь шүүх эмнэлгийн гэмтлийн зэрэг тогтоох журмын 2.3.1-д зааснаар эрүүл мэндийг удаан хугацаанд сарниулах тул гэмтлийн хүндэвтэр зэрэгт хамаарч байх тул аймгийн прокурорын газраас яллах дүгнэлт үйлдэж ирүүлсэн хуулийн зүйл, хэсэг зөв байна.

Иймд шүүгдэгч  Х.Н-г гэмт хэрэг үйлдсэн гэм буруутайд тооцож, эрүүгийн хариуцлага хүлээлгэх үндэстэй гэж шүүх үзлээ.

Насанд хүрээгүй хохирогчийн хууль ёсны төлөөлөгчөөс эмчилгээ хийлгэсэн талаар 950461 төгрөгийн баримт бүрдүүлж ирүүлсэн бөгөөд шүүгдэгч Н нь мөрдөн байцаалтын шатанд 1300000 төгрөг төлсөн гэж мэдүүлж байгаа боловч насанд хүрээгүй хохирогчийн хууль ёсны төлөөлөгч 790000 төгрөг авсан гэж мэдүүлж байна.

Шүүгдэгч Н нь насанд хүрээгүй хохирогчид 1300000 төгрөг төлсөн гэдгээ нотолж чадахгүй байх тул 790000 төгрөг төлсөн гэж үзэх үндэстэй.

Эмчилгээний зардлын зөрүү болох 160461 төгрөгийг шүүгдэгч Н нь 30 минутын завсарлага авч, нөхөн төлсөн байх тул шийтгэх тогтоол гарах үед шүүгдэгчээс гаргуулах төлбөргүй байна гэж үзлээ.

Насанд хүрээгүй хохирогчийн эрүүл мэндэд хүндэвтэр хохирол учирсан бөгөөд хууль ёсны төлөөлөгчийн зүгээс “цаашид гарах эмчилгээний зардалд 1 сая төгрөг нэхэмжилнэ.” гэж шүүхийн хэлэлцүүлэгт мэдүүлж байгаа боловч энэ талаар нотлох баримт ирүүлээгүй байх тул хэлэлцэхгүй орхиж, холбогдох нотлох баримтаа бүрдүүлсний эцэст иргэний хэрэг шүүхэд хянан шийдвэрлэх журмаар нэхэмжлэлээ гаргаж шийдвэрлүүлэх эрхтэй бөгөөд энэхүү нэхэмжлэл нь улсын тэмдэгтийн хураамжаас чөлөөлөгдөхийг дурдаж шийдвэрлэв.

2. Эрүүгийн хариуцлага, бусад асуудлын талаар:

Шүүгдэгч Н нь 2018 оны 10 дугаар сарын 01-ний өдрийн 18 цагийн орчим Дархан-Уул аймгийн Дархан сумын 6 дугаар багийн нутаг дэвсгэр болох Ханжаргалангийн 8 дугаар гудамжны асфальтан зам дээр өөрийн өмчлөлийн ****** улсын дугаартай “Хюьндэй маяти” маркийн хөх өнгийн авто машиныг жолоодон замын хөдөлгөөнд оролцож явахдаа Монгол Улсын Замын хөдөлгөөний дүрмийн 9 дүгээр бүлгийн 9.1-т заасан “жолооч хөдөлгөөний эрчим, тээврийн хэрэгслийн онцлог байдал, тээж яваа ачаа, замын болон цаг агаарын нөхцөл, хөдөлгөөний дагуу үзэгдэлтийг харгалзан тээврийн хэрэгслийн хурдыг энэ дүрэмд тогтоосон хязгаараас хэтрүүлэхгүйгээр сонгож явна”, 9.2-т “жолооч хөдөлгөөнд аюул, саад бий болохыг мэдсэн үед тээврийн хэрэгслийн хурдыг хасаж, зайлшгүй тохиолдолд зогсоох арга хэмжээг авна” гэсэн дүрмийн заалтуудыг зөрчсөний улмаас зам хөндлөн гарч гүйсэн явган зорчигч 7 настай М мөргөж, эрүүл мэндэд нь хүндэвтэр хохирол учруулж, Эрүүгийн хуулийн тусгай ангийн 27.10 дугаар зүйлийн 1-т заасан гэмт хэрэг үйлдсэн гэм буруутай болох нь хавтаст хэрэгт авагдаж шүүхийн хэлэлцүүлэгт шинжлэн судлагдсан бусад бичгийн баримтуудаар нотлогдож байх тул шүүгдэгчийг гэмт хэрэг үйлдсэн гэм буруутайд тооцож, эрүүгийн хариуцлага хүлээлгэх үндэстэй байна гэж шүүх үзлээ.

Эрүүгийн хариуцлага нь эрүүгийн хуульд заасан ял, албадлагын арга хэмжээнээс бүрддэг ба шүүгдэгч Н нь эрүүгийн хариуцлага хүлээлгэх насанд хүрсэн, хэрэг хариуцах чадвартай этгээд байна.

Шүүгдэгч нь анх удаа гэмт хэрэг үйлдсэн, гэмт хэргийн улмаас учирсан хохирлыг баримтын хүрээнд төлсөн зэргийг Эрүүгийн хуулийн ерөнхий ангийн 6.5 дугаар зүйлийн 1.1, .5 дугаар зүйлийн 1.2-т зааснаар эрүүгийн хариуцлага хөнгөрүүлэх нөхцөл байдалд харгалзан үзлээ.

