МОНГОЛ УЛСЫН НЭРИЙН ӨМНӨӨС

Дундговь аймаг дахь сум дундын Иргэний хэргийн анхан шатны шүүхийн шүүгч Г.Б даргалж, тус шүүхийн Б танхимд нээлттэй хийсэн шүүх хуралдаанаар:

 

Нэхэмжлэгч: Дундговь аймаг дахь Цгийн газрын нэхэмжлэлтэй   Дундговь аймгийн С  сумын                тоотод  оршин суух, С  овогт Цийн М /ЗК /-ыг архины албадан эмчилгээнд  хамруулах тухай нэхэмжлэлтэй, 139/2019/00394/И индекстэй иргэний хэргийг хянан хэлэлцэв.

 

Шүүх хуралдаанд нэхэмжлэгчийн итгэмжлэгдсэн төлөөлөгч Б.Гантуяа, гуравдагч этгээд Ц.М, шүүх хуралдааны нарийн бичгийн дарга С.Уянга нар оролцов.

 

 

ТОДОРХОЙЛОХ нь:

Нэхэмжлэгч Дундговь аймаг дахь Цгийн газар шүүхэд гаргасан нэхэмжлэлдээ: Ц.М нь сүүлийн жилүүдэд согтууруулах ундааг тогтмол хэтрүүлэн хэрэглэж, иргэдийн амгалан тайван байдлыг алдагдуулж, архидан согтуурч удаа дараа эрүүлжүүлэх байранд хүргэгдэн ирж, захиргааны арга хэмжээ авагдсан.

Иймд эмнэлгийн комиссын дүгнэлт, багийн засаг даргын тодорхойлолт, удаа дараа саатуулагдсан бүртгэл зэргийг үндэслэн архины албадан эмчилгээнд  хамруулах албадлагын арга хэмжээ авахуулах хүсэлт гаргаж гаргаж байна гэжээ.

 

Нэхэмжлэгчийн итгэмжлэгдсэн төлөөлөгч шүүх хуралдаанд гаргасан тайлбартаа:Ц.Мыг архины албадан эмчилгээнд  хамруулж өгнө үү гэжээ.

Гуравдагч этгээд Ц.М шүүх хуралдаанд гаргасан тайлбартаа: Надад одоо нэг удаа боломж өгөөч гэж хүсч байна. Би албадан эмчилгээнд хамрагдахыг зөвшөөрөхгүй байна гэжээ.

 

 

Нэхэмжлэгчийн нэхэмжлэл, зохигчийн тайлбар, шүүх хуралдаанаар хэлэлцсэн нотлох баримтуудыг шинжлэн судлаад

 

ҮНДЭСЛЭХ нь:

Нэхэмжлэгч Дундговь аймаг дахь Цгийн газар  нь Ц.Мыг архины албадан эмчилгээнд  хамруулах тухай нэхэмжлэл гаргажээ.

 

Сайнцагаан овогт Цийн М нь архины шалтгаант сэтгэцийн эмгэгтэй, удаа дараа эрүүлжүүлэгдсэн, нийгмийн хэв журам зөрчиж захиргааны хариуцлага хүлээсэн, архи согтууруулах ундаа байнга хэрэглэдэг болох нь

Дундговь аймгийн Нэгдсэн эмнэлгийн эмч нарын 2019 оны 7 сарын 3-ны өдрийн “...архины шалтгаант сэтгэцийн эмгэгтэй, эмчилгээ хийлгэх шаардлагатай...” гэх дүгнэлт /хэргийн 4 хуудас/

Дундговь аймаг дахь Цгийн газрын 2019 оны 8 сарын 21-ний өдрийн 35/817 дугаартай “Ц.Мыг архины албадан эмчилгээнд  хамруулах тухай” хүсэлт /хэргийн 2 хуудас /

Цгийн газрын мэдээллийн сангаас ирүүлсэн Ц.М нь удаа дараа саатуулагдсан, зөрчлийн хуулиар шийтгүүлсэн талаарх лавлагаа /хэргийн 7-12 хуудас/

Дундговь аймгийн Сайнцагаан сумын 5-р баг засаг даргын 2019 оны 7 сарын 2-ны өдрийн 65 дугаартай  албан бичгээр ирүүлсэн “...Ц.М нь өөрийн гэрт бөөгнөрөл үүсгэж, байнга архидан согтуурч, ойр орчимын иргэдийн амгалан тайван байдлыг алдагдуулж байгаа...” талаарх тодорхойлолт /хэргийн 5 хуудас/ зэргээр тогтоогдож байна.

Ц.М нь архины шалтгаант сэтгэцийн эмгэгтэй болох нь эмнэлгийн байгууллагын дүгнэлтээр тогтоогдсон, архи согтууруулах ундаа хэрэглэж удаа дараа захиргааны хариуцлага хүлээсэн болох нь тогтоогдож байх тул түүнийг албадан эмчлэх газарт явуулж албадан эмчлэх  нь зүйтэй гэж үзлээ.

 

Иймд нэхэмжлэлийн шаардлагыг хангаж,  нэхэмжлэгч улсын тэмдэгтийн хураамж  төлөхөөс чөлөөлөгдсөн болохыг дурдаж шийдвэрлэлээ.

 

            Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118,  133 дугаар зүйлийн 133.1.1, 135 дугаар зүйлийн 135.2.14-т заасныг удирдлага болгон ТОГТООХ нь:

 

1. Согтуурах, мансуурах донтой хүнийг захиргааны журмаар албадан эмчлэх тухай хуулийн 9 дүгээр зүйлийн 9.1-т зааснаар Сайнцагаан овогт Цийн М /ЗК /-ыг албадан эмчлэх газарт явуулж, албадан эмчилсүгэй.
2. Согтуурах, мансуурах донтой хүнийг захиргааны журмаар албадан эмчлэх тухай хуулийн 9 дүгээр зүйлийн 9.6-д зааснаар Ц.Мыг албадан эмчлэх газарт хүргэхийг Дундговь аймаг дахь Шүүхийн шийдвэр гүйцэтгэх газарт даалгасугай.
3. Улсын тэмдэгтийн хураамжийн тухай хуулийн 41 дүгээр зүйлийн 41.1.3 дахь хэсэгт зааснаар нэхэмжлэгчийг улсын тэмдэгтийн хураамж төлөхөөс чөлөөлсөн  болохыг дурдсугай.
4.  Иргэний хэрэг шүүхэд хянан шийдвэрлэх тухай хуулийн  120 дугаар зүйлийн 120.2 дахь хэсэгт зааснаар нэхэмжлэгч, түүний төлөөлөгч, Согтуурах, мансуурах донтой хүнийг захиргааны журмаар албадан эмчлэх тухай хуулийн 9 дүгээр зүйлийн 9.5 дахь хэсэгт зааснаар Ц.М, түүний хууль ёсны төлөөлөгч, өмгөөлөгч нь  энэ шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор Дундговь аймгийн Эрүү, иргэний хэргийн давж заалдах шатны шүүхэд гомдол гаргах эрхтэйг дурдсугай.

 

 

 

 

 

 

ДАРГАЛАГЧ ШҮҮГЧ                        Г.Б