Шүүгдэгчид эрүүгийн хариуцлага хүндрүүлэх нөхцөл байдал тогтоогдохгүй байх тул гэмт хэрэг үйлдсэн гэм буруугаа хүлээн зөвшөөрч гэмшиж байгаа, ар гэрийн амьдралын нөхцөл байдал зэргийг харгалзан Эрүүгийн хуулийн тусгай ангийн 27.10 дугаар зүйлийн 1-т зааснаар 600 нэгжтэй тэнцэх хэмжээний буюу 600000 төгрөгөөр торгох ял оногдуулж, мөн нөхцөл байдлыг харгалзан торгох ялыг 3 сарын хугацаанд хэсэгчлэн төлж барагдуулахыг шүүгдэгч Н  анхааруулж шийдвэрлэв.

Шийтгэх тогтоол гарах үед шүүгдэгчээс гаргуулах төлбөргүй байх тул шүүгдэгч  Х.Н-г эзэмшлийн нийт 18000000 төгрөгийн үнэ бүхий “Хюьндэй маяти” маркийн хар хөх өнгийн автомашиныг битүүмжилсэн 2018 оны 10 дугаар сарын 23-ны өдрийн 19 дугаартай прокурорын тогтоолыг шийтгэх тогтоол хуулийн хүчин төгөлдөр болмогц хүчингүй болгохыг дурдаж, шүүгдэгч нь энэ хэрэгт цагдан хоригдоогүй, хэрэгт эд мөрийн баримтаар хураагдсан зүйлгүй, хэрэг хянан шийдвэрлэх ажиллагааны зардалгүй болохыг тус тус дурдаад

Эрүүгийн хэрэг хянан шийдвэрлэх тухай хуулийн 36.1, 36.2, 36.3, 36.5, 36.6, 36.8, 36.10 дугаар зүйлүүдэд заасныг тус тус удирдлага болгон ТОГТООХ нь:

1.Шүүгдэгч   Н  автотээврийн хэрэгслийн жолооч хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний актыг зөрчсөний улмаас хүний эрүүл мэндэд хүндэвтэр хохирол учруулж, Эрүүгийн хуулийн тусгай ангийн 27.10 дугаар зүйлийн 1-т заасан гэмт хэрэг үйлдсэн гэм буруутайд тооцсугай.

2.Эрүүгийн хуулийн тусгай ангийн 27.10 дугаар зүйлийн 1-т зааснаар шүүгдэгч   Н  600 /зургаан зуу/ нэгжтэй тэнцэх хэмжээний буюу 600000 /зургаан зуун мянга/ төгрөгөөр торгох ялаар шийтгэсүгэй.

3.Эрүүгийн хуулийн ерөнхий ангийн 5.3 дугаар зүйлийн 4, 5.3 дугаар зүйлийн 5, Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1.6-т зааснаар торгох ялын 600000 төгрөгийг шийтгэх тогтоол хүчин төгөлдөр болсноос хойш 3 сарын хугацаанд хэсэгчлэн төлөхийг шүүгдэгч Н  үүрэг болгож, торгох ялыг шүүхээс тогтоосон хугацаанд биелүүлээгүй бол шүүх биелэгдээгүй торгох ялын 15 нэгжтэй тэнцэх хэмжээний төгрөгийг нэг хоног хорих ялаар тооцож солихыг шүүгдэгч Н  анхааруулсугай.

4. Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1.4, 1.7, 1.8, 1.9-т зааснаар шүүгдэгч нь энэ хэрэгт цагдан хоригдоогүй, бусдад төлөх төлбөргүй, эд мөрийн баримтаар хураагдаж ирсэн зүйлгүй, хэрэг хянан шийдвэрлэх ажиллагааны зардалгүй болохыг тус тус дурдаж,*******улсын дугаартай  Х.Н-г эзэмшлийн нийт 18000000 төгрөгийн үнэ бүхий “Хюьндэй маяти” маркийн хар хөх өнгийн автомашиныг битүүмжилсэн 2018 оны 10 дугаар сарын 23-ны өдрийн 19 дугаартай прокурорын тогтоолыг шийтгэх тогтоол хуулийн хүчин төгөлдөр болмогц хүчингүй болгож, хохирогч нь цаашид гарах эмчилгээний зардлыг холбогдох нотлох баримтаа бүрдүүлсний эцэст иргэний хэрэг шүүхэд хянан шийдвэрлэх журмаар нэхэмжлэлээ гаргаж шийдвэрлүүлэх эрхтэй бөгөөд энэхүү нэхэмжлэл нь улсын тэмдэгтийн хураамжаас чөлөөлөгдөхийг дурдсугай.

5.Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1.5-т зааснаар шийтгэх тогтоол хүчин төгөлдөр болтол шүүгдэгч Н  авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

6.Эрүүгийн хэрэг хянан шийдвэрлэх тухай хуулийн 38.2 дугаар зүйлийн 1-т зааснаар шүүгдэгч, хохирогч, тэдгээрийн хууль ёсны төлөөлөгч, өмгөөлөгч тогтоолыг эс зөвшөөрвөл тогтоолыг гардуулсан буюу хүргүүлснээс хойш 14 хоногийн дотор Дархан-Уул аймгийн Эрүүгийн хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

7.Эрүүгийн хэрэг хянан шийдвэрлэх тухай хуулийн 37.1 дүгээр зүйлийн 2-т зааснаар давж заалдах гомдол гаргасан, эсэргүүцэл бичигдсэн тохиолдолд шийтгэх тогтоолын биелэлтийг түдгэлзүүлсүгэй.

 

 

 

ДАРГАЛАГЧ, ЕРӨНХИЙ ШҮҮГЧ                             Я.ТУУЛ